Nalinginnaasumik nassuiaatit
Kalaallit Nunaannut, Kalaallit Nunaannit Kalaallit Nunaannilu usinik imaatigut assartuineq pillugu Inatsisartut peqqussutaat 1. november 1992-imi KNI-p allanngortiterneqarneranut atatillugu atuutilersumik atulersinneqarpoq.
Assartueriaatsip nutaap aningaasartuutivinnik annertunerusumik tunngaveqarnissaanik Naalakkersuisut kissaateqarnerat naapertorlugu Kalaallit Nunaannit Kalaallit Nunaannilu usinik imaatigut assartuinermut akitsuutip procentia 1. januar 2002 aallarnerfigalugu atuutilersumik 0-inngortillugu aalajangerneqarpoq, aammalu 1. maj 2003 aallarnerfigalugu Kalaallit Nunaannut usinut akitsuutip procentia taamatuttaaq 0-nngortillugu aalajangerneqarluni.
Tamanna tunngavigalugu Kalaallit Nunaannut, Kalaallit Nunaannit Kalaallit Nunaannilu usinik imaatigut assartuineq pillugu peqqussummi § 6 peerneqassasoq siunnersuutigineqarpoq.
Inatsisini allani suut atuunnersut naapertorlugit § 8-mi siunnersuutigineqarpoq akisussaatinneqarsinnaasut amerlineqassasut aammattaaq uku ilanngullugit, piginneqataassuteqarluni ingerlatseqatigiiffiit, peqatigiiffiit, pisortat ingerlatsivii imminnut pigisut, aningaasaateqarfiit il.il. kiisalu namminersornerullutik oqartussat, kommunit aamma kommunit ataatsimoorussaat.
Siunnersuut aningaasaqarnikkut allaffissornikkulluunniit sunniuteqassanngilaq.
Aalajangersakkanut ataasiakkaanut nassuiaatit
§ 1, nr. 2-mut
Kalaallit Nunaannit, Kalaallit Nunaanni Kalaallit Nunaannullu usinik imaatigut assartuinermut akitsuutip akilerneqartarunnaarnera pissutigalugu allaffissornikkut akiliisitsinissat aalajangiiviginissaat pisariaarutivissaaq. § 1-imi aalajangersagaq Kalaallit Nunaannut, Kalaallit Nunaannit Kalaallit Nunaannilu usinik imaatigut assartuineq Naalakkersuisut akuersiteqqaartinnagit inuussutissarsiornermik siunertaqarluni unioqqutinneqarpat, akiliisitsinissamik apeqqut taamaalilluni Kalaallit Nunaanni Politimesterimit imaluunniit eqqartuussivinnit aalajangiivigineqarsinnaassaaq.
Akiliisitsinermik suliassani taamaattuni kikkut akisussaatinneqassanersut imm. 2-mi erseqqissaavigineqarput. Siunnersuutigineqarpoq akisussaatinneqarsinnaasut inuttaat inatsisini allani suut atuunnerat naapertorlugu amerlineqassasut.
§ 2-mut
Siunnersuutigineqarpoq Kalaallit Nunaannut, Kalaallit Nunaannit Kalaallit Nunaannilu usinik imaatigut assartuineq pillugu Inatsisartut peqqussutaanni § 6 1. januar 2004-miit atuutilersumik atorunnaarsinneqassasoq.
Siunnersuutigineqarpoq Inatsisartut peqqussutaanni malittarisassat akitsuusiisarnermut tunngasut ukiuni 1. januar 2001-imiit 31. december 2003 ilanngullugu atorneqarsinnaajuassasut.