Nalinginnaasumik nassuiaatit.

Inatsisip allanngortinneqarnerani siunertaavoq Maniitsup Sisimiullu kommuniisa akornanni kommunit killeqarfiat allanngortinneqassammat Kangerlussuaq kommunimi ataatsimi inoqarfinngorluni ataaseq imermillu pilersuineq qularnaarneqarluni.

Kangerlussuup Sisimiut kommuneqarfianut januaarip aallaqqaataaniit atalernissaanut atatillugu sakkutooqarfikumi siusinnerusukkut kommuneqarfinnut agguataarinerup avataanniittumi kommunit marluk taakku kommuneqarfittut killeqarfiata iluarsaanneqarnissaa Sisimiut Maniitsullu kommuniisa 2001-imi aggustimi aalajangersumik isumaqatigiissutigaat.

Siunnersuutip uuma suliarineqarneranut atatillugu Naalakkersuisut Allattoqarfiata kommunit pineqartut isummeqqusimavai (tusarniaavigisimavai), isummeqqusissummut (tusarniaanermut) akissutit allannguutissatut siunnersuutip inaarutaasumik ilusilerneqarneranut tunngaviusimapput.

 

Siunnersuummi aalajangersakkanut ataasiakkaanut nassuiaatit.

 

§ 1-mut

§ 2-mi nr. 7-ip oqaasertalerneqarnerata sunniutigaa Kangerlussuup qinnguata nunataata matuma kingorna Maniitsup Sisimiullu kommuneqarfiinut killiliussatut aalajangersarneqartunut ilanngunneqarnera. Kangerlussuup qinngua najugaqarfiusoq taamaalilluni Sisimiut kommuneqarfianut ilan-ngutissaaq.

Kommuneqarfiit killeqarfiat atuuttoq Kangerlussuup qinnguaniit kangerluk qiterarlugu inissisimasoq sumiiffinnut nalunaaqutsiussani avannarpasissutsimi 66^o 57', kippasissutsimi 50^o 56'-imi inissisimasaoq allanngortinneqassaaq avannarpasissutsimut 67^o 05', kippasissutsimut 50^o 14'-imut inissisimasussanngorlugu, tassa kuuk sermersuup killingata kitinnguaniittoq sinertussanngorlugu.

Allanngortitsineq imaappoq:

Kommuneqarfiit killeqarfiat ingerlavoq sumiiffinnut nalunaaqutsiussani avannarpasissuseq 66^o 57', kippasissuseq 50^o 56'-imit tatsip Tasersuatsiap imeqarfittut killeqarfianut kangimut kujammut kangianut titarneq narlusooq aqqusaarlugu sumiiffinnut nalunaaqutsiussani avannarpasissuseq 66^o 57', kippasissuseq 50^o 43'-mut. Tassanngaanniit kommuneqarfiit killeqarfiata kujammut kangimut imeqarfiup killeqarfia malippaa avannarpasissuseq 66^o 55', kippasissuseq 50^o 38'-miit imeqarfiup killeqarfiata kujammut isuanut sumiiffinnut nalunaaqutsiussani avannarpasissuseq 66^o 53', kippasissuseq 50^o 27'-mut. Tassanngaanniit killeqarfik avammut ingerlavoq sumiiffinnut nalunaaqutsiussani avannarpasissuseq 66^o 57', kippasissuseq 50^o 27' aqqusaarlugit Tasersuatsiap Kinginnerani sumiiffinnut nalunaaqutsiussani avannarpasissuseq 66^o 58', kippasissuseq 50^o 31'-mut. Sumiiffinnut nalunaaqutsiussami kingullermit tassannga imeqarfiup killeqarfiani inissisimasumit kommuneqarfiit killeqarfiat nutaaq titarneq narlusoq aqqusaarlugu kuup sinaani killeqarfimmut atuuttumi sumiiffinnut nalunaaqutsiussami avannarpasissuseq 67^o 05', kippasissuseq 50^o 14'-mut ingerlavoq.

Sumiiffinnut nalunaaqutsiussat tamarmik WGS 84 datum-imi nunat assingini titarnerit malippaat.

 

§ 2-mut

Inatsit 1. maj 2003-mi atuutilersussatut siunnersuutigineqarpoq.