27. marts 2003

UPA 2003/21

 

A l l a n n g u u t i s s a t u t s i u n n e r s u u t

uunga

Naligiissitaanissamut Siunnersuisoqatigiit pillugit Inatsisartut inatsisaata allanngortinneqarneranik Inatsisartut inatsisissaattut siunnersuut

 

 Aappassaaneerinninnermut Naalakkersuisunit saqqummiunneqartoq.

 

 

Siunnersuutip qulequtaanut qulequtaaraanullu

1. Siunnersuutip qulequtaa qulequtaaraalu ima oqaasertaqassapput:
"Naligiissitaanissamut Siunnersuisoqatigiit pillugit Inatsisartut inatsisaata allanngortinneqarneranik Inatsisartut inatsisissaattut nr. xx, uu. qqqq 2003-meersussatut siunnersuut (Naligiissitaanissamut Siunnersuisoqatigiit inuttalersugaanerat)".

 

§ 1-imut

2. § 1-imut aallarniut ima oqaasertaqassaaq:
"Naligiissitaanissamut Siunnersuisoqatigiit pillugit Inatsisartut inatsisaanni nr. 5-imi 20. maj 1998-imeersumi uku allanngortinneqassapput:" .

3. § 1, nr. 1-imi § 3, imm. 3 ima oqaasertaqassaaq:
"Imm.3. Sulisitsisut peqatigiiffii anginerit pingasut aamma KNAPK peqatigiillutik sapinngisamik ajornanngippat angummik arnamillu, kattuffiit taakku arlaannut ilaasortaasunik, inassuteqassapput."

4. § 1, nr.1-imi § 3, imm. 5 ima oqaasertaqassaaq:
"Imm. 5. Kattuffiit peqatigiiffiilluunniit uku meeqqanik inuusuttunillu sullissisuusut imaluunniit sulisut meeqqanut inuusuttunullu tunngasunik suliallit soqutigisaannik ingerlatsisut peqatigiillutik sapinngisamik ajornanngippat angummik arnamillu, kattuffiit taakku arlaannut ilaasortaasunik, inassuteqassapput:
1) Sorlak
2) Perorsaasut Ilinniarsimasut Peqatigiiffiat, PIP
3) AK, isumaginninnermi siunnersortit eqqarsaatigalugit
4) PPK."

 

Allannguutissatut siunnersuummut nassuiaatit

Inatsisissatut siunnersuutip qulequtaaraa inatsisissatut siunnersuutaaqqaartumi kukkunikkut § 1-imut aallarniutip ataanut ilanngunneqarsimavoq. Kukkuneq tanna allannguutissatut siunnersuutikkut iluarsineqarpoq.

KNAPK siunnersuutaaqqaartumi kukkunikkut kattuffinnut meeqqanik inuusuttunillu sullissisunut imaluunniit sulisut meeqqanut inuusuttunullu tunngasunik suliaqartut soqutigisaannik ingerlatsisunut ilanngunnqarsimavoq. Kukkuneq taanna allannguutissatut siunnersuutikkut iluarsineqarpoq, KNAPK taarsiullugu sulisitsisut peqatigiiffiisa anginerit pingasut saniatigut ilanngunneqarmat.

Tamatuma kinguneraa KNAPK sulisitsisullu peqatigiiffii anginerit pingasut peqatigiillutik sapinngisamik ajornanngippat angummik arnamillu, kattuffiit taakku arlaannut ilaasortaasunik, inassuteqartassammata. Tamatuma saniatigut Sorlak, PIP, AK PPK-lu peqatigiillutik sapinngisamik ajornanngippat angummik arnamillu, kattuffiit taakku arlaannut ilaasortaasunik, inassuteqartassapput.