Nalinginnaasumik nassuiaatit
1. Aallaqqaasiut
Siunnersuut tamatumunnga peqatigitillugu sulisitsisut inuutissarsiutinut ilinniartitaanernut tapiissutaat pillugit Inatsisartut inatsisaanni (AEB pillugu inatsimmi) allannguutissatut siunnersuutit kingunerisaattut suliarineqarpoq.
Aalajangersakkatut siunnersuutigineqartut ilinniagaqarnersiutit pillugit Inatsisartut peqqussutissaattut siunnersuutaanni Naalakkersuisunit saqqummiunneqartumi (UKA 2003/163) § 3 aamma § 5-itut ilaapput. Siunnersuutip siullermeerneqarnerata kingorna siunnersuutip Naalakkersuisunit tunuartinneqarnerata kingunerisaanik aalajangersakkat taakku sulisitsisut inuutissarsiunut ilinniartitaanernut tapiissutaat pillugit Inatsisartut inatsisaata allanngortinneqarnissaanik Inatsisartut inatsisissaattut siunnersuummut (UKA 2003/162) aammalu inuussutissarsiutinut ilinniartitaanerit inuussutissarsiutinullu pikkorissartitsisarnerit pillugit Inatsisartut peqqussutissaattut siunnersuutip allanngortinneqarnissaanik Inatsisartut peqqussutissaattut siunnersuummut (UKA 2003/161) attuumassuteqarnerat pillugu pisariaqarsimavoq siunnersuummik matuminnga saqqummiinissaq sungiusarluni sulinermi tapiissutit nutaamik aaqqissuussivigineqarnera siunnersuutit taakku marluk aqqutigalugit siunnersuutigineqartoq piviusunngortinneqarsinnaaqqullugu.
2. Siunnersuummi qulequttatut pingaarnerutitat pillugit nassuiaat
Siunnersuutip § 2a, imm. 1-ani pisinnaatitsisoqalerpoq ilinniagaqarnersiutit sulisitsisut inuutissarsiutinut tunngaviusumik ilinniagaqartunik aammalu ilinniagaqartunik Kalaallit Nunaanni sungiusarlutik sulisunut Danmarkimilu atuagarsornermik ingerlatsisunut akissarsia-nut aningaasartuutigiligaannut tapiissutitut atorneqartalernissaannik. Taama aaqqiinikkut siunertaavoq Namminersornerullutik Oqartussanut aammalu sulisitsisunut aningaasartuuteqar-titsisoqannginnissaanik siunniussap inatsisitigut tunngavissiorniarneqarnera, sulisitsisut inuutissarsiutinut ilinniartitaanernut tapiissutaat pillugit Inatsisartut inatsisaata allannguutis-saatut siunnersuummi erseqqinnerusumik allaatigineqartoq.
Siunnersuutip § 2a, imm. 2 aamma 3-ani imm. 1-mut atatillugu aalajangersarneqarpoq sulisi-tsisunut tapiissutit annertussusissaat aningaasanut inatsimmi aalajangersarneqartassasut, aammalu tapiissutinut nunatta karsiata aningaasartuutai sulisitsisunut tapiissutit tamarmiusut affaattut annertutigisassasut, tapiissutillu affaat allat aningaasalersorneqassasut AEB pillugu inatsimmi aalajangersakkat naapertorlugit. Tassunga peqatigitillugu Naalakkersuisut inatsisi-tigut tunngavissinneqarput pineqartoq pillugu erseqqinnerusunik malittarisassiornissaminnut.
Allannguutit aamma isiginiarneqassapput inuutissarsiutitigut ilinniagaqarnermut sulisitsisut akiliutaat pillugit Inatsisartut inatsisaata allanngortinneqarneranik Inatsisartut inatsisissaattut Naalakkersuisut siunnersuutaannut piffissami matumanissaaq saqqummiunneqartumut atasutut, taannalu innersuussutigineqassaaq sukumiinerusumik paasisaqarniartumut.
3. Pisortanut allaffissornikkut ingerlatsinermi aningaasaqarnikkullu sunniutit
Taamaaliorneq aningaasaqarnikkut sunniuteqassanngilaq sulisitsisumut tapiissutissatut siunnersuutigineqartup annertussusissaa ilinniartumut ataatsimut atorfeqartinneqartumut qaammammut 2.000 kroninngortinneqarpat ilinniartup ilinniarnerata nalaani tamarmi. Taakkunannga nunatta karsiata matusassavai tapiissutit affaat affaalu allat AEB-imit aningaa-saatigineqartunit matuneqartassallutik. Tapiissutissap annertussusissaa naatsorsorneqarpoq nunatta karsiata aamma AEB-mit aningaasaatigineqartunit lærlingimut ataatsimut agguaqati-giissillugu aningaasartuutigineqartartut ullumikkumut atuuttut najoqqutaralugit. Saffiortutut, maskinalerisutut aammalu umiarsuarni ikkussuisartutut ilinniartunut aningaasartuutigine-qartartut ullumikkut 1.787 kroniupput, taavalu sanasutut, ruujorilerisutut aammalu qalipaasu-tut ilinniartunut ullumikkut 2.029 kroniullutik, kiisalu TNI-mi (HK-mut ilinniakkat nutaat) ilinniartunut ullumikkut 2.372 kroniullutik.
4. Inuutissarsiornermut aningaasaqarnikkut aamma allaffissornikkut ingerlatsinermi sunniutit
Siunnersuut inuutissarsiuteqarnermut aningaasaqarnikkut aamma allaffissornikkut ingerlatsi-nermi sunniuteqassanngilaq. Aalajangersakkat taakkulu AEB pillugu inatsimmi allannguu-tissatut siunnersuummut attuumassutaat ilimagineqarpoq allaffissornikkut ingerlatsinermi oqilisaataassasut, taamalu aamma sulisitsisunut iluaqusersuutaassalluni.
5. Avatangiisinut sunniutit
Siunnersuut avatangiisinut sunniuteqassanngilaq.
6. Innuttaasunut allaffissornikkut ingerlatsinerni sunniutit
Siunnersuut toqqaannartumik innuttaasunut sunniuteqassanngilaq.
7. Sunniutaasinnaasut pingaaruteqartut allat
Sunniuteqanngilaq.
8. Naalagaaffeqatigiinnermut aammalu namminersulivinnissamut attuumasut
Ilimagineqanngilaq siunnersuut annertunerusumik namminersulivinnissamut qanillisaasumik sunniuteqarsinnaassasoq imaluunniit tunngavissiuisinnaassasoq annertunerusumik namminersulivinnissamut. Illuatungaatigulli aamma siunnersuutip taama pisoqarnissaa akornusinngilaa.
9. Oqartussaaffeqarfiit kattuffiillu il. il. tusarniaaffigineqarsimasut
Siunnersuut ilinniagaqarnersiutit pillugit peqqussutissap ilaatut 20. junimiit 18. juli 2003-p tungaanut tusarniaassutigineqarpoq tusarniaaffigineqartussatut allattorsimaffimmi matumunnga ilanngussamiittumut (ilanngussaq 1).
KANUKOKA isumaqarpoq sulinermik sungiusarneq ilinniarfimmiinnerlu malillugit inuussu-tissarsiutinut ilinniartitaanerit suussusiinut tamanut assigiinngitsunik annertussusiliisoqar-tariaqartoq, taavalu ukiumi siullermi ilinniarfimmiinnermi ilinniagaqarnersiutit ilinniarnerup nalaa tamaat akissarsianut allanngortinneqarnissaani pisariaqassasoq illuatungeriit isumaqati-giissuteqarsinnaatitaasut akornanni nutaamik isumaqatigiissuteqarnissaat, aammalu isumaqar-luni erseqqinnginnerarlugu allannguineq taamaattoq aningaasartuutitigut nikingassutaassa-nersoq.
KANUKOKA-p kissaatigaa akissarsiat qaffanneqartillugit tamanna Namminersornerullutik Oqartussanit tapiissutit amerlinerisigut taarsiiffigineqartassasoq.
Aammattaaq KANUKOKA-p kissaatigaa ilinniarnerup naammassineqarnerani tapiissutit atorunnaarsinnerini imaluunniit ilinniarnermik taamaatitsiinnarnermi qaammatip ulluisa 15-ianni unitsitsisoqartassasoq, siunnersuutigineqartutut 20-aniunngitsoq.
Tamanna pillugu Naalakkersuisut KANUKOKA-mik aammalu Kalaallit Nunaanni Sulisitsisut Peqatigiiffiannik oqaloqatiginnipput, tamannalu tunngavigalugu KANUKOKA-p oqaaseqaa-taasa akuerineqarnissaat tunngavissaqartissimanagu.
Aqutsinermut Pisortaqarfiup paaserusussimavaa inussutissarsiutinut tunngaviusumik ilinniartitaanerni lærlingit akissarsiaannut aningaasartuutit qaffariaataannik matussusiinissa-mut Namminersornerullutik Oqartussani immikkoortortanut tapiissutit qanoq ilillugit tunniunneqartassanersut, tamatumunnga tunngavigineqartutut oqaatigineqarmat tamatuma kingorna malittarisassat kingunerisaannik pisortaqarfiit ataasiakkaat Namminersornerullu-tilluunniit Oqartussat ataanni suliffeqarfiit ataasiakkaat tapiissutit tunniunneqarnissaat siunertaralugu sulianik ingerlatsisarnissaat. Tassunga atatillugu ilisimatitsissutigineqassaaq tapiissutit sulisitsisunut ataasiakkaanut akilerneqartarmata pineqartut kontoannut nuussinikkut, taamaattumillu sulisitsisut ataasiakkaat tamanna suliaqaatigineq ajormassuk.
Inatsisileriffiup inatsisilerinermi teknikkikkut oqaaseqaatai siunnersuummut ilanngunneqar-put. Aamma tamanna atuuppoq Inatsisartut Inatsisissanik Nalilersuisarfiannit oqaaseqaatinut.
Siunnersuummi aalajangersakkanut ataasiakkaanut oqaaseqaatit
§ 1-imut
Namminersornerullutik Oqartussat siunissami aningaasartuutigiunnaassavaat inuutissarsiu-tinut tunngaviusunut ilinniartunut aamma Kalaallit Nunaanni ilinniagaqarnermut atatillugu misiliilluni suliffeqarallartunut aammalu Danmarkimi atuarfinniittunut aningaasartuutaasartut. AEB pillugu inatsisip allannguutissaatut siunnersuut malillugu sulisitsisut pisussaatitaapput ilinniagaqartut taakku akissarsiaannut aningaasartuutit matussallugit, atuarfimmiippata misiliilluniluunniit suliffeqarpata.
Aaqqiinermut nutaamut tunngaviuvoq peqataasunut tamanut aningaasartuutitigut nikingassu-teqassanngitsoq, tassa Namminersornerullutik Oqartussanut, sulisitsisunut, ilinniartunut aammalu AEB-mut aningaasaatinut. Taamaattussaanerata kinguneraa tamatuma aalajanger-sakkap ilanngunneqarnissaa pisariaqalersoq, taamalu periarfissiisoqassalluni ilinniagaqarner-siutit sulisitsisunut ilinniartunik atorfinitsitsisunut tapiissutigineqartalernissaannut.
Piviusunngortinnerani isumagineqarpoq aningaasanut inatsimmi konto 40.13.50-mit, ilinniagaqarnersiutit aamma meeqqanut tapiissutit, aningaasaliissutinit kontumut nutaamut illuartitsisoqartassasoq, taamatuttaarlu aningaasanut inatsimmi konto 40.13.55-mit AEB-mut tapiissutit aningaasaliissutinit amerlaqataannik kontumut nutaamut illuartitsisoqartassasoq. Kontulu nutaaq taanna sulisitsisunut tapiissutinut atorneqartassaaq. Ukiumut naatsorsuutit suliarineranni sinneqartoorutit imaluunniit amigartoorutit konto nutaap aamma konto 40.13.50-ip kiisalu konto 40.13.55-ip akornanni iluarsiivigineqartassapput, iluarsiissutit kontunut taasanut kingullernut angeqqatigiimmik avillugit.
2002-mi AEB-mi aningaasaatinit 19,8 mio kr. atorneqarput inuutissarsiutini tunngaviusumik ilinniartut akissarsiaqartinnerannut. 2002-mi aningaasarsianut atorneqartut aallaavigigaanni taamaalilluni aningaasanut inatsimmi konto 40.13.50-miit 9,9 mio. kronit aammalu taakku amerlaqatai konto 40.13.55-miit kontumut nutaamut illuartinneqassapput. Konto nutaami aningaasaliissutit taamaallaat sulisitsisunut tapiissutinut atorneqartassapput. Tapiissutit allat ilinniartunut tunniunneqarsinnaasut, soorlu meeqqanut, angalanermi aningaasartuutinut aammalu pigisat nassiunneranni aningaasartuutaasinnaasunut tapiissutaasartut siornatigutut kontut uku atorlugit matuneqartassapput: 40.13.50, 40.13.60 Immikkut tapiissutit, angalanermi aningaasartuutit il.il., USF, 40.13.61 Immikkut tapiissutit, angalanermi aningaasartuutit il.il. KIIIP-ip ingerlatsiveqarfii.
§ 2a, imm. 2-imi aalajangersarneqarpoq tapiissutit aningaasanut inatsimmi annertussusi-lerneqartassasut aammalu Namminersornerullutik Oqartussat sulisitsisunut ilinniartunik atorfinitsitsisunut tapiissutit tamarmiusut affaat akilertassagaat.
§ 2a imm. 3-imi Naalakkersuisut pisinnaatitaapput malittarisassaliornissamut tapiissutit suna siunertaralugu, qanoq ingerlanneqarnissaat, sunik tunngaveqarluni tunniunneqartarnissaat aammalu qanoq annertutiginissaat akiliutigineqartarnissaallu pillugit.
Siunnersuummi angorusunneqarpoq sulisitsisunut ilinniartunik atorfinitsitsisunut qanoq siunertaqarluni tapiissuteqartarnissap malittarisassaliorsinnaalernissaa. Siunertat pingaarner-paat ilagaat sulisitsisut tamarmiusut suleqataallutik peqataalernissaat sulisartunik ilinniagaqar-simasunik naammattunik aammalu qaffasissumik sapinngisaqartunik ilinniagaqartitsisoqar-niarnerani, taamaalillunilu suliffeqarfinni ilinniarsimasunik sulisartoqarnissamik pisariaqar-titsineq naammassineqarsinnaalersillugu.
Naalakkersuisut aamma aalajangersarsinnaavaat tapiissutinik allaffissornikkut ingerlatsineq qanoq malittarisassaqartinneqassanersoq. Naalakkersuisut angorusuppaat malittarisassalior-toqassasoq qulakkeerinnissutaasunik sulisitsisunut ilinniartunik atorfinitsitsisunut tapiisoqartassasoq, tapiissutillu taakku tunniunneqartarunnaassasut ilinniartumut isumaqatigiissut atorunnaaraangat. Tamakku saniatigut aamma malittarisassaliorfigine-qarsinnaapput kikkut ingerlatsisuussanersut aammalu tapiissutinut allaffissornikkut ingerlatsi-nerup qanoq ittuunissaa pillugu.
Tapiissutinik tunineqarnissamut piumasaqaatit malittarisassiorneqarsinnaapput. Malittari-sassaniissinnaapput ilinniartoq ulloq naallugu suliffeqartinneqassasoq aammalu sulisitsisoq AEB-mi tapiissutinut akiligassaminik kinguaattoorsimassanngitsoq, imaluunniit allanik piumasaqartoqarsinnaalluni sulisitsisup imaluunniit ilinniartup naammassisimasassaanik tapiissutinik tunniussisoqannginnerani.
Malittarisassat tapiissutit annertussusissaannik tunniunneqarnissaannillu imaqartut annerusumik imarisassavaat tapiissutit annertussusilernerat aammalu piffissap qanoq ilinerani tunniunneqartarnissaat, assersuutigalugu qaammammut 2.000 kr. tunniunneqartassanersut imaluunniit qaammatit pingasukkaarlugit 6.000 kroninik tapiisoqartassanersoq. Pinngitsoorani malittarisassiorneqassapput sulisitsisunut tapiissutip qanoq annertutigineranik tunniunne-qarneranillu naatsorsuusiortarnissaq, naatsorsuusiarisat ilinniartup atorfeqartinneqarnera najoqqutaralugu suliarineqartassanersut imaluunniit sulisitsisumut tapiissutit aatsaat tunniunneqartassanersut tunniussinerup nalaani ilinniartoq atorfeqartinneqarpat.
Naalakkersuisut naatsorsuutigaat massakkut aalajangersaanissami malittarisassaniissasoq tapiissutit qaammammut kingumoortumik tunniunneqartarnissaat, aammalu tapiissutit tunniunneqartassanngitsut ilinniartoq qaammatip ulluisa 20-anni atorfeqartinneqanngippat.
§ 2-mut
Peqqussutip atuutilerfissaatut siunnersuutigineqarpoq 1. januar 2004. Tamanna pissuteqarpoq AEB pillugu inatsisip allanngortinneqarnissaanik Inatsisartut inatsisissaattut siunnersuut saqqummiunneqartoq ulloq taanna aamma atuutilissammat. Pissusissamisoorsorineqarnerpaavoq allanngortitsineq matumuuna siunnersuutigineqartoq atuutilissasoq ukiup nutaap aallartinnerani.