Nalinginnaasumik nassuiaatit
Siunnersuummut tunuliaqutaasut:
Inuutissarsiutitigut ilinniagaqarnermut sulisitsisut akiliutaat pillugit Inatsisartut inatsisaata allanngortinneqarnissaanut Inatsisartut inatsisissaattut siunnersuut Inatsisartut ukiakkut 2003-mi ataatsimiinnissaannut Naalakkersuisut oqaluuserisassanngortinniarlugu nalunaarutigaat.
Inuutissarsiutitigut ilinniagaqarnermut sulisitsisut akiliutaat pillugit Inatsisartut inatsisaata allanngortinneqarnissaanut siunnersuut Inatsisartut akuersissutigissappassuk inuussutissarsiutinut ilinniartitaanerit inuussutissarsiutinullu pikkorissartitsisarnerit pillugit Inatsisartut peqqussutaanni kingunerisassanut iluarsiissutissat uani eqqartorneqartut iluarsiissutigineqassapput, taamaanngippat inatsisit taakku marluk imminnut akerleriilissammata.
Tamatumunnga tunuliaqutaavoq § 36, imm. 1-imi atuuttumi innersuussutigineqarmata sungiusarluni suliffimmiinnerit, inuutissarsiutitigut ilinniagaqarnermut sulisitsisut akiliutaat pillugit Inatsisartut inatsisaanni ilaasut aamma § 36, imm. 2-mi innersuussutigineqarmata ilinniarfimmiinnerit Inatsisartut inatsisaanni tassani ilaasut.
Inuutissarsiutitigut ilinniagaqarnermut sulisitsisut akiliutaat pillugit Inatsisartut inatsisaannut allannguutissatut siunnersuutip akuersissutigineqarneratigut sulisitsisut suliffimmi sungiusarnernut ilinniarfimmiinnernullu aalajangersimasunut akiliuteqartarunnaassapput. Sulisitsisut akiliutaat sulisitsisunut ilinniartunik sulisoqalersunut akiliutigineqartassapput ilinniarnerullu ingerlanera tamakkerlugu suliffimmi sungiusarnermi ilinniarfimmiinnermilu agguataarneqarsimassallutik.
Aammattaaq innersuussutigineqassaaq Inuutissarsiutitigut ilinniagaqarnermut sulisitsisut akiliutaat pillugit Inatsisartut inatsisissaata allanngortinneqarneranik inatsisissatut siunnersuut nassuiaatitalik.
Aningaasatigut allaffissornikkullu kingunerisassat:
Siunnersuutip akuersissutigineqarnera aningaasatigut allaffissornikkullu kinguneqassanngilaq.
Tusarniaaneq:
Siunnersuut piffissami 2002-mi 1. julimiit 1. augustimut ukununnga tusarniaassutigineqarsimavoq: qitiusumik ilinniarfiit, qitiusumik ilinniartitaanernut ataatsimiititaliat, najukkani inuussutissarsiutitigut ilinniarfiit, najukkani inuussutissarsiutitigut ilinniartitaanernut ataatsimiititaliat, Kalaallit Nunaanni ilinniarfiit, sulinermik sungiusarnermut ilitsersuisut, KANUKOKA, ilinniagaqartut kattuffii (KIK aamma DKIK), KIIIP-ip Danmarkimi allaffimmi immikkoortortaa, Namminersornerullutik Oqartussat pisortaqarfii, Kalaallit Nunaanni Sulisitsisut Peqatigiiffiat, Kalaallit Nunaanni Niuernermut, Assartuinermut Suliffissuaqarnermullu Sulisitsisut Kattuffiat (HST) aammalu SIK.
KANUKOKA-mit Namminersornerullutik Oqartussani pisortaqarfinnit, Naalakkersuisut Allattoqarfianni Inuussutissarsiornermut immikkoortortaq aamma Isumaginninnermut Suliffeqarnermullu Pisortaqarfik kisiisa pinnagit, Sulisitsisut Peqatigiiffiannit HST-millu tusarniaanermut akissutit tiguneqarput.
Tusarniaanermi akissutit oqaaseqaatillu tiguneqartut siunnersuutip nassuiaatitaasalu allanngorneqarnissaanut tunngavissiinngillat. Tusarniaanermi oqaaseqaatit pingaarnerit naatsumik nassuiaatigineqassapput.
KANUKOKA-p oqaatigaa sulisitsisut aningaasartuutaat nikisinneqassanngippata akiliutit ilinniartitaanernut ataasiakkaanut atatillugu assigiinngitsuussasut. Inuutissarsiutitigut ilinniagaqarnermut sulisitsisut akiliutaasa agguataarnerat ilinniartitaanernut ataasiakkaanut naleqqussarneqassapput, agguaqatigiissitsilluni naatsorsuineq malillugu agguarneqarnatik.
Aammattaaq KANUKOKA-p oqaatigaa aaqqissuussineq ilinniartitaanernut tamanut assigiimmik atuutissasoq, tassa imaappoq aammattaaq isumaginninnermi peqqissaanermilu ikiortitut ilinniartitaaneq ilaatinneqassasoq.
Kiisalu KANUKOKA-p aamma oqaatigaa ilinniartitaanernut taakkununnga atatillugu aningaasat ilinniagaqarnersiutinut kontumut nuunneqartussat sungiusarluni sulinermut akissarsianut attuumassuteqartinneqassasut.
Tamatuma saniatigut KANUKOKA-p oqaatigaa akiliutit ilinniartut piffissamut atorfeqarfigisaannut atatillugu naatsorsorneqartariaqartut, siunnersuummi oqaatigineqartutut piffissami tunniunneqarfissaanni atorfinitsinneqarnermut atatinnagu.
Kiisalu KANUKOKA-p oqaatigaa Naalakkersuisut tapiissutit qaammammut kingumoortumik tunniunneqartarnissaannik aammalu ilinniartoq qaammatip ulluisa 20-anni atorfinitsinneqan-ngippat tapiissutit tunniunneqarsinnaannginnerannik naatsorsuutiginninnerat isumaqatigisinnaanagu.
Naalakkersuisut KANUKOKA-p oqaaseqaatai Kalaallit Nunaanni Sulisitsisut Peqatigiiffiat KANUKOKA-lu peqatigalugit oqaluuserisimavaat, tamannalu tunngavigalugu siunnersuummik allannguinissamik pissutissaqarsimanatik.
Aammattaaq siunnersuut Inatsisileriffimmi inatsisitigut aaqqissugaanera pillugu misissorneqarsimavoq. Tassanngaannit oqaaseqaatit siunnersuummi ilanngunneqarput, tassunga ilanngullugit siunnersuummi erseqqissaatit nassuiaatillu.
Aalajangersakkanut ataasiakkaanut nassuiaatit
§ 1-mut
Aalajangersakkamut aallaaviuvoq illuatungeriit isumaqatigiissuteqarsimanerat. Kalaallit Nunaanni Sulisitsisut Peqatigiiffiata SIK-llu akornanni kiisalu Naalakkersuisut SIK-llu akornanni inuussutissarsiutinut tunngaviusumik ilinniarfinni ilinniartut pillugit isumaqatigiissuteqartoqarpoq. Sulisitsisut namminersortut Kalaallit Nunaanni Sulisitsisut Peqatigiiffiannut ilaasortaan-ngitsut massakkorpiaq isumaqatigiissuteqanngillat. Ilinniartut sulisitsisuni isumaqatigiissuteqanngitsuni atorfeqartut isumannaallisaaviginiarlugit aalajangersakkamik ikkussisoqarpoq, tassanilu aalajangersaavigineqarluni ilinniartut pisortani ilinniartut akissarsiarisartagaasa atorfeqarnerminnilu atugassarisaasa minnerpaamik assinginik akissarsiaqartitaanissamut pisinnaatitaaffeqartut. Inuussutissarsiutinik ilinniartitaanermi ilinniartut ilinniagaqarnersiutit pillugit malittarisassat naapertorlugit immikkut tunniunneqartartunik ilinniarnertik naallugu pisinnaatitaaffeqassapput.
Inuussutissarsiutinik ilinniartitaanerit tamaasa aalajangersakkap atuuffissarai.
§ 2-mut
Inuutissarsiutitigut ilinniagaqarnermut sulisitsisut akiliutaat pillugit Inatsisartut inatsisaannut allannguutissatut Inatsisartut inatsisissaattut siunnersuut peqatigalugu Inatsisartut peqqussutissaat atuutilissaaq, aammalu sanaartornerup, inuussutissalerinerup, saviminilerinerup aammalu niuernerup allaffissornerullu iluanni inuussutissarsiutitigut tunngaviusumik ilinniartitaanernut 1. januar 2004-mit atuutissalluni. Isumaginninnermi ikiortitut peqqissaanermilu ikiortitut ilinniartitaanerit iluanni ikaarsaariarnermi aalajangersakkamik ilanngussinissaq pisariaqartinneqarpoq, ilinniartitaanerit taakku iluarsartuunneqaqqinnerannut atatillugu ilinniartitaanernut taakkununnga brancheudvalgit ilinniartitaanerup ingerlanerani tamarmi ilinniagaqarnermut tapiissuteqartitsilernissaq kissaatigisimammassuk. Taamatut allannguineq aningaasartuutinik nikisitsissanngippat tamatumani pisariaqartinneqartut tassaapput
- inuutissarsiutitigut ilinniagaqarnermut sulisitsisut akiliutaat pillugu Inatsisartut inatsisaat naapertorlugu akiliutit ilinniartitaanerni taakkunani ukiumi siullermi ilinniartunut tapiissutinut suli aningaasalersuissutigineqassasut,
- Peqqinnissamut Pisortaqarfiup peqqissaanermi ikiortinngorniarlutik ilinniartut sulinermik sungiusarneranni akissarsiaannut aningaasat atukkani ilinniagaqarnersiutinut kontunut nuussagai, aamma
- kommuninut ataatsimoortumik tapiissutit annikillisinneqassasut ilinniartitaanerni taakkunani ilinniartut akissarsiaannut kommunit aningaasartuutaasa amerlaqataannik, aningaasallu taakku ilinniagaqarnersiutinut kontumut nuunneqassasut.
Inatsisartut inatsisaata isumaginninnermi peqqissaanermilu ikiortitut ilinniartunut 1. januar 2004-mi atuutilersinnaanissaa naatsorsuutigineqarpoq. Inatsisissaq akuerineqarpat kommuninut 2004-mut ataatsimoortumik tapiissutissat isumaqatigiissutigineqareersimassammata kommuuninut ataatsimoortumik tapiissutit kingumoortumik iluarsiivigineqarsinnaassapput.