Oqaaseqaatit nalinginnaasut
Siunnersuutigineqarpoq raajanut akitsuut, raajat akitsuusigassat tunineqarneranni isertitat procentiannik aalajangersimasumik angissuseqarunnaarluni allanngortinneqassasoq imaalillugu, raajat tunineqarneranni agguaqatigiissillugu kiilumut akiata 13,00 kr.-nit sinnerpagit aatsaat raajanut akitsuut allanngorartoq qaffagiartuaartorlu akilerneqartussanngorlugu.
Akitsuutip qaffagiartuaartup ilusissaatut siunnersuutaavoq, raajat akitsuusigassat tunineqarneranni agguaqatigiissillugu kiilumut akiata 13,00 kr.-inik annertussusillip aallaavittut 100,00-imut annertussusilerneqarnissaa. Tunisinermi akiusup kiilumut 13,00 kr.-nit sinnerlugit ørimik ataatsimik nikinneri tamaasa aallaavik nikisinneqartassaaq. Aallaavik 100,0769-iuppat akitsuut 0,01 procentimik angissusilerneqassaaq, aallaaviullu 0,05 procentpointinik qaffattarnera ilutigalugu 0,01 procentimik qaffakkiartortassalluni, tassalu tunisinermi akiusoq agguaqatigiissillugu kiilumut 20 kr.-niuppat tamanna 7 procentimik akitsuuteqarnissamik kinguneqartassalluni.
Agguaqatigiissillugu aki kiilumut 13,00 kr.-niuppat taassumanngaluunniit mikineruppat raajanut akitsuummik akiliisoqassanngilaq.
Agguaqatigiissillugu aki kiilumut 58,00 kr.-niuppat akitsuut qaffagiartuaartoq 45 procentiussaaq, taannalu raajanut akitsuutip qaffasinnerpaaffissaatut nalilerneqarpoq, akitsuuseeriaatsimmi siunnersuutigineqartup kingunerissammagu kiilumut aki 58,00 kr.-i qaangerlugu qaffariaatit 100 pct.-ii qaangerlugit annertussuseqartumik akitsuusiisoqartarnissaa.
Aningaasatigut kingunissaiTaama inuussutissarsiutillit raajanik akitsuusigassanik tunisinermikkut siunissami akigititassaasa ineriartornerat landskarsip raajanut akitsuutitigut isertitassaanut aalajangiisuussaaq. Ukiuni kingullerni pingasuni akit annertuumik nikerartarsimanerat naluneqanngilaq, maannakkullu 2003-mi kvartalimi kingullermi aatsaat taama appasitsigaluni kiilumut 13,98 kr.-niuvoq. 2002-mi agguaqatigiissillugu aki kiilumut 15,43 kr.-niuvoq, 2001-imi kiilumut 19,01 kr.-niulluni 2000-imilu kiilumut 22,88 kr.-niusimalluni.
Raajanut akitsuutip ukiumut 18 mio. kr.-nit missinginik isertitaqaataasarnissaa naatsorsuutigineqarpoq.
Piffissaq akitsuutinut akiliisussanngorfik pillugu ikaarsaarutaasumik immikkut maleruagassiortoqanngilaq, tassami § 2, imm. 2-mi allassimareerpoq akitsuutinut akiliisussanngorneq piffissami tunisisup pisisumit aningaasanik pisassaqaliviffiani aallartissasoq, taamaammallu raajat suli pisarineqanngitsut tunineqarnissaannik isumaqatigiissutitigut iluanaarniarsinnaaneq periarfissaqanngitsoq, piffissaq akiliiffissaq raajat tunineqarnissaat sioqqullugu pisussatut isumaqatigiissutaasimagaluarpalluunniit apeqqutaatinnagu.
Allaffissornermut kingunissai
Inatsisissatut siunnersuutip allaffissornermut annertuunik kinguneqarnissaa naatsorsuutigineqanngilaq.
Tusarniaaneq
Aalisarnermut, Piniarnermut Nunaqarfinnullu Pisortaqarfik, Inuussutissarsiornermut Pisortaqarfik aamma Aningaasaqarnermut Pisortaqarfik kiisalu KNAPK aamma APK inatsisissatut siunnersuut siunnersuutigineqaqqaarnermini (19 kr.) iluserqartillugu tusarniaaffigineqar-simapput. Raajanut akitsuuseeriaasissamut nutaamut tunngavissat APK-mit isumaqataaffi-gineqarput. Pisortaqarfiit taakku pingasut siunnersuummut oqaaseqaatissaqarsimanngillat
Inatsisissatut siunnersuut maannakkutut iluseqartillugu (13 kr.) tusarniaavigineqarnikuunngi-laq.
Aalajangersakkanut ataasiakkaanut oqaaseqaatit
§ 1, nr. 1-imut
Raajanut akitsuutip procentiata aalajangersimasuujunnaarluni allanngorartunngornissaa siunnersuutigineqarpoq, tassa taama inuussutissarsiuteqartut raajat akitsuusigassat tunineranni akitigut angusaasa agguaqatigiissillugu angissusia tunngavigalugu aallaaviliussap, kvartalikkaartumik angissusilerneqartartussap procentinngorlugu ilaanik allanngorartumik angissuseqalersillugu.
Oqaatigineqassaaq akitsuutip tunngavia allannguuteqarani tassaammat raajanik akitsuusigassanik tunisinermi aki akitsuummik akiliisussaatitaasup pissarsiaa.
Aallaavissap, procentimik allanngorartumik akitsuusiinissamut tunngaviusussap, raajat akitsuusigassat kilisaatinit Kalaallit Nunaanni nalunaarsorneqarsimasunit pisarineqartut tunineqarneranni agguaqatigiissillugu kiilumut akiat aallaavigalugu angissusilerneqarnissaa siunnersuutigineqarpoq. Raajat akitsuusigassat umiarsuit nunanit allanit attartukkat atorlugit pisarineqarsimasinnaasut aallaavissamik naatsorsuinermi ilanngunneqarnissaat naleqquttuusorineqanngilaq, attartornermi isumaqatigiissutit ilaatigut pissutigalugit. Oqaatigineqassaarli raajat taakku tunineqarneranni akii aallaavissami ilaatinneqanngikkaluartut akitsuutinik akiliisussaatitaasup (aalisarsinnaanermut akuersissummik pigisaqartup) raajat akitsuusigassat, umiarsuit nunanit allanit attartukkat atorlugit pisarineqartut akitsuutaannik akiliisarnini aallaavissaq naapertorlugu ingerlatiinnassammagu.
Kvartalit tulleriiginnaat sisamat ingerlaneranni raajat akitsuusigassat tunineqarneranni agguaqatigiissillugu kiilumut akiisa aallaavissami ilaatinneqarnissaat siunnersuutaavoq, taamaaliornikkut aallaavissaq 2004-mi januarip kvartaliani raajanut akitsuutissap tunngavissaa, raajat akitsuusigassat 2002-mi oktoberip kvartaliani aammalu 2003-mi januarip, aprilip julillu kvartaliini tunineqarnerini agguaqatigiissillugu kiilumut akii tunngavigalugit angissusilerlugu. 2004-mi aprilip kvartaliani raajanut akitsuutissap naatsorsornissaanut aallaavissamik naatsorsuinissami raajat akitsuusigassat 2002-mi oktoberip kvartaliani tunineqarneranni agguaqatigiissillugu kiilumut akiat peerlugu raajat akitsuusigassat 2003-mi oktoberip kvartaliani tunineqarneranni agguaqatigiissillugu kiilumut akiannik taarserneqassaaq, tulliilu taamatuttaaq pineqassapput.
Kvartalikkaartumik periusissap qulaani taaneqartup toqqarneqarneranut pissutaavoq Akileraartarnermut Pisortaqarfiup kvartalimi kingullermi tunineqarsimasut nalunaarutigineqarnerannik pissarsisarnermigut kvartalimi tullermi aallaaviusussaq ulluni 15. november, 15. februar, 15. maj aamma 15. august piffissaalluartillugu tamanut saqqummiuttarsinnaassammagu, tassuunakkut selskabit inuillu akitsuummik akiliisussaatitaasut akitsuutip procentiata kvartalimi aallartittussami annertussusissaa ilisimareertassammassuk.
Raajat akitsuusigassat tunineqarneranni agguaqatigiissillugu kiilumut akiata 13,00 kr.-nip aallaavissatut 100,00-imut angissusilerneqarnissaa siunnersuutaavoq. Raajat akitsuusigassat tunineqarneranni agguaqatigiissillugu kiilumut akiat 13,00 kr.-ni qaangerneqartillugu ørit nikinneri tamaasa aallaavissaq aaqqiivigineqartassaaq. Aallaavissaq 100,0769-iuppat raajanut akitsuut 0,01 procentimik angissusilerneqassaaq, aallaavissallu 0,0769 procentpointimik qaffariarneri tamaasa 0,01 procentimik qaffariartassalluni.
Inatsisissatut siunnersuummut ilanngussatut ilanngunneqartumi takuneqarsinnaasutuut assersuutigineqarsinnaavoq, raajat akitsuusigassat kvartalit sisamat ingerlaneranni tunineqartut agguaqatigiissillugu kiilumut akiat 20 kr.-uppat raajanut akitsuut 7 procentiussaaq.
Qaffariaatit 100 procent sinnerlugu akitsuusiiffiginissaat anguniagaanngimmat siunnersuutigineqarpoq, agguaqatigiissillugu kiilumut akip 58,00 kr.-uneratigut raajanut akitsuutip 45,00 procentiusup raajanut akitsuutip qaffasinnerpaaffigissagaa.
Imm. 1 aamma imm. 6 siusinnerusumut sanilliullugit allannguuteqanngillat.
§ 1, nr. 2-mut
Siunnersuutigineqarpoq suliffeqarfiit akitsuummik akiliisussaatitaasut raajanik akitsuusigassanik tunisaqarnerminnik, aallaavissap naatsorsorneqarnissaanut atorneqartussamik naatsorsuusiortarnissaat. Raajat akitsuusigassat tunineqartut naatsorsuusiorneqarnerata taassuma suliffeqarfiit akitsuummik akiliisussaatitaasut, akitsuutip naatsorsorneranut aammalu akitsuutip eqqortumik akilerneqarnissaanik nakkutilliinermut tunngaviusussanik allattuisartussaareernerat assigiinnarpaa.
§ 2-mut
Inatsisartut inatsisaata ulloq 1. januar 2004-miit atortuulernissaa siunnersuutigineqarpoq.