6. marts 2003 UPA 2003/127
Nalinginnaasumik nassuiaatit
Inatsisartutut sulinermut tapiissutinik qinnuteqarnissamut tunniussinissamullu aalajangersakkap maanna atuuttup ukiumut siulianut naatsorsuutinik kukkunersiukkanik, tapiissutinik qinnuteqaateqarnermut peqatigitillugu, nassiussinissamik piumasaqaatitaqarnera naleqquttuunngitsoq paasinarsisimavoq.
Tapiissutinik pissarsisinnaatitaasut ukiumut siulianut naatsorsuutinik kukkunersiukkanik janua-imili nassiussereersinnaanerat piviusumik isigalugu periarfissaqanngilaq.
Naleqquttuunngitsup tamatuma siunnersuutikkut matumuuna piviusunngortinneqarsinnaasumik aaqqiivigineqarsinnaanera anguniarneqarsimavoq, partiimummi, kattusseqatigiinnut attaviitsumulluunniit tunniunneqarsinnaasutut tapiissutit marlunnut avillugit tunniunneqartarmata. Tapiissuteqarfigineqarnissamik qinnuteqaammik, tapiissutitut qinnuteqaatigineqartut atorneqarnissaannut aammalu ukiup siuliani tapiissutit atorneqarsimanerannut uppernarsaammik ilaqartinneqartumik, Siulittaasoqarfiup suliarinninnera tunngavigalugu tapiissutit affaat siulliit tunniunneqassapput. Naatsorsuutit kukkunersiukkat Inatsisartut Siulittaasoqarfiannut nassiunneqarpata tapiissutit avinnerisa arlaat tunniunneqassapput.
Aalajangersakkanut ataasiakkaanut nassuiaatit
§ 1, nr. 1-imut
Inatsisartut inatsisaanni §§-ni 2-4 maleruagassat malillugit Inatsisartuni sulinermut partiit, kattusseqatigiit attaviitsullu tapiissutinik pisinnaatitaasut Inatsisartut Siulittaasoqarfiannut qinnuteqaateqarnermikkut, tapiissutisinissamut piumasaqaatit eqquutsinneqarneri Siulittaasoqarfimmit aalajangerneqareerpat, tapiissutit affaannik tunineqarsinnaapput. Tapiissutitut ukiup siuliani tiguneqarsimasinnaasut naalakkersuinikkut sulinermut atorneqarsimanerannik tamatumalu ingerlateqqinneqalersaarneranik Siulittaasoqarfimmut uppernarsaammik qinnuteqaat ilaqartinneqassaaq. Ukiumut siulianut naatsorsuutit kukkunersiukkat tapiissutinik pissarsisumit Inatsisartut Siulittaasoqarfiannut nassiunneqarpata tapiissutit affaat sinneruttut aatsaat tunniunneqassapput. Naatsorsuutit kingusinnerpaamik ulloq 30. juni nassiunneqassapput.
§ 2-mut
Allannguutit atuutilissapput ulloq 31. december 2003-mi.