Nalinginnaasumik nassuiaatit
§ 22a-mi siunertarineqarpoq tunitsivinnik tunisassiorfinnillu pilersitsisoqassatillugu imaluunniit allannguisoqassatillugu aningaasarsiornikkut suliffissaqartitsiniarnikkullu pisariaqartinneqartut qulakkeerneqarnissaat. Taamaalilluni tunitsiviit tunisassiorfiillu pisinnaasaasa allanngortinneqarnerini inuiaqatigiinni aningaasarsiornikkut iluanaarutit annertunerpaajutinneqarnissaat anguniarneqarpoq.
Allannguutissatut siunnersuummut tunuliaqutaapput tunisassiorfinnik allannguinerit akuersissutigineqarnerinut atatillugu ajornartorsiutaasartut ikiorsiivigineqarnissaat. Malittarisassatigut nutaatigut siunertaavoq qinnuteqartarnerup eqaallisarneqarnissaa, taamaasilluni tassuuna inuussutissarsiummit sukkanerusumik pisariinnerusumillu sulianik suliarinnittoqartarnissaanik piumasaqaatit naammassineqarsinnaaniassammata pisortat soqutigisaat innarlernagit.
Allannguutissatut siunnersuut pisortanut allaffissornikkut aningaasaqarniarnikkulluunniit kinguneqassanngilaq; peqataaqataassallunili pingaartumik tunitsivimmik tunisassiorfinniluunniit pioreersuni tunisassiornermik allannguinermi, pisariinnerusumik sukkanerusumillu suliat suliarineqartalernissaannut.
Allannguutissatut siunnersuut Aalisarnermut Piniarnermullu Pisortaqarfimmit Inuussutissarsiornermullu Pisortaqarfimmit suleqatigiinnikkut suliarineqarpoq, § 22a Inuussutissarsiornermut Pisortaqarfimmit allaffissornikkut akisussaaffigineqarmat.
Allannguutissatut siunnersuut ukununnga tusarniaassutigineqarpoq Aningaasaqarnermut Pisortaqarfik, Naalakkersuisut Allattoqarfiat, Inuussutissarsiornermut Pisortaqarfik, Akileraartarnermi Pisortaqarfik, Avataasiorluni Aalisariutaatillit Kattuffiat APK, KNAPK, Kalaallit Nunaanni Kommunit Kattuffiat KANUKOKA, Sulisitsisut Peqatigiiffiat, SIK, Inuussutissarsiorneq pillugu Siunnersuisoqatigiit, Unammilleqatigiinnermut Ataatsimiititaliap allaffeqarfia, Royal Greenland A/S, Polar Seafood A/S, Nuka A/S kiisalu Aalisarneq pillugu Siunnersuisoqatigiit ilaasortaannut tusarniaassutigineqarnikuulluni.
Pinngortitaleriffik, Aalisarsinnaanermut Akuersissutinik Nakkutiliisoqarfik aamma Akileraartarnermi Pisortaqarfik nalunaarput oqaaseqaatissaqaratik.
KNAPK-p oqaatigaa siunnersuut illorraap tungaanut alloriarnerusoq aammalu aalisarneq pillugu inatsisip sinneranut arlalinnik oqaaseqaateqarlutik – taakku Aalisarnermut Piniarnermullu Pisortaqarfimmut ingerlateqqinneqarput.
Kalaallit Nunaanni Kommuuneqarfiit Kattuffiat KANUKOKA siunnersuummut isumaqataavoq, sunniutissaanulli annilaangassuteqalaarluni peqatigitillugu kommunit inuussutissarsiornermik ineriartortitsinermut peqataasinnaanerinut periarfissaat pillugit Inatsisartut inatsisaannik allannguinermi. Kattuffiup kaammattuutigaa kommunit tusarniarneqartartunut ilaatinneqartassasut, taakkulu nassuiaatinut ilanngunneqarput.
Unammilleqatigiinnermut Ataatsimiititaliap Atuisartunullu Siunnersuisoqatigiit Ataatsimut Allaffeqarfiata kissaatigaa Unammilleqatigiinnermut Ataatsimiititaliap tusarniarneqartartussanit peerneqarnissaa, tamannalu pivoq.
Royal Greenland A/S isumaqarpoq paragrafi pissusissamisuunngitsoq, taamaattorli ilorraap tungaanut alloriarnerusoq. Ilanngullugu kissaatigineqarpoq inatsit akuersissutigineqarnermini ingerlaannaq atuutilissasoq, tamannali pissusissamisuunngitsutut nalilerneqarpoq.
Inatsisissatut siunnersuutip aalajangersagartaanut ataasiakkaanut nassuiaatit
§ 1-imut
§ 22a, imm. 1-imut
Nioqqutissiorfiup pioreersup tunitsivittut allanngortiterneqarnissaanut imaluunniit aalisakkanik allanik nioqqutissiorfinngortinneqarnissaanut tunngatillugu Naalakkersuisut taamaallaat akuersissuteqarsimasariaqarput allanngortiterinerup pisortanit aningaasaliiffigineqarnissaa pisariaqartinneqartillugu soorlu erngup imaluunniit innaallagissap pisinnaasaata annertusineqarnerani imaluunniit attaveqaatinut aningaasaliisoqassatillugu soorlu aqqusinernut, talittarfiliornernut imaluunniit assigisaannut.
Naalakkersuisut pisortanit aningaasaliissutit akisussaassuseqartumik aqussinnaasariaqarpaat, kiisalu piffissap ilaani pisinnaassutsikkut ajornartorsiornerup nalaani umiarsuarnik tunitsiviliinissat pillugit inuiaqatigiinni aningaasarsiornikkut tunngavilersorluakkat naapertorlugit aalajangiisinnaanermi tunitsivinnik imaluunniit nioqqutissiorfinnik allannguinerit inuiaqatigiinnit iluanaarutaasinnaasut kiisalu inuiaqatigiinnit aningaasaliissutit oqimaaqatigiisinneqarsinnaanerisa nalilersorneqarsinnaaneri pisariaqassapput.
Nioqqutissiorfinnik allanngortiterinerit pisortanit aningaasaliinissamik, tapersiinissamik imaluunniit tapiissuteqartoqarnissaanik pisariaqartitsinngitsut ingerlatsinerup aningaasarsiornerata pitsan-ngorsarneratigut ingerlatsivinnit nammineq tamakku isumagineqarsinnaassapput. Tunitsivinnik nioqqutissiorfinnillu piginnittut ingerlatsinerup sulisoqarnikkullu akilersinnaassusia tunngavigalugu nioqqutissiorfiup allanngortiterneqarnera ingerlaavartumik ingerlassinnaasariaqarpaat.
Tunitsivinnik nioqqutissiorfinnillu nutaanik pilersitsinermut atatillugu Naalakkersuisut akuersissuteqaqqaartarnissaata allanngortinneqarani ingerlatiinnarneqarpoq, tunitsivinnik nutaanik pilersitsinerit suliffeqarfiit inuiaqatigiinnit akiliutitigut atorfissaqartitsinerisa allanngortinnerinik amerlanertigut kinguneqartarmata amerlanertigullu aaqqissugaanikkut aningaasaliinissamik pisinnaasatigullu allannguinissanik tamanna pisariaqartitilersarluni.
§ 22a, imm. 2-mut
Aalajangersakkap immikkoortui marluk siulliit allanngortinneqanngillat. Taakku aalisarneq pillugu inatsisip allannguutissaata UPA 2002-mi Inatsisartunit suliarineqarneranut atasumik ilanngunneqarpoq siunnersuutip pingajussaaneernerani Inatsisartut Aalisarnermut, Piniarnermut Nunalerinermullu Ataatsimiititaliap piumasaqarnera tunngavigalugu.
Aalajangersakkamut allanngortiterinerit akuersissutigineqartariaqanngitsut Naalakkersuisunut nalunaarutigineqartarnissaannik malittarisassamik ilasinissaq siunnersuutigineqarpoq, aalisarnerup ataatsimut aqunneqarnissaa anguniarlugu kiisalu piffissap ilaani tunitsiviup nioqqutissiornerullu pisinnaasaanut tapertaasussamik soorlu umiarsuarmik tunitsiviliisoqassanersoq eqqarsaatigeqqissaarnissaanut ilanngunneqarsinnaaqqullugu.
§ 22a, imm. 3-mut
Aalajangersakkamut atuuttumut naleqqiullugu "susassaqartut tamarmik" "susassaqartut"-nut allanngortinneqarpoq. Naalakkersuisut aalajangiinissaat pitinnagu susassaqartut tamarmik oqaaseqaateqarnissaata utaqqineqartarnerat suliamut kinguarsaataasarpoq ilaatigullu kinguarsaaneq ima kinguneqartarluni allaat aningaasarsiornikkut annertuumik sunniuteqapiluttarluni, taamaalillunilu pinngitsoorani susassaqartut tamaasa tusarniaavigineqartarnerat naleqqukkunnaarsimalluni.
Taamaattumik siunnersuutigineqarpoq susassaqartut kisimik ilaatinneqartassasut. Aalajangersakkap pioreersup suliarinerani sulinermik inuussutissarsiuteqartut aamma sulisitsisut kattuffii kiisalu Unammilleqatigiinnermut Ataatsimiititaliaq eqqarsaatigineqarsimapput. Kingullertut taaneqartoq tusarniaavigisassatut naleqqussimanngilaq, ilaatigut Unammilleqatigiinnermut Ataatsimiititaliamik tusarniaaneq piffissaq eqqarsaatigalugu ataatsimiititaliap akuttusuumik ataatsimiittarnera pissutigalugu erininarsisarmat, ilaatigullu kingusinnerusukkut suliami naammagittaalliutaasinnaasut suliarinissaanni ataatsimiititaliaq peqataasinnaassanani. Tamanna tunngavigalugu susassaqartunit tusarniaavigineqartussanit Unammilleqatigiinnermut Ataatsimiititaliaq peerneqarpoq. Unammilleqatigiinneq pillugu inatsit naapertorlugu isumaqatigiissutit unammilleqatigiinnermut killilersuutaasut suli nalunaarutigineqartariaqarneri tamatuma allanngortinngilaa soorluttaaq tamatumap kingorna suliat naammagittaalliutaasut Unammilleqatigiinnermut Ataatsimiititaliamit suliarineqarnissaannut imaluunnit nammineq ingerlaatsini naapertorlugu suliarinninnissaanut killilersuisoqarani.
Naggasiullugu naatsorsuutigineqarpoq kommunit pineqartut pisariaqarnera naapertorlugu tusarniaanermut ilanngunneqassasut.
Tunitsivimmik imaluunniit nioqqutissiorfimmik nutaamik pilersitsinermut atatillugu tusarniaanermi naatsorsuutigineqarpoq amerlanerusut tusarniaanermi peqataatinneqartassasut, allanngortiterinissarlu sioqqullugu tusarniaanerup ikinnerusunut sammitinneqartariaqassalluni aalisarnermi imaluunniit aalisariaatsip allanngortinneranut pisinnaassutsimut sukkasuumik naleqqussaanissamut periarfissaqarnissaq eqqarsaatigalugu.