25, marts 2003

UPA 2003/31

 

Inissianik attartorneq pillugu Inatsisartut peqqussutaata

allanngortinneqarneranik Inatsisartut peqqussutissaattut siunnersuut

pillugu

Inatsisartut Attaveqaqatigiinnermut Ineqarnermullu Ataatsimiititaliaata

ISUMALIUTISSIISSUTAA

siunnersuutip aappassaaneerneqarnerani saqqummiunneqartoq

 

Inatsisartut Attaveqaqatigiinnermut Ineqarnermullu Ataatsimiititaliaat suliarinninnermini ukuninnga inuttaqarpoq:

 

Inatsisartuni ilaasortaq Isak Davidsen, Atassut, siulittaasoq
Inatsisartuni ilaasortaq Kalistat Lund, Siumut, siulittaasup tullia
Inatsisartuni ilaasortaq Jens Napaattooq, Siumut
Inatsisartuni ilaasortaq Johan Lund Olsen, Inuit Ataqatigiit
Inatsisartuni ilaasortaq Palle Christiansen, Demokraatit

 

Inatsisartut Attaveqaqatigiinnermut Ineqarnermullu Ataatsimiititaliaata Inissianik attartorneq pil-lugu Inatsisartut peqqussutaata allanngortinneqarneranik Inatsisartut peqqussutissaattut siunnersuut UPA 2003-mi siullermeerneqareermat nassuiaatitai ilanngullugit misissuataarpaa.


Apeqqutit

Ataatsimiititaliaq siunnersuutip oqaluuserineqarneranut atugassanik Attaveqaqatigiinnermut, A-vatangiisinut Ineqarnermullu Naalakkersuisoq apeqqutinut arlalinnut akissuteqaqqullugu qinnui-gaa. Ataatsimiititaliap apeqqutaasa Naalakkersuisunilu ilaasortap akissutaasa nuutinneri isumaliutissiissummut matumunnga ilanngunneqarput.


Siunnersuutip ilusiligaanera

Inatsisartut peqqussutaat 2001-imiit marloriarlugu allanngortinneqarnikuuvoq. Taamaalilluni siunnersuutip matuma akuersissutigineqarsinnaanera ilanngullugu Inatsisartut inatsisaannut siullermut tunngatillugu inatsimmut allannguutit pingasuulissapput.

Inatsisartut peqqussutaat arlaleriarlugu allanngortikkaanni, taanna inatsimmik atuisunut paasiuminaatsunngortinneqarsinnaavoq.

Taamaammat Inatsisartut Attaveqaqatigiinnermut Ineqarnermullu Ataatsimiititaliaata Naalakkersuisunut kaammattuutigissavaa, inatsisitigut allannguutigitinniakkat inatsisissatut ataasinngorlugu allatatut nutaatut saqqummiunniarneqassasoq, taamaaliornikkut inissianik attartorneq pillugu maleruagassat atuuttut inatsimmi nutaami ataatsimi katersorneqassammata.


Siunnersuutip imarisai

Pingaarnerusumik isigalugu siunnersuutikkut iliuuseriniarneqartut amerlanersaat Inatsisartut At-taveqaqatigiinnermut Ineqarnermullu Ataatsimiititaliaata pissusissamisoortutut isigai.

Peqqussummi inuit namminiusut kisimik erseqqissaatigineqarmata tamanna iluaqutaassaaq, tamannami ininik attartorneq pillugu peqqussummi siusinnerusukkut erseqqissumik takuneqarsinnaasimanngimmat.

Ataatsimiititalialli uniffigaa tamatuma kingunera tassaassasoq ineqarnermut akiliutit qaffasinnerpaaffeqarnissaannik peqqussutip aalajangersagaqarnera namminersortut attartortitsisut Namminersornerullutik Oqartussanut, kommuninut sullissivinnullu allanut isumaqatigiissutaannut atuutinngimmat. Utaqqiisaasumik ininut pisortat aningaasartuuteqarujussuartarnerat eqqarsaatigalugu Inatsisartut Attaveqaqatigiinnermut Ineqarnermullu Ataatsimiititaliaata tamanna pissutissamisuunngitsutut isigaa.

Ataatsimiititaliap isumaqatigiittup aappassaaneerinnilluni oqaluuserinninnissamut, ineqarnermut akiliutit qaffasinnerpaaffissaat inunnut attartortunut allallu attartorneranni atuuttut pillugit, Naalakkersuisut allannguutissatut siunnersuummik saqqummiussissasut kissaatigaa.

Sananermi kvadratmeterimut ataatsimut akiusussap, iluanaarutissanut akiliuteqarfigisassap qummut killiliivigineqarnissaa siunnersuutip aalajangiiviginiarmagu ataatsimiititaliap iluarisimaarlugu maluginiarpaa. Tamanna attartortunut, sananerup nalaani sanaartornermi akiusut qaffasinnerat kisiat tunngavigalugu qaffasissumik ineqarnermut akiliisartunut akikinnerulersitsisussaavoq.

Siunnersuutip kingunerissavaa attartortut qaammatini 12-ini qularnaveeqqusiussatut akiliutinik aningaasartuuteqaratik akilersuisinnaajunnaarnissaat. Tamatumunnga Naalakkersuisut tunngaviliissutigaat ineqarfiit immikkoortuisa erniatigut isertitanik annaasaqartarnerat attartortunullu aningaasanik taarsigassarsisitsinikkut aqutsinermut immikkut aningaasartuuteqartoqalernissaa.

Ataatsimiititaliami amerlanerussuteqartut Atassummeersut, Siumumeersut Inuit Ataqatigiinneersullu oqaatigissavaat, taamatut iliuuseqarneq inunnut aningaasassaleqisooreersunut artukiisussaasoq, akissarissaartulli iserternerminni akiliutaagallartussamik tamakkiisumik akiliiginnartussaasut.

Taamaammat amerlanerussuteqartut qulaani taaneqartut kissaatigaat allannguutissatut siunnersuut atorlugu akiliuteqartitsinermik aaqqissuussineq Naalakkersuisut allannguutissatut siunnersuummi piissagaat.

Ataatsimiititaliami ikinnerussuteqartup Demokraatineersup immikkoortumut tassunga Naalakkersuisut akissuteqataat isumaqatigaa, tassungalu tunngatillugu oqaatigissallugu, taarsigassarsiaritinneqarsinnaasutut neqeroorutigineqartunut, ineqarnermut tunngasuni pioreersunut sanilliullugu, akikinnerusumik taarsigassarsisinnaaneq pineqarmat.

Ataatsimiititaliami amerlanerussuteqartut Atassummeersut, Siumumeersut Inuit Ataqatigiinneersullu, amerlanerussuteqartut kaammatuutaannut naapertuuttumik Naalakkersuisut allannguutissatut siunnersuutinik saqqummiussereerpata, siunnersuut tapersiivigissavaat.

Ataatsimiititaliami ikinnerussuteqartoq Demokraatineersoq siunnersuummut tapersiiumaarpoq, ataatsimiititaliap isumaqatigiittup kaammattuutigisai naapertorlugit inuit attartortut allallu attartornermi pissutsit atugarisaanni ineqarnermut akiliutip qaffasinnerpaaffissaata atuunneranut qulakkeerinnissutaasumik Naalakkersuisut allannguutissatut siunnersuummik saqqummiussereerpata.

Taama oqaaseqarluni Inatsisartut Attaveqaqatigiinnermut Ineqarnermullu Ataatsimiititaliaata inissianik attartorneq pillugu Inatsisartut peqqussutaata allanngortinneqarneranik Inatsisartut peq-qussutissaattut siunnersuut aappassaanigassanngortippaa.

Isak Davidsen
Siulittaasoq
 

Kalistat Lund
Siulittaasup tullia

  

Jens Napaattooq
 

Johan Lund Olsen

  

Palle Christiansen

 

Ilanngussaq

1. Nalinginnaasumik nassuiaatit naapertorlugit Namminersornerullutik Oqartussat inissiaa-taasa 0,6%-iisa missaat peqqussutissatut siunnersuummi m2-mut sanaartornermi akimut iluanaarutigineqartussamut 15.000 kr.-inut annertunerpaaffiliinerup kingunerisaanik eqqorneqartussaapput. Sooq m2-mut aki 15.000 kr.-imut killilerneqarsimava? (tak. § 11, imm. 1-imi nutaaq)

Oqaatigineqassaaq Namminersornerullutik Oqartussat inissiaataasa amerlanersaat Danskit Naala-gaaffiannit sanaajusut 1987-imi Namminersornerullutik Oqartussat tigusinnginneranni, taamaattumik pisortat inissiaataat taakku sananeqarneranni akiusoq m2-mut ataatsimut 15.000 kr.-it ataanniippoq.

Kalaallit Nunaanni kommunit inissialiarisagaasa m2-mut ataatsimut akia nunamut tamarmut agguaqatigiissillugu 15.000 kr.-it missaanniippoq. Taassuma killiliunneranut taanna tunuliaqutaasut aapparaat. Tunuliaqutaasup aappaa minnerpaamillu taama pingaaruteqartigisoq tassaavoq aningaasaliissutinit iluanaarutissat, sanaartornermi akissaajaatit tunuliaqutaralugit naatsorsorneqartartut piginnittumullu tutsinneqartussat, ineqarnermut akiliutinik akuerineqarsinnaasumit annerusumik qaffaassutaannginnissaasa qularnaarneqarnissaa.

2. Nr. 1-imut akissummut ilanngullugu ataatsimiititaliap erseqqinnerusumik paaserusuppaa qummut killigititaq 14.000 kr.-imut imaluuunniit 16.000 kr.-imut aalajangiunneqarsimagaluarpat, tamanna aningaasaqarnikkut qanoq kinguneqaateqassanersoq.

M2-mut ataatsimut 16.000 kr.-it killiliunneqarsimagaluarpata taassuma nassatarissagaluarpaa ullumikkumut naleqqiullugu Namminersornerullutik Oqartussat 455 kr.-inik annaasaqaateqarnerat, tassa Namminersornerullutik Oqartussat ullumikut attartortittakkanik inissiarsuaateqarmata sisamanik katillugit 1.784,6 m2-inik angissuseqartunik, taakku sananeqarnerminni akiat m2-imut ataatsimut 16.000 kr.-init qaffasinnerummat.

Piffissaliussap sivikinnera pissutigalugu kommunini nikingassuterpiaasup naatsorsornissaanut paasissutissanik katersuinissaq ajornarsimavoq. Misissuinerilli pisimasut tunuliaqutaralugit ilisimaneqarpoq kommunit minnerpaamik inissiaataat katillugu 25.275 m2-inik angissuseqartut, taakku sananeqarnerminni akiat m2-mut 15.000 kr.-init qaffasinneruvoq, tamatuma nassataraa allannguutissatut siunnersuutip kingunerisaanik aningaasaliissutinit iluanaarutissaraluanit 458.793 kr.-it annaasussaassagaat. Tamanna tunngavigineqassappat mē-imut ataatsimut agguaqatigiissillugu 18,15 kr.-it kommunit annaassavaat.

Killiliussaq mē-imut ataatsimut 15.000 kr.-iniit 14.000 kr.-inut appartinneqarpat naatsorsuinermi tunngaviusup 1.000 kr.-ip 1,5%-ia mē-imut ataatsimut 15 kr.-it annaassavaat. Oqarutta 15.000 mē-it sananerannut akissaajaatit mē-imut ataatsimut 14.000 kr.-init qaffasinnerusut kisianni mē-imut ataatsimut 15.000 kr.-init appasinnerullutik, taava kommunit annaasassaat 225.000 kr.-inut nalilerneqarsinnaapput.

Akerlianilli killiliussaq 16.000 kr.-utinneqarpat oqaruttalu 15.000 mē-it sananeqarnerat mē-imut ataatsimut 15.000 kr.-init qaffasinnerusoq kisianni mē-imut ataatsimut 16.000 kr.-it ataassimallugit kommunit annaasassaat 233.793 kr.-inut nalilerneqarsinnaapput (458.793 kr. minus 225.000 kr.).

Ilassutitut apeqqut 1.

Peqqussutissatut siunnersuutikkut sananermi kvadratmeterimut akiusut, iluanaarutissanik akileqquneqartussat, 15.000 kr.-inut qaffasinnerpaaffissalerneqarput. Tamatumunnga atatillugu Namminersornerullutik Oqartussat kommunillu annaasaqaatigisassaat Naalakkersuisut nassuiaatigaat. Attartortunut ataasiakkaanut kinguneqaatissat pillugit paasissutissanik erseqqinnerusunik pissarsinissaq Inatsisartut Attaveqaqatigiinnermut Ineqarnermullu Ataatsimiititaliaata kissaatigaa.
Inissianik attartortut qassit 15.000 kr.-inik killiliinikkut pitsaaqutissarsitinneqassappat?

Aningaasaliissutinit iluanaarutissat kommunit/Namminersornerullutik Oqartussat annaasassaat ataatsimut isigalugu ineqarnermut akiliutinut attartortunut oqilisaassissutaasussanut naapertuupput. Namminersornerullutik Oqartussat inissiaataanni attartortittakkani attartortut 30 missaanniittut ukiumut ineqarnermut akiliutiminni mē-imut ataatsimut 14 kr.-inik appaavigineqassapput. Taakku inissiamut 70 mē-imut qaammammut 82 kr.-it missaannik oqilisaatinut naapertuupput.

Kommunit eqqarsaatigalugit allannguineq attartortunut 360 missaannut eqquissangatinneqarpoq, taakku ukiumut ataatsimut ineqarnermut akiliutiminni mē-mut ataatsimut agguaqatigiissillugu18,15 kr.-inik appaavigineqassapput. Oqarutta attartortut taakku agguaqatigiissillugu inissiami 70 mē-imi najugaqartut peqqussutissatut siunnersuutikkut qaammammut 106 kr.-ingajannik oqilisaaffigineqassapput.


Ilassutitut apeqqut 2.

Killiliinerlu 14.000 kr.-inut imaluunniit 16.000 kr.-inut angissusilerneqarpat inissianik attartortut qassit pitsaaqutissarsitinneqassappat?

Killiliussap 14.000 kr.-inut imaluunniit 16.000 kr.-inut allanngortinneqarneratigut attartortut pineqartussat qassioqqissaarnerat pillugu paasissutissanik Naalakkersuisut pigisaqanngillat. Kisianni paasissutissat pigineqartut tunuliaqutaralugit mē-imut ataatsimut 16.000 kr.-it killiliunneqarpata Namminersornerullutik Oqartussat inissiaataanni attartortittakkani attartortut 30 missaat ullumikkumut naleqqiullugu 455 kr.-inik, qaammammut 1 kr.-ip missaanut naapertuuttumik, oqilisaassivigineqarnissaat naatsorsuutigineqarsinnaavoq.

Killiliussaq 16.000 kr.-inut aalajangerneqarpat, kommunillu inissiaataasa attartortittakkat 15.000 mē-iusut sananeranni akissaajaatit mē-imut ataatsimut 15.000 kr.-init amerlaneruppata kisianni mē-imut 16.000 kr.-inik appasinnerullutik, taava ineqarnermut akiliutip qaffariaataa tamarmiusoq 233.793 kr.-inut (458.793 kr. minus 225.000 kr.) naatsorsuutigineqarsinnaavoq, taakku inissiamut 70 mē-imut ukiumut mē-imut ataatsimut 15,59 kr.-imut imaluunniit qaammammut 90 kr.-imut naapertuupput.

3. Manna tikillugu qaammatini 12-ini qularnaveeqqusiissummik saniatigut aningaasartuutitaqanngitsumik akilersuisoqarsinnaasimavoq. Taamatut kiffartuussinermut maanna 1.100 kr.-inik akiitsullu 1.000 kr.-it sinnersimagaangatigit 2%-inik ilasanik akiliuteqartussanngornermi suna tunngaviuva, tak. § 17, imm. 2 nutaaq.

Qularnaveeqqusiissummik naafferartumik akilersuineq aningaasartuutitaqanngisaannarsimavoq. Qularnaveeqqusiissutit attartortumit erngerlugu (aningaasanngorlugu) akilerneqannginnerat imaappoq najugaqaqatigiiffiup pineqartup najugaqarfigisaata akiliussigallartuunera taamaattumillu ernianit isertitassaraluanik annaasaqarnera. Tamatuma ajornerpaatut nassatarisinnaavaa attartortut allat annaasaqaammut matussusiinerat qularnaveeqqusiissutip ataatsip annaaneratut annertussuseqartumik. Aammattaaq eqqaasitsissutigineqassaaq najugaqaqatigiiffimmi inissiap ingerlanneqarneranut akissaajaatinut tamanut akileeqqusissut ataasiinnarmut ingerlatinneqarsinnaammat, tassalu attartortumut.

Siunnersuutigineqarpoq attartortut siunissami toqqarsinnaassagaat qularnaveeqqusiissutip nammineq aningaasaatit atorlugit aningaasanngorlugu akilertalissagaa, aningaasat aningaaserivimmit attavigisaminit attartussagai imaluunniit aningaasat "attartortunit allanit" attartussagai. Qularnaveeqqusiissutit naafferartumik akilersornissaat allaffissornertaqarpoq makkuninnga, pilersitsineq, akileeqqusineq nukingisaarinerlu, naleqqutinngilarlu taakkununnga akissaajatit attatortunit allanit ataatsimoortumik matussusertinnissaat. Taamaattumik kiffartuusseriaatsit arlallit Inissiaatileqatigiiffiup nalinginnaasumik ingerlatsineranit peertiterneqassapput, tamakkulu siunissami kiffartuussissutigineqarnissaat immikkut akilerneqartalissalluni. Kiffartuussinissanik taamaattunik ujartuisut tamakkununnga akiliisarnissaat pissusissamisuuginnarpoq.

4. Kukkunersiuinermut Ataatsimiititaliaasimasoq Nunatta Karsiata 2001-imut naatsorsuutai pillugit isumaliutissiissummini (qupperneq 116-imi) imatut inassuteqaateqarpoq: "Utaqqiisaasumik ineqartitsinerup Namminersornerullutik Oqartussanut annertunerujartuinnartumik ajornartorsiutaaleriartornerata qanoq iliuuseqarfigineqarsinnaanera pillugu naalakkersuinerup tungaanit itisilerutaasumik isumaliutersuutigineqarnissaa, tassungalu ilanngullugu aningaasaqarnikkut misissueqqissaarnerit ingerlanneqarnissaat, kiisalu inissianik immikkoortitseriaatsimut inissaqartinneqartussaatitaanermullu apeqqutit kiisalu apeqqutit allat inissianik agguaasisarnermut attuumassuteqartut naalakkersuinikkut naliliiffigineqaqqinnissaat. Naalakkersuinikkut nalilersueqqinnermi ineqarnermut tunngatillugu naalakkersuinikkut ineqarnermut politerisap anguniagaata nassatarisaannik siunissamut qanittumut ungasinnerusumullu aningaasatigut kinguneqaatissat itisilerlugit misissuiffigeqqissaarneqarnerat ilaatinneqartariaqarpoq."

Inatsisartut Attaveqaqatigiinnermut Ineqarnermullu Ataatsimiititaliaata sulisunut utaqqiisaagallartumik inigititat attartortitsinermi peqqussummi ilaatinneqannginnerat ilisimaaraa, qulaanili taaneqartut aallaavigalugit Namminersornerullutik Oqartussani tikisitatut sulisut taarseraannerujussuannut atatillugu sulisunut inissiaqartitsineq sulisut taarseraannerannut qanoq annertutigisumik sunniuteqartarnera naliliivigineqarsimanersoq erseqqinnerusumik paaserusuppara. Apeqqut tamanna attartortitsinermut peqqussummi inissiaqarfinnik aalajangersimasunik kissaateqarsinnaajunnaarnermik aammalu inissianik aalajangersimasunik piumasaqarsinnaajunnaarnermi aallaaveqarpoq.

Apeqqummut saqqummiunneqartumut atatillugu pingaarpoq erseqqissassallugu utaqqiisaasumik ineqartitsisarnermut tunngasut Inissianik attartorneq pillugu Inatsisartut peqqussutaanni pineqartunut ilanngimmata. Matumani pineqartoq isumaqatigiissutitigut Namminersornerullutik Oqartussat sulisitsisutut aamma sulisorisat kattuffiisa akornanni isumaqatigiissutaasartutigut maleruagassaqartitaavoq.

Namminersornerullutik Oqartussat sulisussarsiornermi ajornartorsiutaasa aaqqiivigeriarnissaat imaluunniit sulisunik tigumminniinnarniarnissaat Inissianik attartorneq pillugu Inatsisartut peqqussutaatigut ingerlatsivigineqanngillat, taamaattumik apeqqutitut saqqummiunneqartoq akineqarsinnaanngilaq. Taamaakkaluartoq qularutissaanngilaq ineqarnermut tunngassutillit atorfeqartitap toqqissisimanissaanut aamma pingaaruteqarsinnaammata.

Tapertaliullugu nalunaarutigineqarsinnaavoq utaqqiisaasumik ineqartitsisarnermut tunngasut arlalitsigut suliniuteqarfigineqalereersut, ilaatigut utaqqiisaasumik ineqartitsinermut akissaajaatit ikilisinniarlugit aammalu atorfeqartitap inissaqartinneqartussaatitaasup sapinngisamik piaartumik ataavartumik inissaminik innersuunneqarsinnaalersinniarlugu, taamaalillunilu nalinginnaasumik inuuneqalersinnaanissaa qularnaarniarlugu.

5. § 1, imm. 4-mi nutaami peqqussummi aalajangersarneqarpoq attartortitsinerit inunnut ataasiakkaanut tunngasut kisimik pineqartut. Maleruagassap tamatuma kingunerissavaa Namminersornerullutik Oqartussanut kommuninullu (sulisorisanut utaqqiisaagallartumik) inissianik inuinnarnit pigineqartunit attartortitsinerit inatsisit avataanni inissisimalernerat. Tamatuma ilaatigut kingunerisaanik peqqussummi inissianut akiliutip qaffasinnerpaaffissaatut aalajangersakkanik attartortitsisup malinnittussaannginnera, soorluttaaq attartornermut peqqussummi attartortut illersorneqarnissaannik siunertaqartumik maleruagassat atuutissanngitsut.

Peqqussutissatut siunnersuutip nalinginnaasumik nassuiaatitaani nutaamik aalajangersakkamut tunngasumik imaattumik allassimasoqarpoq:

"Ilaanneeriarluni nalornissutigineqartarsimavoq inatsisartut peqqussutaat sunut atorne-qassanersoq. Soorlu arlallit kukkullutik isumaqartarsimapput inatsisartut peqqussutaat aamma atuuttoq ingerlatseqatigiiffiit imaluuniit suliffeqarfiit akornanni attartortitsinermut. Taamaattoqanngilarli. Inatsisartut peqqussutaanni taamaallaat pineqarput inuit attartortuusut."

Taamaalilluni isumaqarnarpoq attartornermut peqqussut, aamma siunnersuutip matuma akuersissutigineqarsinnaanera sioqqullugu attartortitsinernut inunnit ataasiakkaanit attartorneqartunut taamaallaat atuuttutut Naalakkersuisunit isigineqarsimasoq. Taamatut isumaqarsimaneq attartortitsinermi peqqussutip oqaasertaani aammalu inatsisip nassuiaatitaani tunngavissaqarsorinartinneqanngilaq. Taamaattumik inatsisartut peqqussutaata maannakkut atuuttup attartortunut aalajangersimasunut inuttaqanngitsunut atuutinnginneranik isiginninnini sooq Naalakkersuisuni ilaasortap aalajangiusimaannarneraa itisiliivigalugu paasissutissiissutigineqassasoq ataatsimiititaliap kissaatigaa. Paasinninnerminut naammattumik tapersiutaasunik Naalakkersuisuni ilaasortaq tunngavissaalatsitsippat inatsisitigut tunngavigisanik allannguinerup matumani peqarnera paatsoorneqarsinnaanngitsumik erseqqissaatigineqassasoq ataatsimiititaliap kissaatigaa.

Oqaatigineqareersutut Inissianik attartorneq pillugu Inatsisartut peqqussutaanni siusinnerusukkut erseqqissumik takuneqarsinnaasimanngilaq taanna attartortitsinernut inunnit ataasiakkaanit attartorneqartunut taamaallaat atuunnersoq. Taamaakkaluartoq taamaattuarsimavoq, attartortitsisartullu taanna malillugu iliuuseqartarsimapput. Kiisalu inatsisip oqaasertaani arlaleriarluni atuarneqarsinnaavoq attartortoq tassaasoq inuttut isigineqarsinnaasoq, taamaanngippammi inatsisip oqaasertai arlaleriarluni nalinginnaasumik oqaatsinut atortakkatsinnut assortuutissapput, assersuutigalugu:

Inissianik attartorneq pillugu peqqussummi attartortup inuttut isigineqarsinnaasuunissaanut tunngasumik atuagassaqanngilaq. Assersuutigalugu piginnaatitsissummut imaluunniit atsiorsinnaatitaasumut tunngasumik eqqaasaqartoqanngilaq.

Kiisalu Namminersornerullutik Oqartussat inissiaataasa attartortittakkat attartortinneqarnerat pillugu kaajallaasitani nutaannginnerusuni (atuukkunnaarnikuni), Kaajallaasitaq imm. 7. nr. 31, § 2-mi atuarneqarsinnaavoq "Kommunit Namminersornerullutik Oqartussat sinnerlugit inunnik nammineersinnaatitaasunik pissutissaatitaasunillu eqquutsitsisunik attartornissaq pillugu isumaqatigiissuteqarsinnaapput:ž" Kaajallaasitaq Inissianik attartorneq pillugu Inatsisartut peqqussutaata siulliup siuleraa.

6. Peqqussutissatut siunnersuutip aningaasatigut kingunerisassaasa nassuiaatitaani imatut allassimasoqarpoq: "Kommunit Nunattalu Karsiata ilimagisariaqarpaat akiliigallassutit pillugit aaqqissuussinerup eqqortinneqannginneranut tunngatillugu annaasaqarnissartik."

Naalakkersuisut Inatsisilerinermut allaffia siunnersuummik inatsisit tungaannit naliliiffi-ginninnermini imatut oqaaseqaateqarpoq: "Annaasat aningaasartuutilluunniit annertussusaat erseqqissumik nalunaarsorneqanngillat. Peqqussutissatut siunnersuutip kinguneqaatissaat inatsisartunit nalilerluarneqarsinnaanissaat periarfissikkumallugu, annaasassatut aningaasartuutissatullu ilimagineqartut annertussusaat sapinngisaq naapertorlugu nalunaarsorniarneqarnissaat pisariaqassaaq."

Taamaakkaluartorli aningaasaqarnikkut kinguneqaatissat nassuiaatini erseqqissaatigineqarsimanngillat. Tamanna tunngavigalugu Inatsisartut Attaveqaqatigiinnermut Ineqarnermullu Ataatsimiititaliaata attartortitsinermut qularnaveeqqutinut naammassineqanngitsoortunut annaasassat qanoq amerlatigisussatut ilimagineqarnersut paaserusuppaa.

Pineqartut immikkoortinneqarnissaat pingaaruteqarpoq.

Kisiannili Namminersornerullutik Oqartussat kommunillu inissiaataat najugaqaqatigiiffinnut aningaasaqarnikkut namminersortunut agguataagaapput. T.i. najugaqaqatigiiffiit ataasiakkaarlutik namminerisaminnik missingersuusiaqarput. Missingersuusiani taakkunani attartortitsisup (Namminersornerullutik Oqartussat imaluunniit kommunit) ineqarnermut akiliutit akilerneqannginnerisigut imaluunniit qularnaveeqqutit naafferarlugit akilersorneqarnissaannik eqquutsitsisoqannginneratigut annaasaqaatimik matussutissaannut akissaajaatissatut naatsorsuutigisat ilannguttarpaat.

Siuliiniittut malillugit najugaqaqatigiiffimmut akiligassiissutit tamarmiusut attartortunit najugaqaqatigiiffimmi pineqartumi najugaqartunit matussuserneqartussaapput. Tamanna aamma atuuppoq annaasanut qularnaveeqqutit naafferarlugit akilersorneqarnissaannik sumiginnaasoqarneratigut pinngorsimasinnaasunut. Nalunaarutigineqarsinnaavoq paasisimasat tunngavigalugit ukiumut ataatsimut mē-mut ataatsimut 10 kr.-it attartortup qimatsineratigut, attartortoqanngikkallarneratigut, ineqarnermut akiliutit akilerneqannginnerisigut aammalu qularnaveeqqutit naafferarlugit akilersorneqarnissaannik sumiginnaasoqarneratigut annaasanut matussutissatut missingersuutigineqartartut. Aningaasat inissiamut 70 mē-imut qaammammut 58 kr.-inut naapertuupput.