4. april 2003

UPA 2003/34

 

Namminersornerullutik Oqartussat kommunillu inissiaataasa attartortittakkat pigisatut inissianngortissinnaanerat pillugu inatsisartut peqqussutaata allanngortinneqarneranik inatsisartut peqqussutissaattut siunnersuut

pillugu

Inatsisartut Attaveqaqatigiinnermut Ineqarnermullu Ataatsimiititaliaata

ISUMALIUTISSIISSUTAA

siunnersuutip aappassaaneerneqarnerani saqqummiunneqartoq

 

Inatsisartut Attaveqaqatigiinnermut Ineqarnermullu Ataatsimiititaliaat suliarinninnermini ukunin-nga inuttaqarpoq:

 

Inatsisartuni ilaasortaq Isak Davidsen, Atassut, siulittaasoq
Inatsisartuni ilaasortaq Kalistat Lund, Siumut, siulittaasup tullia
Inatsisartuni ilaasortaq Jens Napaattooq, Siumut
Inatsisartuni ilaasortaq Johan Lund Olsen, Inuit Ataqatigiit
Inatsisartuni ilaasortaq Palle Christiansen, Demokraatit

 

Inatsisartut Attaveqaqatigiinnermut Ineqarnermullu Ataatsimiititaliaata Namminersornerullutik Oqartussat kommunillu inissiaataasa attartortittakkat pigisatut inissianngortissinnaanerat pillugu peqqussutaata allanngortinneqarneranik Inatsisartut peqqussutissaattut Naalakkersuisut siunnersuutaata siullermeerneqareernerani, nassuiaatitai ilanngullugit, misissuataarpaa.


Tusarniaanermit akissutisiat

Ataatsimiititaliap siunnersuutip oqaluuserineqarneranut atatillugu tusarniaanermit akissutisiat nuu-tinneri piniarpai.

Tassunga atatillugu Naalakkersuisut peqqussutissatut siunnersuutip Aningaasaqarnermut Pisor-taqarfimmut KANUKOKA-mullu tusarniaassutigisimaneranut Nalakkersuisut allassimammata Attaveqaqatigiinnermut Ineqarnermullu Ataatsimiititaliap naammaginanngilluinnartutut isigaa.

Tamatumunnga tunngaviuvoq Aningaasaqarnermut Pisortaqarfiup KANUKOKA-llu tusarniaanermut akissuteqarnerminni aalajangersakkat imaannik paasiuminaatsitsinertik oqaatigisimammassuk, taamaattorli Naalakkersuisut siunnersuutip nassuiaataani tusarniaavigineqartut oqaaseqaataat allassimanagillu, aalajangersakkat apeqquserneqartut nassuiaataat itisilersimanngimmasigit.

Ataatsimiititaliap Ataveqaqatigiinnermut, Avatingiisinut Ineqarnermullu Naalakkersuisumut apeqquteqarnermigut siunnersuutip nassuiaatai itisiliivigeqqusimavai.Ataatsimiititaliap apeqqutaasa Naalakkersuisunilu ilaasortap akissutaasa nuutinneri isumaliutissiissummut matumunnga ilanngunneqarput.


Siunnersuutip ilusiligaanera

Peqqussutissamut siunnersuutip § 1, nr. 2-mut tunngatillugu Inatsisartut Attaveqaqatigiinnermut Ineqarnermullu Ataatsimiititaliaata paasivaa, "inissiap pisiarinerani akiusoq" "§ 8, imm. 2 ima-luunniit imm. 5"-imut innersuussinikkut nassuiarneqarmat. § 8, imm. 2-mi pisinermi aki pine-qartoq inissiap teknikikkut aningaasatigullu naliliivigineranut tunngavoq, aammaalu § 8, imm. 5-imi niuernermi naligititaq inissiap teknikikkut aningaasatigullu naliliivigineranit minnerusinnaaneranut innersuussilluni. Nalornilersitsineq tamanna paatsoornernik nassataqarsinnaasoq pinngitsoorneqartariaqarpoq.


Siunnersuutip imarisai

Attaveqaqatigiinnermut Ineqarnermullu Ataatsimiititaliap peqqussut atorlugu inissiat attartortittakkat niuernermi naligitigaq, taannalu teknikikkut aningaasatigullu naliliinermit minneruppat, atorlugu pisiarineqarsinnaalernerat pitsaasutut isigaa. Nunap ilaani inissianik piumasaqarnerup annikinnera pissutigalugu taamatut periarfissiinissaq pisariaqartuusimavoq.

Siunnersuummili niuernermi naligititap teknikikkut aningaasatigullu naliliinermit minneruppat, aningaasat nalingisa nikerarnerat naapertorlugu qularnaveeqqusiisariaqarneq pisariaqarsimavoq.

Illu Nanortalimmiittoq 900.000 kr.-nik teknikikkut aningaasatigullu nalilerneqartoq niuernermi naligititap akigititaa naapertorlugu 400.000 kr.-nilersillugu tunineqassappat, taava ukiuni qulini nalikillilerneqartussamik 500.000 kr-imik nalilimmik qularnaveeqqusiivigineqassaaq. Illumik piginnittup illu ukiup ataatsip qaangiunnerani tunissaguniuk, taava qularnaveeqqusiussap sinne-ranik 450.000 kr.-inik annertussuseqartumik akiligassinneqassaaq. Taamatut iliuuseqarneq inunnik pituttuinertut taaneqartariaqarpoq.

Ataatsimiititaliap isumaqatigiittup tamanna pissusissamisoortuusorinngilaa taamaattumillu aap-passaanneerlugu oqaluuserineqarneranut atatillugu allannguutissatut siunnersuummik, inissianik pisinermi teknikikkut aningaasatigullu naliliinermi akigititamit annikikkermik akiliilluni pisinik-kut aningaasat nalingisa nikerarnerat naapertorlugu qularnaveeqqusiisoqartannginnissamik kinguneqartussamik saqqummiussivoq, takuuk § 8, imm. 5.


Ataatsimiititaliap inassuteqaataa

Ataatsimiititaliap isumaqatigiittup allannguutissatut siunnersuut saqqummiuppaa.

Taamatut oqaaseqarluni Inatsisartut Attaveqaqatigiinnermut Ineqarnermullu Ataatsimiititaliaata Namminersornerullutik Oqartussat kommunillu inissiaataasa attartortittakkat pigisatut inissian-ngortissinnaanerat pillugu Inatsisartut peqqussutaata allanngortinneqarneranik Inatsisartut peq-qussutissaattut siunnersuut aappassaanigassanngortippaa.

 

Isak Davidsen
Siulittaasoq
 

Kalistat Lund
Siulittaasup tullia

  

Jens Napaattooq
 

Johan Lund Olsen

  

Palle Christiansen

 

Namminersornerullutik Oqartussat kommunillu inissiaataasa attartortittakkat pigisatut inissianngortissinnaanerat pillugu inatsisartut peqqussutaata allanngortinneqarneranik inatsisartut peqqussutissaattut siunnersuummut
(Teknikikkut aningaasatigullu naliliinermit apasinnerusumik akeqartillugit inissianik tunisinissamut periarfissaq)

 

A l l a n n g u u t i s s a t u t s i u n n e r s u u t

 

Attaveqaqatigiinnermut Ineqarnermullu Ataatsimiititaliamit saqqummiunneqartoq.

 

§ 1-mut tunngasoq

 

  1. § 1, nr. 2 atorunnaarpoq.

 

Allannguutissatut siunnersuummut nassuiaat.

§ 11-ip allanngortinneqannginnissaa allannguutissatut siunnersuutip malitsigaa. Taamaalilluni teknikikkut aningaasatigullu naliliineq naapertorlugu inissianik pisinermi aningaasat nalingisa nikerarnerannut qularnaveeqqusiisarneq suli § 11 atorlugu killiliivigineqassaaq.

Niuernermi naligititaq naapertorlugu inissiamik tunisinikkut aningaasat nalingisa nikerarnerannut qularnaveeqqusiisoqartannginnissaa allannguutissatut siunnersuutip malitsigissavaa, takuuk § 8, imm. 5. Tassani inissiamik tunisinermut atatillugu, pisisup inissiap niuernermi nalingata teknik-ikkut aningaasatigullu naliliinermit nikingassutaanik akileeqquneqariarsinnaanera tunngavigalugu, aningaasatigut pituttugaasinnaanera perataannaanera eqqarsaatigineqarmat.

Ilanngussaq.

 

1. Peqqussutissatut siunnersuutip aningaaatigut kingunerisassaasa nassuiaataanni imatut allassimasoqarpoq:

"Inissiat attartortunut tunineqaraangata inissianik maannamut piginnittut, Namminersornerullutik Oqartussat imaluunniit kommunit, tunisinermi akiliutit tigusassaat. Paarlattuanik inissianik maannamut piginnittut aningaasaliis-sutigisimasanit iluanaarutissat ukiumoortut annaassavaat."

Nassuiaatit taakku nalinginnaasumik Namminersornerullutik Oqartussat kommunillu inissiaataannik tunisisarnernut tunngassuteqarput, taamaattumillu inatsisissatut siunnersuummut saqqummiunneqartumut kalluutsikkuminaallutik. Inatsisissatut siunnersuut, niuernermi aki teknikikkut aningaasatigullu naliliivigineqarneranit appasinnerussagaluarpat, Namminersornerullutik Oqartussat kommunillu illuutinik niuernermi aki atorlugu tunisisinnaanerannut tunngavoq. Siunnersuutip illuutit arlallit massakkumut malittarisassaasunut naleqqiullugu akikinnerusumik akilerlugit tunineqarnissaat kingunerissavaa. Tamatumalu isertitassanik annaasaqarneq kingunerissavaa. Annaasassatut naatsorsuutigineqartut qanoq annertussuseqar-nissaannik missingersuummik Inatsisartut Attaveqaqatigiinnermut Ineqarnermullu Ataatsimiititaliaat perusuppoq.

Namminersornerullutik Oqartussat kommunillu inissiaataasa attartortittakkat pigisatut inissianngortissinnaanerat pillugu Inatsisartut peqqussutaata nr. 5, 21. maj 2002-meersup 1. juli 2002-mi atuutilernerat kingornatigut kommuninit Qaqortoq, Paamiut, Nuuk, Maniitsoq, Sisimiut, Ilulissat aamma Tasiilaq saaffiginnissutinik 20 missaannik Namminersornerullutik Oqartussat tigusaqarsimapput. Tamatigut saaffiginnittuusimapput attartortut Namminersornerullutik Oqartussat imaluunniit kommunit ilaqutariinnut ataatsinut illuutaannik imaluunniit illuni marloqiusani attartortuusut.

Inatsisartut peqqussutaanni § 8, imm. 2-mi atuarneqarsinnaapput "Inissiaqarfiup imaluunnit inissiap pisiarinerani akiusumut ilaapput inissiaqarfiup imaluunniit inissiap teknikikkut aningaasatigullu naliliiviginera, ilanngullugit pisinermut atatillugu aningaasartuutit tamarmiusut, matumanittaaq landinspektørimut, illunik tuniniaasartumut, teknikikkut aningaasatigullu siunnersorneqarnermut, advokatimut, aningaasatigut siunnersorneqarnermut naqissusiinermullu akiliutinut aningaasartuutit."

Tassa imaappoq inissiaqarfik imaluunniit inissiaq tunineqassaaq sanaartornermi atortussat sulinerullu nalingannut akilersillugu, ilanngullugit niuerutiginerani akissaajaatit. Pisiarinerani akiusumut ilaasussaanngitsut tassaalerput assersuutigalugu alianaassusaata nalinga, sumiiffia, inissaaleqineq imaluunniit inissianik nioqquteqarnermut tunngasut allat sunniutaat.

Kisianni illoqarfiit ilaanni inissaaleqisoqarnera pissutigalugu inissianik nioqquteqarneq imatut equngatigaaq pisiumasut inissiat nalingannit qaffasinnerusumik akilerlugit pisiariumasarlugit, aamma pisiumasut akiliuteqarfigerusuttarpaat sumiiffik alianaassuserlu.

Taamaattumik peqqussummi aalajangersagaqarpoq oqartumik akiusoq (teknikikkut aningaasatigullu nalinga ilanngullugit niuernermi akissaajaatit) § 8, imm. 2-mi taaneqartumik inissiap niuernermi akigisinnaasaatut naliliinermit 5%-imik appasinneruppat inissiap tunineqarneranut atatillugu iluanaapilunniarsinnaaneq pinaveersaartinniarlugu inissiaq aningaasat nalingisa nikerarnerannut qularnaveeqquserneqassasoq.

Ass. 1:

Sinerissami illoqarfimmi allami suliffissaaleqisoqariartuinnarnera, illoqarfimmiit nutsertoqarnera aammalu Namminersornerullutik Oqartussat kommunillu inissiaatiminnik attartortitsiniarnerisa ajornakusuuleriartuinnarnera pissutigalugit inissianik nioqquteqartuerussimavoq. Illoqarfimmi attartortup ataatsip inissiaq attartukkani pisiarerusuppaa.

Ass. 2:

Peqqussummut allannguutissatut siunnersuutip kinguneraa Naalakkersuisut aalajangersinnaammata inissiaq akimik § 8, imm. 2-mi taaneqartumit allaasumik appasinnerusumillu akilerlugu tunineqarsinnaasoq niuernermi pissutsit tamanna pissutissaqartippassuk.

Assersuut 2-mi inissiaq 475.000 kr.-inut niuerutigineqarpoq, kisianni aningaasat nalingisa nikerarnerannut qularnaveeqqusiunneqarput 280.000 kr.-it, taakku ukiut tamaasa 1/10-mik ukiuni tulliuttuni 10-ni nalikilliliissutigineqassapput. Ukiut 10 ingerlareerpata qularnaveeqqusiussaq nalikillineqarpoq 0 kr.-imut.

Aningaasat nalingisa nikerarnerannut 280.000 kr.-it qularnaveeqqusiunneqarnerisa siunertaraa pisisup piffissap sivikitsuinnaap iluani illoqarfimmi tassani niuernermut tunngasut allanngornerisigut pitsaanerulernerisigullu tunisinermini siunertarineqanngitsumik iluanaaruteqarnissaata pinngitsoortinneqarnissaa.

2. § 1-p nassuiaatai taamaallaat § 1, nr. 1-imut tunngapput. Taamaalilluni § 1, nr. 2-mut inissiap pisiarinerani akiusoq, inissiap niuernermi akigisinnaasaatut 5%-imik appasinneruppat qaffasinneruppalluunniit inissiap tuneqqinneranut atatillugu iluanaapilunniarsinnaaneq pinaveersaartinniarlugu inissiaq pisisup Naalakkersuisunut imaluunniit kommunalbestyrelsimut aningaasat nalingisa nikerarnerannut pisinermi akiusup aamma niuernermi akigisinnaasaatut naliliinerup akornanni nikingassummut naapertuuttumik qularnaveeqqusiinissamut tunngasumik malittarisassiuussivoq.

KANUKOKA-p sooq illu niuernermi akimit qaffasinnerusumik akilersillugu tuninerani akit ineriartornerat naapertorlugu qularnaveeqquserneqartassanersoq paasisinnaanagu tusarniaanermi akissummini allagaqarsimavoq.

Naalakkersuisut ajuusaarutigaat aalajangersakkamut nassuiaatit tamakkiisuunatillu naammattumik itisilerissutaasimanngimmata. Aalajangersagaq Inatsisartut peqqussutaannut nr. 5 af 21. maj 2002-meersumut tassungalu oqaaseqaatinut sukumiisunut tamarmiusumut atatillugu paasineqassaaq.

Siuliini oqaatigineqartunut tunngatillugu aningaasat nalingisa nikerarnerannut qularnaveeqqusiinerit siunertaraat:

Pisumi uani aningaasat nalingisa nikerarnerannut qularnaveeqqusiisoqarnissaa siunertaanngilaq, tassa inissiap pisiarinerani akiusoq niuerutigineqarnerani akiusumit qaffasinneruppat, assersuutigalugu § 8, imm. 2 malillugu akia 750.000 kr.-iuppat niuerutigineranilu akia 1.250.000 kr.-iuppat pisisullu 1.500.000 kr.-it akiliutigippagit. Taamatut pisoqarsinnaanera ilimanarujussuanngilaq.

3. § 1, nr. 2-mut tunngasunik itisiliivigineqarnissani Attaveqaqatigiinnermut Ineqarnermullu Ataatsimiititaliap kissaatigaa. Pisisup niuernermi akimit appasinnermit akiliilluni pisimatilluni illup tuninerani iluanaarutaasup akileraaruserneqartarnissaata naleqqunneratulli, pisisup niuernermi akia sinnerlugu pisinermigut "akileraarusiivigineqarnera" paasiuminaatsigaaq. Tassunga tunngatillugu ataatsimiititalia paasissutissiivigineqarnissaminik kissaateqarpoq.

Aningaasat nalingisa nikerarnerannut qularnaveeqqut akileraarutaananiluunniit akileraarusiutaanianngilaq. Aningaasat nalingisa nikerarnerannut qularnaveeqqut pisisup tunisisumut inissiamik niuernermi akiusumit imaluunniit nalinganit appasinnerusumik akiliilluni pisinermigut iluanaaruteqarniarsimannginnerminik uppernarsaaneranut nallersuunneqarsinnaavoq.

Paarlattuanik aningaasat nalingisa nikerarnerannut qularnaveeqqut tunisisup pisisumut, pisisup inissiaq iluanaarnartumik akilerlugu pisiarisimasani najorpagu, taava tunisisup tuniseqqinnikkut iluanaarutigisinnaasaraluani ukiumut 1/10 pissarsiariniarumanagit uppernarsaaneratut nallersuunneqarsinnaavoq.

Taamaattumik matumani taamaallaat pineqarpoq isumannaallisaaneq, tamatumuuna pisortat inissiaatiminnik niuernermi nalingi ataallugit nioqqutigininerisigut isasoortitsinissaq pinaveersaarniarlugu. Tamatumami nassatarisinnaavaa inissiat inunnit nammineq sanatitat/pigisat taarsigassarsiniartarfinnillu taarsigassarsinikkut aningaasalersorneqarsimasut pinngitsaaliinikkut tuniniagaalernerat.

4. Akit nikerarneri malillugu qularnaveequtip "sanasut neqeroorutaannik" taasat atorneqarsinnaaneri ajornarsisivittussaavaat. Uani ataatsimiititaliap inuup illumik aserfallannikumik akikitsumik akilerlugu piseriarluni, aaqqissuuteriarlugu iluanaaruteqarluni tunisinnaaneranut periarfissaqarsinnaanera eqqarsaatigaa. Imaassoreqqajaanarpoq inuk taanna akit ineriartorneri malillugit qularnaveeqummik eqqornerlugaaratarsinnaasoq. Taamatut paasinninneq Naalakkersuisut uppernarsarluguluunniit / ilumuunnginnerarsinnaavaat?

Isumap taasuma eqqortuunnginnera Naalakkersuisut uppernarsassavaat. Inatsisartut peqqussutaanni § 1, imm. 3-mi takuneqarsinnaavoq peqqussut atuutsinneqanngitsoq inissianut attartortittakkanut attartorneqanngitsunut imaluunniit inissianut attartortittakkat akisunerpaamik akiliiumasumut ammasumik nioqqutiginneqarsinnaanngitsut.

Taamaattumik inissianik nioqquteqarnermi "sanasut neqeroorutaat" suli periarfissaassapput.

5. Inigisap naliliivigineqarneranut atatillugu naliliisartut arlaannaannulluunniit attuumassuteqanngitsut atorneqartassapput. Naliliisartut arlaannaannulluunniit attuumassuteqannginnissaat qanoq ililluni qulakkeerneqassavaa?

Peqqussutip § 7-ani atuarneqarsinnaavoq inissiaqarfiup imaluunniit inissiap nalinga tamanullu ammasumik tuniniaanikkut tunineqarnerani akiusussatut naatsorsuutigisat illunik tuniniaasartumit naatsorsorneqassasut imarissallugillu nalinga tunineqarneqarneranilu akiusussap naatsorsorneqarnerani tunngaviit. Suliassanik suliarinnittarnermi tunngaviit nalinginnaasut malillugit naliliinermik isumaginnittoq imaluunniit taassuma qanigisaa naliliinerup aalajangersimasumik inissisimanissaanut inuttut aningaasatigut soqutigisaqartuussanngilaq.

6. Siunnersuummi § 2 malillugu peqqussut 1. januar 2003 atuutilissaaq. Tassunga atatillugu Inatsisartut Attaveqaqatigiinnermut Ineqarnermullu Ataatsimiititaliaata sooq kingumoortumik atuutilertitsinissaq kissaatigineqarnersoq itisilerlugu nassuiaqquaa.

Aalajangersagaq isumannaallisaataavoq, tassa qularnaarniarneqarmat niuernermi akiusoq teknikikkut aningaaatigullu naliliinermiit apasinnerusoq paasinarsippat naliliinerit 1. januar 2003 kingornatigut pisut tunngaviginiarneqassammata. 1. januar 2003-mi atuutilersinneqarani aatsaalli assersuutigalugu 1. juni 2003-mi atuutsinneqalerpat qinnuteqartut teknikikkut aningaasatigullu nalinganiit appasinnerusumik niuernermi akeqarnerata nalaani pisiareqqusilluni neqeroorummut qujaannassapput allannguutissatullu siunnersuutip atuutilernissaanut utaqqillutik, taamaalineranilu maannakkut attartukkaminnik tigusiumallutik nutaamik qinnuteqarlutik.