30. november 2003

UKA 2003/139

 

Inatsisartuni Naalakkersuisunilu il.il. ilaasortat aningaasarsiaqartitaanerat il.il. pillugit Inatsisartut inatsisissaattut siunnersuut.

pillugu

Inatsisartut Siulittaasoqarfiata

ISUMALIUTISSIISSUTAA

siunnersuutip aappassaaneerneqarnerani saqqummiunneqartoq

 

Inatsisartut Siulittaasoqarfiat suliarinninnermini ukuninnga inuttaqarpoq:

 

Inatsisartut Siulittaasuat Jonathan Motzfeldt, (S),
Inatsisartuni ilaasortaq Augusta Salling, siulittaasup tullia siulleq. (A)
Inatsisartuni ilaasortaq Aqqaluk Lynge, siulittaasup tulliata aappaa. (IA)
Inatsisartuni ilaasortaq Per Rosing-Petersen, siulittaasup tulliisa pingajuat. (S)
Inatsisartuni ilaasortaq Per Berthelsen, siulittaasup tulliisa sisamaat. (D)

 

Siunnersuutip imarisai.
Siunnersuummi Inatsisartuni ilaasortat Naalakkersuisunilu ilaasortat aningaasarsiaqarnerannut, soraannerussutisiaqarnerannut, aningaasartuuteqarnermut tapisiaannut, ineqarnerannut, angalanermi aningaasartuutaannut Inatsisartullu ataatsimiinnerinut ilaquttanit ingiallortarneqarnerannut tunngassutillit pineqarput.

 

Siunnersuutip suliarineqarnera.
Aningaasarsiaqartitaaneq pillugu inatsisissatut siunnersuummik nutaamik suliaqarnermini Siulit-taasoqarfiup maluginiarpaa siunnersuutip siullermeerneqarnerani partiit Siumup, Inuit Ataqatigiit Atassutillu makku isumaqatigiissutigigaat:

- Inatsisartuni sulineq ukiuni kingullerni ineriartorneq eqqarsaatigalugu piffissaq tamakkerlugu suliffittut, taamaattutut aningaasarsiaqarfiusariaqartutut, isigisariaqartoq,

- nunatsinni inuiaqatigiinni atuuffiit akisussaassuseqarfiusut allat isumagineqarnerannit Inatsisartuni sulineq aningaasaqarniarnikkut orniginannginnerunngitsutut aningaasarsiaqarfiusariaqartoq,

- nunatta ataasiinnartut qinersiviunera eqqarsaatigalugu Inatsisartuni ilaasortat ukiut tamaasa Kalaallit Nunaanni paasisassarsiorlutik angalanissamut periarfissaqartitaanissaat isumagissallugu pisariaqartoq erseqqissoq,

- Inatsisartuni ilaasortatut atuuffimmik isumaginninnermut atugassarititaasut inissamik innersuunneqarnissaq nuunnermilu aningaasartuutinik akiliunneqarnissaq eqqarsaatigalugit nunatsinni suliffeqarnermi atorfinitsitaanermut ileqquusutut atugassarititaasunut aallaavittut sanilliunneqarsinnaasariaqartut,

- maannakkut siunissamilu Inatsisartuni Naalakkersuisunilu ilaasortanut ullutsinnut naleqquttumik soraarnerussutisiaqartitsinermik aaqqissuussinissaq pisariaqartoq,

- sulinermi immikkut atugassarititat Inatsisartunut atuuttut Inatsisartut ataatsimiinnerinut atatillugu Inatsisartuni ilaasortat katissimasatut aappaasa / katissimanagit inooqataasa meeraasalu 18-nit inorlugit ukiullit ukiumut ataasiarluni ingialluillutik Nuuliarsinnaanissaat pissutissaqartikkaat,

- Inatsisartuni ilaasortat aningaasartuuteqarnermut tapisiaat ukiumut kr. 50.000,-inik angissusilittut aalajangiusimaneqassasut, Inatsisartunili ilaasortatut atuuffimmut atatillugu uppernarsaatitalittut aningaasartuutinut atorneqanngippata akileraaruserneqassasut.

Taamaalilluni aningaasarsiaqartitaaneq pillugu inatsisissatut siunnersuummik nutaamik saqqummiussinermi immikkoortut pingaarnerit siammasilluartumik isumaqatigiissutigineqartut Siulittaasoqarfiup maluginiarsimavaa.

Taamatut isumaqatigiinneq siunnersuummi § 1, imm. 5-mut tunngatillugu (nassuiaatini qupperneq 9) allannguutissatut siunnersuummik saqqummiussinissamut tunngavissaqalersitsivoq, taamaalilluni Inatsisartuni ilaasortat sinerissamiit Nuummut nuunnissamik kissaateqartut, Inatsisartunulluunniit qinersinermut atatillugu Nuummi inigisaminnik annaasaqartut, najukkamiit najukkamut nuunnermut atatillugu nunatsinni suliffeqarnermi maleruagassat nalinginnaasumik atuuttut assigalugit nuunnermut aningaasartuutiminnik akiliunneqartussaapput.

Apeqqutigineqarnikuuvoq ilaasortat Nuummut nuunnissamik toqqaasut piffissaq qinigaaffik naappat nuuffigisaminniit uterlutik nuunnissaminnut qulakkeerunneqarnissamut periarfissaqartinneqarsinnaanersut. Kommunimut pineqartumut siusinnerusukkulluunniit sulisitsisorisimasamut pisuni taamaattuni inissamik innersuussinissaq qulakkeerteqqullugu peqqusinissaq Siulittaasoqarfiup imaaliinnarlugu periarfissaqartutut isiginngilaa. Taamaalilluni Inatsisartuni ilaasortap Nuummut nuunnissamik toqqaasup nammineerluni qulakkeertussaavaa kommunimut pineqartumut sulisitsisumulluunniit isumaqatigiissuteqarnikkut inissamut innersuussamut uterluni nuunnissaq isumagissallugu.

Siunnersuutip siullermeerneqarnerani Inatsisartuni ilaasortaanermut aningaasarsiat, pisortani atorfinnit atuuffimmilu katillugit isertitat Inatsisartuni ilaasortaanermi aningaasarsianit aappaa qeqqanik angissusilimmik qaangerneqarpata millileriffigineqartarnissaat pillugu, siunnersuummi § 1, imm. 2-mi aalajangersagaq assigiinngitsunit arlalinnit apeqquserneqarpoq. Ilaatigut aalaja-ngersagaq pisortani atorfillit inuussutissarsiutini namminersortunit pigineqartuni nammineerlutillu inuussutissarsiortuni atorfilinnut sanilliullugit assigiinngisinneqarnerannik nassataqartutut isigineqarpoq. Ilaatigullu aalajangersagaq siunertaanngitsutut Inatsisartuni ilaasortat sulisutut i-nuuneqarnerannut atorfimmilu qaffakkiartornissamik pilersaarusiornissaannut periarfissatigut killiliisussatut isigineqarpoq.

Inatsisartunut qinersinissaq sioqqullugu qinersisartut tusagassiorfiillu piffissami qinigaaffimmi pineqartoq Inatsisartuni sulinermik tamakkiisumik ingerlatsiniarnersoq imaluunniit suliffimmik atuuffigisamilluunniit allamik ingerlassiniarnersoq pillugu apeqqummut qinigassanngortittumut akititsiniaasinnaammata aalajangersagaq pinngitsuuinneqarsinnaasoq Siulittaasoqarfiup tunngavissaatippaa. Tamatuma kingorna qinersisartut taasinertik sumut inissinniarnerlugu nammineerlutik aalajangigassarissavaat.

Partiit kattusseqatigiilluunniit ataasiakkaat nammineq Inatsisartunut qinigassanngortitamik Inatsisartuni sulinerup avataatigut kissaatiginanngitsumik suliffeqarnissaasa atuuffimmilluunniit isumagisaqarnissaasa pinaveersimatinnissaanut tunngatillugu Inatsisartunut qinigassanngortinnermi piumasaqaasiornissartik sunniivigineqaratik nammineerlutik aalajangersagassarissagaat ilanngullugu oqaatigineqarpoq. Taamaalillugu saqqummiunneqarpoq siunnersuummi § 1, imm. 2-p atorunnaarsinneqarnissaanut allannguutissatut siunnersuut.

Naalakkersuisuni ilaasortat suliassartik piffissaq tamaat atuuffittut isigisariaqartuarsimammassuk kiisalu akisussaaffik suliakkersorneqarnerlu siornatigumut sanilliullugu allannguuteqarsiman-ngimmat Inuit Ataqatigiit apeqqutigaat Naalakkersuisuni ilaasortat aningaasarsiaasa qaffanneqarnissaat pissusissamisoortutut isigineqarsinnaanersoq,. Tassunga tunngatillugu Inuit Ataqatigiinnit isummatut saqqummiunneqartut Siulittaasoqarfiup isumaqatigai. Taamatut isumaqatigiinneq pis-sutigalugu siunnersuummi § 6, imm. 1-imut tunngatillugu (nassuiaatini qupperneq 15) allannguutitut siunnersuummik saqqummiussisoqarpoq, taamaalilluni ukiumut aningaasarsiat akissaatit inissisimaffiat 38, skalatrin 51 tassungalu ilanngullugit tapisiat tamanut atuuttut angeqatigilissallugit. Inatsisissatut siunnersuummut sanilliullugu aningaasarsiat immikkoortuat taanna Naalakkersuisuni ilaasortanut, taamatullu Inatsisartut Siulittaasuannut Naalakkersuisullu Siulittaasuannut tunngasoq kr. 388.085-imiit kr. 358.501-imut ukiumut millineqassaaq.

Kalaallit Nunaanni paasisassarsiorluni angalasarnerit ingerlanneqartarnernut aningaasartuutigineqartartut pillugit maannamut misilittakkat pisariaqartilerpaat paasisassarsiorluni ukiumut angalasarnernut aningaasatigut killissarititat siunnersuutip § 3, imm. 4-ni taaneqartut kr. 30.000-iniit kr. 50.000-inut qaffanneqartariaqartut. Taamaalilluni tamatumunnga tunngasumik allan-nguutissatut siunnersuuteqartoqarpoq. Allannguutissatut siunnersuutip kingunerissavaa kr. 600.000-inik ukiumut aningaasartuuteqarnerulerneq.

Inatsisartuni ilaasortamut sinniisussaq, Inatsisartuni ilaasortamut taartaalluni piffissami killiligaanngitsumi ivertinneqartoq, Inatsisartuni ilaasortatulli paasisassarsiorluni angalanissamik taassumatulli pisariaqartitsisussaavoq. Taamaammat Inatsisartuni ilaasortamut sinniisussaq piffissami kil-liligaanngitsumi Inatsisartuni ilaasortamut taartaasoq Inatsisartuni ilaasortap pineqartup paasisassarsiorluni angalasinnaatitaaneranik atuisinnaatitaalisssaaq. Tassa imaappoq, Inatsisartuni ilaasortamut aningaasanut killiliussat iluini aningaasat atorneqanngitsut Inatsisartuni sinniisussamut nuunneqassasut. Sulinngiffeqarneq naappat aningaasanut killiliussatut taaneqartut iluanni aningaasanik sinneqartoqarsimassappat Inatsisartuni ilaasortaq paasisassarsiorluni angalasinnaatitaaqqilissaaq.

 

Siulittaasoqarfiup inassuteqaatai.
Siulittaasoqarfimmi amerlanerussuteqartut Siumumeersut, Inuit Ataqatigiinneersut Atassummeersullu siunnersuut akuersissutigineqassasoq inassutigaat, pingajussaaneerinninnissamulli isumaliutissiissummut matumunnga naapertuuttumik allannguutissatut siunnersuummik saqqummiussiniarlutik.

Siulittaasoqarfimmi ikinnerussuteqartut Demokraatineersut isumaqarput Inatsisartuni Naalakkersuisunilu ilaasortat aningaasarsiaasa soraarnerussutisiaasalu pitsanngoriaatissaat nunatta aningaasaqarniarnerata pitsaannginnera eqqarsaatigalugu piffissami tulluangitsukkut pisoq. Taamaammat siunnersuut ikinnerussuteqartut tapersersinnaanngilaat.

 

	Jonathan Motzfeldt, Siulittaasoq
Augusta Salling		Aqqaluk Lynge
Per Rosing-Petersen		Per Berthelsen