2. november 2003

UKA 2003/164

 

Inatsisartut Naalakkersuisullu pillugit
Inatsisartut inatsisaata allanngortinneqarneranik
Inatsisartut inatsisissaattut siunnersuut
(Naalakkersuisut siulittaasuata saniatigut naalakkersuisunut ilaasortat
arfineq-marluusinnaanerat kiisalu aningaasanut inatsisip akuerineqartarneranut
killiliussaq pillugu kingunerisatut iluarsiissut)

pillugu

Inatsisartut Inatsisit Atortinneqarnerannut Ataatsimiititaliaata

ISUMALIUTISSIISSUTAA

siunnersuutip aappassaaneerneqarnerani saqqumiunneqartoq

 

Inatsisartut Inatsisit Atortinneqarnerannut Ataatsimiititaliaat suliarinninnermini ukuninnga inuttaqarpoq:

 

Inatsisartuni ilaasortaq Ane Hansen, Inuit Ataqatigiit, siulittaasoq
Inatsisartuni ilaasortaq Isak Davidsen, Siumut, siulittaasup tullia
Inatsisartuni ilaasortaq Enos Lyberth, Siumut
Inatsisartuni ilaasortaq Otto Jeremiassen, Atassut
Inatsisartuni ilaasortaq Marie Fleischer, Demokraatit

 

Inatsisartut Inatsisit Atortinneqarnerannut Ataatsimiititaliaata siunnersuut siullermeerneqareermat misissuataarpaa.

Inatsisit Atortinneqarnerannut Ataatsimiititaliap malugniarpaa siunnersuut marlunnik immikkoortortaqartoq.

Aningaasanut inatsimmik Inatsisartut akuersissutiginnittarnerannut killiliussamik allanngortitsineq kingunerisatut iluarsiissutaavoq, Inatsisartut inatsisaannik Namminersornerullutik Oqartussat missingersuutaat pillugit Inatsisartut inatsisaannut, Inatsisartut inatsisaatigut nr. 1, 23. maj 2000-imeersukkut allanngortinneqartumut, naapertuuttunngortitsisoq. Tassunga Inatsisit Atortinneqarnernnut Ataatsimiititaliaq oqaaseqarfiginnissutissaqanngilaq.

Tamatuma saniatigut siunnersuummi pineqarpoq Naalakkersuisuni ilaasortat amerlassusissaattut qummut killigitinneqartup qaffanneqarnissaa. Taamaalilluni Naalakkersuisut, Naalakkersuisunut Siulittaasup saniatigut, Naalakkersuisuni ilaasortanik marlunniit arfineq-marluk tikillugit (siusinnerusukkut marlunniit arfinillit tikillugit) amerlassuseqalersinnaassapput.

Inatsisit Atortinneqarnerannut Ataatsimiititaliami amerlanerussuteqartut Siumumeersut Inuit Ataqatigiinneersullu tamatumunnga ima oqaaseqarniarput:

Naalakkersuisuni ilaasortat amerlassusiisa killiliivigineqarnerat atuuttoq 1988-imi aalajangersarneqarpoq. Piffissap tamatuma kingorna Namminersornerullutik Oqartussanit akisussaaffiit arlalippassuit tiguneqarput. Tamatuma saniatigut Naalakkersuisooqatigiit kissaatigaat naalakkersuisoqarfimmik nutaamik pilersitsisoqassasoq: Namminersorneq pillugu Naalakkersuisoqarfimmik. Tamatuma naalakkersuisuni ilaasortat amerlassutsimikkut ilaneqarnissaat pisariaqalersippaa.

Amerlanerussuteqartut taaneqartut naalakkersuisoqarfimmik nutaamik pilersitsinissaq, tassungalu atatillugu Naalakkersuisut amerlineqarnissaat, taperserpaat.Amerlanerussuteqartut Siumut Inuit Ataqatigiillu maluginiarsimavaat Namminersorneq pillugu Isumalioqatigiissitat paasinninnerat malillugu suliassanik pineqartunik Naalakkersuisut Siulittaasuata naammaginartumik anertussusilimmik kiffaanngissuseqarluni naalakkersuisuni ilaasortat akornanni sapinngisamik tulluarnerpaamik agguataarisinnaanera qulakkeerneqartariaqartoq. Taamaammat apeqqutaalerpoq inatsisartut naalakkersuisullu pillugit Inatsisartut inatsisaanni naalakkersuisuni ilaasortat amerlassusii iluarsiivigissallugit ilumut tulluartuunersoq. Taamatut iluarsiinissaq pisariaqavissutut isumaqarfiginanngilaq, Naalakkersuisummi Siulittaasuata Naalakkersuisut inuttalersorneqarnissaannik siunnersuutaa Inatsisartunut taasissutigitinneqartussaammat, Naalakkersuisullu atuunnerinut aningaasaqarnikkut killissarititaasut aningaasaliissuteqartarnermut inatsisikkut immikkut aalajangersaavigineqartarmata.

Tamanna tunngavigalugu amerlanerussuteqartut allannguutissatut siunnersuummik naalakkersuisuni ilaasortat amerlassusissaannik aalajangersakkap inatsisartut inatsisaannit peerneqarneranik kinguneqartussamik saqqummiussipput.

Inatsisit Atortinneqarnerannut Ataatsimiititaliami ikinnerussuteqartut Atassummeersut Demokraatineersullu isumaqarput tunngavissatut saqqummiunneqartoq tunngavigalugu Naalakkersuisut amerlineqarnissaannut tunngavissaqanngitsoq.

Ikinnerussuteqartut erseqqissarusuppaat namminersulernissaq ikinnerussuteqartut akerlerinngimmassuk. Pingaartuuvorli akisussaaffinnik nutaanik tigusinissatsinnut piareersimalertinnata nuki-ngiussinnginnissarput. Tamakkiisumik namminersulissagaanni imminnut aningaasaqarnikkut napatissinnaasariaqarpoq - taamaaliunngikkuttami innuttat ilaasa sanngiinnerpaamik inissisimasut atugarissaarnissaat sapangittussaagatsigu. Taamaattumik pingaartuuvoq namminersulernissap eqqunneqarnissaanut tunngavissat - tamatumalu nassatarisassaasa - tamakkiisumik qulaajaavigineqarsimanissaat. Ikinnerussuteqartuttaaq pingaartippaat aalajangiinissaq taama pingaaruteqartigisoq innuttat qulaatiinnarlugit pissanngitsoq.

Suliassalli namminersulernissamik suliap ingerlasup akisussaassuseqartumik ingerlaqqinnissaanut attuumassuteqartut Naalakkersuisut amerlinngikkaluarlugit ingerlanneqarsinnaalluarput. Ingerlatsiviit Naalakkersuisut Siulittaasuata naalakkersuisoqarfimmut nutaamut inissikkusutai Naalakkersuisut Siulittaasuata, maannakkut taamaallaat tassaasut Naalakkersuisut Allattoqarfiat Aqutsinermullu Pisortaqarfik, oqartussaaffiisa ataannut ajornaquteqanngitsumik inissinneqarsinnaapput.

Naalakkersuisoqarfimmik nutaamik pilersitsineq allaffissornikkut aningaasartuutit amerlinerinik kinguneqartussaavoq, tamannalu pisortani aningaasartuutigineqartartut ikilileriffigineqarnissaannik pisariaqartitsinermik oqaluttarnermut naapertuuttuunani.

Taamaammat ikinnerussuteqartut inerniliussatuarisinnaasaat tassaavoq, naalakkersuisooqatigiinni assigiinngitsunik isumallit tamakkerlugit naammaginartunik amerlassusilinnik naalakkersuisutut inissanik pissarsisinneqarnissamik kissaateqarnerat Naalakkersuisut siunnersuutaannut tunngaviorpiartoq. Ikinnerussuteqartut isumaqarput innuttaasut tamatumunnga akiliisuutissallugit pissutissaqanngitsoq.

Taamaammat ikinnerussuteqartut siunnersuut itigartinneqassasoq inassutigaat.

 

Taamatut oqaaseqarluni Inatsisit Atortinneqarnerannut Ataatsimiititaliap siunnersuut aappassaaniigassanngortippaa.

 

	Ane Hansen Inuit Ataqatigiit, Formand
Isak Davidsen Siumut		Enos Lyberth Siumut
Otto Jeremiasen Atassut		Marie Fleischer Demokraterne