24. november 2003

UKA 2003/143

 

Inatsisartut Naalakkersuisullu pillugit Inatsisartut inatsisaata

allanngortinneqarneranik Inatsisartut inatsisissaattut siunnersuut

pillugu

Inatsisartut Siulittaasoqarfiata

ISUMALIUTISIISSUTAA

siunnersuutip aappassaaneerneqarnerani saqqummiunneqartoq

 

Inatsisartut Siulittaasoqarfiat suliarinninnermini ukuninnga inuttaqarpoq:

Inatsisartut siulittaasuat Jonathan Motzfeldt, (S),
Inatsisartuni ilaasortaq Augusta Salling, siulittaasup tullia siulleq, (A),
Inatsisartuni ilaasortaq Agathe Fontain Aqqaluk Lyngimut, siulittaasup tulliata aappaanut sinniisussaq, (IA),
Inatsisartuni ilaasortaq Per Rosing-Petersen, siulittaasup tulliisa pingajuat, (S),
Inatsisartuni ilaasortaq Per Berthelsen, siulittaasup tulliisa sisamaat, (D)

 

Siunnersuutip imarisai.

Inatsisartut Naalakkersuisullu pillugit Inatsisartut inatsisaata allanngortinneqarneranik Inatsisartut inatsisissaattut siunnersuut Nunanut Allanut Sillamniarnermullu Ataatsimiititaliap ataatsimiititaliatut sullinneqarnerata Naalakkersuisut Allattoqarfiannit Inatsisartut Allattoqarfiannut nuunneqarnissaanik Naalakkersuisut siunnersuutaat tunngassuteqarpoq.

 

Siunnersuutip suliarineqarnera.

Siunnersuut Inatsisartunit siullermeerneqarmat Naalakkersuisut siunnersuutitut saqqummiussaat siamasissumik isumaqatigineqarpoq.

Siullermeerinermut atatillugu ataatsimiititaliap oqartussaaffiinut suleriaasianullu tunngatillugu isummersortoqarpoq. Tamatuma Inatsisartut Inatsisit Atortinneqarnerannut Ataatsimiititaliamik taamatullu Nunanut Allanut Sillimaniarnermullu Ataatsimiititaliamut tusarniaanissamik Siulittaasoqarfik pissutissaqartilersimavaa. Siulittaasoqarfiup tusarniaassutitut allagaa ataatsimiititaliallu taaneqartut akissutaat isumaliutisiissummut matumunnga ilanngunneqarput.

Sammisat tusarniaassutigineqartut ilaat tassa Nunanut Allanut Sillimaniarnermullu Ataatsimiititaliap taaguutaata ullutsinnut naleqquttumik pisarnermullu tunngatillugu atorneqarneranik apeqqut. Tusarniaanermut akissutini inatsisip oqaasertaani ataatsimiititaliap taaguutaata allanngortinneqarnissaanut tunngatillugu nangaassuteqartoqanngilaq. Siulittaasoqarfik isumaqarpoq taaguut "Nunanut Allanut Sillimaniarnermullu Ataatsimiititaliaq" siunissami atorneqartariaqartoq, taamaammallu Inatsisartut Naalakkersuisullu pillugit Inatsisartut Inatsisaata allanngortinneqarneranik Naalakkersuisut inatsisissatut siunnersuutaannut allannguutissatut siunnersuummik saqqummiussilluni.

Nunanut Allanut Sillimaniarnermullu Ataatsimiititaliap oqartussaaffiisa Naalakkersuisunillu peqateqarnerata suleriaasiatalu inatsisitut ilusilerlugu ullutsinnut naleqquttumik oqaasertaliivigineqarnissaanik pisariaqartitsineq tikkuaavigissallugu Siulittaasoqarfik pissutissaqarsorivoq. Tamatuma pinissaata tungaanut maannamut periuserineqartunut Inatsisartullu Suleriaasiannut naapertuuttumik ataatsimiititaliaq suligallassaaq.

Nunatta folketingimut ilaasortaatitaasa marluk ataatsimiititaliami taaseqataasinnaanatik ilaasortaanerat pillugu aalajangersagaq atuuttoq pillugu aaqqissuussinerup atuutiinnartinneqarnissaa Siulittaasoqarfiup pisariaqartutut isiginngilaa. Tassunga tunngatillugu Nunanut Allanut Sillimaniarnermullu Ataatsimiititaliaq Inatsisartut ataatsimiititaliaattut ataavartutut allatulli atugassaqartitaasariaqarpoq, taakkumi nammineerlutik aalajangertarmassuk avataaneersunut paasissutissanik avitseqatiginnittarneq ataqatigiissaarisarnerlu qanoq aaqqiivigineqassasoq. Taamaalilluni ataatsimiititaliap nammineerluni aalajangersinnaasariaqarpaa nunatta folketingimi ilaasortaatitaannik marlunnik pisariaqartutut kissaatiginartutullu suleqateqarneq qanoq aaqqissuunneqarluni sulianut atatillugu ingerlanneqassanersoq. Tamanna Udenrigspolitisk Nævnimik Nunanulluunniit Allanut Ministereqarfimmik suleqateqarnermi nangaatitsilissagaluarpat nangaassutit taamaattut taakkununnga isumaqatigiissuteqarnikkut paaseqatigiissutigineqarlutillu pinaveersaartariaqarput. Tassunga atatillugu oqaatigisariaqarpoq Nunanut Allanut Sillimaniarnermullu Ataatsimiititaliap Udenrigspolitisk Nævnimut Nunanullu Allanut Minstereqarfimmut pitsaanerpaamik suleqatigiinnikkut attaveqarnissaa erseqqissutut immat.

Siunnersuutip suliarineqarnerani apeqqutit allat Siulittaasoqarfimmit qaqinneqartut tusarniaassutitut allakkami akissutitullu allakkani ilanngunneqartuniipput. Inatsisartut Naalakkersuisullu pillugit Inatsisartut inatsisaata iluarsiivigineqarneranik suliamut ilanngullugit apeqqutit suliarineqarnissaat naatsorsuutigalugu atortussat Naalakkersuisunut tunniunneqarput, tassungalu ilan-ngullugu tusarniaanermut akissutini tusarniaavigineqartussatut taaneqartut tusarniaavigineqassasut.

 

Siulittaasoqarfiup inassuteqaataa.

Naalakkersuisut siunnersuutaat allannguutissatullu siunnersuummi ilanngunneqartumi allannguutissatut siunnersuutit ilanngullugit akuersissutigineqassasut Siulittaasoqarfiup inassutigaa.

 

 

	Jonathan Motzfeldt, formand
Augusta Salling		Agathe Fontain
Per Rosing-Petersen		Per Berthelsen