04. februar 2003

UKA 2003/41

 

Atuarfik pillugu inatsisartut peqqussutaata allanngortinneqarneranik Inatsisartut peqqussutissaattut siunnersuut. (Inatsisitigut tunngavigisat pillugit aalajangersakkat)

 

Nalinginnaasumik nassuiaatit

Inatsisartut 2002-mi upernaakkut ataatsimiinnermi atuarfik pillugu peqqussut nutaaq (atuarfik pillugu inatsisartut peqqussutaat nr. 8, 21. maj 2002-meersoq) akueraat.

Tamatuma kingorna siunnersuummi akuerineqartumi kukkunerit marluk paasineqarput.

  1. § 18, imm. 4-mi inatsisitigut tunngavigisat pillugit aalajangersagaqannginnera.

    2. Siunnersuutip aappassaaneerneqarnerata kingorna aappassaaneerneqarnissaani siunnersuut aappassaaneerneqarneranilu allannguutit akuerineqartut katitinneqarput. Taamatut katitinneqarnerannut atatillugu siunnersuummi § 18, imm. 4–mi inatsisitigut tunngavigisat pillugit aalajangersagaq siunnersuutip qallunaatoortaani kukkusumik peerneqarpoq. Taamaattumik siunnersuutip matuma siunertaraa peqqussutip kalaallisoortaata qallunaatoortaatalu imminnut naapertuuttunngortinnissaat. Tamatumunnga peqatigitillugu siunertaavoq qulakkiissallugu atuartup atuarnerminik pissarsiaqarnersoq pillugu naliliinissamut naalakkersuisut malittarisassiornissaannut inatsisitigut tunngavissaqarnissaat.

  2. Meeqqat atuarfianni sunngiffimmi sammisassaqartitsineq pillugu nalunaarutip nr. 14-ip, 29. maj 1995-imeersup kukkusumik atorunnaarsinneqarnera

Siunnersuummi akuerineqartumi 1. juli 2002-mit atuutilersumik meeqqat atuarfianni sunngiffimmi sammisassaqartitsineq pillugu nalunaarut nr. 14, 29. maj 1995-imeersoq atorunnaarsinneqarpoq. Aamma piffissami tassani nalunaarutip atuutsinneqarnissaanut maannamut inatsisitigut tunngavigineqartoq atorunnaarsinneqarpoq. Tassani pineqarpoq meeqqat atuarfiat pillugu inatsisartut peqqussutaanni nr. 1-imi, 6. juni 1997-imeersumi § 4. Tamatumani tunngavigineqarpoq sunngiffimmi sammisassaqartitsineq pillugu inatsisartut peqqussutaata nutaap aammattaaq 1. juli 2002-mi atuutilernera.

Meeqqat atuarfiat pillugu peqqussutip nutaap atuutilerfissaanut piffissap 1. august 2002-mit, pilersaarutaagaluarsimasumit, 1. august 2003-mut kinguartinneqarnerata kingunerisaanik nalunaarut taaneqartoq 1. august 2003-p tungaanut atuutiinnarsimassagaluarpoq. Taamaalilluni sunngiffimmi sammisassaqartitsineq pillugu inatsisartut peqqussutissaattut siunnersuummi pisariaqartinneqartumik kingunerisassat pillugit iluarsiissuteqartoqarsimannginnera kukkuneruvoq, aammalu nalunaarut taamaalilluni 1. juli 2002-mi atorunnaarsinneqareerluni. Aammattaaq meeqqat atuarfiat pillugu peqqussummi akuerineqartumi nalunaarutip maannamut atuuttup imarisaata assinganik imalimmik nalunaarummik atuutsitsilernissamut inatsisitigut tunngavissaqanngimmat, tamatumunnga periarfissaqalernissamut inatsisitigut tunngavigisat pillugit aalajangersakkamik nutaamik ilanngussinissaq pisariaqarpoq. Tamatuma kingorna nutaamik nalunaarusiortoqassaaq 1. august 2003-p tungaanut atuuttussamik.


Allaffissornikkut aningaasaqarnikkullu kingunerisassat:

Siunnersuut allaffissornikkut aningaasaqarnikkullu kinguneqassanngilaq.


Tusarniaaneq:

Taamaallaat kukkunerit marlussuit pineqarmata siunnersuut tusarniaassutigineqarsimanngilaq.

 

Siunnersuummi aalajangersakkanut ataasiakkaanut nassuiaatit

 

§ 1-imut

Nr. 1-imut

Aalajangersagaq aaqqissugaanermigut allannguutitaqarluni meeqqat atuarfiat pillugu inatsisartut peqqussutaanni nr. 1-imi, 6. juni 1997-imeersumi § 4-mut naapertuuppoq.

Aalajangersagaq atorlugu meeqqat atuarfiata sunngiffimmi atuartitsinissaanut naalakkersuisut malittarisassiornissamut inatsisitigut tunngavissinneqarput. Sunngiffik imatut paasillugu piffissaq atuartitsinerup avataaniittoq.

Nr. 2-mut

Aalajangersagaq atorlugu atuartup atuartitsinermi pissarsiaqarnerata naliliiffiginissaa pillugu naalakkersuisut malittarisassiornissaannut inatsisitigut tunngavissinneqarput. Naliliineq taanna ilaatigut ingerlaavartumik naliliinerup inernerinik ilaatigullu atuartup atuartitsissutini tamani inissisimanera pillugu naliliinermik tunngaveqassaaq. Atuartitsissutini atuartup piginnaanertigut inissisimanerata nalilerneqarnera ataatsimut piumasaqaatit naalakkersuisunit aalajangersarneqartut aallaavigalugit ingerlanneqassapput. Perorsaanermut Institutti piginnaanertigut naliliinernit inernerit ingerlaavartumik katersussavai misissoqqissaarlugillu, aammalu tamatumunnga atasumik ilinniartitsissutinut toqqarneqartunut ukiut tamaasa naliliinissamut immikkut atortussanik nassitsisassalluni. Ilinniartitsissutini tamani atuartup inissisimaneranik inaarutaasumik naliliinerit meeqqat atuarfianni maanna misilitsinnernut taarsiullugit atuutilissapput. Naatsorsuutigineqarpoq oqaluttariarsornermik allattariarsornermillu misilitsinnerit suli atorneqassasut, pingaartumik inissisimanermik naliliinerni. Naalakkersuisut periaatsit sorliit atorneqassanersut pillugit erseqqinnerusumik malittarisassiussapput.

 

§ 2-mut

Piffissaq atortuulerfissaa allannguutit sapinngisamik piaartumik atuutilernissaat siunertaralugu aalajangersarneqarpoq.

§ 1, nr. 1-ip piffissamut atuutilerfissaanut atatillugu tamanna 1. julimut aalajangersarneqarpoq, meeqqat atuarfianni sunngiffimmi sammisassaqartitsineq pillugu nalunaarutissap piffissap taassuma tungaanut kingumut atuuttumik atuunnissaa pillugu, taamaalilluni meeqqat atuarfianni sunngiffimmi sammisassaqartitsinerup malittarisassat maannamut atuuttut naapertorlugit atuutilernissaa pillugu.