Nalinginnaasumik nassuiaatit
1. Inatsisissatut siunnersuutip tunuliaqutaa siunertaalu
Inatsisartut Naalakkersuisullu pillugit Inatsisartut inatsisaata allanngortinneqarnissaanik siunnersuut inatsimmi oqaasertanik marlunnik allannguinermik imaqarpoq. Ilaatigut Naalakkersuisut siulittaasuata saniatigut Naalakkersuisut arfineq-marlunnik ilaasortaqarsinnaanerannik periarfissiisoqarpoq ilaatigullu Inatsisartut aningaasanut inatsimmik akuersisarnissaannut killigititaq pillugu kingunerisatut iluarsiisoqarluni.
Inatsisartut naalakkersuisullu pillugit inatsimmi maanna atuuttumi naalakkersuisut tassaapput Naalaakkersuisut siulittaasuat kiisalu marlunnit arfinillit angullugit Naalakkersuisunutilaasortat. Inatsisip siulliup akuerineqaqqaarneraniilli paasinarsisimavoq Naalakkersuisunut ilaasortat amerlineqartariaqartut. Taamaattumik Naalakkersuisut siulittaasuata saniatigut Naalakkersuisut arfineq-marlunnik ilaasortaqarsinnaanerat siunnersuutigineqarpoq.
Namminersornerullutik Oqartussat missingersuutaat pillugit Inatsisartut inatsisaata allanngortinneqarneranik Inatsisartut inatsisaanni aningaasanut inatsisip ukioq aningaasanut inatsiseqarfiusoq sioqqullugu novembarip ulluisa 15-ianni akuerineqartarnissaa killiliunneqarpoq. Tamatuma kingunerisaanik aamma Inatsisartut Naalakkersuisullu pillugit Inatsisartut inatsisaanni iluarsiisoqartariaqarpoq inatsisit imminnut ataqatigiilersikkumallugit.
2. TusarniaaneqInatsisissatut siunnersuut Namminersorneq pillugu Allattoqarfimmut, Aningaasaqarnermut Pisortaqarfimmut, Aatsitassanut Ikummatissanullu Pisortaqarfimmut kiisalu Siulersuisunut ilaasortaatitanut Allattoqarfimmut tusarniaassutigineqarpoq.
3. Aningaasaqarnikkut kiisalu allaffissornikkut kingunerisassaiInatsisartut Naalakkersuisullu pillugit Inatsisartut inatsisaata allanngortinneqarnissaanik siunnersuummi ilaatigut Naalakkersuisut inatsisartut inatsisaannut atuuttumut sanilliullugu Naalakkersuisunut ilaasortamik ataatsimik amerlanerusinnaanerat periarfissinneqarpoq. Tamatuma kingunerissavaa aaqqissuussinermut maanna atuuttumut sanilliullugu naalakkersuisoqarfimmik nammineq ingerlatalimmik pilersitsisoqarsinnaanera. Taakku suliassaqarfinnit allanit nuuneqarlutilluunniit nutaamik pilersinneqassapput.
Naalakkersuisoqarfimmik nutaamik pilersitsineq Naalakkersuisunut ilaasortap ministerimillu sullissinermut il.il. allaffissornikkut sulisut aningaasarsiaannut, soraarnerussutisiassaannut, allaffissornermut il.il. toqqaannartumik aningaasartuuteqarnissamut atatillugu aningaasaqarnikkut kinguneqartussaapput. Tamakku saniatigut Naalakkersuisut Aningaasanut inatsimmik tulleriiaarinerannut atatillugu suliassannik nutaanik takkuttoqarsinnaavoq. Nukissat ilaat ingerlaannartumik naalakkersuisoqarfimmut nutaamut malinnittussaapput.
Aningaasaqarnikkut allannguutissat tamarmik Aningaasanut inatsisissatut siunnersuummi imaluunniit Ilassutitut aningaasaliissutini takuneqarsinnaassapput. Aningaasaqarnermut tunngatillugu allannguutissat maannakkuugallartoq naatsorsorneqarsinnaanngillat, tassami naalakkersuinikkut suliniuteqarfiusussat suussusersineqanngimmata akuersissutigineqaratillu.
Siunnersuummi aalajangersakkanut ataasiakkaanut nassuiaatit
§ 1, nr. 1-imut
Siunnersuutigineqarpoq Naalakkersuisut Naalakkersuisut siulittaasuannik aamma Naalakkersuisunut ilaasortanik arfineq marluk tikillugit amerlassusilinnik ilaasortaqalissasut. Taamaaliornikkut maannakkut Inatsisartut Naalakkersuisullu pillugit Inatsisartut inatsisaannut aalajangerakkamut, Naalakkersuisut arfinillit tikillugit ilaasortaqarnissaannik taamaallaat periarfissiisumut, naleqqiullugu Naalakkersuisut Naalakkersuisunut ilaasortanut amerlanerusunut Naalakkersuisut suliassaannik siammaanissaannut periarfissinneqassapput.
§ 1, nr. 2-mutNamminersornerullutik Oqartussat missingersuutaat pillugit Inatsisartut inatsisaata allanngortinneqarnera pillugu Inatsisartut inatsisaat nr. 1, 23. maj 2000-imeersup kingunerisaanik siunnersuutigineqarpoq Inatsisartut Aningaasanut inatsimmik akuersissuteqartarnerannut killiliussaq pillugu Inatsisartut Naalakkersuisullu pillugit Inatsisartut inatsisaata kingunerisaanik iluarsiissuteqartoqassasoq. Siunnersuutigineqarpoq Aningaasanut inatsisissap akuersissutigineqartarneranut killiliussaq ukioq aningaasaliiviusoq sioqqullugu 15. novembarimut allanngortinneqassasoq.
§ 2-mutSiunnersuutigineqarpoq Inatsisartut inatsisissaat atuuttussanngortinneqaannarluni atuutilissasoq.