19. marts 2003

UPA 2003/25

 

Piniarneq aallaaniarnerlu pillugit Inatsisartut inatsisaata allanngortinneqarneranik Inatsisartut inatsisissaattut siunnersuut

pillugu

Inatsisartut Aalisarnermut, Piniarnermut Nunalerinermullu Ataatsimiititaliaata

ISUMALIUTISSIISSUTAA

inatsisissatut siunnersuutip aappassaaneerneqarnerani saqqummiunneqartoq

 

Inatsisartut ataatsimiititaliaat suliarinninnermini ukuninnga inuttaqarpoq:

 

Inatsisartuni ilaasortaq Jensine Berthelsen, Atassut, siulittaasoq
Inatsisartuni ilaasortaq Ole Dorph, Siumut, siulittaasup tullia
Inatsisartuni ilaasortaq Ole Thorleifsen, Siumut
Inatsisartuni ilaasortaq Agathe Fontain, Inuit Ataqatigiit
Inatsisartuni ilaasortaq Palle Christiansen, Demokraatit

 

UPA 2003-mi siullermeerinninnerup kingorna Inatsisartut ataatsimiititaliaata Piniarneq aallaaniarnerlu pillugit Inatsisartut inatsisaata allanngortinneqarneranik Inatsisartut inatsisissaattut siunnersuut nassuiaatitai ilanngullugit misissuataarpaa.

Tusarniaanermit akissutisiat

Siunnersuutip matuma ataatsimiititaliami oqaluuserineqarnissaanut atugassatut tusarniaanermi akissutigineqartut nuutinneqarnerinik ataatsimiititaliaq piniarpoq.

Siunnersuutip imarisai

Siullermik Piniarneq aallaaniarnerlu pillugit Inatsisartut inatsisaata allanngortinneqarneranik Inatsisartut inatsisissaattut siunnersuut Inatsisartut Aalisarnermut, Piniarnermut Nunalerinermullu Ataatsimiititaliaata qujaruppaa. Inatsisartut Ombudsmandiata saaffiginnissutaa ilaatigut tun-ngavigalugu inatsisissatut siunnersuummi allannguinerit erseqqissaanerillu pisut ataatsimiititaliap maluginiarpaa.

Piniarneq aallaaniarnerlu pillugit Inatsisartut inatsisaanni maannakkut atuuttukkut ataatsimoorluni tikaagullinniarnermi siuttuusussamik najukkami aalisartut piniartullu peqatiiffiata toqqaasinnaanermut piginnaatitaanissaanik periarfissamik amigaateqartoqarnera Inatsisartut Ombudsmandiata tassuuna innersuussutigaa.

Tamatuma saniatigut, Piniarnermut siunnersuisoqatigiit ilaasortaligaaneratigut, inatsisissatut siunnersuut iluarsiissutissamik imaqarpoq, taamaalilluni Aalisarnermut Piniarnermut Nunalerinermullu Pisortaqarfik, kiisalu Avatangiisinut Pinngortitamullu Pisortaqarfik siunnersuisoqatigiinnut pingaarnerusumik taaseqataasinnaanatik ataatsimeeqataasartutut siunissami inissimasussanngussallutik. Tamanna ataatsimiititaliap isumaqatigaa, suliassaqarfittummi pisortaqarfiit pisortaqarfinnik taakkuninngarpiaq siunnersuisutut suliaqartuni ilaasortaatitaqarlutik peqataanissaat tulluarpallaarnavianngimmat.

§ 16, imm. 4-p oqaasertaliivigineqarneratigut Aalisarnermut siunnersuisoqatigiinnut maleruagassanut atuuttunut Piniarnermut siunnersuisoqatigiinnik tusarniaasarnermut maleruagassat naapertuuttunngortinneqarput. Taamatut allannguuteqartitsinissamut ataatsimiititaliaq isumaqataavoq, Piniarnermullu siunnersuisoqatigiinnik tusarniaasarnerup naleqqussaavigineqarnissaa pitsaasutut isigalugu. Piniarnermut siunnersuisoqatigiinnut 1997-imi suliakkiissut ataatsimiititaliap Naalakkersuisunut naggataatigut malugeqqussavaa, tassani oqaatigineqarmat siunnersuisoqatigiit Naalakkersuisunut oqaaseqaateqarumallutik suliassanik suliarinnissinnaasut. Suliakkiissummi maannakkut atuuttumi saaffiginnissutit tamakkerlugit oqaaseqarfiginissaannut Piniarnermut siunnersuisoqatigiit pisussaafeqanngillat. Taamaammat inatsisip allannguuteqarneranut atatillugu Piniarnermut siunnersuisoqatigiinnut suliakkiissutip Naalakkersuisunit aamma allanngortinneqarnissaa ataatsimiititaliap kaammatuutigissavaa, taamaaliornikkut Naalakkersuisunit saaffiginnissutit tamakkerlugit Piniarnermut siunnersuisoqatigiinnit oqaaseqarfigalugit akissuteqarfigineqarnissaat pisussaafinngortinneqaqqullugu. Tamanna siunnersuisoqatigiit tusarniaavigineqartarnerannut atatillugu nalornilernerit pilersannginnissaannik siunertaqassaaq.

Taama oqaaseqarluni Ataatsimiititaliap isumaqatigiittup siunnersuut maannakkut iluserisamisut iluseqarluni akuersissutigineqassasoq inassutigaa.

Inatsisartut Aalisarnermut, Piniarnermut Nunalerinermullu Ataatsimiititaliaata taamaalilluni Piniarneq aallaaniarnerlu pillugit Inatsisartut inatsisaata allanngortinneqarneranik Inatsisartut inatsisissaattut siunnersuut Inatsisartunut aappassaaniigassanngortippaa.

 

	Jensine Berthelsen, Atassut, siulittaasoq
Ole Dorph,Siumut siulittaasup tullia		Ole Thorleifsen Siumut
Agathe Fontain Inuit Ataqatigiit		Palle Christiansen Demokraatit