Nalinginnaasumik nassuiaatit

 

Siunnersuummut tunngaviusut:

"Inuutissarsiutinut ilinniartitaanerit iluarsartuussivigeqqinneri pillugit nassuiaat" Naalakkersuisut august 2000-imi akuersaarpaat. Inatsisartut 2000-imi ukiakkut ataatsimiinneranni nassuiaat Inatsisartunut ilaasortanut tamanut nassiunneqarpoq. Nassuiaammi kaammattuutinut ilaavoq manna: "Ilinniartut sungiusaammik sulisut akissarsiaasa AEB-mit aningaasalersorneqartut sulisitsisunit tunniunneqartarnissaat pillugu aaqqissuussisoqassaaq."

Taamatut kaammattuuteqarnermut tunuliaqutaavoq kissaatiginartinneqarmat "ilinniarfimmi ilinniartup ilaanneeriarluni sungiusarluni sulisarneranik" paasinnittarnerup allanngortinneqarnissaa "suliffeqarfimmi ilinniartup ilaanneeriarluni ilinniarfimmiittarneranik" paasineqartartussanngorlugu. Tamanna ilaatigut pisinnaavoq sulisitsisup ilinniartumut akissarsisitsisalerneratigut, tassa massakkut ilinniarnerup ukiuani siullermi ilinniartup ilinniagaqarnersiuteqartinneqartarneranut taarsiullugu.

Tamanna tunngavigalugu Naalakkersuisut aaqqissuussinermik imaattumik pilersitsinialersaarput sulisitsisut ilinniartup ilinniarnera tamakkerlugu, tassalu ilinniarnerup suliamut sungiusarnertaani atuagarsornertaanilu, akissarsiaqartitsissallutik.

Aaqqissuussineq suliarineqarpoq tunngavissat makku pingaartillugit:

- Aaqqissuussineq allaffissornikkut aqukkuminartuussaaq.
- Aaqqissuussineq attuumassuteqartut tamarmik, tassa sulisitsisut, ilinniartut Nunattalu Karsia aningaasartuutigisartagaannik nikisitsissanngilaq.
- Ullumikkutut ilinniartut allanngorartunik akissarsitinneqartassanngillat, tassami ullumikkut ilinniarfimmiinnerminni qaammammut pisarmatigik 4.200 koruunit missaat, sungiusarlutillu sulinerminni ukiuni kingullerni qaammammut 9.000 koruunit missaat angullugit pisarlugit.

Nutaamik aaqqissuussinermi ilinniartut ilinniarfimmiikkunik sungiusarlutilluunniit suligunik qaammammut assigiimmik akissarsitinneqartalissapput. Ukiumut akissarsiarisartagaat allanngoratik taama annertussuseqaannassapput. Sungiusarlutik sulinermik nalaanni ilinniartut akissarsiarisartagaat annikilleriaateqalaassapput, illuatungaatigulli ilinniarfimmiinnerminni akissarsiaqarnerulaalissallutik.

Inuutissarsiutinut ilinniartitaanerit inuutissarsiutinullu pikkorissartitsisarnerit pillugit Inatsisartut peqqussutaannik normu 2-mik, 31. maj 1999-imeersumik Inatsisartut akuersissutiginninnerata kinguneraa taaguutip Siammasissumik Tunngaviusumik Ilinniartitaanerup (STI) atorunnaarsinneqarnera, taamaattumik pisariaqarpoq inatsisip matuma iluarsiivigineqarnissaa, imaalillugu STI-mi ilinniartunut tapiissuteqartoqarani inuutissarsiutinut tunngaviusumik ilinniartitaanerni ilinniartunut tapiissuteqartoqartalissalluni.

 

Siunnersuutip imarisai:

Siunnersuutip imaraa Inuutissarsiutitigut ilinniagaqarnernut sulisitsisut akiliutaat pillugit Inatsisartut inatsisaanni normu 16-imi, 23. november 1989-imeersumi § 2, imm. 1-ip allanngortinneqarnera. Aalajangersakkap ersarissarpaa sulisitsisunut ilinniartunik atorfinitsitsisunut tapiissut atorneqassasoq. Maannakkut aaqqissuussineq naapertorlugu AEB malillugu tapiissutit ukiumi siullermi ilinniartut suliffimmi sungiusarneranni tapiissutaasutut Namminersornerullutik Oqartussat aningaasartuutaannut matussutissatut atorneqartarput.

Aammattaaq § 2-mi imm. 2 nutaaq ilanngunneqarpoq isumaginninnermi ikiortitut peqqissaanermilu ikiortitut ilinniartitaanerup iluani tapiissutit atorneqarnerat iluarsineqarluni. Tamanna pissuteqarpoq ilinniartitaanerit taakku allanngortinneqarnerannut atatillugu ilinniartitaanernut taakkununnga brancheudvalgit ima naliliimmata ilinniartitaanerup ingerlanera tamaat ilinniagaqarnersiutinik pisartagaqartitsisoqassasoq.

Tamatuma saniatigut § 8 allannguuteqartinneqarpoq, taanna tunngavigalugu Naalakkersuisut piginnaatitaassallutik sulisitsisunut tapiissutit, takuuk § 2, imm. 1, taamatuttaaq pikkorissarnernut ilinniaqqittarnermullu tapiissutit, takuuk § 2, imm. 3 kiisalu aqutsineq akiliutissanillu akiliisitsiniartarneq pillugit malittarisassaliornissamut.

Ilanngullugit takukkit aalajangersakkanut ataasiakkaanut nassuiaatit.

 

Allaffissornikkut sulisoqarnikkullu kingunerisassat:

Siunnersuutip akuersissutigineqarnissaata malitsigissavaa sulisitsisuni ataasiakkaani Ilinniagaqarnersiuteqartitsivimmilu allaffissornikinnerulernissaq.

Isumaqatigiissummi atuuttumi tunngavissatut aalajangersagaareersut aallaavigalugit Namminersornerullutik Oqartussat Isumaqatigiinniartarnermut immikkoortortaqarfiata inuutissarsiutinik tunngaviusumik ilinniartitaanerni ilinniartut pillugit Namminersornerullutik Oqartussat, Finansministeriap aamma Sulinermik Inuutissarsiuteqartut Kattuffiata akornanni isumaqatigiissut iluarsaassivigissavaa. Taamatuttaaq Kalaallit Nunaanni Sulisitsisut Peqatigiiffiat SIK-lu isumaqatigiissummi aalaja-ngersakkamik ikkussaqarsimapput inatsit akuersissutigineqariarpat iluarsiivigineqarsinnaasumik.

 

Aningaasatigut kingunerisassat:

Siunnersuut imaalillugu suliarineqassaaq aaqqissuussineq sulisitsisunut, ilinniartunut Namminersornerullutillu Oqartussanut aningaasartuutigisartakkanik nikisitsissanani.

 

Tusarniaaneq:

Siunnersuut piffissami 2002-mi 1. julimiit 1. augustimut ukununnga tusarniaassutigineqarsimavoq: qitiusumik ilinniarfiit, qitiusumik ilinniartitaanernut ataatsimiititaliat, najukkani inuutissarsiutitigut ilinniarfiit, najukkani inuutissarsiutitigut ilinniartitaanernut ataatsimiititaliat, Kalaallit Nunaanni ilinniarfiit, sulinermik sungiusarnermut ilitsersuisut, KANUKOKA, ilinniagaqartut kattuffii (KIK aamma DKIK), KIIIP-ip Danmarkimi allaffimmi immikkoortortaa, Namminersornerullutik Oqartussat pisortaqarfii, Kalaallit Nunaanni Sulisitsisut Peqatigiiffiat, Kalaallit Nunaanni Niuernermut, Assartuinermut Suliffissuaqarnermullu Sulisitsisut Katuffiat (HST) aammalu SIK.

KANUKOKA-mit, HST-mit, Kalaallit Nunaanni Sulisitsisut Peqatigiiffiannit, Aqutsinermut Pisortaqarfimmit, Aningaasaqarnermut Pisortaqarfimmit, Peqqinnissamut Pisortaqarfimmit, Ineqarnermut, Angallannermut Pilersuinermullu Pisortaqarfimmit, Naalakkersuisut Allattoqarfiannit, Aalisarnermut, Piniarnermut Nunaqarfinnullu Pisortaqarfimmit, Akileraartarnermi Pisortaqarfimmit, Nuummi Niuernermik Ilinniarfimmit, Ilisimatusarfimmit, Odensimi Kalaallit Illuannit, Maniit-sumi Najukkani Inuutissarsiutitigut Ilinniarfimmit tusarniaanermut akissutit tiguneqarput.

Oqaaseqaatit tiguneqartut siunnersuutip nassuiaatitaasalu allanngorneqarnissaannut tunngavissiin-ngillat. Tusarniaammut akissutinit oqaaseqaatit pingaarnerit naatsumik nassuiaatigineqassapput.

KANUKOKA-p oqaatigaa sulisitsisut aningaasartuutaat nikisinneqassanngippata akiliutit ilinniartitaanernut ataasiakkaanut atatillugu assigiinngitsuussasut. Inuutissarsiutitigut ilinniagaqarnermut sulisitsisut akiliutaasa agguataarnerat ilinniartitaanernut ataasiakkaanut naleqqussarneqassaaq, agguaqatigiissitsilluni naatsorsuineq malillugu agguarneqarnatik.

Aammattaaq KANUKOKA-p oqaatigaa aaqqissuussineq ilinniartitaanernut tamanut assigiimmik atuutissasoq, tassa imaappoq aammattaaq isumaginninnermi peqqissaanermilu ikiortitut ilinniartitaaneq ilaatinneqassasoq.

Kiisalu KANUKOKA-p aamma oqaatigaa ilinniartitaanernut taakkununnga atatillugu aningaasat ilinniagaqarnersiutinut kontumut nuunneqartussat sungiusarluni sulinermut akissarsianut attuumassuteqartinneqassasut.

Tamatuma saniatigut KANUKOKA-p oqaatigaa akiliutit ilinniartut piffissamut atorfeqarfigisaannut atatillugu naatsorsorneqartariaqartut siunnersuummi oqaatigineqartutut piffissami tunniunneqarfissaanni atorfinitsinneqarnermut atatinnagu.

Kiisalu KANUKOKA-p oqaatigaa Naalakkersuisut tapiissutit qaammammut kingumoortumik tunniunneqartarnissaannik aammalu ilinniartoq qaammatip ulluisa 20-anni atorfinitsinneqanngippat tapiissutit tunniunneqarsinnaannginnerannik naatsorsuutiginninnerat isumaqatigisinnaanagu.

Naalakkersuisut KANUKOKA-p oqaaseqaatai Kalaallit Nunaanni Sulisitisut Peqatigiiffiat KANUKOKA-lu peqatigalugit oqaluuserisimavaat, tamannalu tunngavigalugu siunnersuummik allannguinissamik pissutissaqarsimanatik.

Aqutsinermut Pisortaqarfimmit paaserusunneqarsimavoq Namminersornerullutik Oqartussani immikkoortoqarfinnut ataasiakkaanut tapiissutit inuutissarsiutitigut ilinniartitaanerni ilinniartut akissarsiaannut aningaasartuutit annertusissutaasa matussutissaat qanoq ilillugit tunniunneqassanersut. Tassunga atatillugu oqaatigineqarpoq tamanna pillugu KIIIP-ip kingusinnerusukkut malittarisassiariumaagassaasa kingunerisinnaagaat pisortaqarfiit ataasiakkaat imalt. Namminersornerullutik Oqartussat ataani suliffeqarfiit ataasiakkaat tapiissutit tunniunneqarnissaannut suliaq ingerlatilersinnaagaat. Tamatumunngalu atatillugu ilisimatitsissutigineqassaaq tapiissutit sulisitsisunut ataasiakkaanut tamanut tunniunneqartussat sulisitsisut kontuinut nuussinikkut pisassasoq, taamaattumillu sulisitsisunut ataasiakkaanut suliamik ingerlatsisoqassanngitsoq.

Aammattaaq Aqutsinermut Pisortaqarfimmit oqaatigineqarpoq kommunit Peqqinnissamullu Pisortaqarfik isumaginninnermi peqqissaanermilu ikiortitut ilinniartitaanerup iluani ukiumi siullermi ilinniartut sulinermik sungiusarneranni akissarsiaannut kisimik aningaasartuuteqartussaanngitsut, aamma Isumaginninnermut Suliffeqarnermullu Pisortaqarfiup suliffeqarfiutai isumaginninnermi ikiortinik sulinermik sungiusartoqartarput. Tamanna ilumoorpoq, taamaattoq ikittuinnaammata malunnaatilimmik allannguuteqartitsisoqartariaqarsorinanngilaq.

Siunnersuut aamma Inatsisileriffimmut tusarniaassutigineqarsimavoq, tassanngaanniillu oqaaseqaatit ilanngunneqarsimapput ilaatigut inuutissarsiutitigut ilinniagaqarnermi sulisitsisut akiliutaannut ataatsimiititaliornissaq pillugu siunnersuummi nassiunneqartumi aalajangersakkap siunnersuummit peerneqarneratigut, tassami Inatsisileriffiup oqaatigisimavaa inuutissarsiutitigut ilinniagaqarnermut sulisitsisut akiliutaannut ataatsimiititaliornissami pissusissamisoornerussasoq Naalakkersuisut tamanna pillugu aalajangeereernerisigut allaffissornikkut pilersinneqarpat.

 

Aalajangersakkanut ataasiakkaanut nassuiaatit

 

§ 1-imut

Normu 1-imut:

Aalajangersakkami erseqqissarneqarpoq akiliutit isertinneqartut sulisitsisunut inuutissarsiutinut ilinniartitaanerit inuutissarsiutinullu pikkorissartitsisarnerit pillugit Inatsisartut peqqussutaat tun-ngavigalugu sulisitsisunut ilinniartussarsisunut tapiissutitut tunniunneqassasut. Taamatuttaaq ilinniartut sulisitsisunit nunatsinni najugaqartunit ilinniartorilikkat, kisiannili Danmarkimi atuagarsortussat, aaqqissuussinermi pineqarput. Immikkut pineqartut tassaapput soorlu nujalerisunngorniat, grafikerinngorniat, filmiliortutut tv-milu suleqataasutut il.il. ilinniartut. Danmarkimi inuutissarsiutinut ilinniagaqarnerit tamarmik aaqqissuussinermi pineqarput ilinniartoq nunatsinni suliffeqarfimmi ilinniarfissaqartinneqarsimappat.

Aalajangersakkap nutaartaraa akiliutit Namminersornerullutik Oqartussat sungiusarluni sulinernut aningaasartuutigisartagaannut matusissutigineqartarunnaarnerat. Inatsisip akuersissutigineqarnerani akiliutit sulisitsisup ilinniartunik ilinniartoqalerneranut atasumik aningaasartuutaanut aningaasaliissutissanngussapput. Akiliutit sulisitsisumut toqqaannartumik tunniunneqartassapput. Tapiissutit annertussusiat § 8, nr. 1 naapertorlugu Naalakkersuisunit aalajangersarneqassaaq, tak. siunnersuummi § 1, nr. 3-mut tamanna pillugu nassuiaatit.

Ilinniagaqarnersiuteqartitsiviup ilinniagaqarnersiutinik aqutsineq sulisitsisunullu tunniussisarneq suliarisassagai siunertaavoq.

Sulianik sungiusarnermi tapisiassat aningaasalerneqarnissaannut atugassanik akileeqqusisarneq pillugu Inatsisartut inatsisaat nr. 5, 23. april 1988-imeersoq tunngavigalugu sungiusarluni sulinermut tapiissutit tunniunneqartussatut naatsorsuutigisat tunngavigalugit aqutsinermi aningaasartuutit +/- ukiuni siuliini iluanaarutit naatsorsuutigalugit procentiliussassaq aalajangerneqartarsimavoq, ukiumi qaangiuttumi qaammatisiutit malillugit pisortanit namminersortutullu sulisitsisunit akissarsiaritinneqartut ataatsimut katillugit sanilliunnerisigut.

1989-imi allannguinermut atatillugu procentiliussassap aalajangernissaanut periaaseq allanngortinneqarpoq Inatsisartut suliamik ilinniagaqarsimasunik ilinniagaqarsimanngitsunillu pikkorissartitsisarneq ilinniaqqittarnerlu pillugit tapiissuteqartarneq pillugu malittarisassanik akuersissuteqarnerat pissutigalugu. Inatsisartut inatsisaata attuumassuteqarfigisaasa, tassa pikkorissartitsisarnermut atatillugu tapiissutit ilanngunnerisigut annertuseriarnerat aningaasartuuteqarnerulernermik kinguneqartussatut naatsorsuutigineqarsimavoq. Qanoq aningaasartuutit amerleriartiginissaat erseqqissumik oqaatigineqarsinnaasimanngilaq, tassani apeqqutaatinneqarmat tapiissutit pillugit malittarisassat qanoq innersut.Tamanna pikkorissartitsisarnermik ilinniaqqittarnernillu killeqanngitsumik pisariaqartitsisussatut paasineqarpoq, taamaalillutik Inatsisartut aalajangiisussanngorput procentiliussassap naammaginartumik angissuseqarnissaanut, taamalu pikkorissartitsisarnermut ilinniaqqittarnermullu tapiissutit pillugit malittarisassat aningaasaliissutinut naleqqussarneqartariaqarlutik.

Aaqqissuussinerup siunnersuummi saqqummiunneqartup kingunissarinngilaa procentiliussassap qaffariaateqarnissaa, pissutigalugu siunnersuut aningaasartuuteqartitsisussaanngimmat. Ilinniagaqarnersiutit ilinniagaqarnermut tapiissutit pillugit malittarisassat iluanni qaffariaateqassagaluarpata aammalu sulisitsisut amerlanerusunik utertitsisarnissartik kissaatigippassuk taava pisariaqalissaaq procentiliussap naliliivigeqqinnissaa.

 

Normu 2-mut:

Isumaginninnermi ikiortitut peqqissaanermilu ikiortitut ilinniartitaaneq pillugu immikkut aalaja- ngersaasoqarneranut tunngaviusoq tassaavoq ilinniartitaanerit taakku iluanni ilinniartitaanernut ataatsimiititaliat kissaatigisimammassuk ilinniartitaanerit taakku ilinniartitaanernut immikkoortunut marlunnut namminiussuteqartunut avinneqassasut, ataatsimiititaliallu inassutigisimavaat ilinniartitaanerup ingerlanerani tamarmi ilinniagaqarnersiuteqartinneqarnissaat akuersissutigineqassasoq. Tamanna periarfissaqassappat inatsisissatullu siunnersuut manna aningaasartuutaassanngippat inuutissarsiutitigut ilinniagaqarnermut sulisitsisut akiliutaasigut ukiumi siullermi ilinniartunut tapiissutit suli aningaasalersorneqassapput. Aammattaq kommunit sulinermik sungiusarnermut aningaasartuutaat kommuninut ataatsimoortumik tapiissutitigut annikillisinneqarnissaat Peqqinnissamullu Pisortaqarfiup sulinermik sungiusarnermi akissarsianut aningaasartuutai aningaasanut inatsimmi konto 40.13.50-imut, ‘Ilinniarnermi tapiissutit meeqqanullu tapit’-nut, nuunneqarnissaat pisariaqarpoq.

 

Normu 3-mut:

Aalajangersakkami atuuttumi inatsimmik atortuulersitsinissaq pillugu malittarisassanik aalaja-ngersaasoqarnissaanut tunngavissaqarpoq, tassunga ilaallutik pikkorissarnernut ilinniaqqittarnermilu tapiissutinut tunngasut, tak. § 2, imm. 2.

Siunnersuummi siunniunneqarpoq sulisitsisunut ilinniartunik sulisoqalersunut tapiissuteqarnissamut malittarisassanik aalajangersaasinnaanissaq. Siunertat pingaarnerit ilagaat sulisitsisut tamarmik sapinngisartik tamaat ilinniarluarsimasunik naammattunik amerlassusilinnik ilinniartitsinissamut peqataanissaat, taamaaliornikkut sulisoqarniarnikkut pisariaqartitat sulisussat ilinniarsimasut naammattut pigineqalerniassammata.

Naalakkersuisut aammattaaq tapiissutinik allaffissornikkut aqutsinissamut malittarisassanik aalajangersaasinnaapput. Naalakkersuisut pilersaarput malittarisassiorniarlutik sulisitsisut ilinniartunik sulisoqalersut tapisiaqarnissaannik qulakkeerisunik, kiisalu tapiissutit unitsinneqartassasut ilinniarnermut isumaqatigiissut atorunnaarpat. Taamatuttaaq kikkut allaffissornikkut aqutsisuunissaannut tapiissutillu qanoq allaffissornikkut aqunneqarnissaannut malittarisassiortoqarsinnaavoq.

Tapiissutisisarnissamut piumasaqaasiortoqarsinnaavoq. Malittarisassiortoqarsinnaavoq soorlu ilinniartut piffissaq tamakkerlugu sulisassasut imaluunniit piumasat allat tapiissutinik akuersissuteqartoqartinnagu sulisitsisup ilinniartullu eqqortitassaat eqqarsaatigalugit.

Tapiissutit amerlassusissaat tunniunneqarnissaallu pillugit malittarisassani annerusumik pineqassapput tapiissutit amerlassusissaannut piffissanilu aalajangersimasuni tunniussisarnissamut tunngasut - assersuutigalugu soorlu qaammatikkaartumik 2.000 koruunit imaluunniit qaammatit pingasukkaarlugit 6.000 koruunit tunniunneqartassanersut. Sulisitsisunut aningaasanik tunniussassanik naatsorsuisarneq qanorlu amerlatigisunik tunniussisarnissaq pillugit malittarisassiortoqassaaq - taakkununnga ilanngullugit ilinniartup qanoq sivisutigisumik atorfeqarneranut naleqqiussilluni naatsorsuisoqassanersoq, imaluunniit sulisitsisoq taamaallaat tapisissanersoq ilinniartoq ullormi tapiissutinik tunniussivissami sulisorineqarpat.

Naalakkersuisut naatsorsuutigaat piffissami matumani tapiissutit qaammatikkaartumik kingumoortumik tunniunneqartarnissaat pillugu malittarisassaliortoqassasoq, tassalu tapiissutinik tunniussisoqassanngitsoq qaammatip tunniussivissap ulluisa 20-anni ilinniartoq sulisorineqanngippat.

§ 8, imm. 1, nr. 2 malillugu Naalakkersuisut malittarisassanik inuutissarsiutinut ilinniartitaanermi pikkorissartitsisarnerit sulisitsisut inuutissarsiutinut ilinniartitaanermut akiliutaannit (AEB) ani-ngaasalersorneqartut pillugit nalunaarummi normu 18-imi, 20. maj 1998-imeersumi malittarisassanut aalajangersakkanut naapertuuttunik aalajangersaanissamut periarfissinneqarput.

§ 8, imm. 1, normu 3-mi ilaatigut Naalakkersuisut periarfissinneqarput, akissarsiatut isertitaq suna naatsorsuinermi ilanngunneqassanersoq sunalu ilanngunneqassannginnersoq, malittarisassaliussallutik takuuk § 1, imm.3. Tamatuma saniatigut §§-it 3-6 eqqarsaatigalugit erseqqissaataasunik malittarisassiornissamut pisariaqartitsisoqarsinnaavoq.

 

§ 2-mut.

Atuutilersitsinissamut piffissaliussaq allaffissornikkut pissutsit tunngavigalugit ulloq 1. januar 2004-mut aalajangersarneqarpoq, aammalu sanaartornerup, inuutissalerinerup, saviminilerinerup aammalu niuernerup allaffissornerullu iluanni inuutissarsiutitigut tunngaviusumik ilinniartitaanernut 1. januar 2004-mit atuutissalluni. Isumaginninnermi ikiortitut peqqissaanermilu ikiortitut ilinniartitaanerit iluanni ikaarsaariarnermi aalajangersakkamik ilanngussinissaq pisariaqartinneqarpoq, ilinniartitaanerit taakku iluarsartuunneqaqqinnerannut atatillugu ilinniartitaanernut taakkununnga brancheudvalgit ilinniartitaanerup ingerlanerani tamarmi ilinniagaqarnermut tapiissuteqartitsilernissaq kissaatigisimammassuk. Taamatut allannguineq aningaasartuutinik nikisitsissanngippat tamatumani pisariaqartinneqartut tassaapput:

- inuutissarsiutitigut ilinniagaqarnermut sulisitsisut akiliutaat pillugu Inatsisartut inatsisaat naapertorlugu akiliutit ilinniartitaanerni taakkunani ukiumi siullermi ilinniartunut tapiissutinik suli aningaasalersuissutigineqassasut,

- Peqqinnissamut Pisortaqarfiup peqqissaanermi ikiortinngorniarlutik ilinniartut sulinermik sungiusarneranni akissarsiaannut aningaasat atukkatik ilinniagaqarnersiutinut kontunut nuussagai, aamma

- kommuninut ataatsimoortumik tapiissutit annikillisinneqassasut ilinniartitaanerni taakkunani ilinniartut akissarsiaannut kommunit aningaasartuutaasa amerlaqataannik, aningaasallu taakku ilinniagaqarnersiutinut kontumut nuunneqassasut.

Inatsisartut inatsisaata isumaginninnermi ikiortitut peqqissaanermilu ikiortitut ilinniartunut aatsaat 1. januar 2004-mi atuutilersinnaanissaa naatsorsuutigineqarpoq, tassami aningaasanik kommunit ilinniartut sulinermik sungiusarneranni atugaannik nuussinissaq Namminersornerullutik Oqartussat kommunillu akornanni ataatsimoortumik tapiissutit pillugit 2004-mi isumaqatiginninniarnermut aatsaat ilanngunneqarsinnaammat.