Oqaaseqaatit nalinginnaasut

 

Landskarsi isertitaqarnerulersinniarlugu siunnersuutigineqarpoq qamutit motoorillit oqimaassusertik malillugu immikkoortunut pingasunut agguataarneqarsimasut aammalu motorcykelit ukiumut akileraarutaasa ullormit 1. januar 2004-miit atuutilersumik 22 pct.-imik qaffanneqarnissaat.

Qamutit motoorillit akileraarutaannik qaffaanissamik siunnersuutip biilit tamarmiullutik amerlassusiisa annikitsuararsuaannarmik ikileriaateqarnissaannik kinguneqarnissaa naatsorsuutigineqarpoq, taamaattumik inatsisissatut siunnersuutip landskarsimut 2004-mi ukiunilu missingersuusiorfiusuni ukiumut 7 mio. kr.-inik isertitsissutaanerunissaa naatsorsuutigineqarpoq. Kisitsit 2004-mi aningaasanut inatsisissatut siunnersuummi saqqummiunneqartumi ilanngullugu naatsorsorneqareerpoq, hovedkonto 20.11.60, Missingersuutinut iluarsiissutit.

Inatsisissatut siunnersuut allaffissornermut annikitsuararsuaannarmik sunniuteqassaaq.

 

 

Aalajangersakkanut ataasiakkaanut oqaaseqaatit

 

§ 1, nr. 1-imut

Qamutit motoorillit 900 kg.-t tikillugit oqimaassusillit ukiumut akileraarutaasa 5.958 kr.-inut qaffanneqarnissaat siunnersuutaavoq.

§ 1, nr. 2-mut

Qamutit motoorillit 901 kg.-niit 1.500 kg.-t tikillugit oqimaassusillit ukiumut akileraarutaasa 8.374 kr.-inut qaffanneqarnissaat siunnersuutaavoq.

§ 1, nr. 3-mut

Qamutit motoorillit 1.500 kg.-t qaangerlugit oqimaassusillit ukiumut akileraarutaasa 10.950 kr.-inut qaffanneqarnissaat siunnersuutaavoq.

§ 1, nr. 4-mut

Motorcykelit ukiumut akileraarutaasa 3.220 kr.-inut qaffanneqarnissaat siunnersuutaavoq.

§ 2-mut

Inatsisartut inatsisaata ullormit 1. januar 2004-miit atuutilernissaa siunnersuutaavoq.