Naligiissitaanissamut Siunnersuisoqatigiit pillugit Inatsisartut inatsisaata allanngortinneqarneranik Inatsisartut inatsisissaattut siunnersuummut nassuiaatit
Nalinginnaasumik nassuiaatit
Naligiissitaanissamut Siunnersuisoqatigiit pillugit inatsisartut inatsisaat atuuttoq 1998-imeersuuvoq. Siunnersuisoqatigiit aqqanilinnik ilaasortaqarput, siulittaasoq Naalakkersuisunit toqqarneqartarluni siunnersuisoqatigiinnilu nalinginnaasumik ilaasortat qulit kattuffinnit arlalinnit partiinillu inassuteqaatit malillugit Naalakkersuisunit toqqagaallutik.
Naligiissitaanissamut Siunnersuisoqatigiit isumaqarput siunnersuisoqatigiinni ilaasortat ikilineqartariaqartut, aammattaaq Siunnersuisoqatigiit katitigaanerat allanngortinneqartariaqartoq. Naligiissitaanissamut Siunnersuisoqatigiit ilaasortat ikilineqarnissaannik kissaataanut pissutaavoq Sinnersuisoqatigiinnut aningaasaqarnikkut killissarititaasut, ataatsimiinnerit annertuumik aningaasartuuteqarfiusarmata ilaasortat taama amerlatigitillugit. Ilaasortat katitigaanerisa allanngortinneqarnissaat maanna kattuffinniit partiinillu naleqqunnerusumik tunuliaqutaqarnissamik, aammalu ilaasortat siullertut naligiissitaanissamik suliaqarnermi tunniusimanerujussuullutik eqeersimaarnerullutillu peqataanissaannik kissaateqarnermik pissuteqarpoq. Pingaartumik kissaataavoq Siunnersuisoqatigiinni ilaasortaqalissasoq meeqqanut inuusuttunullu tunngassutilinnik suliaqartunik kiisalu meeqqanut inuusuttunullu sullissisuusunik, taamaalilluni naligiissitanissamik suliaqarnermi pingaartumik meeqqat inuusuttullu aallaavigineqarlutik.
Naligiissitaanissamut Siunnersuisoqatigiit pillugit inatsisikkut pingaarnertut anguniarneqarpoq angutit arnallu naligiissitaanerisa siuarsarneqarnissaa.
Naligiissitaanissamut Siunnersuisoqatigiit pillugit inatsisartut inatsisaata allanngortin-neqarnissaanik siunnersuutip matuma siunertaraa Siunnersuisoqatigiit tunniusimanerusumik, eqaannerusumik sunniuteqarnerusumillu sulinissamut periarfissagissaarnerulernissaa.
Aningaasatigut allaffissornikkullu kingunerisassai.
Inatsisissatut siunnersuut aningaasatigut kinguneqassanngilaq, Naligiissitaanissamut Siunnersuisoqatigiinnut Nunatta Karsiata tapiissutaani sipaaruteqartoqareernera pissutigalugu. Aningaa-saliissutit allaffinnik attartornermi, sulisunut, ingerlatanut assigiinngitsunut, angalanerit ataatsimiittarnerillu ilanngullugit kiisalu Naligiissitaanissamut Siunnersuisoqatigiinni ilaasortat akissarsiaannut il.il. aningaasartuutinik matussusiissapput.
Siunnersuut allaffissornikkut kinguneqassanngilaq.
Aalajangersakkanut ataasiakkaanut nassuiaatit
§ 1-imut
Nr. 1-imut:
Aalajangersagaq Naligiissitaanissamut Siunnersuisoqatigiit katitigaanerannut attuumassuteqarpoq. Naligiissitaanissamut Siunnersuisoqatigiit sapinngisamik inuiaqatigiinni tamanut attuumassutilinnik ilaasortaqarnissaa pingaaruteqarpoq, aammattaaq pingaaruteqarpoq Siunnersuisoqatigiinni ilaasortat ima amerlassuseqassasut, ulluinnarni eqaatsumik sunniuteqartumillu sulisinnaallutik.
Naligiissitaanissamut Siunnersuisoqatigiit atuuttut siunnersuutigisimavaat, Siunnersuisoqatigiit siunissami toqqarneqartassasut kattuffinnit meeqqanut inuusuttunullu attuumassutilinnik suliaqartunit, kattuffinnit meeqqanik inuusuttunillu sullitaqartunit, peqatigiiffinnit sulisitsisunik sinniisunit, kattuffinnit sulinermik inuussutissarsiuteqartut sinniisuinit, kattuffinnit arnanik sinniisunit aammalu kattuffinnit angutinik sinniisunit inassuteqaatit malillugit, aammalu Siunnersuisoqatigiit inatsisinut tunngasunut suliaqartartuisa kattuffiit soqutigisaqaqatigiillu arlallit attuumassuteqartut tikkuarsimavaat.
Naligiissitaanissamut Siunnersuisoqatigiit sapinngisamik pitsaanerpaamik sulisinnaaqqullugittaaq Naligiissitaanissamut Siunnersuisoqatigiinni arnat angutillu naligiikannersumik ilaasortaanissaat pisariaqarpoq. Tamanna arnat angutillu ikinnerpaamik pingasunik ilaasortaatitaqarnissaat pillugu aalajangersakkamut tunuliaqutaavoq.
Inassuteqaatit tunuliaqutaralugit naalakkersuisut ilaasortassat toqqassavaat, taamaalilluni arnat angutillu amerlaqatigiinnissaannik piumasaqaat piviusunngortillugu.
Kalaallit Nunaanni sulisitsisut peqatigiiffii ataatsimoorlutik sapinngisamik ajornanngippat arnamik angummillu inassuteqassapput. Kalaallit Nunaanni sulisitsut peqatigiiffii maannaangaaq tassaapput GA, Niuernermut, Sullissinermut Angallannermullu Sulisitsut Peqatigiiffiat kiisalu Inuit Nunaanni Sulisitsisut Peqatigiiffiat.
Sulinermik inuussutissarsiuteqartut kattuffiisa anginerit pingasut ataatsimoorlutik sapinngisamik ajornanngippat angummik arnamillu inassuteqassapput. Sulinermik inuussutissarsiuteqartut kattuffii anginerit pingasut maannangaaq tassaapput, SIK, IMAK aammalu AK.
Sulisitsisut peqatigiiffiinit sulisitsisullu kattuffiinit inuit inassutigineqartut kattuffinni inassuteqaateqartuni ilaasortaassapput.
Kattuffiit Tulararfik (nuna tamakkerlugu ulloq unnuarlu paaqqinnittarfiit peqatigiiffiat) aammalu KANUKOKA (meeqqanut inuusuttunullu suliassaqarfimmi kommunini atorfeqartunut), taakku tamarmik meeqqanik inuusuttunillu sullitaqartuupput, ataatsimoorlutik ajornanngippat angummik arnamillu inassuteqassapput. Inuit inassutigineqartut meeqqanik inuusuttunillu ulluunerani imaluunniit ulloq unnuarlu paaqqittarfinni sulisut kattuffiisa arlaannut ilaasortaassapput.
Kattuffiit peqatigiiffiilluunniit Sorlak, PIP aammalu Isumaginninnermi Siunnersortit Peqatigiiffiat, tamarmik meeqqanut inuusuttunullu suliaqartuusut, kiisalu soqutigisaqaqatigiiffik KNAPK, ataatsimoorlutik ajornanngippat angummik arnarmillu inassuteqassapput. Kattuffinnit peqatigiiffinnilluunniit inuit inassutigineqartut kattuffiit inassuteqaateqartut ilaanni ilaasortaassapput.
Arnat Peqatigiit Kattuffiat aamma Qimarnguiit Kattuffiat ataatsimoorlutik arnamik inassuteqassapput. Arnaq inassutigineqartoq kattuffiit ilaanni ilaasortaassaaq.
Kalaallit Nunaanni angutit oqaloqatigiittartoqatigiit ataatsimoorlutik angummik inassuteqassapput. Angut inassutigineqartoq oqaloqatigiittartoqatigiit ilaanni ilaasortaassaaq.
Naligiissitaanissamut Siunnersuisoqatigiit toqqarneqareerunik ukiuni sisamani atuutissapput.
Maannamut atuuttoq 1998-ip naalernerani toqarneqarpoq. Taamaalilluni Naligiisitaanissamut Siunnersuisoqatigiit pisariaqartitaminnik eqqissillutik sulissapput.
Nr. 2-mut:Naligiissitaanissamut Siunnersuisoqatigiinni ilaasortaq suliaminik ingerlatsisinnaajunnaarpat, kattuffiit inassuteqaateqartut § 3 imm. 2 - 7-mi aalajangersakkat naapertorlugit piffissap ukiut sisamaasut sinneranut angummik/arnamik inassuteqarsinnaapput.
§ 2-mut
Allannguutit 1. maj 2003-mi atuutilissapput.