27. marts 2003
UPA 2003/20
Allannguutissatut siunnersuut
uunga
Arnat angutillu naligiissitaanissaat pillugu Inatsisartut inatsisissaattut siunnersuut
Aappassaaneerinermut Naalakkersuisunit saqqummiunneqartoq.
§ 2-imut
1. § 2-mi, imm. 2 peerneqarpoq.
§ 3-mut
2. § 3, imm. 2 ima oqaasertaqassaaq:
"Imm. 2. Namminersortut suliffeqarfiutaat qulit sinnerlugit sulisoqartut sulisut suiaassutsimikkut agguataarsimanerat kiisalu ukiumi pineqartumi naligiissitaaneq siuarsarniarlugu sulisoqarnikkut ingerlatsinermi iliuutsit Naligiissitaanermut Naalakkersuisumut ukiut tamaasa nalunaarutigisassavaat. Nalunaarut 1. marts nallertinnagu tunniunneqartassaaq siullermik ukioq 2004-mut."3. § 3, imm. 2-p kingorna imm. 3-tut ilanngunneqassaaq:
"Imm. 3. Naligiissitaanermut Naalakkersuisoq imm. 2 naapertorlugu nalunaaruteqartarneq pillugu erseqqinnerusunik malittarisassiorsinnaavoq."
§ 4-mut
4. § 4, imm. 2 ima oqaasertaqassaaq:
"Imm. 2. Pisortat ingerlatsivii aamma suliffeqarfii qulit sinnerlugit sulisoqartut sulisut suiaassutsimikkut agguataarsimanerat kiisalu ukiumi pineqartumi naligiissitaaneq siuarsarniarlugu sulisoqarnikkut ingerlatsinermi iliuutsit Naligiissitaanermut Naalakkersuisumut ukiut tamaasa nalunaarutigisassavaat. Nalunaarut 1. marts nallertinnagu tunniunneqartassaaq siullermik ukioq 2004-mut."5. § 4, imm. 2-p kingorna imm. 3-tut ilanngunneqassaaq:
"Imm. 3. Naligiissitaanermut Naalakkersuisoq imm. 2 naapertorlugu nalunaaruteqartarneq pillugu erseqqinnerusunik malittarisassiorsinnaavoq."
§ 7-imut
6. § 7, imm. 3 ima oqaasertaqassaaq:
"Imm. 3. Oqartussaasut siulersuisullu il.il. imm. 1 naapertorlugu ilaasortassanik inassuteqan-ngippata, oqartussat siulersuisulluunniit pineqartut inassuteqaataat Naalakkersuisut naatsorsuutiginngitsoorsinnaavaat. Tamanna aamma atuuppoq imm. 1-imi aalajangersakkap sanioqqunnissaanut imm. 2 naapertorlugu tunngavilersuutaasoq Naalakkersuisut akuerisinnaanngippassuk."
§ 19-imut
7. § 19 ima oqaasertaqassaaq:
" § 19. Inuit § 2-p imaluunniit §§ 9-12-ip unioqqutinneqarnerisigut pisinnaatitaaffimmikkut innarliivigineqartut taarsiivigineqarsinnaapput."
§ 25-mut
8. § 25, imm. 2 ima oqaasertaqassaaq:
"Imm. 2. Inatsisit aalajangersakkallu tulliuttut atorunnaarsinneqarput:
1) Arnat angutillu assigiimmik akissaateqartinneqarnerat pillugu inatsit nr. 32, 4. februar 1976-imeersoq.
2) Sulinermi erninermullu atatillugu sulinngiffeqarnermi il.il. angutit arnallu assigiimmik pineqarnissaat pillugu inatsit nr. 244, 19. april 1989-imeersoq.
3) Naartunermi, erninermi meeravissiartaarnermilu sulinngiffeqartarneq il.il. ullormusiaqartarnerlu pillugit Inatsisartut peqqussutaanni nr. 12-imi, 31. oktober 1996-imeersumi § 4."
Allannguutissatut siunnersuummut nassuiaatit
Siunnersuutigineqaqqaartumi pissusissamisuunngitsut ataasiakkaat iluarsineqarnissaat pisariaqartinneqarmat allannguutissatut siunnersuut saqqummiunneqarpoq.
Aalajangersakkanut ataasiakkaanut nassuiaatit
Nr. 1-imut
Siunnersuutigineqaqqaartumi § 2, imm. 2-p peerneqarnissaa siunnersuutigineqarpoq, aalaja-ngersakkakkut isumagineqartussatut eqqarsaataasoq ingerlatsinermi inatsisitigut atuuttutigut malittarisassaqartinneqareermat, malittarisassanullu taakkununnga sanilliullugu aalajangersakkap oqaasertaata paasineqarnissaa nalornissutaalersinnaammat.
Nr. 2-mut
Allannguutissatut siunnersuummi erseqqissarneqarpoq ukioq nalunaarusiorfiusoq pillugu aappaagukkut nalunaarut ukiumoortoq martsip aallaqqaataa nallertinnagu tunniunneqartassasoq. Taamaasilluni 2004-mut nalunaarut kingusinnerpaamik 1. marts 2005-imi tunniunneqassaaq.
Nr. 3-mut
§ 3, imm. 2 naapertorlugu namminersortut suliffeqarfiutaasa nalunaarusiortarnissaat pillugu malittarisassanik erseqqinnerusunik aalajangersaanissaminut Naligiissitaanissamut Naalakkersuisoq piginnaatinneqarpoq.
Nr. 4-mut
Allannguutissatut siunnersuummi erseqqissarneqarpoq ukioq nalunaarusiorfiusoq pillugu aappaagukkut nalunaarut ukiumoortoq martsip aallaqqaataa nallertinnagu tuniunneqartassasoq. Taamaalilluni 2004-mut nalunaarut kingusinnerpaamik 1. marts 2005-imi tunniunneqassaaq.
Nr. 5-imut
§ 4, imm. 2 naapertorlugu pisortat ingerlatsiviisa aamma suliffeqarfiisa nalunaarusiortarnissaat pillugu malittarisassanik erseqqinnerusunik aalajangersaanissaminut Naligiissitaanissamut Naalakkersuisoq piginnaatinneqarpoq.
Nr. 6-imut
Aalajangersakkap kingunerissavaa pisortat ataatsimiititaliaannut, kommissioninut, siulersuisunut, sinniisoqarfinnut assigisaannullu ilaasortassanik Naalakkersuisut toqqaassagaangamik oqartussat, siulersuisut imaluunniit kattuffiit il.il. inassuteqaataannik sanioqqutsisinnaalernerat, oqartussat, siulersuisut imaluunniit kattuffiit il.il. pineqartut arnanik angunitillu sapinngisamik inassuteqartussaanermut piumasaqaammik eqquutsitsisimanngippata.
(Siunnersuutigineqaqqaartutut) ilaasortassanik toqqaaffigineqartussat oqartussaasut, siulersuisut imaluunniit kattuffiit il.il. sinniisoqartinnagit Naalakkersuisunit ingerlatinneqarsinnaanngillat.
Tamatumunnga pissutaavoq siunnersuummi § 6-imut ilaasut suliniaqatigiiffiit arlaqartut inatsisit naapertorlugit pilersitaanerat inatsisinilu aalajangersakkatigut suliniaqatigiiffimmi pineqartuni soqutigisaqaqatigiinnut imaluunniit inunnut immikkut siunertaqarlutik sinniisuutitaasunut aalajangersimasunut qularnaarinnittunik.
Inassutigineqartunit Naalakkersuisut toqqaassagunik suliniaqatigiiffiup pineqartup katitigaaneranut tunngaviusut eqqarsaatigalugit piumasaqaatit aallaavigalugit atuuffissaq pineqartoq Naalakkersuisunit inuttalerneqassaaq.
Atuakkiortut peqatigiiffiat assersuutigalugu kulturi pillugu siunnersuisoqatigiinnut inassuteqarnissaminut pisinnaatitaaffeqarluni, kisiannili § 7, imm. 1-imut akerliusumik arnanik angutinilluunniit marlunnik inassuteqaruni atuakkiortut peqatigiiffiata inassuteqaataanik sanioqqutsinissaq Naalakkersuisunit toqqarneqarsinnaavoq. Inassutigineqartunut taarsiullugu Naalakkersuisunit toqqarneqartoq inassutigineqartut allat assigalugit atuakkiortut peqatigiiffiata soqutigisaanut sinniisuusinnaassaaq imaluunniit pineqartumut tunngasunut paasisimasaqartuulluni. Taamaalillutik atuuffissamut pineqartumut nipilersortartumik imaluunniit qalipaanermik eqqumiitsuliortumik Naalakkersuisut toqqaasinnaanngillat.
Nr. 7-imut
Allannguutissatut siunnersuutikkut inuit § 2-p imaluunniit §§ 9-12-ip unioqqutinneqarnerisigut pisinnaatitaaffiiagaasimasut taarsiivigineqarsinnaapput.
Siunnersuutigineqaqqaartoq malillugu inuit § 12-ip unioqqutinneratigut pisinnaatitaaffiiagaasimasut aamma taarsiivigineqarsinnaapput.
§ 12-imi aalajangersarneqarpoq atorfinittussamik imaluunniit inuussutissarsiummik ilinniartussamik il.il. arnat angutilluunniit sulisoriumaneqarneruneri inuttassarsiuussinermi oqaatigineqassanngitsut. Inuit tamatuminnga unioqqutitsinikkut pisinnaatitaaffiiagaasut aalajangersimasut killilernissaat ajornakusoorpoq. Taamaatumiguna § 12-imut innersuussinerup peerneqarnissaa toqqarneqartoq.
Nr. 8-mut
Allannguutissatut siunnersuut siunnersuutip ilusaanik iluarsiinerinnaavoq.