21. januar 2003 IMAT 2003/13
Ukiumut aningaasanut inatsiseqarfiusumut 2003-mut Inatsisartut aningaasaliissutinut inatsisigigallagaat pillugu Inatsisartut inatsisaata allanngortinneqarneranik Inatsisartut inatsisissaattut nr. xx, 21. januar 2003-meersussatut siunnersuut.
(Aningaasaqarnermut Naalakkersuisoq)
Saqqummiussissut
Naalakkersuisut sinnerlugit matumuuna Ukiumut aningaasanut inatsiseqarfiusumut 2003-mut Inatsisartut aningaasaliissutinut inatsisigigallagaat pillugu Inatsisartut inatsisaata allanngortinneqarneranik Inatsisartut inatsisissaattut siunnersuut saqqummiutissavara.
Ulloq 15. oktober 2002-mi inatsisartunut qinersineqartussanngortitsisoqarmat taamanikkut Inatsisartuusut 2003-mut aningaasanut inatsisissaq naammassillugu suli suliarisimanngilaat. Taamaammat taamanikkut Inatsisartuusut Inatsisartut aningaasaliissutinut inatsisigigallagassaannik akuersissutiginnipput.
Solar uuliamut tapiissutinut aningaasaliissutissat pillugit siunnersuut 2002-mi sinerissamut qanittumi aalisarnermut taamatut tapiissuteqartoqartarneranik tunngaveqarpoq. 2002-mi sinerissamut qanittumi raajarniarnermi aalisariutinik naleqqussaanissaq pilersaarusiorneqarpoq, aalisarnermik imminut akilersinnaatitsinerulersussaq. 2002-mi aalisariutinik naleqqussaaneq kinguaattoorpoq sulilu tamakkiisumik naammassineqarani. Tamatuminnga pissuteqartumik sinerissamut qanittumi raajarniarnermi pissutsit 2002-mut naleqqiullugu annertuumik allanngunngillat taamaammallu Naalakkersuisut siunnersuutigaat inatsisartut aningaasaliissutinut inatsisigigallagaatigut 2003-mullu aningaasanut inatsisissamut ilanngullugu suliarineqartussamik sinerissamut qanittumi aalisarnermut piffissami pineqartumi solar uuliamut tapiissuteqartoqassasoq.
Naalakkersuisut aalisarnermi susassaqartut peqatigalugit periarfissinneqartariaqarput sinerissamut qanittumi raajarniarnermi pissutsinik nalilersuinissaminnut paasiniarlugu tamakkununnga tunngasut qanoq ililluni allaanerusumik aaqqissuussivigineqassanersut. Naalakkersuisut naliliipput sinerissamut qanittumi aalisarnermi aningaasarsiornikkut ajornartorsiutit aalisariutinik naleqqussaanikkut aaqqiivigineqassasut tassalu pisortat tapiissutaasiguunngitsoq. Kisiannili piffissami aalajangersimasumi aalisariutinik naleqqussaanerup siunertarineqartutut sunniuteqalernissaata tungaanut ikaarsaariarfimmi aaqqissuussinissaq pisariaqarpoq, tassani killilimmik tapiissuteqartoqarsinnaassalluni.
Tamakku tunngavigalugit Naalakkersuisut nutaat upernaakkut katersuunnissap tungaanut raajanik tunisinermi akinut tapiissuteqartarneq aamma solar uuliamut tapiissutit taakkununngalu aningaasartuutaasartut aningaasalersorneqartarnerat eqqarsaatersuutigeqqissaarniarpaat, tassami taamanikkut tapiissutit 2003-mut aningaasanut inatsimmut ilanngullugit suliarineqassammata.
Sinerissamut qanittumi aalisarniarnermi angallatinut 150 BT ataallugu usisinnaassusilinnut GR-imillu normulinnut solar uuliamut tapiissutit tunniunneqartassasut siunnersuutigineqarpoq aalisarnerup annertussusia ingerlaannarsinnaaqqullugu tassami aalisarneq inuiaqatigiinnut pingaaruteqarluinnarmat.
Inatsisartut suleriaasissaanni § 41 innersuussutigalugu Inatsisartut qinnuigissavakka Inatsisartut suleriaasissaanni § 30, imm. 1 aamma § 31, imm. 1-mi nalinginnaasumik malittarisassat atuutinngikkallartussanngorteqqullugit taamaalilluni 2003-mut Inatsisartut aningaasaliissutinut inatsisigigallagaata allanngortinneqarneranik Inatsisartut inatsisissaattut siunnersuut siullermeerinninnermut uiggiutiinnarlugu aappassaaniigassanngortinneqarsinnaaqqullugu pingajussaaniigassanngortinneqarsinnaaqqullugulu.
Taamatut oqaaseqarlunga siunnersuut Inatsisartunut oqaluuserisassanngortippara.
______________________
IMAT 2003/13
ANIPI J.nr. 22.21+2003+005