24. november 2003 UKA 2003/160-2
Allannguutsissatut siunnersuut
uunga
Meeqqat Inuusuttullu pillugit Ilisimasaqarfik pillugu inatsisartut inatsisissaattut siunnersuut
Ilaqutariinnermut Peqqissutsimullu Naalakkersuisup aappassaaniigassanngorlugu saqqummiussaa
§ 1
1. § 3imm. 2 ima oqaasertaqassaaq:
"Imm. 2. Siulersuisut amerlanerpaamik arfineq marlunnik amerlassuseqarput, Naalakkersuisunit toqqarneqassallutik. Ilisimatusarfik, Nunatta Atuagaateqarfiat, ilanngullugu Groenlandica, Naatsorsueqqissaartarfik kiisalu Kalaallit Nunaanni Kommuneqarfiit Kattuffiat siulersuisunut ilaasortassamik ataatsimik tamarmik inassuteqassapput. Naalakkersuisunut ilaasortat, ulluunerani paaqqinniffinnut atuarfinnullu, peqqissutsimut pinaveersaartitsinermullu kiisalu isumaginninnermut akisussaasut, tamarmik immikkut ilaasortamik ataatsimik, amerlanerpaamillu pingasunik inassuteqartassaput. Siulersuisuni siulittaasoq ilaasortassatut inassutigineqartut akornannit Naalakkersuisunit toqqarneqassaaq. "
Oqaaseqaatit
Nr. 1-imut
Inatsisartut Ilaqutariinnermut Peqqissutsimullu Ataatsimiititaliaata ataatsimiinnermini siunnersuutigisimavaa arfineq marlunniit qulinut ilaasortat amerlassuseqarnissaanik siunnersuummi siullermi siunnersuutaasimasoq allanngortinneqassasoq amerlanerpaamik ilaasortat arfineq marluusussanngorlugit. Siunnersuut taanna Naalakkersuisut akueraat
Inatsisartut Ilaqutariinnermut Peqqissutsimullu Ataatsimiititaliaata ilanngullugu siunnersuutigaa Kalaallit Nunaanni Kommuneqarfiit Kattuffiat siulersuisunut ilaasortassamik ataatsimi inassuteqartassasoq. Siunnersuut taanna Naalakkersuisut akueraat, pissutigalugu KANUKOKA tassaammat meeqqat inuusuttullu atugarisaat pillugit immikkut paasisimasaqartoq.
Kiisalu Inatsisartut Ilaqutariinnermut Peqqissutsimullu Ataatsimiititaliaata siunnersuutigaa siulersuisuni siulittaasup ilaasortassatut inassutigineqartut akornanni toqqarneqartassasoq. Siunnersuut taanna Naalakkesuisut akueraat.