30. marts 2003 UPA 2003/08
Inatsisartut Naalakkersuisullu pillugit Inatsisartut inatsisaata allanngortinneqarneranik Inatsisartut inatsisissaattut siunnersuut
pillugu
Inatsisartut Inatsisit Atortinneqarnerannut Ataatsimiititaliaata
ISUMALIUTISSIISSUTAA
inatsisissatut siunnersuutip aappassaaneerneqarnerani saqqummiunneqartoq
Inatsisartut Inatsisit Atortinneqarnerannut Ataatsimiititaliaat suliarinninnermini ukuninnga inuttaqarpoq:
Inatsisartuni ilaasortaq Isak Davidsen, Atassut, siulittaasoq
Inatsisartuni ilaasortaq Ole Dorph, Siumut, siulittaasup tullia
Inatsisartuni ilaasortaq Enos Lyberth, Siumut
Inatsisartuni ilaasortaq Ane Hansen, Inuit Ataqatigiit
Inatsisartuni ilaasortaq Astrid Fleischer Rex, Demokraatit
Inatsisartut Inatsisit Atortinneqarnerannut Ataatsimiititaliaata Inatsisartut Naalakkersuisullu pillugit Inatsisartut inatsisaata allanngortinneqarneranik Inatsisartut inatsisissaattut siunnersuut siullermeerlugu oqaluuserineqareermat nassuiaatitai ilanngullugit misissuataarpaa.
Inatsisartut ataatsimiititaliaasa allat suliamut peqataatinneqarneratSiunnersuummik ataatsimiititaliap suliarinninnerminut atatillugu Inatsisartut Landskarsip Naatsorsuutaasa Kukkunersiorneqartarnerannut Ataatsimiititaliaq (Kukkunersiuinermut Ataatsimiititaliaq) qinnuigaa siunnersuut oqaaseqarfigeqqullugu.
Kukkunersiuinermut Ataatsimiititaliap akissutaata nuutinnera isumaliutissiissummut matumunnga ilanngunneqarpoq.
Siunnersuutip imarisaiSiunnersuut marlunnik immikkoortortaqarpoq: Siunnersuut atorlugu ilaatigut Kukkunersiuinermut Ataatsimiititaliap ingerlatsinermik kukkunersiuisinnaaneranut inatsisitigut erseqqilluinnartumik tunngavissiisoqassaaq. Ilaatigut Inatsisartut ataatsimiissutaasa imaqarniliorneqarnerisa tama-nut saqqummiunneqartarneri pillugit maleruagassat erseqqissarneqassapput.
2002-mi upernaakkut ataatsimiinnermi Inatsisartut aalajangerpaat Naalakkersuisut maleruagassanik atuuttunik allanngortitsinissamut siunnersuummik saqqummiusseqqullugit peqquneqassasut, taamaalilluni Kukkunersiuinermut Ataatsimiititaliap ingerlatsinerup kukkunersiuiffigineqarsinnaanerata aallartinneqarnissaanut inatsisitigut erseqqissumik tunngavissinneqarnissaa pilersinneqassammat. Tamatuma peqatigisaanik Namminersornerullutik Oqartussat aktiaatilittut inissisimanerannik Naalakkersuisut isumaginninnerannut killissarititaasut patajaallisarneqarnissaannik aammalu Inatsisartut tamatuminnga nakkutilliinerata patajaallisarneqarnissaanik saqqummiusissussamik suleqatigiissitamik pilersitsisoqassasoq natsisartut aalajangerput.
Inatsisartut inatsisissaattut siunnersuutikkut matumuuna Inatsisartut aalajangigaat Naalakkersuisut malippaat, tassuunalu Kukkunersiuinermut Ataatsimiititaliaq ingerlatsinermik kukkunersiuinissamut tunngavissamik erseqqilluinnartumik qulakkeeriffigineqarluni.
2002-mi upernaakkut ataatsimiinnermit Inatsisartut aalajangigaata sinnera pillugu Inatsisit Atortinneqarnerannut Ataatsimiititaliap oqaatigissavaa suleqatigiissitamik pilersitsisoqarsimaoq, taassumalu Namminersornerullutik Oqartussat aktiaatilittut inissisimanerata Naalakkersuisunit isumagineqarneranut killissarititat Inatsisartullu tamatuminnga nakkutilliisuunerat qanoq ilillugit patajaallisarneqarsinnaanersut kissaatigineqartutut misissoqqissaarneqarnissaa aallartissimagaa. Naatsorsuutigineqarpoq suleqatigiissitap misissuieqqissaarnera siunnersuutinik arlalinnik tigus-saasunik, tassungalu ilanngullugu pisariaqarneratut annertussusilimmik inat-sisiliornertut suliniutinut siunnersuutinik inerneqarumaartoq. Suliassap annertussusia pisariussusialu eqqarsaatigalugit suleqatigiissitap misissueqqissaarnerminik naammassinnissinnaalernissaata tungaanut piffissamik atuisariaqarnissaq naatsorsuutigineqartariaqarpoq. Inatsisilli Atortinneqarneranut A-taatmiititaliap maluginiarpaa siunnersuutip siullermeerlugu oqaluuserineqarnerani Namminersornerullutik oqartussat aktieselskabiutaasa paasisaqarfigineqarsinnaanerat pillugu Kukkunersiuinermut Ataatsimiititaliap oqartussaaffiata piaartumik annertusineqarnissaa kissaatigineqartoq arlalinnit annertuumik pingaartillugu oqaatineqarmat. Ukiakkut ataatsimiinnissaq tulleq nallertinnagu apeqqut taanna pillugu tamakkiisuunngitsumik isumaliutissiissuteqarnissaq suleqatigiissitamit ajornanngitsutut isigineqassagaluarpat tamanna Inatsisit Atortinneqarnerannut Ataatsdimiititaliap ilassilluassavaa.
Suliamili Kukkunersiuinermut Ataatsimiititaliap 2000-imi oktoberimi nalunaarusiaatigut aal-lartinneqartumi siunnersuutitut saqqummiunneqartoq alloriarneruvoq siulleq pingaartoq. Taman-na alloriarnerujumaartullu Kukkunersiuinermut Ataatsimiititaliap isumaliutersuutaa annertuumik kinguneraat, taamaalillunilu Kalaallit Nunaanni tamat oqartussaaqataanerini, inatsisartoqarnerup inatsiseqarnerullu ineriartornerini Kukkunersiuinermut Ataatsimiititaliaq annertuumik tunniussaqarpoq, tamannalu nersorneqartariaqarpoq.
Taamatut oqaaseqarnermut ilanngullugu Inatsisit Atortinneqarnerannut Ataatsimiititaliap pissu-sissamisoortutut isigalugu Naalakkersuisut qujassuteqarfiginiarpai, Naalakkersuisut Inatsisartut kissaatigisaannut tunniussimalluarlutik ilassinnilluarlutillu pimmata, aammalu Kukkunersiuinermut Ataatsimiititaliap oqartussaaffiisa maleruagassatigut tunngavigisaasa iluarsiivigineqarnissaanik anguniagaqarfiusumik suleqataammata.
Taamatuttaaq Inatsisit Atortinneqarnerannut Ataatsimiititaliap Inatsisartut ataatsimiissutaasa imaqarniliorneqarnerisa tamanut saqqummiunneqartarneri pillugit maleruagassat erseqqissarneqarnissaannik Naalakkersuisut siunnersuutaat Inatsisit Atortinneqarneranut Ataatsimiititaliap isumaqatigaa.
Taamaammat ataatsimiititaliap isumaqatigiittup siunnersuut Inatsisartunit akuersissutigeqqullugu inassutigaa.
Inatsisartut Inatsisit Atortinneqarnerannut Ataatsimiititaliaata taama oqaaseqarluni siunnersuut aappassaaniigassanngortippaa.
Isak Davidsen Ole Dorph
Enos Lyberth
Ane Hansen
Astrid Fleischer Rex
Ilanngussaq (Qarasaasiatigut pigineqanngilaq)