Oqaaseqaatit nalinginnaasut
Naalakkersuisut 2004-mi aningaasanut inatsisissatut siunnersuutaannut atatillugu siunnersuutigineqarpoq, aningaasanik ikisilluni pinnguaatinut pissarsissutaasinnaasunut pissarsissutaasinnaanngitsunullu akileraarutip 9 pct.-it missaannik qaffanneqarnissaa.
Siunnersuutip aningaasarsiornikkut tunngavigaa aningaasanik ikisilluni pinnguaatitigut iluanaarutaasartut ilaat Landskarsimut akileeraarutitigut annertunerusumik isertitsissutaanissaat. Ilunaarutaasartut pineqartut aningaasanik ikisilluni pinnguaatinik piginnittut maannakkut pissarsiarisarpaat.
Aningaasanik ikisilluni pinnguaatinut akileraarummik qaffaanerup ukiumi aningaasanut inatsiseqarfiusumi 2004-mi ukiunilu missingersuusiorfiusuni 1 mio. kr.-inik isertitaqaataanerunissaa naatsorsuutigineqarpoq, tassa aningaasanik ikisilluni pinnguaatinut akileraarut tamarmiusoq ukiumut 14,5 mio. kr.-iusassalluni. Aningaasat 2004-mi aningaasanut inatsisissatut siunnersuummi saqqummiunneqartumi, hovedkonto 20.11.60, Missingersuutinut iluarsiissutit-ni ilanngunneqareerput. Aningaasanik ikisilluni pinnguaatinut akileraarut 2004-mi januarip kvartalianut tunngasoq ulloq 1. december 2003-mi akilerneqartussanngortussaammat ukiumi aningaasanut inatsiseqarfiusumi 2003-mi 250.000 kr.-inik isertitaqarnerunissaq naatsorsuutigineqarpoq.
Aningaasanik ikisilluni pinnguaatinut akileraarutip qaffanneqarnera akileraarutitigut isertittakkanut sunniuteqartussaavoq, aningaasanimmi ikisilluni pinnguaatinik piginnittut aningaasarsiamik akileraaruteqaataasussat naatsorsorneranni aningaasanik ikisilluni pinnguaatinut akileraarut ilanngaatigisinnaammassuk. Kommunit ataatsimut isigalugit isertitassaraluarmikkut annaasassaat annerpaamik 275.000 kr.-nit missaanniissangatinneqarpoq. Landskarsip isertitassaraluarmigut annaasassaasa annerpaamik 111.000 kr.-iunissaat naatsorsuutigineqarpoq, taakkulu nuna tamakkerlugu akileraarutinut missingersuutini 684 mio. kr.-inut missiliuussani qularnartortaqartuni ilaareersutut isigineqarput.
Akileraarummik qaffaaneq allaffissornermut sunniuteqarnavianngilaq.
Aalajangersakkanut ataasiakkaanut oqaaseqaatit
§ 1, nr. 1-imut
Aningaasanik ikisilluni pinnguaammut pissarsissutaasinnaasumut akileraarutip siullermut 54.000 kr.-iniit 59.000 kr.-inut, aappaannut 60.000 kr.-iniit 65.000 kr.-inut, tulliuttunullu tamanut 66.000 kr.-iniit 71.000 kr.-inut qaffanneqarnissaa siunnersuutigineqarpoq.
§ 1, nr. 2-mutAningaasanik ikisilluni pinnguaammut pissarsissutaasinnaanngitsumut akileraarutip siullermut 5.000 kr.-iniit 5.460 kr.-inut, aappaannut 6.000 kr.-iniit 6.540 kr.-inut, tulliuttunullu tamanut 7.000 kr.-iniit 7.630 kr.-inut qaffanneqarnissaa siunnersuutigineqarpoq.
§ 2-mutInatsisartut inatsisaata ulloq 30. november 2003-mi atuutilernissaa, akileraarutillu angissusiisa allanngortitat akileraarummut 2004-mi januarip kvartalianut tunngasumut siullermeerlutik atortuunissaat siunnersuutigineqarpoq.