8. marts 2003

UPA 2003/41

 

Atuarfik pillugu Inatsisartut peqqussutaata allanngortinneqarneranik Inatsisartut peqqussutissaattut siunnersuut (inatsisitigut tunngavigisat pillugit aalajangersakkat)

pillugu

Inatsisartut Kultureqarnermut Ilinniartitaanermullu Ataatsimiititaliaata

ISUMALIUTISSIISSUTAA

Siunnersuutip aappassaaneerneqarnerani saqqummiunneqartoq

 

Inatsisartut ataatsimiititaliaat suliarinninnermini ukuninnga inuttaqarpoq:

 

Inatsisartuni ilaasortaq Doris Jakobsen, Siumut, siulittaasoq
Inatsisartuni ilaasortaq Isak Davidsen, Atassut, siulittaasup tullia
Inatsisartuni ilaasortaq Jens Napatoq, Siumut
Inatsisartuni ilaasortaq Henriette Rasmussen, Inuit Ataqatigiit
Inatsisartuni ilaasortaq Marie Fleischer, Demokratiit

 

Inatsisartut Kultureqarnermut Ilinniartitaanermullu Ataatsimiititaliaata siullermeerinerup kingorna atuarfik pillugu Inatsisartut peqqussutaata allanngortinneqarneranik Inatsisartut peqqussutissaattut siunnersuut (inatsisitigut tunngavigisat pillugit aalajangersakkat) nassuiaatitai ilanngullugit misissorpaa.

Atuarfik pillugu Inatsisartut peqqussutaata ilusiligaanerani ataasiakkaanik amigaateqartoq paasinarsisimavoq, taakku allannguutissatut siunnersuutip akuersissutigineqarneranut atatillugu siunnersuutip suliarineqarnerata nalaani pinngorsimapput. Siunnersuut manna aqqutigalugu tamanna iluarsiivigineqarpoq.

Ilusiliinermut tunngasumik iluarsiineq taamaallaat pineqarmat siunnersuut tusarniaassutigineqarsimanngitsoq KIIIP-ip paasissutissiissutigaa.

Atuarfik pillugu Inatsisartut peqqussutissaattut siunnersuut, akuusut tamarmik tulluusimaarutigisinnaasaannik sivisuumik sukumiisumillu suliarineqareerluni, Inatsisartut kingullermik upernaakkut ataatsimiinneranni akuersissutigineqarpoq. Nunatta inuusuttaasa siunissami unammillerniagassanik naapitsinissaanni ilinniagaqarnikkut toqqammavissaat qulakkeerniarlugit ilungersuuteqarnermi Inatsisartut peqqussutaat aammalu "Atuarfitsialak" aqqutigalugit annertuumik alloriartoqarpoq.

Taamaattumik Kultureqarnermut Ilinniartitaanermullu Ataatsimiititaliap isumaqatigiittup "kukkunimerngit" aaqqinniarlugit piaartumik alloriartoqarnera nuannaarutigaa allamillu oqaaseqaateqaqqinnani siunnersuutip maanna ilusimisut iluseqartup akuersissutigineqarnissaa inassutigalugu.

Taama oqaaseqarluni Kultureqarnermut Ilinniartitaanermullu Ataatsimiititaliap atuarfik pillugu Inatsisartut peqqussutaata allanngortinneqarneranik Inatsisartut peqqussutissaattut siunnersuut (inatsisitigut tunngavigisat pillugit aalajangersakkat) aappassaaniigassanngortipaa.

 

	Doris Jakobsen, Siulittaasoq
Isak Davidsen		Jens Napatoq
Henriette Rasmussen		Marie Fleischer