Peqqussutissatut siunnersuummut nassuiaatit
Nassuiaatit nalinginnaasut
Peqqussutissatut siunnersuut saqqummiunneqarpoq aaqqissuussinerup atulerneraniit ukiumi siullermi paasisimalikkat kingunerisaannik. Paasinarsisimavoq inissiat attartortittakkat niuernermi akiat sumiiffinni arlalinni inissiat teknikikkut aningaasatigullu naliliivigineqarneranniit appasinnerusoq. Taamaattumik inissiat maannakkut attartortorisaminnut niuernermi nalingannit appasinnerusumik akilersillugit tunineqarsinnaanissaasa periarfissinneqarnissaa pisariaqarpoq.
Iluanaapilunniartoqarsinnaanera pinaveersaartinniarlugu akiliutissaq niuernermi akigisinnaasaanit 5 %-imit annerusumik nikingassuteqarpat aningaasat nalingisa nikerarnerannut qularnaveeqqut nalunaarsorneqartassaaq.
Peqqussutissatut siunnersuutip allaffissornikkut kingunerisassaiPeqqussutissatut siunnersuut allaffissornikkut immikkut nammakkersuutaassanngilaq.
Peqqussutissatut siunnersuutip aningaasatigut kingunerisassaiInissiat attartortunut tunineqaraangata inissianik maannamut piginnittut, Namminersornerullutik Oqartussat imaluunniit kommunit, tunisinermi akiliutit isertitatut tigusassavaat. Paarlattuanik inissianik maannamut piginnittut aningaasaliissutigisimasanit iluanaarutissat ukiumoortut annaasassavaat.
Peqqussutissatut siunnersuut Aningaasaqarnermut Pisortaqarfimmut aamma KANUKOKA-mut tusarniaatigineqarsimavoq inatsisilerinikkullu misissuataartinneqarsimalluni.
Aalajangersakkanut ataasiakkaanut nassuiaatit.
§ 1-imut.
Aalajangersakkap kingunerissava Naalakkersuisut aalajangersinnaalissammata inissiap teknik-ikkut aningaasatigullu naliliisoqareerneratigut akiusumik allamik appasinnerusumillu akilersillugu tunineqarsinnaanera. Taamaaliortoqarnissaanik pisariaqartitsineq malunnarnerussaaq sumiiffinni inissiat akiisa piffissap ingerlanerani appariartuaarfigisimasaanni.
§ 2-mut.
Siunnersuutigineqarpoq peqqussut 1. januar 2003-mi atuutilissasoq piffissamiillu tassannga sunniutilimmik atuutissasoq. Tamatumuuna qularnaarniarneqarpoq illut naliliivigineqareersut niuernermilu akingi teknikikkut aningaasatigullu naliliinermit appasinnerusoq maannakkut attartortorisaminnit pisiarineqarsinnaanerat.