Inatsisartut Inuussutissarsiornermut Ataatsimiititaliaat suliarinninnermini ukuninnga inuttaqarpoq:

Inatsisartuni ilaasortaq Ole Dorph, Siumut, siulittaasoq
Inatsisartuni ilaasortaq Ane Hansen, Inuit Ataqatigiit, siulittaasup tullia
Inatsisartuni ilaasortaq Ruth Heilmann, Siumut
Inatsisartuni ilaasortaq Finn Karlsen, Atassut
Inatsisartuni ilaasortaq Per Skaaning, Demokraatit

Inatsisartut Inuussutissarsiornermut Ataatsimiititaliaata ulloq 14. november 2003 siullermeerinerup kingorna Inuussutissarsiornermut, Nunalerinermut Suliffeqarnermullu Naalakkersuisup, Johan Lund Olsenip peqqussutissatut siunnersuutaa misissuataarpaa.

Aallarniut
Siunnersuut suliffeqarnermik iluarsaaqqinnerup 1998-imi sisamaqiusamik pilersaarusiap suliffeqarnermik naliliisarluni misissuinernik kisitsitigullu paasissutissanik, suliffeqarnerup ilusiligaaneranik aaqqissuussaaneranillu, inatsisitigut iluarsaaqqinnermik kiisalu sulisartunik piginnaan-ngorsaanermik imaqarluni aallartinneqartup ilagaa.

Suliffissarsiuussisarneq pillugu Inatsisartut peqqussutaat atuuttoq 1988-imeersuuvoq, inatsisillu ullutsinnut naleqqussarneqarnissaa, paasiuminarnerulersinneqarnissaa peqqussummillu atuisunut pissarsiariuminarnerulersinneqarnissaa pisariaqartinneqarput.

Sulisartut ingerlaavartumik piginnaanngorsarneqarnissaannik qulakkeerinninnissamik suliffeqarnermi iluarsartuusseqqinnerup anguniagaa peqqussutissatut siunnersuutikkut tapersiivigineqarpoq, minnerunngitsumik suliffeqarnermi sulisartut atorfissaaruttartut kiisalu suliffissarsiuusisarnermut tunngatillugu ilusiliinerit naleqquttut pillugit.

Siunnersuummi pingaarnerusumik anguniagaq tassaavoq najukkani assigiinngitsuni suliffissarsiuussinermik suliniutit innuttaasut kommunalbestyrelsi aqqutigalugu anguniakkamittut kissaatigisaannut naleqqiullugit qanoq ineriartortinneqarsinnaanerannut killiliussassat aalajangersarneqarnissaat. Kommunit eqqarsaatigalugit suliffissarsiuussineq pilersinneqarpoq, peqqussutissatullu siunnersuutikkut matumuuna suliffissamik innersuussisarneq sulisoqarniarnerlu eqqarsaatigalugit kiisalu ilitsersuisarneq siunnersuisarnerlu eqqarsaatigalugit suliffissarsiuussisarnerup nutaaliaanerulersinnissaa atuisunullu piuminarnerusunngortinnissaa suliniutigineqarput.

Inuussutissarsiornermut Ataatsimiititaliap oqaatigissavaa peqqussutissatut siunnersuut matumani pineqartoq suliffeqarnermi peqataasunut, KANUKOKA-mut Namminersornerullutillu oqartussani namminermi tusarniaassutigineqarsimasoq. Tusarniaanermit akissutisiarineqartut pisariaqarneratut annertussusilimmik peqqussutissatut siunnersuummut Naalakkersuisut ilaatippaat. Taamatuttaaq inatsisissatut siunnersuut inatsissanik nalilersuisarfimmit misissuataarneqarsimavoq.

Inatsisissatut siunnersuutip imarisai
Malugeqquneqarpoq peqqussutissatut siunnersuut manna malillugu kommunalbestyrelsimut suliassiissutigineqartut Inatsisartut peqqussutaanni matumani taaneqartut allaffitsigut aqunneqarnissaannut kommunalbestyrelsip piareersarfittut ilitsersuisarfittullu qitiusut pilersissinnaammagit. Qitiusoqarfinni taakkunani suliffissarsiortut aammattaaq ilinniartitsiviit, ilinniarfiusinnaasut, suliffissatut neqeroorutigineqartut il.il pillugit paasisaqarsinnaapput. Inuussutissarsiornermut, Nunalerinermut Suliffeqarnermullu Pisortaqarfiup aamma Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfiup kiisalu kommunit ataasiakkaat akornanni maannakkut suleqatigiinnerup kinguneraa Aasianni, Narsami Tasiilamilu najukkani piareersarfittut ilitsersuisarfittullu qitiusunik misiliilluni aaqqissuussinerit pilersinneqarmata.

Suliffissanik innersuussisarnerup eqaannerusunngortinnissaa atuisunullu piuminarnerusunngortinnissaa aammalu inunnut ataasiakkaanut sullissinerup annertusineqarnissaa siunertaralugit nuna tamakkerlugu suliffissarsiortarfiup pilersinnissaanut periarfissaq ammarneqarpoq. Suliffissarsiortarfiup taassuma pilersinnissaanut periarfissap Inatsisartut peqqussutaanni matumani inatsisitigut tunngaveqarnissaa siunnersuutigineqarpoq.

Siunnersuut manna malillugu Naalakkersuisut qitiusoqarfinnut tapiissutinik ingerlatsinermullu tapiissutinik aalajangersaasinnaammata qitiusoqarfinni suliniutit annertusineqarnerisigut siunnersuut Landskarsimut aningaasatigut kinguneqaateqarsinnaavoq. Suliniutit § 5 naapertorlugu inuusuttut sulliviisa aammalu najukkani inuussutissarsiornermik ilinniarfiit aningaasaliivigineqartarnerisa aaqqissuussiffigeqqinnerisigut qulakkeerneqassasoq siunertaavoq.Suliniutit siuliani taaneqartut aningaasatigut tunngavissaat aaqqissussiffigineqassapput kommunit suleqatiginerisigut. Kommunit aamma Naminersornerullutik Oqartussat akornanni suliassat/nammatassat agguataarneqarnerat tamatumani allannguuteqasslappat, tamanna KANUKOKA-p Naalakkersuisullu akornanni isumaqatigiinniutigineqassaaq.

Ataatsimiititaliap suliarinninnera
Ataatsimiititaliap maluginiarpa siunnersuutip aningaasatigut allaffissornikkullu kinguneqaatissaasa erseqqinnerusumik nassuiaatigineqarnissaat arlalinnit ujartorneqarmat. Taamaammat ataatsimiititaliap Inuussutissarsiornermut, Nunalerinermut Suliffeqarnermullu Naalakkersuisoq ataatsimeeqatigaa. Naalakkersuisoq qinnuigineqarpoq peqqussutissatut siunnersuutip aningaasatigut kingunerisassai itisilerlugit nassuiaatigissagai, kiisalu Naalakkersuisut maleruagassanik erseqqinnerusunik aalajangersaasinnaanerinut peqqussutissatut siunnersuummi aalajangersakkat iluserisaat imarisaallu pillugit.

Tassani Naalakkersuisup sammiumallugit toqqarsimasai tassaapput nutaaviit malunnavissumilluunniit allannguuteqarfiusimasut. Ataatsimiititaliap apeqqutaanut Naalakkersuisup akissutai tulliini issuarneqarput.

§§ 2,3 & 4: Kommunalbestyrelsip suliassai.
Kommunalbestyrelsip qanimut suliffeqarnermi ineriartorneq malinnaavigissavaa taamatullu i-nuussutissarsiutinut suliffissaqartitsivinnullu nutaanut tunngaviliisuussallutik. Taakkua saniatigut kommunalbestyrelse suliffeqarneq pillugu paasissutissanik katersissaaq naalakkersuisunullu nalunaaruteqassalluni. Paasissutissat/kisitsisit taakkua naalakkersuisut inatsisartut inatsisaat tunngavigalugu nunatsinni naatsersueqqissaartarfimmut atatillugu atorsinnaassavaat

Naalakkersuisut paasissutissat/kisitsisit siunertamut atorsinnaassavaat, nalunaarsuinermi maleruaqqusanut attuumassuteqartunut akuerineqarsimasunut, Suliap ilanngunneratigut, tassaassoq Namminersornerullutik oqartussat qitiusumik aqutsiviat qarasaasiamik aallaaveqartoq kisitsisit atorlugit nassuiaatinut allattorsimaffik, suliffeqarneq pillugu misissueqqissaarnerni suliaqarnermut tunngaviusoq. Siullerpaamik periarfissaqarpugut isersinnaalluta, suliffeqarnermilu pisariaqartinneqartunik misissueqqissaassalluta, soorlu suliffeqarfiit sorliit sulisussanik amigaateqarnermik eqqorneqarsimappat, ajornartorsiutit kinguarsaataasut ilaalu ilanngullugit. Ajornartorsiutit taakku pillugit nalunaarut malinnaatinneqassaaq paasissutissat suut pineqarnersut erseqqissarneqassallutik, soorunalumi kommunet isumasiorneqassapput, namminnertaaq misissueqqissaarnermi paasissutissat atorluarsinnaaniassammatigit.Suliassaq taanna aallarteriivippoq.

§ 4: Suliffissaaleqineq annertuumik qaffakkiartortoq nalaapparput, unalu Inatsisartut peqqussutaat aallaavigalugu kommunit suliffissaqartitsinermut tunngatillugu iliuusissanik aallartitsinissamut siunnersuusiussapput kommuneni sulisartut piginnaasaasa nukittorsarneqarnerisigut. Uani Nalunaarut nr.42, 28.september 1994meersoq nanginneqassaq. Kommunet suliffissaqartitsinermut tunngatillugu iliuusissaannut tapiissutit, § 12, imm. 2mut innersuullugu. Kommunalbestyrelsettaaq inuusuttunut 25it ataallugit ukiulinnut sammisitanik suliffissaqartitsinermut, ilinniartitaanermullu neqeroorutinik aallartitsissaaq. Paragrafi una tunngavigalugu aammalu § 12, imm. 2-mut innersuullugu Naalakkersuisut suliffissaqartitsiniarnermi siuarsaataasunut suliniutinut aammalu inuusuttut kiffartuussinerannut tapiissuteqarsinnaanerannut tunngatillugu, Naalakkersuisut nalunaarummik nutaamik piareersaaleruttorput, siusinnerusukkut kommuneni inuusuttut kiffartuussinerannut tapiissutit nalunaarut nr.37 29.december 1995meersumut paarlaassutaasussamik.

§ 5: Inuussutissarsiutinut ilinniartitaanernullu ilitsersuineq kiisalu suliffissanut innersuussisarneq.
1999mi inatsisartut suliaraat akueralugulu STI-mi ilinniartitsissutinik nassuiaat aammalu ilinniartitsissutinut- inuussutissarsiutinullu ilisarititsissutinut nassuiaat ilitsersuullu.

STI-mi ilinniartitaanermut nassuiaatip innersuussutigaa, inuussutissarsiummik ilinniartitaanermik iluarsaassisoqassasoq, inuussutissarsiummik ilinniartitaanermi immikkut ilinniagaasumi pitsaassuseq nukittorsarniarlugu. Pitsaassutsimik pilersitsineq ilaatigut pissaaq ilinniartunngornissamut piumasaqaatit sukannernerulersinnerisigut aammalu ilaatigut ilinniartitsinerup nukittorsarneqarneratigut. Kingulleq ilaatigut isumaqarpoq, ilinniartitsinerup aaliangersimasup ilaa STI- p aaqqissuussaanerata iluaniittoq piffinni inuussutissarsiutigalugu atuarfinni tamaniittoq, inuussutissarsiummut atuarfiusunut annertunerusumik katersorneqassasoq imaluunniit nunap immikkoortuini atuarfinnut ikinnerusunut katersorneqassasoq.

Tamatuma kingorna STI-mik nassuiaat tunngavigalugu, inuussutissarsiummik ilinniartitaanermi aaqqissuussisoqarsimavoq, tamannalu isumaqarpoq massakkut piffinni inuussutissarsiutinut atuarfiit ilai annikitsuinnarmik ingerlatsimmata, taamaalillutik periarfissamik inissaqartitsillutik.

Ilinniartsitaanermut- inuussutissarsiutinullu ilisarititsissutip nassuiaataata innersuussutigaa, siunnersuinermik suliniuteqarneq annertummik nakussassarneqassasoq. Siunnersuinerup pitsanngorsarneqarnerata ilinniarfinni uniinnartartunik minnerpaaffileeqataassammat, ilinniarniarlutik qinnuteqartartut amerlasuut misigisimanngimmata, ilinniarfissaminnik aaliangertarnertik siunnersuinermik naammaginartumik pitsaassusilimmik tunngaveqartoq. Nassuiaatip innersuussutigaa piffinni ataasiakkaani ilinniartitaanermut- qitiusumik ilitsisuisarfimmik pilersitsisoqassasoq, aammattaaq kommune-ni ilinniarnermut- inuussutissarsiutinullu ilitsersuutit tamarmik katersorneqassasut, imaluunniit minnerpaamik piffinni inuussutissarsiummik ilinniarfinni siunnersuisarnerup aaqqissuunneqarnissaa. Aammattaaq nassuiaatip innersuussutigaa, siunnersuinermut attuumassuteqartumik sulisinnaassusilinnut ukiunut tamanut ilinniarnermik- aammalu inuussutissarsiummik ilisarisitsinissamik neqerooruteqartitsisarnermik pilersitsisoqassasoq, atuanngitsunut tamanut, ilinniagaqartunut imaluunniit inuussutissarsiutigalugu suliffeqartunut. Ilinniartitaanermut- aammalu inuussutissarsiummik ilisarisitsinermi neqeroorutit ataasiakkaanut suleriarnissamik pilersaarusiornikkut periarfissiissapput ilinniarfissatut toqqakkamut aallartinnissamut piginnaanngorsarnissamik, imaluunniit inuussutissarsiutissamut toqqakkamut piginnaanngorsarnissamik.

Ilinniartitaanermut- aammalu inuussutissarsiummut ilisarisitsinermik neqeroorutini eqqarsaataasimavoq siusinnerusukkut suliniutaasimasut assingusut katersornissai, soorlu inuusuttut kiffartuussineri, allallu ingerlariaqqinnissamik neqeroorutit, fag-ini ataasiakkaani ilinniartitsinerit aammalu kommune-nini ilinniartitaanermut- inuussutissarsiornermilu siunnersuinerit.

Nassuiaatini siuliani taaneqartuni innersuussutigineqarpoq, piffinni inuussutissarsiutigalugu ilinniarfiit kommune-ni suliffeqarfiulissasut, 1988-miit Namminersornerusut Kommune-llu ataatsimut ingerlassimagaluaraat aningaasartuutit aammalu suliassat agguataarnerisigut. Namminersornerullutik oqartussat inuussutissarsiutitigut ilinniartitaanermut immikkoortortaqarfiani sinniisut (KIIIP) aammalu suliffissaqartitsiniarnermi immikkoortoqarfimmi sinniisut (INUUPI) kommune-ni arlalinniissimapput piffinni inuussutissarsiutigalugu ilinniarfinnik kommune-t ataani suliffeqarfinngortinneqarnissaannik eqqarsaammik paasisitsiniaallutik. Namminersornerullutik oqartussattaaq kommune-t ilai isumaqatigiissuteqarfigisimavaat inuussutissarsiutigalugu inniartitsinerit ilaasa nunap immikkoortuini atuartitsissutigineqarnissaannik nakkutiginnittussatut.

Suliffissarsiuussisarnermik suliniutit ataqatigiissaarniarlugit, siunnersuinermik - ilisarisitsinermillu qitiusoq pilersinneqarpoq, taakkua inuussutissarsiutitigut, suliffissaqartitsiniarnikkut aammalu ilinniartitaanikkut qaffakkiartortut ataatsimut siunnersuineri katersussallugit. Siunnersuinernut - ilisarititsinermullu qitiusunut nassuiaammik naalakkersuisoqarfimmi peqartoqarpoq, INUUPI-mit KIIIP-millu suliarineqarsimasunik, kommune-llu suleqatitut tusarniaavigineqarsimallutik.

Sulissutigalugu misissorneqarpoq qallunaat misissuiffiginninnermik suleriaasiat nunatsinnut atuutilersinneqarsinnaanersoq, makkuninnga iluaqutissartaqartumik, soorlu suliffissaaleqisut pillugit kisitsisit atorlugit nassuiaatinik tigusisinnaaneq, saniatigullu aamma ataasiakkaanut suleriarnissamik pilersaarummik suliaqarnermi atortorineqarsinnaalluni.

Aningaasartuutinut tunngaviit:
Kommune-ni qitiusumik siunnersuisarfimmik pilersitsisinnaanermi tunngaviusumik aningaasartuutissanik naatsersuisoqarsimavoq, taakkualu KANUKOKA-lu eqqartorneqarsimaput. Naatsersuinerilli kommune-t agguaasseqqissinnaanermik immikkoortuinut naleqqutinngillat. Kommune-t tamaasa ataasiakkaarlugit naammassisassat pillugit (resultatkontrakter) isumaqatiginninniarfigineqassapput. Massakkuugallartoq pingaaruteqarpoq erseqqissassallugu aningaasatigut aaqqiineq ullumikkut aningaasartuutit tunngavigalugit ingerlassammat, taamaalilluta aaqqiissutip iluarsaannissaanut periarfissaqassaagut, kommune-t pisariaqartitavii aallavigalugit. INUUPI-mit immikkoortinneqarsimapput 10,7 mio. kr.-nit, KIIIP-imiillu 9,0 mio. kr.-nit.

§ 7: Nuttarnerulersitsiniarluni aningaasartuutit (Mobiltetsfremmende ydelse).
Paragraf-i taanna aallaavigalugu suleqatigiisitamik pilersitsisoqarsimavoq ukunannga inuttaqartinneqarluni peqataaffigineqartumik: Inuussutissarsiornermut, nunalerinermut suliffissaqartitsiniarnermullu naalakkersuisoqarfimmit, inunnik isumaginninnnermi naalakkersuisoqarfimmit, Avatangiisinut ineqarnermullu naalakkersuisoqarfimmit, KANUKOKA-miillu, aaqqiissutip taamaattup qanimut periarfissaanik misissuisussat .

Nalimmassaanermi siuarsaanermut aningaasartuutit siunertaraat suliffissaqartitsiniarnermi politik-kikkut atortutut sunniuteqarneq. Suliffissaqartitsiniarnermi politik-kup tunngaviusumik siunertaraa qulakkiissallugu sulisinnaassutsip akerleriiffiunngitsumik nikerartinneqarsinnaanera.

Suliffissaqartitsiniarnermi politik-imi ajornartorsiutaavoq, nunatta ilaani suliffissarsiortut suliffissarsisinnaanngimmata, illuatungaanili illoqarfinni allani sulisitsisut sulisussanik nassaarsinnaasannginnerat. Misilittakkat oqaluttuaraat sulisussanik tikiorartsitsineq pisartoq uffa sulisussaq amigaatigineqartoq illoqarfinni allani pigineqartoq.

Illoqarfimmiit illoqarfimmut nuunneq akisoqaaq. Ilaqutariit tamarmik nuunnissamik eqqarsaateqarpata, tamatigorluinnaq apeqqutinngortarpoq ilaqutariit akissaqarnersut. Nuunnermi aningaasartuutit suliffissaqartitsiniarnermut tamaviaarutinngortarput, sulisinnaassuserlu qilersorneqartarluni. Aningaasarsiornikkut ineriartorsinnaaneq sanngiillisinneqarpoq aammalu annertuumik inunnik isumaginninnermut aningaasartuutaalluni.

Nuttarnerulersinnaanissaq pillugu aningaasartuutissat suliffeqarnermi politik-itut isigineqassapput, sulisitsisunut soqutiginnilluni inussiarnisaarnertut, sulisussanik amigaateqartunut, aammalu sulisussanut piginnaasaminnut naleqquttumik suliffimmmik amigaateqartunut soqutiginniinnertut. Misilittakkat katersoqqaarnissaat pillugu, aallaqqaammut siunnersuutigineqarpoq misiliutitut ingerlanneqassasoq.

Ingerlariaqqinnissamut tunngatillugu nalimmassaanermi siuarsaanermut aningaasartuutinut nalunaarutissatut siunnersuut naalakkersuisoqarfimmit suliarineqarpoq, 2004-llu ingerlanerani tusarniaassutigineqassalluni. Tusarniaanermut periarfissarititaasoq sapaatit akunnerinik sisamanik sivisussuseqassaaq, nalunaarullu 2004-p ingerlanerani Naalakkersuisunit suliarineqarnissaminut piariissalluni, taamaalilluni kommune-t aaqqiissutip 1.januar 2005-mut atulersinnaanissaanut allaffissornikkut aaqqiissuteqarfiginissaa periarfissaqarfiginiassammassuk.

Tusarniaanerup affaata kingulliup ingerlanerani, tusarniaanermi suleqatigineqartut aaqqiissut pillugu isumasioqatigiinnermut aggersarneqassapput. Isumasioqatigiinnermi siunertaavoq, siunnersuutip imaata ersarissarneqarnissaa. Isumasioqatigiinnerup pinissaa naatsersuutigineqarpoq kommune-ni suliffissaqartitsiniarnermi suliaqartut il.il. ukiumoortumik pikkorissartitsinissaannut atatillugu pissasoq.

Aningaasanut tunngaviit: Pilersaarutigineqarpoq nalimmassaanermi siuarsaanermut 3.8 mio. kr.-nit ukiumut aningaasaliissutigineqartassasut, kisianni soorunalimi pisariaqartitsineq ingerlaavartumik nalilersorneqartassaaq, eqqartorneqarlunilu.

§ 10: suliffissanik nalunaarsuivik
Aalingersakkap uuma Naalakkersuisut periarfissippai suliffissanik nalunaarsuivimmik pilersitsisinnaanerannik. Naalakkersuisoqarfiup massakkorpiaq periarfissaareersut assigiinngitsut misissorpai, suliffissaqartitsiniarnermut tamarmut pitsaanerpaamik aaqqiissuteqarnissaq anguniarlugu. Qallunaat nunaanni suliffissarsiuussisarfik aningaasartuutitaqanngitsumik suliffissanik nalunaarsuivianut atassuserneqarsinnaaneq pillugu oqaloqatigineqarsimavoq, taamaalilluni kommune-ni ataasiakkaani sulisitsisullu akornani paasissutissat ikkullugillu peerneqarsinnaanngorniassammata. Aaqqiissut taamaattoq suliffinnik 240 time-nik ukiumut naleqassaaq, paasissutissat nunatsinniit nunatsinnullu AF-p qupperneranut isertussat naalakkersuisoqarfimmit sulisumit misissorneqartassammata, soorlu ilaatigut oqaatsit atorneqartut nutsernerisigut.

Aaliangersakkat assigiinngitsut:
§ 11: Naalakkersuisut kommune-ni suliffissaqartitsiniarnermik il.il. suliaqartunik ukiumut pikkorissartitsisassapput. Pikkorissaarnermut tamatumunnga aningaasartuutit immikkut konto-mit tiguneqartassapput.

§ 12: Takuuk § 4.

§ 13: Pisariaqartitsineq aalaakkaasumik nalilersorneqartassaaq, aammalu suliffissaqartitsiniarneq pillugu aaqqissuusseqqinermi konto-mut tunngatillugu aningaasartuutissanik immikkoortitsisoqarsimavoq.

§ 14: Ukiumoortumik Nalunaarusiaq. Suliassap taassuma suliarinissaanut utertitsilluni aqutsinermiit (mandtimit atorlugit aaqqiineq) allannguinikkut pissarsiortoqassaaq qaammatikkaartumik naalakkersuisunut nalunaaruteqartarnikkut, ukiullu affakkaartumik nalilersorneqartartussatigut.

Naalakkersuisup akissutai tamatuma kingorna itisilerlugit nassuiarneqartut iluarisimaarini ataatsimiititaliap oqaatigaa.

- Siunnersuut tamanit taperserneqartoq.

- Peqqussutissatut siunnersuutip pitsaaqutaanut ilaapput suliffeqarnermi innersuussisarnerup eqaannerulernissaa atuisunullu atoruminarnerulernissaa, aammalu ataasiakkaanut annertunerusumik sulissisoqarsinnaanngornissaa. Soorlu suliffeqanngitsut ilinniarfinnut, ilinniarnissamut periarfissanut, suliffissanut neqeroorutinut il.il. ilisimanninnerulernissamut aqqutissiuussisussaapput.

- Siunnersuut naapertorlugu unarput tamakkerlugu suliffissarsiuussisarnermik pilersitsisoqassasoq, sulisussatut pisariaqartinneqartunik atugassiinissaq annertunerpaamik periarfissiuunneqassalluni. Ataatsimiititaliaq isumaqarpoq ineriartorneq taamaattoq tapersiivigisariaqartoq.

- Peqqussutissatut siunnersuut piareersarfittut ilitsersuisarfittullu qitiusunik, kommunit ilaasa misileraanertut ingerlateriigaannik, pilersitsinissamut kommuninut periarfissiisoq. Ataatsimiititaliap qularutiginngilaa suliffissarsiuussisarnermi siunissami suliniuteqarnerit sakkussatut atorneqarsinnaasut atorlugit maannamornit pitsaanerujussuanngortinneqarsinnaasut.

Taama oqaaseqarluni Inatsisartut Inuussutissarsiornermut Ataatsimiititaliap siunnersuut aappassaaniigassanngortippaa.