1. april 2003

UPA 2003/31

 

Inissianik attartorneq pillugu Inatsisartut peqqussutaata

allanngortinneqarneranik Inatsisartut peqqussutissaattut siunnersuut

pillugu

Inatsisartut Attaveqaqatigiinnermut Ineqarnermullu Ataatsimiititaliaata

ILASSUTITUT ISUMALIUTISSIISSUTAA

siunnersuutip pingajussaaneerneqarnerani saqqummiunneqartoq

 

Inatsisartut Attaveqaqatigiinnermut Ineqarnermullu Ataatsimiititaliaat suliarinninnermini ukunin-nga inuttaqarpoq:

 

Inatsisartuni ilaasortaq Isak Davidsen, Atassut, siulittaasoq
Inatsisartuni ilaasortaq Kalistat Lund, Siumut, siulittaasup tullia
Inatsisartuni ilaasortaq Jens Napaattooq, Siumut
Inatsisartuni ilaasortaq Johan Lund Olsen, Inuit Ataqatigiit
Inatsisartuni ilaasortaq Palle Christiansen, Demokraatit

 

Inatsisartut Attaveqaqatigiinnermut Ineqarnermullu Ataatsimiititaliaata Inissianik attartorneq pil-lugu Inatsisartut peqqussutaata allanngortinneqarneranik Inatsisartut peqqussutissaattut siunnersuut aappaasaaneerneqareermat nassuiaatitai ilanngullugit misissuataarpaa.

Siunnersuutip imarisai

Amerlanerussuteqartut Siumumeersut Atassummeersullu siunnersuut aappassaaneerneqarnermi kingorna iluserilikkamisut ilusilik isumaqatigaat.

Ikinnerussuteqartut Inuit Ataqatigiinneersut Demokraatineersullu ernummatigaat §§-ini 4-mi 5-imilu maleruagassat sukaterneqarnerat namminersornerusuni allaffeqarfissuarmi taassumalu ataa-ni sullivinni sulisorisanik pissarsiniarnissamut tigumminniinnarnissamillu aalajangiusimanissamut Namminersornerullutik Oqartussat periarfissaanut pitsaanngitsumik ajortumillu kingunilimmik sunniuteqassasoq. Tamatuma saniatigut ikinnerussuteqartut isumaqarput Naalakkersuisut allannguutissatut siunnersuutaat isumaqatiginninniartarnermik piginnaatitaanermut piffissaan-ngitsukkut akulerunnerusoq, sulisitsisummi kattuffii nalinginnaasutigut tamakkununnga tunngasumik Naalakkersuisunut isumaqatigiissuteqartaraluarmata, taamaattumillu, isumaqatiginninniartarnernut tunngasutut inatsisiliortut inatsiliuutissallugu ingalasimasariaqagaat.

Taamaammat peqqussutissatut siunnersuutip pingajussaaneerneqarneranut, maannamut inatsisitigut inissisimanerup sulisorisanullu atorfimmut atatillugu inissamik innersuussisarnermut tunngatillugu ileqquusut aalajangiusimaneqarnissaat siunertaralugu, ikinnerussuteqartut qulaani taaneqartut §§-it 4-p aamma 5-ip allannguutissaannik saqqummiussissapput.

Ataatsimiititaliap inassuteqaataa

Ataatsimiititaliami ikinnerussuteqartut Inuit Ataqatigiinneersoq Demokraatineersorlu allannguutissatut siunnersuummik saqqummiussissasut.

Taama oqaaseqarluni Inatsisartut Attaveqaqatigiinnermut Ineqarnermullu Ataatsimiititaliaata Inissianik attartorneq pillugu Inatsisartut peqqussutaata allanngortinneqarneranik Inatsisartut peqqussutissaattut siunnersuut pingajussaanigassanngortippaa.

 

	Isak Davidsen Siulittaasoq
Kalistat Lund Siulittaasup tullia		Jens Napaattooq
Johan Lund Olsen		Palle Christiansen