Oqaaseqaatit nalinginnaasut

Kalaallit Nunaanni selskabit piginnittuusut, selskabinit Danmarkimi pigisaminnit iluanaarutisiarisartagaasa akileraaruserneqartarnerat oqilisaassiffiginiarlugu, aningaasarsianit pigisanillu marloriaammik akileraannginnissaq siunertaralugu kiisalu akileraartarnermi suliassani ikioqatigiinnissaq pillugu danskit naalakkersuisuisa Kalaallillu Nunaata naalakkersuisuisa isumaqatigiissutaannut 18. oktober 1979-imeersumut ilassutitut isumaqatigiissut Naalakkersuisuusimasut 12. juni 2002-mi atsioqataaffigaat.

Isumaqatigiissutip imaraa Kalaallit Nunaanni selskabip piginnittuusup, Danmarkimi selskabimit pigisaminit iluanaarutisiatut pissarsiaasa 1. januar 2003 aallarnerfigalugu Kalaallit Nunaanniinnaq akileraaruserneqarsinnaalernissaat, tassa siusinnerusukkut iluanaarutisiat taamaattut danskit iluanaarutisianit akileraarutaannik 28 pct.-iusumik akileraaruserneqartaraluarnerannut taarsiullugu. Tamatumunngali piumasaqaataavoq iluanaarutisiat pineqartut selskabip piginnittuusup Kalaallit Nunaanni akileraaruteqaatigissanngikkai, aammalu selskabi piginnittuusoq iluanaarutisianik agguaassitillugu iluanaarutisiarititat ilaasa, Danmarkimi selskabimit pigisamit iluanaarutisiatut pissarsianeersut selskabimit piginnittuusumit ilanngaatigineqarsinnaannginnissaat.

Matuma kingorna Kalaallit Nunaanni selskabi piginnittuusoq Danmarkimi selskabimit pigisaminit iluanaarutisianik pissarsigaangami Danmarkimi iluanaarutisianit akileraarutinik imaluunniit Kalaallit Nunaanni selskabit akileraarutaannik akiliisussaajunnaassaaq, taamaalillunilu iluanaarutisiat aningaasartaat tamaasa atorsinnaalissallugit, soorlu Kalaallit Nunaanni aningaasaliinernut. Selskabi piginnittuusoq aktiatigut anpartitigulluunniit piginnitsiminut iluanaarutisianik kingusinnerusukkut agguaassiguni iluanaarutisiarititami aningaasartaat ilanngaatigineqarsinnaasut, selskabimit pigisaminit akileraaruteqaataanngitsumik iluanaarutisiatut pissarsiarisimasaminik millilissavai, tassa selskabip akileraaruteqaataanngitsumik iluanaarutisiatut pissarsiaasa agguaanneqarneranni selskabit akileraarutaannik akiliisillugu.

Ilassutitut isumaqatigiissutaasoq illua´tungeriinnut tamanut atuuppoq, Kalaallilli Nunaanni inatsisit malillugit selskabit iluanaarutisiatut tunniussaminnik aningaasarsianit akileraaruteqaataasussanit tamakkiisumik ilanngaateqarsinnaatitaajuartillugit iluanaarutisiat, selskabinit pigineqartunit Kalaallit Nunaanni angerlarsimaffeqartunit nalunaarsorneqarsimasunilluunniit selskabinut piginnittuusunut Danmarkimi angerlarsimaffeqartunut tunniunneqartut Kalaallit Nunaanni akileraaruserneqartarnissaat isumaqatigiissutigineqarpoq.

Ilassutitut isumaqatigiissutip Kalaallit Nunaannit ajorisassaanngilluinnartup, piffissap iluanaarutisiatut agguaassat ilanngaatigineqarsinnaaffiata allanngortinneqarneranut, kingoraarsinermi maleruagassanut kiisalu peqatigiiffiit il.il. akunnittarfeqarnermik neriniartarfeqarnermilluunniit ingerlassaqartut akileraartussaatitaalernerannut ilutigitillugu aningaasarsianit akileraarutit pillugit Inatsisartut inatsisaanni timitalerneqarnissaa Naalakkersuisut siunnersuutigaat.

Tassa siunnersuutigineqarpoq aningaasarsiat akileraaruteqaataasussat naatsorsorneqarneranni selskabip piginnittuusup nunami allami selskabimit pigisaminit iluanaarutisiat ilanngutissanngikkai. Piumasaqaalli avaqqunneqarsinnaanngitsoq tassaavoq selskabip piginnittuusup nunami allami selskabip pigisami aktiatigut aningaasaataasa minnerpaamik 25 pct.-ii sivikinnerpaamik ukiumi ataatsimi pigisimassagai.

Aktiatigut piginneqataassutilinnut iluanaarutisiatut agguaanneqartut maleruagassat atuuttut naapertorlugit selskabip piginnittuusup ilanngaatigisinnaammagit, taamaalillunilu nunami allami selskabimit pigisaminit iluanaarutisiat akileraaruteqaataanngitsumik pissarsiarisimasani ilanngaatigisinnaammagit siunnersuutigineqarpoq, selskabip piginnittuusup ukiumi aningaasarsiorfimmi iluanaarutisiarititaasa ilanngaatigineqarsinnaasut, nunami allami selskabimit pigisamit iluanaarutisiatut akileraaruteqaataanngitsumik pissarsianik millilerneqartarnissaat. Nunami allami selskabimit pigisamit iluanaarutisiat akileraaruteqaataanngitsut, selskabip piginnittuusup atorunnaarsivinneqarnissaa sioqqullugu, imaluunniit selskabip piginnittuusup tamakkiisumik akileraartussaatitaanera kipitinnagu, imaluunniit selskabip piginnittuusup suliffeqarfittut akileraartussaatitaanngitsutut inissisimalernissaa sioqqullugu selskabip piginnittuusup iluanaarutisiatut agguaassaanit tamakkiisumik milliliissutigineqarsimanngippata, taakkuninnga akileraarusiinissamut qulakkeerisunik maleruagassiortoqarnissaa aammattaaq siunnersuutaavoq.

Selskabip piginnittuusup, nunami allami selskabimi pigisamini aktiatigut piginneqataassutinik tunisaqarnermi annaasani maleruagassat atuuttut naapertorlugit tamakkiisumik ilanngaatigisinnaammagit maleruagassap allanngortinneqarnissaa siunnersuutaavoq, tassa annaasat ilaat, iluanaarutisiatut akileraaruteqaataanngitsumik pissarsiarineqartunit aammalu iluanaarutisiarititanut ilanngaatigineqarsinnaasunut milliliissutitut atorneqanngitsunit sippuutaasut kisiisa ilanngaatigineqarsinnaasunngorlugit, taamaanngippammi selskabip piginnittuusup annaasat ilumut annaasimanngisani ilanngaatigissagaluarmagit.

Selskabit aktiatigut piginnitsiminnut iluanaarutisiatut tunniussatik, maleruagassat atuuttut naapertorlugit ukiumi tunniunneqarfianni ilanngaatigisarpaat. Iluanaarutisialli tunniunneqartartut ukiup tunniunneqarfimmik siulianeersuusarput, taamaattumik ukioq isertinneqarfiat ukiorlu ilanngaatigineqarfiat assigiinneq ajorput, selskabillu ukiumi tunniussaqarfimmi aningaasarsiai akileraaruteqaataasussat amigartoorutaasimappata, selskabip ukiumi tunniussaqarfimmini akileraarutitigut sipaarutit aningaasanngorlugit maluginavianngilai, akerlianilli selskabip amigartoorutaasa amerlanerulernerat kisiat malugissallugu.

Taamaattumik siunnersuutigineqarpoq selskabit iluanaarutisiatut tunniussat, ukiumi aningaasarsiorfimmi iluanaarutisiat attuumassuteqarfigisaanni ilanngaatiginissaannut Skatterådimit akuersissuteqarfigineqarnissaminnik qinnuteqarsinnaanissaat, taamaattorli rådip isumaa malillugu selskabip akuersissut taamaattoq atornerlunniarpagu, soorlu piffissami ungasinngitsumi selskabip atorunnaarsinnissaanik siunertaqarluni, Skatterådi taamatut akuersissuteqarnissamini piumasaqaatinik aalajangersaasinnaatillugu.

Naalakkersuisut isumaqarput nunami maani selskabinit pigisanit iluanaarutisiat akileraartarnikkut suliarineqartarnerisa allanngortinneqarnissaannik apeqqut, selskabit piginnittuusut aamma selskabit pigisat nalinginnaasumik ataatsimoortillugit akileraartinneqartalersinnaanerannik apeqqummut, nunat tamat akornanni pissutsinik misissueqqissaarnissamik siusinnerusukkut eqqaaneqarnikuusumik utaqqimaartariaqartumut ilanngunneqartariaqartoq.

Sinerissamut qanittumi raajarniarnerup nutarterneqarnera oqilisaassiffiginiarlugu naggataatigut siunnersuutigineqarpoq, inuit ataasiakkaat aktie- imaluunniit anpartsselskabini peqataalerumatillugit kingoraarsinissamut periarfissiisoqarnissaa, tassuunakkut inuk peqataalersoq pisassaminik aalisariumminillu tunniussaqarnermini iluanaarutiminit akileraartussaajunnaarlugu. Pisassat aalisariullu piffissami peqataalersumit pissarsiarineqarfimminni, pissarsiarineqaramillu akiminnik akeqartutuut selskabimit pigineqalersutut isigineqarlutik kingusinnerusukkut selskabimi akileraaruserneqarumaarput. Peqataalersoq akileraarutitigut nalikilliliissuteqarsimappat taakku selskabimit nalikilliliissutigineqarsimasutut isigineqassapput.

Suliffeqarfiit imminnut pigisut, soorlu umiartortut angerlarsimaffii højskolillu, § 3, imm. 2 malillugu akileraartussaatitaasimanngitsut suliffeqarfinnut, aktie- imaluunniit anpartsselskabitut imaluunniit inummit pigineqartutut ingerlanneqarlutik akunnittarfeqarnermik neriniartarfeqarnermillu ingerlataqartunut unammillertaallutik ukiorpassuarni akunnittarfeqarnermik neriniartarfeqarnermillu ingerlatsisimapput. Unammillernerup naligiissumik atugassaqarfiusumik ingerlanneqalernissaa Naalakkersuisut piffissanngorsoraat, taamaattumillu siunnersuutigineqarpoq suliffeqarfiit imminnut pigisut akunnittarfeqarnermik imaluunniit neriniartarfeqarnermik ingerlataqartut aktie- aamma anpartsselskabit assigalugit akileraarusiiffigineqartalernissaat. Akileraarutitigut naliliunneqartussat pillugit maleruagassat ikaarsaarnermi maleruagassiani aalajangersarneqarput.

Inatsisissatut siunnersuut tusarniaassutigineqarsimavoq Ineqarnermut Attaveqarnermullu Pisortaqarfimmut, Aalisarnermut, Piniarnermut Nunaqarfinnullu Pisortaqarfimmut, Allattoqarfiup inuussutissarsiornermut Immikkoortortaqarfianut, Aatsitassanut Ikummatissanullu Pisortaqarfimmut, Aningaasaqarnermut Pisortaqarfimmut, KANUKOKA-mut, Kalaallit Nunaanni Inuussutissarsiorneq pillugu Siunnersuisoqatigiinnut, GrønlandsBanken A/S-imut, Sparbank Vest A/S-imut, Advokat Henrik Hey-imut, Advokatfirmaet Wilhelm Malling & Co.-mut, NUNA Advokater-mut, Deloitte & Touche-imut, PricewaterhouseCoopers-imut, SIK-mut, KNAPK-mut, Kalaallit Nunaanni Sulisitsisut Peqatigiiffiannut, HST-mut aamma APK-mut. Tusarniaanermi akissutisiarineqartut tamarmik siunnersuummik tapersiisut, siunnersuutip saqqummiunneqartup allanngortinnissaanik nassataqarsimanngillat.

Inatsisissatut siunnersuut piffissaq qaninnerusoq eqqarsaatigalugu pissutsinut atuutereersunut sanilliullugu annikitsuinnarnik aammalu isertitassatigut malunnanngingajattunik kinguneqassangatinneqarpoq. Inatsisissatut siunnersuut piffissaq ungasinnerusoq eqqarsaatigalugu selskabit aammalu inuiaqatigiit aningaasarsiornerannut, taamatuttaarlu akileraarusigassat tunngaviannut nukittuallaataassaaq.

Ukiup iluanaarutisiat agguaanneqartut ilanngaatigineqarsinnaaffiata "siuartinneqarneratigut" selskabit akileraarutaasigut landskarsip kommunillu 2003-mi isertitassaat, ilanngaatissat ilanngaatigereerlugit katillugit annerpaamik 10 mio. kr.-inik ataasiartumik nikiallannissaat naatsorsuutigineqarpoq.

Inatsisissatut siunnersuut allaffissornermut annikitsuinnarnik sunniuteqassaaq.

 

Aalajangersakkanut ataasiakkaanut oqaaseqaatit

 

§ 1, nr. 1-imut

Peqatigiiffiit, suleqatigiiffiit, iluaqutissiuiffiit, aningaasaatit aalajangersimasunut atugassanngortitat aamma suliffeqarfiit imminnut pigisut akunnittarfeqarnermik aamma/imaluunniit neriniartarfeqarnermik ingerlataqarnermik suliallit, inuit selskabillu inuussutissarsiutinik taamaattunik ingerlataqartut akileraarutinut akiliisussaareernerisuulli akiliisarnissaat siunnersuutigineqarpoq.

Peqatigiiffiit il.il. pineqartut akunnittarfeqarnermik aamma/imaluunniit neriniartarfeqarnermik ingerlatsinermikkut isertitaminnit, § 3, imm. 2 naapertorlugu manna tikillugu akileraartussaatitaasimanngitsut ulloq 1. januar 2004 aallarnerfigalugu isertitanit taakkunannga akileraartussaatitaalissapput.

Akileraartussaatitaanermi taamaallaat pineqarput akunnittarfeqarnermik aamma/imaluunniit neriniartarfeqarnermik ingerlatsinermi isertitat kiisalu pigisanik nalilinnik, taama ingerlataqarnermi atorneqartunik atorneqarsimasunilluunniit tunisaqarnermi, tunniussinermi imaluunniit piginnikkunnaarnermi iluanaarutit annaasalluunniit.

Peqatigiiffik il.il. akunnittarfeqarnermik aamma/imaluunniit neriniartarfeqarnermik ingerlataqarnermigut isertitaminit akileraartussaatitaappat, tamatumali saniatigut inuussutissarsiummik allamik, § 3, imm. 2 naapertorlugu suli akileraartussaatitaaffiunngitsumik ingerlataqarpat, soorlu højskolit taamaattuusut, peqatigiiffik akunnittarfeqarnermik aamma/imaluunniit neriniartarfeqarnermik ingerlatsinermigut isertitaminit taamaallaat akileraarusiiffigineqassaaq, isertitammi allat akileraartussaatitaanermi pineqanngimmata. Obligationinit, pantebrevinit assigisaannillu erniatigut isertitat kiisalu aningaaserivinni uninngasuutit erniaat akunnittarfeqarnermik aamma/imaluunniit neriniartarfeqarnermik ingerlatamit isertitatut isigineqassanngillat, aatsaalli taama isigineqassallutik akunnittarfeqarnermik aamma/imaluunniit neriniartarfeqarnermik ingerlatamut toqqaannartumik attuumassuteqarunik taakkunaniluunniit ingerlatsinermut aningaasaatitut atorneqarunik.

Peqatigiiffiit taamaattut akunnittarfeqarnermik aamma/imaluunniit neriniartarfeqarnermik ingerlatamikkut isertitaminnut tamarmiusunut aamma peqatigiiffiup isertitaanut tamarmiusunut aningaasartuutitik ilanngaatigineqarsinnaasut tamarmiusut, matumani aamma nalikilliliinerit nalinginnaasut, qanoq annertutigineri naapertorlugit agguataarumallugit aalajangersinnaavaat.

Peqatigiiffiit il.il. inuussutissarsiutigalugu suliffeqarfittut akileraartussaatitaannginnermiit inuussutissarsiutigalugu suliffeqarfittut akileraartussaatitaalerpata akileraarutitigut naliliunneqartussat, inatsisissatut siunnersuutip ikaarsaariarnissamut maleruagassiartaani aalajangersagaliuunneqarsimapput.

 

§ 1, nr. 2-mut

Siunnersuut, siunnersuummi § 1, nr. 1-imut, tassa peqatigiiffiit il.il. neriniartarfeqarnermik ingerlassaqartut peqatigiiffiup il.il. sinneqartoorutaanit akileraarusiiffigineqartalernissaannik siunnersuummut attuumassuteqarpoq, peqatigiiffiimmi il.il. timersortarfimmi sutorniartarfimmik ingerlassaqartut sinneqartoorutiminnit akileraartussanngortinneqarnissaat eqqortuusorineqanngimmat, sutorniartarfimmi taamaattoq namminersorlutik neriniartarfiutilinnut unammillerluni ingerlanneqartanngimmat.

Oqaatigineqassaaq, peqatigiiffiup il.il. timersortarfimmi sutorniartarfik allamit ingerlatassanngorlugu atukkiussimappagu akileraartussaatitaannginneq sutorniartarfimmik taamaattumik attartortup sinneqartoorutaanut atuutissanngimmat, soorluttaaq sulisorisat aningaasarsisinneqartillugit akileraarutinik A-nik unerartitsisussaaneq ingerlaannassasoq.

 

§ 1, nr. 3-mut

Selskabip piginnittuusup il.il., nunami allami selskabimi pigisami, matumani aamma Danmarkimi Savalimmiuniluunniit, aktiatigut anpartitigulluunniit annaasaminik, iluanaarutisianilli akileraaruteqaataanngitsunik illua´tungilerneqarnerisigut ilumut annaasarinngisaminik ilanngaateqarnissaa pinngitsoorniarlugu siunnersuutigineqarpoq, selskabip piginnittuusup il.il. nunami allami selskabimi pigisami, § 24, nr. 11a-mi pineqartumi aktiaatinik anpartiutinilluunniit tunisaqarnermi annaasat taamaallaat ilanngaatigisinnaassagai, annaasat selskabip piginnittuusup nunami allami selskabimit pigisamit pineqartumit iluanaarutisiatut pissarsiarisimasaanit amerlaneruppata.

Selskabimilli pigisamit iluanaarutisiatut akileraaruteqaataanngitsumik pissarsiarineqarsimasut, iluanaarutisiat aningaasartaannut § 19, imm. 1 aamma 2 naapertorlugit ilanngaatigineqarsinnaasunut milliliissutigineqarsimappata, iluanaarutisiat selskabimi pigisami aktiaatinik anpartiutinilluunniit tunisaqarnermi annaasat naatsorsorneqarneranni aammaarlugit milliliissutigineqassanngillat.

 

§ 1, nr. 4-mut

Siunnersuutaavoq selskabit il.il. iluanaarutisiatut tunniussatik ukiumi aningaasarsiorfiusumi attuumassuteqarfigisaanni ilanngaatigiumallugit Skatterådimit akuerineqarnissaminnik qinnuteqarsinnaanissaat. Tassuunakkut ukiup isertinneqarfiisa aamma ukiup ilanngaatigineqarfiisa assigiilernissaat qulakkeerneqassaaq, kiisalu aamma selskabi aningaasat iluanaarutisiatut tunniussami annertoqqataannik akileraarutitigut ilanngaateqassalluni, aamma selskabip ukiumi aningaasarsiorfiusumi iluanaarutisianik agguaassiffimmini, agguaassaasalu aktiaatilinnut, anpartiutilinnut, piginneqataassutilinnut imaluunniit ilaasortanut tunniunneqarfianni, aningaasarsiai akileraaruteqaataasussat amigartoorutaagaluarpataluunniit.

Maleruagassami pineqarput iluanaarutisiat ukiumi aningaasarsiorfiusumi kingullermi isertinneqartut aamma iluanaarutisiat ukiumi aningaasarsiorfiusumi siusinnerusumi isertinneqartut.

Maleruagassaq siullerpaamik atorneqarsinnaavoq iluanaarutisianut ukiumi aningaasarsiorfiusumi 2003-mi selskabip agguaassaanut, tassuunakkut Skatterådip akuersissutigisinnaassammagu selskabip iluanaarutisiat ukiumi aningaasarsiorfiusumi 2003-mi agguaassaasa selskabip ukiumi aningaasarsiorfiusumi 2002-mi aningaasarsiaanit akileraaruteqaatassussanit ilanngaatigineqarsinnaanissaat, aatsaalli selskabip ukiumi aningaasarsiorfiusumi 2002-mi aningaasarsiai akileraaruteqaataasussat amigartoorutinngoratilluunniit 0-iuinnassappata.

Iluanaarutisiatulli agguaassat ilaat, ukiumi aningaasarsiorfiusumi 2002-mi ilanngaatigineqarnissamut akuersissutigineqanngitsut ukiumi aningaasarsiorfiusumi 2003-mi tamakkiisumik tamatigut ilanngaatigineqarsinnaassapput, tamannalu atuutissaaq ukiumi aningaasarsiorfiusumi tassani selskabip aningaasarsiaasa amigartoorutaanerat apeqqutaatinnagu.

Akuersissutip taamaattup selskabinut il.il. siunertaanngitsumik iluaqutissiinissaa pinngitsoorniarlugu siunnersuutaavoq, maleruagassamik atornerluiniarneq siunertat pingaarnersarippassuk siunertalluunniit pingaarnerit ilaagippassuk, taava siunertaanngitsumik akileraarutitigut iluaqutaasinnaasut atorneqarsinnaajunnaarlugit Skatterådip piumasaqaatit immikkut ittut aalajangersarsinnaassagai.

Maleruagassamik atornerluisinnaanermut assersuutitut taaneqarsinnaapput selskabip aningaasarsiai amigartoorutaappata selskabip ukiumi aningaasarsiorfiusumi tassani amigartoorutit annertusarniarai, selskabi siunissami qaninnermi nunami allami, matumani aamma Danmarkimi aamma Savalimmiuni, angerlarsimaffeqalerniarluni pilersaartoq, selskabi siunissami qaninnermi atorunnaarnissamik pilersaartoq, selskabi siunissami qaninnermi suliffeqarfittut akileraartussaanngitsutut inissisimalerniarluni pilersaartoq, selskabi siunissami qaninnermi selskabimut allamut kattunnissamik pilersaartoq, imaluunniit selskabi siunissami qaninnermi piginnitsiminik imaluunniit ingerlataminik allannguiniarluni pilersaartoq. Assersuutit taagorneqartut tamakkiisuunngillat.

Selskabip nammineerluni nalunaarsuiffimminik tunniussinerminut atatillugu allakkatigut qinnuteqaat Skatterådimut tunniutissavaa. Taama akuersissuteqarnerup ukioq ataasiakkaartumik atuunnissaa imaluunniit piumasaqaatitaqartumik atuuttuarnissaa Skatterådip aalajangersinnaavaa.

Selskabinut, ukiumi aningaasarsiorfiusumi iluanaarutit attuumassuteqarfigisaanni iluanaarutinik ilanngaateqarnissamut akuerineqarnissamik qinnuteqarsinnaanermik atuiumanngitsunut maleruagassat pioreersut, tassa ukiumi aningaasarsiorfiusumi iluanaarutisianik agguaassiffiusumi aningaasarsianit akileraaruteqaataasussanit tamakkiisumik ilanngaateqarsinnaanermik imaqartut atuutiinnassapput, selskabip aningaasarsiai akileraaruteqaataasussat tassuunakkut amigartoorutinngussagaluarpataluunniit.

Aammattaaq siunnersuutaavoq selskabip piginnittuusup nunami allami selskabimit pigisamit, matumani aamma Danmarkimi Savalimmiunilu selskabimit pigisamit iluanaarutisiatut pissarsiani, § 24, nr. 11a naapertorlugu akileraaruteqaataasussaanngitsut, imm. 1 naapertorlugu iluanaarutisiarititami aningaasartaannut ilanngaatigineqarsinnaasunut milliliissutigissagai, aningaasarsiat akileraaruteqaataasussat naatsorsorneranni selskabi piginnittuusoq iluanaarutisianik selskabip piginnittuusup akileraaruteqaataanngitsumik pissarsiarisimasaanik ilanngaateqaqqunagu.

Selskabimit pigisamit iluanaarutisiatut akileraaruteqaataanngitsumik pissarsiarineqarsimasut agguaanneqarnerat agguaanneqannginneralluunniit apeqqutaatinnagu milliliisoqartassaaq. Matumani apeqqutaanngilaq selskabimit pigisamit iluanaarutisiatut pissarsiarineqarsimasut iluanaarutisiaritinneqaratik siunertanut allanut atorneqarsimanerisa selskabimit piginnittuusumit uppernarsarneqarsinnaanerat.

Selskabi piginnittuusoq ukiumi aningaasarsiorfiusumi selskabimit pigisamit iluanaarutisianik pissarsiffiusumi milliliissaaq, ukiumilu aningaasarsiorfiusumi tassani selskabip piginnittuusup iluanaarutisianik tunniussiffiani iluanaarutisianut milliliissutaassalluni. Ukiumi aningaasarsiorfiusumi tassani selskabip piginnittuusup iluanaarutisiarititaanit milliliisoqassaaq, apeqqutaatinnagu selskabip piginnittuusup iluanaarutisiarititami taakku ukiup aningaasarsiorfiusup siuliani aningaasarsiaminit akileraaruteqaataasussanit ilanngaatiginissaannut Skatterådimit akuerineqarsimanera, tak. imm. 2.

Selskabip piginnittuusup, ukiumi aningaasarsiorfiusumi selskabimit pigisamit iluanaarutisiatut pissarsiaasa aningaasartaat, selskabip piginnittuusup iluanaarutisiatut tunniussaasa aningaasartaannit annertuneruppata, iluanaarutisiat ilanngaatigineqarsinnaasut aningaasartaat imm. 1 malillugu 0 kr.-imik angissusilerlugit millilerneqassapput. Taava selskabimit pigisamit iluanaarutisiat sippuutaat ukiuni aningaasarsiorfiusuni tulliuttuni selskabip piginnittuusup iluanaarutisiatut tunniutassaasa aningaasartaannut millilerutissatut nuunneqassapput. Selskabimit pigisamit iluanaarutisiat sippuutaat aatsaat ukiunut aningaasarsiorfiusunut kingusinnerusunut nuunneqarsinnaapput selskabip piginnittuusup ukiuni siusinnerusuni iluanaarutisiatut tunniussaanit ilanngaatigineqarsinnaanngippata. Nuussisinnaaneq ukiunut aalajangersimasumik amerlassusilinnut killiligaanngilaq.

Aammattaaq siunnersuutaavoq, selskabit piginnittuusut selskabinit pigisanit iluanaarutisianik, § 24, nr. 11a naapertorlugu akileraaruteqaataasussaanngitsunik pissarsisimasut, selskabimit pigisamit iluanaarutisiatut pissarsiarineqarsimasut qanoq annertutiginerannik, kiisalu aamma iluanaarutisiat ilaat qanoq annertutigisut, selskabip piginnittup aktiaatilinnut iluanaarutisiatut tunniussaanit ilanngaatigineqarsinnaasunit millilerutigineqarsimanerannik imaluunniit aktiatigut annaasanut ikilisaatitut atorneqarsimanerannik, tak. § 14, imm. 3 litra a. naatsorsukkamik nammineerluni nalunaarsuiffimmut ilanngussisassasut.

Kiisalu siunnersuutaavoq selskabimit pigisamit iluanaarutisiatut akileraaruteqaataanngitsumik pissarsiarineqarsimasut, imm. 1 naapertorlugu selskabip piginnittuusup iluanaarutisiarititaasa aningaasartaannut ilanngaatigineqarsinnaasunut milliliissutaasimanngitsut imaluunniit aktiatigut annaasanik, tak. § 14, imm. 3 litra a., ikilisaassutigineqarsimanngitsut, ukiumi aningaasarsiorfiusumi selskabip piginnittuusup atorunnaarsivinneqarfiani aningaasarsiaasa akileraaruteqaataasussat naatsorsorneqarneranni ilanngunneqarnissaat.

Selskabit atorunnaarsinneqarnerisa naammassinerini aammalu selskabip atorunnaarsivinneqarnera nalinginnaasumik pisarpoq aktiaatillit imaluunniit anpartiutillit atorunnaarsitsissutaasumik ataatsimeersuarnermi atorunnaarsitsivinnermi naatsorsuutinik akuersissuteqarnerisigut. Peqatigiiffiit il.il. atorunnaartutut isigineqartarput tamanna pillugu aalajangiineq peqataasunit piginnaatitaasunit ingerlanneqaraangat, soorluttaaq tamanna pillugu aalajangernissamut atatillugu naatsorsuutit suliarineqarsimasut peqatigiiffiullu aningaasaataasa qanoq agguataarneqarnissaannik siunnersuutitaqartut saqqummiunneqartussaasut.

Aammattaaq siunnersuutaavoq selskabimit pigisamit iluanaarutisiat akileraaruteqaataanngitsut nuunneqarsimasut selskabip piginnittuusup ukiumi aningaasarsiorfiusumi, selskabip piginnittuusup tamakkiisumik akileraartussaajunnaarfiani imaluunniit ukiumi aningaasarsiorfiusumi peqatigiiffiup suliffeqarfittuut akileraartussaatitaanngitsutut inissisimalerfiani, selskabip piginnittuusup aningaasarsiaanut akileraaruteqaataasussanut aammattaaq ilanngunneqarnissaat.

 

 

§ 1, nr. 5-imut

Siunnersuutigineqarpoq selskabip piginnittuusup nunami allami selskabimit pigisamit, matumani aamma Danmarkimi Savalimmiuniluunniit selskabimit pigisamit, iluanaarutisiai akileraaruteqaataassanngitsut, aktiatigut anpartitigulluunniit aningaasaatit minnerpaamik 25 pct.-ii, piffissami ataannartumi sivikinnerpaamik ukiumik ataatsimik sivisussuseqartumi aammalu piffissap taassuma iluani agguaassiffiusimasussami, selskabip piginnittuusup pigisimappagit. Taamaammat selskabip piginnittuusup piumasaqaatit qulaaniittut naammassisimappagit iluanaarutisiat selskabip piginnittuusup aningaasarsiaanut akileraaruteqaataasussanut ilanngunneqassanngillat.

Nunami allami selskabimi pigisami aktiaatit anpartiutilluunniit minnerpaamik 25 pct.-iinik pigisaqarnissamik, sivikinnerpaamillu qaammatini 12-ini piginnissimanissamik piumasaqaatip assigai, aningaasarsianit pigisanillu marloriaammik akileraannginnissaq siunertaralugu kiisalu akileraartarnermi suliassani ikioqatigiinnissaq pillugu danskit naalakkersuisuisa Kalaallillu Nunaata naalakkersuisuisa isumaqatigiissutaannut ilassutitut isumaqatigiissummi 12. juni 2002-meersumi piumasaqaat aammalu EU-p selskabit piginnittuusut/pigisat pillugit peqqussutaa.

Selskabip pigisap aktiatigut anpartitigulluunniit aningaasaataasa aamma selskabip piginnittuusup selskabimi pigisami aktiatigut anpartitigulluunniit piginneqataassutaasa naatsorsorneqarneranni ilanngunneqassanngillat obligationit allanngortillugit niuerutigineqarsinnaasut selskabimit pigisamit sananeqarsimasut, obligationit selskabimi aktianik anpartinilluunniit taarserneqarsimatinnagit, tassami piffissaq taanna tikillugu obligationit taamaallaat selskabip pigisap aningaasaataanut allaneersunut ilaammata.

Aktiaatit anpartiutilluunniit 25 pct.-iinik pigisaqarnissamik piumasaqaat taamaallaat selskabimut pigisamut tassunga, selskabimut piginnittumut iluanaarutisisitsisumut, toqqaannartumik tunngassuteqarpoq. Taamaattumik selskabip pigisap, selskabimi nammineq pigisamini aktiaatit 25 pct.-iinit minnerusunik aktiaateqarluni iluanaarutisiatut pissarsiaminik agguaasseqqinnera akileraartussaannginnermut aalajangiisuunngilaq.

Selskabip piginnittuusup aktiatigut anpartitigulluunniit aningaasaatit minnerpaamik 25 pct.-ii piffissami ataannartumi sivikinnerpaamik ukiumi ataatsimi pigisimassavai. Tamanna ima paasisariaqanngilaq ukioq aningaasarsiorfik imaluunniit qaammatisiutit malillugit ukioq, piffissarli ataannartoq qaammatinik 12-inik sivisussusilik.

Piffissami iluanaarutisianik agguaassiffiusumi selskabip piginnittuusup, selskabimi pigisami aktiaatit anpartiutilluunniit minnerpaamik 25 pct.-iinik sivikinnerpaamik ukiumi ataatsimi piginnittooreersimanissaa akileraartussaatitaannginnermi piumasaqaataanngilaq. Tassa imaappoq akileraartussaannginneq aammattaaq atuuppoq iluanaarutisianut, piffissami sumiluunniit aktianik anpartinilluunniit pissarsinerup kingorna agguaanneqartunut, aatsaalli selskabip piginnittuusup aktiat anpartilluunniit sivikinnerpaamik qaammatini 12-ini pigiinnarpagit. Iluanaarutisiat agguaanneqassapput, tassa imaappoq piffissap selskabip piginnittuusup aktianik piginniffiata iluani selskabip pigisap ataatsimeersuarnerani aalajangerneqassapput.

Matumani iluanaarutisiat tassaapput § 70, imm. 2-mi aalajangersarneqarsimasutuut iluanaarutisiat nalinginnaasut, tassa imaappoq aammattaaq aningaasaatinik appartitsinermit ugguagarsiat kiisalu selskabimut sanasimasumut aktianik anpartinilluunniit tunisineq iluanaarutisianik oqartarnermi ilaatinneqarput.

 

§ 1, nr. 6-imut

Sinerissamut qanittumi raajarniarnerup nutarterneqarnera oqilisaassiffiginiarlugu siunnersuutigineqarpoq kingoraarsisinnaaneq pillugu maleruagassat kapitali 3 A-miittut inunnut atorneqarnissaat Skatterådip akuersissutigisinnaassagaa, inuit taakku raajartassamik aalisariutaatimillu kiisalu taarsigassarsiarisimasinnaasaminnik, pigisanik taakkunannga qularnaveeqquserneqarsimasunik, aktie- imaluunniit anpartsselskabimut pioreersumut nutaamilluunniit pilersinneqartumut, aktiaatilinnit anpartiutilinnilluunniit arlaqartunit pigineqartumut tunniunnerisigut ilannguppata.

Piumasaqaat avaqqunneqarsinnaanngitsoq tassaavoq inuup peqataalersup selskabillu tamarmik Kalaallit Nunaannut tamakkiisumik akileraartussaatitaanissaat, aammalu selskabimi tunniussiffimmi akiliut tamakkerluni aktiatigut anpartitigulluunniit pissasoq.

Raajartassat aamma aalisariut selskabimut peqataalernermi tunniuneqartut selskabip aningaasarsiaasa akileraaruteqaataasussat naatsorsorneqarneranni, piffissani maannamut piginnitsiminnit pissarsiarineqarfiini aammalu pissarsiarineqaramik akiminnik akeqarlutik selskabimit pissarsiarineqartutut isigineqassapput. Maannamut piginnittuusup akileraarutitigut nalikilliliissutigisimasinnaasai ukiuni aningaasarsiorfiusuni taakkunani selskabimit nalikilliliissutigineqarsimasutut isigineqassapput.

 

§ 2-mut

Siunnersuutigineqarpoq inatsisip ullormi 22. april 2003-mi atuutilernissaa, aammalu § 1, nr. 1 aamma 2 ukioq aningaasarsiorfik 2004 aallarnerfigalugu atortuulersillugit, § 1, nr. 3-miit 5-imut ukioq aningaasarsiorfik 2003 aallarnerfigalugu atortuulersinneqassasut.

Kiisalu siunnersuutaavoq § 1, nr. 6-imi aalajangersagaq ukioq aningaasarsiorfik 2002 aallarnerfigalugu atortuulersinneqassasoq. Tassunga pissutaavoq Naalakkersuisuusimasut 7. marts 2002-mi aalajangiimmata, umiarsuaatileqatigiiffiit kattukkumasut sinerissamut qanittumi raajarniarnermi nioqqutissiornissamut akuersissummik tunineqarsinnaanissaat. Siunnersuutip 2002-mi ukiakkut ataatsimiinnermi aalajangiiffigineqarnissaa qularutiginagu 2002-mi kattuttoqarpoq, inuillu taamatut kattussinnaanermut periarfissamik atuisimasut aningaasaqarnikkut ajortumik inissisimalersikkumanagit siunnersuutigineqarpoq aalajangersakkap, inunnut pineqartunut oqilisaassinermik kinguneqartussap ukioq aningaasarsiorfik 2002 aallarnerfigalugu atortuulersinneqarnissaa. Inuit sinerissamut qanittumi raajarniarnermi, nioqqutissiorsinnaanermik akuersissummik qinnuteqaqqaaratik kattunnernut peqataasimasut taamatulli aningaasaqarnikkut ajortumik inissisimassapput, taamaattumillu inuit taakkuttaaq atuutilersitsinissamut aalajangersakkamut oqilisaassinermik kinguneqartussamut ilaatinneqassapput.

 

§ 3-mut

Suliffeqarfiit imminnut pigisut il.il. akunnittarfeqarnermik neriniartarfeqarnermillu ingerlatsinerminnit siusinnerusukkut akileraartussaatitaasimanngitsut pigisaasa ikaarsaarnermi nalilerneqarnissaat pisariaqarpoq, nalingimi suliffeqarfiup il.il. nalikillilersinnaasaasa naatsorsorneranni aammalu iluanaarutaasimasinnaasut annaasaasimasinnaasullu naatsorsorneqarneranni atorneqartussaapput.

Illuutit, atortut ikkussorneqarsimasut ingerlatsinermullu atortut, ingerlatsiviup akileraartussaatitaalerneq sioqqullugu pigeriigaasa akileraarutitigut nalingi nalikillilerneqarsinnaasut ullormi 1. januar 2004-mi nalinginnaasumik niuernermi nalingisut naatsorsorneqassapput. Taakkuninnga naliliineq ingerlatsiviit il.il. ataasiakkaat isumagissavaat, akileraarusiinermilu misissuiffigineqarumaarput.

Ikaarsaarnermi naliliunneqartussat pineqartut aammattaaq pigisat akileraartussaatitaalerneq sioqqullugu pissarsiarineqarsimasut iluanaarutaanerisa naatsorsorneqarneranni atorneqassapput. Aktiaatitigut, pisassarisatigut akiitsutigullu iluanaarutit annaasalluunniit naatsorsorneqarneranni pissarsiarineqarneranni akiviusumut taarsiullugu ullormi 1. januar 2004-mi nalingat atuutissaaq.