Nalinginnaasumik nassuiaatit

Siunnersuutigineqartumi siunertaavoq Inatsisartut 2003-mut aningaasanut inatsimmik akuersissuteqarnissaasa tungaanut Naalakkersuisut 2003-mi uuliamut tapiissutinut aningaasartuuteqarnissaannut erseqqissumik paatsoorneqarsinnaanngitsumillu tunngavissiinissaq.

Siunnersuutip aalajangersagartaanut ataasiakkaanut nassuiaatit

§ 1-imut

§ 1-ip allanngortinneqarnissaanik siunnersuutigineqartumi siunertarineqartoq tassaavoq Naalakkersuisut 2003-mi uuliamut tapiissutinut aningaasartuuteqarnissaannut tunngavissiinissaq. Aningaasartuutit sineriammut qanittumi raajarniarnermi ilusilersuinermi naleqqussaanermik suliaqarnerup naatsorsuutigineqaqqaaraluartumit kingusinnerusukkut pineranut kiisalu Naalakkersuisut aalisarnermi tapiissuteqarnissamik pisariaqartitanik misissuinerannut tunngasutut isigineqassapput.

Uuliamut tapiissutinut aningaasartuutit kontukkut pingaarnikkut 50.06.21-kkut, Uuliamut tapiissutit, akilerneqassapput. Piffissami 22. januar 2003-mit 30. april 2003-mut aningaasartuutaasussatut killiliussat 2,1 mio. kr.-iusut solarimut liiterimut 0,53 kr.-inik angallatinut 150 BT inorlugu usisinnaassusilinnut GR-imillu normullinnut tapiissuteqarnermut naapertuutissangatinneqarput.

§ 2-mut

Inatsisartut inatsisaat 22. januar 2003-mi atuutilerpoq.