Suliffeqarnermi innersuussisarneq il.il. pillugit inatsisartut peqqussutissaattut siunnersuummut nassuiaatit
Nassuiaatit nalinginnaasut
Suliffeqarnermi innersuussisarneq il.il. pillugit Inatsisartut peqqussutissaattut siunnersuut taanna suliffeqarnermik iluarsaaqqinnerup 1998-imi sisamaqiusanik iluarsaaqqinneq pilersaarutitalerlugu aallartinneqartup ilagaa tassaasunik suliffeqarnermik naliliisarluni misissuinerit kisitsisitigullu paasissutissat, suliffeqarnerup ilusiligaanera aaqqissuussaaneralu, inatsisinik iluarsaaqqinneq kiisalu sulisartunik piginnaanngorsaaneq.
Suliffeqarnermi naalakkersuinikkut ingerlatsinermut angunagaasut pingaarnerit ilagaat sulisartut ilaannik suliffeqarnermi pissarsiarineqarsinnaasunik piginnaanngorsaanissaq. Anguniagaavoq sulisartunik piginnaanilinnik pisariaqartitat pigineqalernissaat sulisartunillu nunanit allaneersunik pisariaqartitsinerup annikillisinneqarnissaa. Taamatuttaaq anguniagaavoq suliffeqanngitsut ilinniartitaanerata suliffeqalernissaasaluunniit qulakkeerneqarnissaat inooqataanerminni nuttarsinnaalernissaat siunertaralugu.
Suliffeqarnermik iluarsaaqqinnermut anguniagaasoq pingaarutilik alla tassa kommunini ilitsersuisarfinnik suliffeqalernissamullu piareersarfinnik pilersitsineq. Taakkunuunatigut ilinniagaqarnermut piginnaanngorsaanerullu naammassinissaannut tunngavissat pitsaanerulersinneqarput. Inunnut ataasiakkaanut suliassanut pilersaarusiornikkut inunnut ataasiakkaanut anguniagaasut naammassineqarnissaat qulakkeerneqassapput. Taamaaliornikkut siunissami sulisartut assersuutigalugu inuusuttut atorfissaaruttarnerat annikillisinneqassaaq.
Pingaarutilittut anguniagaavoq suliffeqarnermik iluarsaaqqinneq naleqquttumik annertussusilimmik inatsitigut piviusunngortinneqassasoq. Suliffissarsiuussisarneq pillugu Inatsisartut peqqussutaat atuuttoq 1988-imeersuuvoq, inatsisillu ullutsinnut naleqqussarneqarnissaa, paasiuminarnerulersinneqarnissaa peqqussummillu atuisunut pissarsiariuminarnerulersinneqarnissaa pisariaqartinneqarput. Taamatuttaaq siunnersuummi kingunerisaasunik iluarsiissuteqartoqarpoq assersuutigalugu kommunini aqutsinermut inatsisip 1994-imeersup kingunerisaanik, taamaalimmat kommunalbestyrelsit suliffeqarnermut ataatsimiititaliamik pilersitsinissaminnut pisussaaffeerullutik.
Inatsisartut peqqussutissaattut siunnersuutikkut tassuuna siunertarineqarpoq najukkani assigiinngitsuni suliffeqarnermut suliniutit anguniakkanut tamakkunani najugaqartut kommunalbestyrelse aqqutigalugu angorusutaannut tunngatillugu qanoq ineriartortinneqassanersut ungasinnerusorlu eqqarsaatigalugu najukkani assigiinngitsuni nunalu tamakkerlugu suliffissanik innersuussisarneq piginnaanngorsaanermillu sulinerit pisariillisaavigineqarnissaannut pingaarnerusutigut killiliussassanik aalajangersaasoqarnissaa.
Aalajangersakkamik nutaamik ilanngussisoqarpoq Naalakkersuisut nuna tamakkerlugu IT atorlugu suliffissanik nalunaarsuiffimmik pilersitsisinnaasut. Siunertaavoq suliffeqarnermi innersuussisarnerup eqaannerulernissaa atuisunullu atoruminarnerulernissaa ataasiakkaanut annertunerusumik sullissisoqarsinnaanngortillugu. Suliffeqanngitsuttaaq ilinniarfinnut, ilinniarnissamut periarfissanut, suliffissanik neqeroorutinut il.il. ilisimannilersinnaapput.
Tusarniaanermut akissutit:
Ukuninngaanniit tusarniaanermut akissutit tiguneqarput:
Attaveqaqatigiinnermut Ineqarnermullu Pisortaqarfik, Naatsorsueqqissaartarfik, Aalisarnermut, Piniarnermut Nunalerinermullu Pisortaqarfik, Nunami Namminermi Pissutsinut Allaffik, KANUKOKA, AK, Kalaallit Nunaanni Sulisitsisut Peqatigiiffiat, Peqqissutsimut Pisortaqarfik, Ilaqutariinnermut Pisortaqarfik, Akileraartarnermi Pisortaqarfik, PIP, Allattoqarfik, Aqutsinermut Pisortaqarfik aamma Aningaasaqarnermut Pisortaqarfik.
Ilaqutariinnermut Pisortaqarfik, PIP, AK; Akileraartarnermi Pisortaqarfik, Nunami Namminermi Pissutsinut Allaffik, Sulisoqarnermut Aqutsisoqarfik, Aalisarnermut, Piniarnermut Nunalerinermullu Pisortaqarfik siunnersuummut oqaaseqaatissaqarsimanngillat.
Attaveqaqatigiinnermut Ineqarnermullu Pisortaqarfimmit oqaatigineqarpoq siunnersuut siunertarissaartoq kisiannili aningaasaqarnikkut kingunerisaasussat naammattumik erseqqarissuunngitsut. Pisortaqarfittaaq naliliivoq inunnut ataasiakkaanut suliassanik pilersaarutit atorneqalernissaat allaffissornikkut oqimaatsuussasut.
SIK kissaateqarpoq peqqussummi atuuttumi § 1, imm. 3 ikkuteqqinneqassasoq, tamannalu Naalakkersuisut akueralugu malippaat. Kommunalbestyrelsip suliffeqarnermut atyaatsimiititaliamik pilersitsinissamik pisussaaffiisa aalajangiusimaneqarnissaannik SIK-p kissaatigisaa Naalakkersuisut malinngilaat. SIK-p ajuusaarnartuutippaa kattuffiit suliffissarsiuussisarfinnik pilersitsisinnaanerannut misiliilluni aaqqissuussisoqarsinnaaneranik aalajangersagaarunnera, tikkuarluguli pingaarnerpaajummat suliffissamik innersuussisarnerup pitsaanerpaamik ingerlanissaa. Tamakku saniatigut SIK-p paaserusuppaa sooq nalunaarut nr. 5, 3. september 1982-imeersoq atorunnaarsinniarneqalernersoq. Naalakkersuisut § 16, imm. 2 innersuussutigaat tassani allassimammat nalunaarut taanna ingerlaannassasoq allanngortinneqarnissami atuukkunnaarsinneqarnissamiluunniit tungaanut.
SIK isumaqarpoq sulilernissamut piareersartarfinnik ilitsersuisarfinnillu pilersitsineq ilorraanut aallariarnerusoq.
Naatsorsueqqissaartarfik Naatsorsueqqissaartarfiup paasissutissanik katersisarnermut tunngatillugu piginnaatitaaffiisa naleqqussarneqarnissaat pillugu nalinginnaasunik oqaaseqarpoq aamma Pisortaqarfiup suliffissanik nalunaarsuiffimmik pilersitsinissaa pillugu siunnerfinnik aamma paasissutissanik nalunaarsuisarnermuttaaq tunngasunik.
Naatsorsueqqissaartarfik sulilernissamut piareersartarfiit ilitsersuisarfiillu suliassaannut tunngatillugu aalajangersimasunik apeqquteqarpoq. Naalakkersuisut oqaatigissavaat siunnersuummut nassuiaatini tamakkununnga tunngasut ilanngullugit eqqaamaneqarsimammata. Naatsorsueqqissaartarfiuttaaq oqaatigaa aningaasaqarnikkut kingunerisaasussat nalilersorlugit erseqqinnerusumik misissorneqartariaqartut. Naalakkersuisut nassuiaatini makkunani aningaasaqarnikkut kinguerisaasussat pillugit immikkoortoq innersuussutigissavaat.
KANUKOKA-p siunnersuut kommuninut tusarniaassutigisimavaa, kommunit qulit akissuteqarsimallutik. KANUKOKA isumaqarpoq peqqussutissaq akuersissutigineqassappat pisariaqartoq peqqussummut atatillugu kommunalbestyrelsip suliassai pillugit erseqqissunik malittarisassaqarnissaq, aningaasartassaanik aningaasaliisoqartariaqarluni, misilittaalluni sulinermut aamma suliffissaqartitsiniutinut malittarisassaqartariaqarluni. Naalakkersuisut innersuussutigissavaat malittarisassanik erseqqinnerusunik suliaqartoqarnissaanut siunniunneqartut pillugit aalajangersagaqarmat. § 3, imm. 3-mi aalajangersagaq Tunngaviusumik Inatsimmut naapertuuttunngortinneqarpoq. KANUKOKA-p suliffissarsiortunut atugassarititaasunik paasinnittarneq pillugu malittarisassat ujartorpai. Naalakkersuisut oqaatigisinnaavaat sulineq taanna ingerlammat ilaatigut KANUKOKA suleqatigalugu.
Ataatsimut isigalugu KANUKOKA isumaqarpoq peqqussut kommunit aningaasartuuteqarnerulernerannik kinguneqassasoq. Aningaasaqarnikkut kingunerisaasussat pillugit Naalakkersuisut peqqussutissamut nassuiaatini makkunani tamanna pillugu immikkoortoq annertusisaq innersuussutigissavaat.
Kalaallit Nunaanni Sulisitsisut Peqatigiiffiat assigiinngitsunik oqaaseqaateqarsimavoq teknikimut tunnganerusunik suliarineranut ilanngunneqartunik. Tamakku saniatigut Sulisitsisut Peqatigiiffiata kommunit suliassaannut piumasaqaatit minnerpaaffissaasa sukumiinerusumik allaaserineqarnissaat takorusussimagaluarpaa. Naalakkersuisut innersuussutigissavaat peqqussutissatut siunnersuut killissarititaasunik inatsisaammat.
Peqqissutsimut Pisortaqarfik siunnersuutip imaanut oqaaseqaatissaqarsimanngilaq kisiannili ilitsersuisarfiit sulilernissamullu piginnaanngorsarfiit aningaasalersorneqarnissaat pigisallu nuunneqarnerannut aningaasartuutit apeqquserlugit erseqqissarlugulu Pisortaqarfik aningaasalersueqataasinnaanngilluinnarmat.
Aningaasaqarnermut Pisortaqarfik taamatuttaaq Inuiaqatigiit Aaqqissugaanerannut Allaffik siunnersuummut arlalinnik oqaaseqaateqarsimapput immikkoortunut pingaarnernut pingasunut eqikkarneqarsinnaasunik:
1) Aningaasaqarnermut Pisortaqarfiup siunnersuutip toqqaannartumik malitsigisaasunillu aningaasaqarnikkut sunniutissaasa allaaserineqarnerat maqaasivaa
2) Aningaasaqarnermut Pisortaqarfiup maluginiarpaa siunnersuummi suliffeqarneq pillugu naalakkersuinikkut ingerlatsineq pissusiviusutigut nunamut siammarniarneqarmat. Aningaasaqarnermut Pisortaqarfiup tamatumunnga tunngatillugu erseqqinnerusumik allaaserineqaqquaa tamanna qanoq suliffeqarnerup ataatsimoortinneqarnissaanik kissaateqarnermut naapertuuttuunersoq
3) Aningaasaqarnermut Pisortaqarfiup suliffeqarnermi naalakkersuinikkut ingerlatsinermi imarisaanut tunngatillugu siunnersuummi pingaarnertut nutaartaasut nassaariuminaatsippai isumaqarlunilu nutaartaasut Inatsisartut peqqussutaanni atuuttumi inissaqarluarsinnaasut.Taakkununnga tunngatillugu Naalakkersuisut matumani aningaasaqarnikkut kingunerisaasussat pillugit immikkoortoq aamma suliffeqarnermi iluarsaaqqinnerup ingerlanerani inatsisinik ingerlaavartumik naleqqussaanissamik Suliffeqarnermi iluarsaaqqinnermi siunniussaasut innersuussutigissavaat.
Allattoqarfik inatsimmik teknikikkut misissuisimavoq taamaalereermallu allanngortitsinerit ilanngunneqarlutik.
Aningaasatigut kingunerisassai
Inatsisartut peqqussutaat taanna malillugu kommunalbestyrelsip suliassaasa allaffissornikkut aqunneqarnissaannut qitiusumik ilitsersuisarfinnik suliffeqalernissamullu piareersarfinnik kommunalbestyrelsip pilersitsisinnaaneranik maleruagassat malitsigisaannik aamma Naalakkersuisut tamakkuninnga ilaatigut tapiissuteqartarneq ingerlatsinerlu pillugit maleruagassanik aalajangersaasinnaammata siunnersuut Nunatta Karsianut aningaasatigut kinguneqarsinnaavoq. Siunertaavoq § 5-ip kingunerisaanik suliassanngortussat aningaasalersorneqarnerat inuusuttut kiffartuussinerata najukkanilu inuussutissarsiornermut ilinniarfiit aningaasalersorneqarnerisa iluarsaateqqinneqarnerannut atatillugu qulakkeerneqassasoq. Suliarineqartartut qulaani taaneqartut aningaasalersorneqarnerannik iluarsaaqqittoqassaaq kommunit suleqatigalugit. Taamaaliornikkut kommunit aamma Namminersornerullutik Oqartussat akornanni suliassat/nammagassat aveqatigiissutigineqartarneranni allanngortoqassagaluarpat tamanna KANUKOKA-p aamma Naalakkersuisut isumaqatigiinniutigisariaqassavaat.
Siunnersuummi § 7-imi aalajangersagaq, taanna malillugu innersuussivigineqartoq angallassinermut pigisallu nuunneqarnerannut aningaasartuuteqartussaassanani, aningaasaqarnermut tunngasutigut kinguneqartariaqassaaq. Aningaasalersuisoqarsinnaavoq aningaasaateqarfimmik imaluunniit aningaasanik agguaassassanik pilersitsisoqarneratigut qulakkeerniarlugu sulisartut pisariaqartitsiviunerpaanut nuussinnaanissaat suliffissarsiortumut suliffeqarfimmulluunniit sulisussarsiortumut artukkersuutaanngitsumik.
Suliffissanik nalunaarsuiffimmik pilersitsisoqassappat ingerlatsisoqassallunilu tamanna Nunatta Karsianut aningaasatigut kinguneqassaaq maannakkut suliffeqarnermik iluarsaaqqinnermut aningaasaliissutitigut aningaasanut inatsimmi aningaasaliivigineqartartunik. Najukkani IT-teknologimik pisariaqartinneqartumik pilersitsineq kiisalu sulisussanik ilinniartitsineq kommuninut aningaasatigut kinguneqaratarsinnaavoq.
Allaffissornikkut kingunerisassai
Siunnersuut piffissami aallarnisarfiusumi qitiusumik allaffissornikkut aqutsisoqarfimmi allaffissornerulernermik kinguneqassaaq suliffissanik nalunaarsuiffissap pilersinneqassaguni pilersinneqarnerata kingunerisaanik, kisiannili kommunini allaffissornikinnerulersoqartussaassagunarluni tassami suliffissanik nalunaarsuiffimmik atuineq sukkanerusumik eqaannerusumillu suliffeqarnermi innersuussisarnermik kinguneqartussatut naatsorsuutigineqarmat.
Suliffeqarnermi suliniutaasut pillugit ukiumoortumik nalunaaruteqartarnissamik siunnersuummi aalajangersagaq allaffissornikkut kinguneqarsinnaavoq tamanna qitiusumik allaffissornikkut aqutsisoqarfimmi ulluinnarni allaffissornermi naasorsuutigineqassanngippat kisiannili suliffeqarnermut tunngassuteqartuni sammisaqarluni suliniuteqarnermi allaffissorneq siunissami annikillisinneqarsinnaassaaq suliniuteqarfissat erseqqinnerulernerisigut.
Inunnut ataasiakkaanut iliuusissatut pilersaarusiortalernissamik , § 5 takuuk, aalajangersagaq kommuninut allaffissornikkut kunguneqarsinnaavoq, tassami aallarnisarnerup nalaani suliassat taamaattut suliarineqartarnissaannut inunnik sulisussanik amerlanerusumik sulilersitsisoqartariaqassagunarmat.
Aalajangersakkanut ataasiakkaanut nassuiaatit
§ 1-imut
Tamatigut pingaarnerpaatillugu kommunit taamaallaat najukkani kommunit sulissaat suliarisassavaat, taamatuttaaq suliffeqarnermi innersuussisarneq. Kommunit kommunit suliassaat pillugit nunap immikkoortuini suleqatigiilersinnaapput. Nuna tamakkerlugu suliassat Naalakkersuisunit suliarineqartassapput, tassunga atatillugu taaneqarsinnaavoq nuna tamakkerlugu IT atorlugu suliffissanik nalunaarsuiffissaq pilersinneqassagunartoq, takuuk § 10.
Peqqussutikkut tassuuna kommunit inuussutissarsiutigalugu suliffeqarfinni inatsisitigut allatigut malittarisassaqartitaasuni aningaasaliinikkut inuussutissarsiutinik ineriartortitsinermut peqataanissaannut periarfissaat killilerneqanngillat.
§ 2-mut
Aalajangersakkakkut aalajangersarneqarpoq kommunit suleqataallutik suliffeqarnermut tunngasutigut ingerlatsinerminnut ilanngullugu suut suliassarineraat. Kommunit najukkani suliffeqarnermi ineriartornerup malinnaaviginissaanut akisussaapput.
§ 3-mut
Aalaajngersagaq Inatsisartut peqqussutaanni atuuttumi § 5, imm. 1-imut, 3-mut aamma 4-mut naapertuuppoq, ilinniartitaanermut inuussutissarsiutinullu ilitsersuisarneq ilanmngutiinnarlugit.
Inuussutissarsiutinut tunngaviusumik ilinniartitaanerit iluarsaateqqinneqarnerannut atatillugu, tassani ilaatigut siunniunneqarluni qinnuteqaateqartut STI-mut pisoqqamut naleqqiullugu inuussutissarsiutinut tunngaviusumik ilinniartitaanermik aallartitsinissaminnut annertunerusunik periarfissaqarnissaat naatsorsuutigineqarpoq ilinniartitaanernik inuussutissarsiutinullu piareersarnernik pilersitsisoqassasoq qinnuteqaateqartunik inuussutissarsiutinut tunngaviusumik ilinniartitaanermik aallartinnissaminnut naammattunik periarfissalinnik piginnaanngortitsisinnaasunik.
Qulakkeerneqassaaq najukkani qitiusumik ilitsersuisarfiit suliffeqalernissamullu piareersarfiit pilersinneqarnissaat taamaalilluni innuttaasut toqqaannartumik sullinneqarsinnaassammata. Taamaaliortoqassaaq inuit ataasiakkaat periarfissaat aallaavigalugit inuussutissarsiortut pisariaqartitaannut sanilliussisarluni.
Kommunit nunap immikkoortuani suliffeqarnermi naalakkersuinikkut ingerlatsinermi suliniutit nukittorsarneqarnissaat suleqatigiissutigissallugu. Tassanissaaq periarfissaq eqqarsaatigineqarpoq kommunit suliffissaaleqinerup akiorneqarnera, suliffeqalernissamut piareersarfiit piginnaanngorsarfiillu sulissutigineqarneri nunap immikkoortuani suleqatigiinnikkut suleqatigiissutigisinnaagaat.
§ 3 imm. 2 takuuk nalunaarutiginnittoqartassaaq kommunalbestyrelsip Inuussutissarsiornermut Pisortaqarfimmi suliffeqarnermut immikkoortortaqarfimmut suliffissaaleqineq pillugu kisitsisitigut paasissutissanik immersuiffissat atorlugit nassiussaqarneratigut, Naatsorsueqqissaartarfiup paasissutissat tamakku Kalaallit Nunaanni Naatsorsueqqissaartarfik pillugu Inatsisartut inatsisaat atuuttoq malillugu atortarsinnaavai.
§ 4-mut
Aalajangersakkakkut qulakkeerneqassaaq najukkani kommunip pisortat namminersortullu suliffeqarfiisa akornanni suleqatigiittoqalernissaa.
§ 4, imm. 2 kiisalu kommunini suliffissaqartitsiniutinut tapiissuteqartarneq pillugu nalunaarut atuuttoq malillugit aningaasanut inatsimmi suliffissaaleqinermik akiuineq il.il. pillugit kommuninut aningaasanik tapiissutissanik immikkoortitsisoqarsimavoq.
§ 5-imut
Aalajangersakkap aalajangersakkami atuuttumi § 9 assigiinnangajappaa. Aalajangersagaq kommunimi Inuussutissarsiutinut ilinniartitaanernullu ilitsersuiffeqarnissaanik qulakkeerisoq ilanngunneqarpoq. Suliniutit taakku kommunit pisortaqarfiit KIIIP aamma Inuussutissarsiornermut Pisortaqarfik suleqatigalugit pitsanngorsarniarlugit sulissutigaat, assersuutigalugu ilitsersuisartutut ilinniartitaanermik pilersitsineq aqqutigalugu.
Nutaatut siunnersuutigineqarpoq suliffissaaleqisut, inuusuttut suliffissaqalernissamut suliniutini peqataasut kiisalu allat pisinnaasaqarnerulernissamut suliniutini peqataasut peqatigalugit kommunit ataasiakkaanut iliuusissatut pilersaarusiussasut.
Aammattaaq taamaaliornikkut qulakkeerniarneqarpoq manna tikillugu inuusuttut sullivii suliffeqalernissamut suliniutinik taarserneqassasut, taamaalilluni inuusuttut sulianut aalajangersimasunut tunngatillugu taamatullu atuagarsornikkut pisinnaasaqarnerulernissaat qulakkeerneqassammat. Siunertarineqarpoq inuusuttut piginnaasaqarnerulersitsisumik ilinniartitaanernut tiguneqarnissaminnut piareersarneqarnissaat imaluunniit ataavartumik suliffeqalernissaminnut periarfissinniarneqarnissaat.
Naalakkersuisut inuusuttut kiffartuussisarnerat pillugu Namminersornerullutik Oqartussat nalunaarutaat nr. 35, 29. december 1995-imeersup atuukkunnaarsinniarlugu siunertaraat ilinniartitaanermut suliffeqalernissamullu piareersartarneq pillugu nalunaarummik taarsissamaarlugu, siunertaralugu suliffeqanngitsut sulimut tunngatillugu, atuagarsornermut, inuttut inuuniarnermilu piginnaanngorsarneqarnissaat, taamaalillutik ilinniartitaanernut piginnaaneqalerfiusunut isernissaminnut imaluunniit ataavartumik suliffeqalernissaminnut piareersarneqartarsinnaaqqullugit.
Ilinniartitaanermut suliffeqalernissamullu piareersarneq inunnut ataasiakkaanut iliuusissatut pilersaarutinik tunngaveqartinneqassaaq, kommunimi qitiusumik ilitsersuisarfimmi suliffeqanngitsup aamma pisortap/ilitsersuisartup akornanni isumaqatigiissutigineqartartussanik.
Inunnut ataasiakkaanut iliuusissatut pilersaarummi suliffeqanngitsup siunissami suliffeqarnissaminik/inuunissaminik kissaatigisai aallaavigineqartassapput, ilitsersuisartup suliassaasa pingaarnersarissallugu suliffeqanngitsup kissaatigisaasa katiterneqarnissaat imaalillugu siunissami imminut pilersorsinnaanngussalluni.
Naalakkersuisut isumaqarput inunnut ataasiakkaanut iliuusissatut pilersaarut suliffeqanngitsup kissaatigisaanik aallaavilik suliffeqanngitsumut annertunerpaamik piumassuseqalersitsisinnaasoq taamaalillunilu anguniakkat iliuusissatut pilersaarutip imaasa angunissaannut annertunerpaamik periarfissiisinnaalluni.
Tassunga tunngatillugu pingaaruteqarpoq kommunit periarfissat inuussutissarsiortut nunap immikkoortuani pigisaat aallavigalugit suliffeqalernissamut piareersaaniarluni suliniutinik nutaanik annertusaanermut suleqataallutik peqataanissaat taakkunatigut qulakkeerneqassammat inuusuttut soqutigisaasa qaangiinnannginnissaat.
Qitiusumik ilitsersuisarfinnik sulilernissamullu piareersarfinnik pilersitsinikkut kommunalbestyrelsit suliassat suliarineqarnissaannut akisussaaffimminnik tunutsiinnassinnaajunnaassapput. Tassami Kommunalbestyrelsi nalunaaruteqartarnermut nakkutilliinermullu periaasissanik suliaqarnissaminut pisussaavoq taakkunatigut qulakkeerneqassammat kommunalbestyrelsip suliassat suliarineqarnerannik paasisimanninnissaa.
Suliffissaaleqinermik allaffissornikkut aqutsinerup ullumikkumut naleqqussarnerunissaa kissaatigineqarpoq, taamaalilluni suliffissaaleqisut atorfinitsinneqarnissaminnut piareersimallutillu piginnaaneqartut suliffimmik innersuunneqarnissamut ikiorneqarnissaat qulakkerneqassalluni. Suliffissaaleqisut piginnaassaat malillugit piginnaasaqarnerulernissamut suliniutit pilersinneqassapput, assersuutigalugu piginnaanngorsaaqqiilluni suliniutit kiisalu piginnaasaqarnerulernissamut suliniutit immikkoortortakkuutaarlugit aaqqissuuneqarsimasut, taamaalilluni sulisinnaasunik pingaartumillu inunnik piginnaanngortitsiviusumik ilinniagaqarsimanngitsunik suliffissaaleqisoqalernerani perifissaarutsitsisoqartaqqunagu.
Peqatigitillugu oqaatigineqassaaq pissutsit piginnaanngorsaaqqinnissamut ikiorsiisarneq pillugu Inatsisartut peqqussutaat nr. 4, 31. maj 2001-imeersukkut malittarisassaqartitaasut suliffeqarnermi innersuussisarneq pillugu Inatsisartut peqqussutissaattut siunnersuummi tassani malittarisassaqartitaasussatut inngimmata.
Siunnersuutigineqarpoq kommunit inunnut ataasiakkaanut iliuusissatut pilersaarutit suliarissagaat suliffeqanngitsut suleqatigalugit. Inunnut ataasiakkaanut iliuusissatut pilersaarutit taamaattut suliarineqartassapput kommunit qitiusumik ilitsersuisarfinnik suliffeqalernissamullu piareersarfinnik pilersitsisimanersut apeqqutaatinnagu.
§ 5, imm. 5 malillugu pilersaarutigineqarpoq KIIIP aamma KANUKOKA suleqatigalugit nalunaarummik suliaqartoqassasoq tassani ilanngunneqassallutik inuussutissarsiutinut ilinniartitaanermullu ilitsersuisarnermut piumasaqaatit pillugit aalajangersakkat.
§ 6-imut
Aalajangersagaq Inatsisartut peqqussutaanni atuuttumi § 11-mut naapertuuppoq. Aalajangersakkakkut qulakkeerneqassaaq sapinngisamik pitsaasumik suliffeqarnermi innersuussisoqartarnissaa.
§ 7-imut
Aalajangersagaq inatsisartut peqqussutaanni atuuttumi § 12-mut pingaarnerusutigut naapertuuppoq, taamaattoq siunnersuut malillugu taamatuttaaq pigisat nuunneqarnerannut aningaasartuutit akilerneqartarsinnaassapput.
Aalajangersagaq taanna malillugu pilersaarutigineqarpoq nalunaarutissaq suliarineqassasoq, tassani angallanneqarnermut pigisallu nuunneqarnerannut aningaasartuutinut tapiissuteqartoqartarneranut maleruagassanik aalajangersaasoqassalluni.
Aningaasaateqarfimmik aningaasanilluunniit immikkoortitanik pilersitsisoqarnissaa sulissutigineqarpoq aningaasartuutit qulaani taaneqartut aningaasalersorneqarnissaat qulakkeerniarlugu.
Siunissami Kalaallit Nunaat suliffeqarfittut ataatsitut isigineqalissaaq. Sulisartut nuttarsinnaassusiat annertusarneqartuassaaq taamaalilluni pissusiviusutigut sulisartut sulisussanik pisariaqartitsiviusuni suliffissarsiorsinnaalissallutik. Suliffissarsiorsinnaaneq isumaginninnermi ikiorsiissutinik isumalluuteqarnerminngaanniit pilerinarnerulersinneqassaaq.
Taamatuttaaq pisortanit ikiorsiissutit pillugit Inatsisartut peqqussutaat nr. 10, 1. november 1982-imeersumi § 17 innersuussutigineqarpoq taanna malillugu inuk nuunnissaminut akissaqanngitsoq ikiorserneqarsinnaavoq, tamanna pineqartup ilaqutaasaluunniit inissaqarniarnerannut inuutissarsiornerannullu iluaqutaassappat.
§ 8-mut
Aalajangersagaq inatsisartut peqqussutaani atuuttumi § 13-imut naapertuuppoq, taamaallaalli oqaasertaanik iluarsiisoqarluni.
Aalajangersakkakkut qulakkeerneqassaaq sulifffeqarfimmut sulinermi aaqqiagiinnginnermut ilaasumut innersuussisoqartassanngitsoq. Aalajangersagaq taamaallaat atorneqartassaaq inatsisit malillugit siumut ilimasaareqqaarluni sulinermik unitsitsinernut atatillugu. Taamaammat suliffeqarfimmut isumaqatigiissutit unioqqutillugit sulinermik unitsitsiviusimasumut innersuussisoqartarsinnaassaaq.
§ 9-mut
Aalajangersakkami inatsisartut peqqussutaanni atuuttumi §§ 14-16 ataatsimoortinneqarput oqaasertaanik allanngortitsisoqarluni.
Imm.2-mi aalajangersakkakkut qulakkeerneqassaaq, kommunip sulilersitsineq iluatsinngitsoortillugu tamatumunnga pissutaasunik paasissutissanik tigusaqartarnissaa taamaalilluni kommunip naliliivigisinnaassammagu tamanna suliffeqarfimmut suliffissarsiortumulluunniit kinguneqartinneqassanersoq assersuutigalugu annertussusileriikkanik ikiorsiissutit akiliutigineqartarnerata unitsinneqarneratigut.
Imm. 3-mi aalajangersakkami sulisitsisoq iluatsinngitsumik innersuussigaluarnermut atatillugu aningaasartuutaasimasunik akiliisussanngortinneqarpoq.
§ 10-mut
Naalakkersuisut suliffeqarneq pillugu nutaamik aaqqissuusseqqinnermut atatillugu kiisalu Danmarkimi suliffissaaleqinermik allaffissornikkut aqutsieriaaseq AIDA 2 suleqatigalugu suliffissaaleqinermik allaffissornikkut aqutsieriaatsimut IT-mik tunngaveqartumut ilusiliussassaq nutaaq suliaritissimavaat.
Siunissami suliffissaaleqisut ataasiakkaarlugit sullinneqartalernissaat periarfissaalissaaq, soorluttaaq suliffissaaleqinermik allaffissornikkut aqutseriaaseq aqqutigalugu ilinniarfinnik, ilinniarnissamut periarfissanik, suliffissanik neqeroorutinik il.il. paasisaqartoqarsinnaalissasoq. Aammattaaq allaffissornikkut aqutseriaatsimi tassani suliffissaaleqinermik allaffissornikkut aqutsineq ingerlatissaallugu periarfissaqalissaaq. Suliffissanik nalunaarsuiffik pilersikkiartuaarneqarpoq.
Suliffissanik nalunaarsuiffik pisortaqarfinni oqartussaasut nalunaarsuiffii pillugit inatsisit atuuttut taamatuttaaq nalunaarsuiffeqarneq pillugu malittarisassat suliarineqartarnerat naapertorlugit pilersinneqassaaq. Suliffissanik nalunaarsuiffikkut kisitsisitigut paasissutissat tunngaviusut pissarsiarineqarsinnaalissapput. Naatsorsueqqissaartarfiup Kalaallit Nunaanni Naatsorsueqqissaartarfik pillugu Inatsisartut inatsisaat sunngavigalugu paasissutissat tamakku atortarsinnaassavai. Naalakkersuisoqarfiup paasissutissat siunertanut nalunaarsuiffeqarneq pillugu malittarisassani attuumassuteqartuni akuerisaasunut atortarsinnaassavai. Paasssutissat Suliamut, Namminersornerullutik Oqartussat qitiusumik allaffeqarfianni qarasaasialerinermik tunngaveqarluni kisitsisitigut paasissutissanik nalunaarsuiffiusumut, suliffeqarnermi naliliisarluni misissuinerit suliarineqartarneranut tunngavigineqartumut, tunniunneqartarsinnaapput. Suliaq suliffeqarnermik iluarsaaqqinnermut ilaavoq.
Kommunini allaffissornikkut nalunaaruteqartarnermi nammagassat killilerniarlugit suleriaatsit naleqqutut pillugit Naalakkersuisut Naatsorsueqqissaartarfillu isumaqatigiissuteqarsinnaapput Naatsorsueqqissaartarfiup kommuninit paasissutissanut tunngavinnut isersinnaaneranik qulakkeerinnittumik.
Imm. 1 malillugu suliffissanik nalunaarfuiffiup pilersinneqarnissaa pillugu Naalakkersuisut malittarisassanik aalajangersaasinnaanissaannut, taamatuttaaq suliffissanik nalunaarsuiffiup atornissaanut kommunalbestyrelsip pisussaaffii pillugit maleruagassanik, nalunaarutikkut piviusunngortitsisoqassasoq naatsorsuutigineqarpoq. Siunertaavoq kommunit suliffissanik nalunaarsuiffiup piviusunngortinneqarneranut, atorfinnik inuttaqanngitsunik nalunaarutiginnittarnermut assigisaannullu peqataanissaminnut pisussaaffilerneqassasut.
§ 11-mut
Aalajangersagaq suliffissarsiuussisarneq pillugu peqqussummi atuuttumi § 18-imut assinguvoq. Naalakkersuisullu suliffissarsiuussisarfinni sulisut ilinniartitaasarnerannut akisussaaffeqarunnaarput. Naalakkersuisut pisussaaffituarilerpaat sulisunik taakkuninnga ukiumoortumik pikkorissartitsisarnerit. Aalajangersakkakkut qulakkeerneqassaaq suliffeqarnermi siunnersortit ukiumut ataasiarlutik suliniutinik nutaanik, aalajangersakkat atuuttut qanoq paasineqarnissaannik il.il. ilisimatinneqartalissasut taamatullu inatsisit allaffissornikkut aqunneqarnerata oqallisiginissaanut periarfissinneqartarlutik taamaaliornikkut ilaatigut nunatsinni assigiiaartumik inatsisit atortinneqarnerat qulakkeerneqarsinnaammat.
Kommunalbestyrelsimut ilaasortanik qinigaarlaanik pikkorissartitsisarneq pillugu malittarisassakkut qulakkeerneqassaaq tamakkununnga tunngassuteqartuni inatsisinik ilisimasaqalernissaat taamaaliornikkullu qulakkeereqataaffigalugu inatsisit malinneqarnissaat.
Aalajangersagaq taanna malillugu pikkorissartitsinernut aningaasartuutit kommunit Nunap Karsiatalu agguaattassavaat imaalillugu Nunap Karsiata ukununnga aningaasartuutit akilertassallugit: angalanerit, ineqarnerit kiisalu pikkorissartitsinermut aningaasartuutit nalinginnaasut taamatuttaaq ininut pikkorissartitsisunullu aningaasartuutit. Kommunip pikkorissartitsinermut akiliutit aamma kommuniniit pikkorissarnermut peqataasut ullormusiassaat akilertassavai.
§ 12-mut
Aalajangersagaq inatsisartut peqqussutaanni atuuttumi § 19-imut naapertuuppoq.
Maannakkuugallartoq aalajangersagaq taanna kiisalu kommunini suliffissaqartitsiniutinut tapiissutit pillugit Namminersornerullutik Oqartussat nalunaarutaat nr. 42, 28. september 1994-imeersoq aamma kommunini inuusuttut sulliviinut tapiissutit pillugit Namminersornerullutik Oqartussat nalunaarutaat nr. 37, 29. december 1995-imeersoq malillugit tapiissuteqartarnermut aningaasanut inatsimmi aningaasanik immikkoortitsisoqarsimavoq.
Naalakkersuisut suliffeqarnermik siuarsaaneq siunertaralugu nunaqarfinnut isorliunerusunullu tapiissuteqartarsinnaapput, tamakkunani suliffinnik nutaanik aallartitsiniartarnerup ajornartorsiutaanera nalinginnaammat.
Kommunit suliffissaqartitsinermik siuarsaaniarluni iliuutsit saniatigut suliffeqanngitsunik sulilersitsiniaaneq pillugu Inatsisartut peqqussutaat malillugu sulilersitsiniaanermut suliniutinik pilersitsinissaminnut periarfissaqarput. Sulilersitsiniaanernut taamaattunut aningaasartuutit kommunit aningaasartuutissaraat.
§ 13-mut
Misileraasinnaanermut aalajangersagaq 1999-mi inatsisinut ilanngunneqarpoq ataannassasoq kissaatigineqarluni. Misileraanernik pilersitsisinnaaginnarnissaq pissusissamisuussaaq taamaalilluni suliffissaqarnissaq qulakkeerniarlugu periarfissat nutaat misileraanertut misilittarneqartassammata.
§ 14-mut
Aalajangersagaq taanna nutaajuvoq. Aalajangersakkakkut qulakkeerneqassaaq suliffeqarnermut tunngatillugu suliniutit ingerlaavartumik allaaserineqartarnerat ineriartorteqqinneqarnerallu. Ukiumoortumik nalunaaruteqartarneq suliffeqarnermut tunngatillugu suliniutinik ineriartortitseqqinnermut Naalakkersuisunut atugassaqqissuuvoq.
§ 16-mut
Peqqussutip atuutilersinneqarneratigut peqqussut atuuttoq atuukkunnaarsinneqassaaq. Inatsisartut peqqussutaat malillugu Namminersornerullutik Oqartussat nalunaarutaat sapinngisamik piaartumik kingusinnerpaamillu ukioq 2004-imi iluarsaateqqinneqassasut naatsorsuutigineqarpoq.