28. november 2003

UKA2003/161 & 162

 

Inuussutissarsiutinut ilinniartitaanerit inuussutissarsiutinullu pikkorissartitsisarnerit pillugit Inatsisartut peqqussutaata allanngortinneqarneranik Inatsisartut peqqussutissaattut siunnersuut (UKA2003/161)

&

Inuutissarsiutitigut ilinniagaqarnermut sulisitsiut akiliutaat pillugit Inatsisartut inatsisaata allanngortinneqarneranik Inatsisartut inatsisissaattut siunnersuut (UKA2003/162)

pillugit

Inatsisartut Kultureqarnermut Ilinniartitaanermullu Ataatsimiititaliaata

ISUMALIUTISSIISSUTAA

siunnersuutip aappassaaneerneqarnerani saqqummiunneqartoq

 

Inatsisartut Kultureqarnermut Ilinniartitaanermullu Ataatsimiititaliaat suliarinninnermini ukuninnga inuttaqarpoq:

 

Inatsisartuni ilaasortaq Doris Jakobsen, Siumut, Siulittaasoq
Inatsisartuni ilaasortaq Georg Olsen, Inuit ataqatigiit, siulittaasup tullia
Inatsisartuni ilaasortaq, Ruth Heilmann, Siumut
Inatsisartuni ilaasortaq Godmand Rasmussen, Atassut
Inatsisartuni ilaasortaq Astrid Fleischer Rex, Demokraatit

Inatsisartuni sinniisussaq Kista Lynge Høegh, Inuit Ataqatigiit, piffissami 31/10-miit 25/11-03-mut
Sinniisussaq Marie Fleischer, Demokraatit, piffissami 05/11-miit 18/11-03-mut

 

Inatsisartut Kultureqarnermut Ilinniartitaanermullu Ataatsimiititaliaata siunnersuut qulaani pineqartoq UKA2003-mi siullermeerneqareermat misissuataarpaa.

 

Tusarniaanernit akissutisiat
Siunnersuutip matuma ataatsimiititaliami suliarineqarnissaanut atugassatut tusarniaanermit akissutisiat assilileri ataatsimiititaliap pissarsiarai.

Siunnersuut piffissami 20. junimit 18. julip tungaanut susassaqartunut tusarniaassutigineqarsimavoq. Naalakkersuisut tusarniaanerup aasaanerani ingerlanneqarnissaanut toqqaasimanerat pissutigalugu, ingammillu ilinniagaqarfiit ilinnigaqartullu kattuffii tusarniaanermi ilaatinneqar nissat pissutigalugu, Naalakkersuisut piffissaq sivisunerusoq atorlugu tusarnisaanermik ingerlat sisimasariaqaraluarnerat ataatsimiititalimit kissaatiginarnerusutut isumaqarfigineqarpoq.

Ataatsimiititaliap KANUKOKA-p oqaaseqaatai Naalakkersuisut KANOKUKA-p Kalaallillu Nunaanni Sulisitsut Peqatigiiffiata akornanni oqaluuserineqarsimasut paasivaa, aammalu Aqutsisoqarnermi Pisortarfiup tusarniaanermut atatillugu Naalakkersuisunut apeqquteqaatigisaat akineqarsimasut.

 

Sassartitat
KIK-miit aallartitanik ataatsimiititaliamut sassartitsisoqarsimavoq. Siunnersuummi nutaami KIK-mi ilaasortat peqatigiiffimminnut toqqaannartumik ilinniagaqarnersiutiminniit ilanngaanneqartarunnaarnissaat kattuffiup naammaginagu oqaatigaa.

Siunnersuutit imarisai:

- Siunnersuutigineqartut tunuliaqutaralugu "Inuutissarsiutinut ilinniartitaanerit iluarsartuussivigeqqinneri pillugit nassuiaat" tunngavigalugu saqqummiunneqarput
- UKA2003/162-mik siunnersuuteqarnerup kingunerisaanik UKA2002/161 saqqummiunneqarpoq
- EM03/162-mik siunnersuutip siunertaraa nassuiaammi "Ilinniartut sungiusaammik sulisut akissarsiaasa AEB-mit aningaasalersorneqartut sulisitsisunit tunniunneqartarnissaat pullugu aaqqissuussisoqassaaq" naapertorlugu pilersitsinissaq
- Aaqqissuussinermi matumani sulisitsisut lærlingip ilinniarneranut annertunerusumik akisussaaqataanerat pillugu paasisimasaqarnerulernissaat pingaarnertut siunniunneqarpoq
- Aaqqissuussinerup nutaap isumaginninnermi ikiortitut peqqissaanermilu ikiortitut ilinniartitaanerup iluani tapiisutit atorneqarnerat iluarsiivigaa.
- Tamatumunnga ilutigalugu aaqqissuussineq aqukkuminartuussaaq
- Aaqqissuussineq illuatungeriinnut aningaasartuuteqarfiussanngilaq
- Aammattaaq ilinniagaqartup ilinniagaqarnermi nalaani aalaakkaasumik isertitaqarnissaa qulakkeerneqassaaq

 

Ataatsimiititaliap siunnersuutigineqartunut oqaaseqaatai:
Ataatsimiititaliap isumaqatigiittup siunnersuut 162 taasumalu kingunerisaanik siunnersuutigineqartoq 161 1. januar 2004 atuutilersussat taperserpaat. Taammaatorli Naalakkersuisut ilinniagaqartunut malittarisassanik nutaanik paasisitsiniaanermik allaritsinissaat pissusissamisuussasoq ataatsimiititaliap naleqquttuusoraa.

Tamanna tunuliaqutaralugu Kulturqarnermut Ilinniartitaanermullu Ataatsimiititaliap isumaqatigiittup siunnersuutit marluusut saqqummiunneqarneratut isikkoqarlutik Inatsisartuni akuersissutigineqassasut inassutigaa.

Taama oqaaseqarluni Inatsisartut Kulturqarnermut Ilinniartitaanermullu Ataatsimiititaliaa "Inuussutissarsiutinut ilinniartitaanerit inuussutissarsiutinullu pikkorissartitsisarnerit pillugit Inatsisartut peqqussutaata allanngortinneqarneranik Inatsisartut peqqussutissaattut siunnersuut" aamma "Inuussutissarsiutigalugu ilinniagaqarnermut sulisitsisut akiliutaat pillugit Inatsisartut inatsisaata allangortinneqarneranik Inatsisartut inatsisissaattut siunnersuut" siunnersuutit aappassaaniigassanngortippai.

 

	Doris Jakobsen, Siulittaasoq
Georg Olsen		Ruth Heilmann
Godmand Rasmussen		Astrid Fleischer Rex