22. marts 2003 UPA 2003/31
A l l a n n g u u t i s s a t u t s i u n n e r s u u t
uunga
Inissianik attartorneq pillugu Inatsisartut peqqussutaata allanngortinneqarneranik Inatsisartut peqqussutissaattut nr. xx, uu. qqqq 2003-meersussatut siunnersuut.
(Peqqussutip atuuffiata ersarissarneqarnera, inuit atugaat malillugit inissanik innersuussarnermut malittarisassat allanngortinneqarnerat, aningaasaliissutinit pissarsiat, siumoortumik akiliutigisassatut qaffasinnerpaaffissaat kiisalu nakkutilliineq pillugu malittarisassat nutaat.)
Aappassaaneerinissamut Naalakkersuisunit saqqummiunneqartoq.
§ 1-imut
1. § 1 nr. 5 ima oqaasertaqassaaq:
"5. § 17 ima oqaasertaqassaaq:
"§ 17. Attartorneq aallartitsinnagu Namminersornerullutik Oqartussat kommunillu inissiaataanni attartortut attartortitsisumut aningaasanngorlugu siumoortumik akiliutigissavaat qaammatini pingasuni ineqarnermut akiliutissat nalingat. Attartortup attartornerup isumaqatigiissutigineqarnerani siumoortumik akiliutigisassat aningaasanngorlugit akiliutigisinnaanngikkunigit attartortup taakku qaammatikkaartumik akiligassanut angeqqatigiiaanut aqqaneq marlunnut agguarlugit akilersorsinnaavai.
Imm. 2. Imm. 1 naapertorlugu naafferarlugu akilersuinissamik pilersitsinermut attartortoq akiliutissanik 500 kr.-inik akiliuteqartinneqassaaq naafferarlugulu akilersuinerup atuunnerani qaavatigut 50 kr.-inik qaammammut akiliuteqartinneqartassalluni, taamaattoq tak. imm. 3. Akileeqqusissummik piumasaqarfigineqarnermut tunngatillugu 1.000 kr.-it sinnerlugit akiligassaqartoqarpat akiliutissat 50 kr.-it 2 %-imik ilallugit attartortitsisup akileqqusinnaavai, taamaattoq tak. imm. 3. Aningaasat kruunimut ilivitsumut qaninnerpaamut apparlugit iluarsineqassapput.
Imm. 3. Imm. 2 malillugu akiliutissap akileqquneqarnissaa inissarsiortunut inoqutigiit tamarmiusut akileraaruteqaataasussamik ukiumut isertitaat inissiani attartortittakkani ineqarnermut tapiissutit pillugit inatsisartut peqqussutaat sukkulluunniit atuuttoq, tassungalu atatillugu nalunaarut, malillugit ineqarnermut tapiissutinik pissarsinissamut aningaasat killiliussat ataallugit isertitaqartartunut atuutinngilaq.
Imm. 4. Paasissutissanik eqqunngitsunik tunniussinerup kingunerissavaa siumoortumik akiliutissat tamarmiusut erngerlutik akiligassanngornerat..
Imm. 5. Allamut nuunnermut tunngatillugu attartortitsisup akiliigallassutit atorsinnaavai attartortup attartornermut isumaqatigiissut malillugu pisussaaffiinut, tamatumani ilanngullugu § 58 naapertorlugu iluarsaassinermut aningaasartuutinut akileeqataassutissanut.
Imm. 6. Siumoortumik akiliutit pillugit Naalakkersuisut malittarisassiorsinnaapput."
Peqqussutissatut siunnersuummut nassuiaatit
Nassuiaatit nalinginnaasut
Peqqussutissatut siunnersuummut allannguutissatut siunnersuut saqqummiunneqarpoq akiliigallassutissanik naafferartumik akilersuisarnissamik pilersitsinermut pappiaralerinermut akiliutissamik aammalu akileeqqusissutip matussutissaanik qaammammut akiliutissamik inissiamik aqutsisup akileeqqusisinnaanera pillugu siunnersuummi aalajangersakkap tamarmiusup peerneqarnissaanik Inatsisartut Attaveqaqatigiinnermut Ineqarnermullu Ataatsimiititaliaata inassuteqataa tunuliaqutaralugu.
Naalakkersuisut Ataatsimiititaliatulli isumaqarput nammassinnaanerpaat nammagassat annersaannik nammattariaqartut. Naalakkersuisuttaaq isumaqatigaat siunnersuut siusinnerusukkut ilusiligaanermisut iluseqarluni sanngiinnerpaanik sakkortuallaartumik eqquisinnaammat. Taamaakkaluartoq Naalakkersuisut isumaqarput inuit amerlasuunik isertitaqartartut akiliigallassutissanik tamarmiusunik aningaasanngorlugu akiliuteqartariaqartut attartortut tamakkerlugit, attartortut ikittuinnarnik isertitaqartartut ilanngullugit, nammakkinngikkaluarlugit.
Taamaattumik Ataatsimiititaliap tunngaviatigut isumakuluutai naapertorlugit Naalakkersuisut saqqummiuppaat allannguutissatut siunnersuut attartortut ineqarnermut tapiissutinik, taakku pillugit malittarisassat atuuttut malillugit, pissarsisinnaatitaasut akiliutissaq akilinngikkaluarlugu akiliigallassutissanik naafferarlugu akilersuinissaminnut aamma pisinnaatitaanissaannik nassataqartussaq. Attartortut isertitaqartarnermikkut ineqarnermut tapiissutinik pissarsisinnaatitaanngitsut akiliutissamik akileeqquneqartassapput ilimagisariaqarmat taakku ima isertitaqartigisassasut aningaasat tamakkerlugit aningaasanngorlugit akilersinnaallugit.
Allannguutissatut siunnersuut KANUKOKA-mut tusarniaatigineqarsimavoq tassanngaaniilli oqaaseqaatinik tigusaqartoqanngilaq kiisalu Inatsisileriffimmi misissuataartinneqarsimalluni.
Peqqussutissatut siunnersuutip allaffissornikkut kingunerisassaiAllannguutissatut siunnersuut aaqqissuussinermut atuuttumut naleqqiullugu kommunini imaluunniit Namminersornerullutik Oqartussani suliaqarnerulernermik kinguneqassanngilaq.
Peqqqussutissatut siunnersuutip aningaasatigut kingunerisassaiAllannguutissatut siunnersuutip nassatarissavaa najugaqaqatigiiffiit ataasiakkaat akiliigallassutitigut isertitassat naafferaalluni akilersuisoqarneratigut aningaasartaasa erniassaralui annaassammatigit aammalu akiliigallassutissat naafferaalluni akilersorneqarnerisa aqutsivigineqarnerisa allaffissornarnerunerata kingunerisaanik ineqarnermut akiliutit qaffariaataannik attartortut tamarmik eqqorneqartussaapput.
Aalajangersakkanut ataasiakkaanut nassuiaatit
§ 1, nr. 1-imut
Aalajangersakkap kingunerissavaa inissianik aqutsisup attartornermut uppernarsaatit suliarinerinut saniatigut akiligassiisinnaammat kiisalu akileeqqusinermut qaammammut akiliutissaq akileqqussallugu. Tamatuma saniatigut akiliinngitsoortoqarsimappat aqutsisoq tuavisaaraluni allagaqarnerminut akiliuteqaqqusisinnaavoq.
Siunertarineqarpoq allaffitsigut aqutsinerup sapinngisamik takulertoruminartuunissaata pilersinneqarnissaa. Tamatuma kingunerissavaa attartortut sullinneqarumasut tamanna akilissammassuk.
Tamannali atuutinngilaq inissarsiortunut taassuma inoqutaasalu akileraaruteqaataasussamik isertitaat akileraaruteqaataasussat ukiumoortumik isertitaannut naatsorsorlugu aningaasanut killiliussat assigiinngisut ataallugit isertitaqartartunut.
Inissarsiortup, saniatigut akiligassinneqarusunngitsup, uppernarsassavai inoqutigiit ukiumut isertitassaattut naatsorsuutigisat, assersuutigalugu qaammatini kingullerni akissarsiat allagartaasigut, piffissamut naatsorsuusiaagallartutigut, (uppernarsaalluni) nalunaaruteqarnikkut imaluunniit sullissiviup nalunaarutaatigut allatulluunniit uppernarsaanikkut.
Ineqarnermut tapiissutisinissamut aningaasanut killiliussat, nammineq akileeqataassutissat kiisalu ineqarnermut tapiissutit aningaasartaasa annerpaaffissaat minnerpaaffissaallu pillugit Namminersornerullutik Oqartussat nalunaarutaat nr. 34, 13. september 2001-imeersoq malillugu aningaasanut killiliussat maannakkut makkuupput:
kr. 180.000 inoqutigiinnut meerartaqanngitsunut
kr. 372.000 inoqutigiinnut ataatsimik meerartalinnut
kr. 396.000 inoqutigiinnut marlunnik meerartalinnut
kr. 408.000 inoqutigiinnut pingasunik meerartalinnut
kr. 416.000 inoqutigiinnut sisamanik meerartalinnut
kr. 428.000 inoqutigiinnut tallimanik meerartalinnut
kr. 444.000 inoqutigiinnut arfinilinnik amerlanernilluunniit meerartalinnut.Aningaasanut killiliussat suliaqarfimmut nalunaarutit nutaat saqqummiunneqarneri ilutigalugit allanngortinneqartassapput.
Attartortoq imminut tunngasunik paasissutissanik eqqunngitsunik tunniussippat tamatumuunalu akiliutissamik akiliinani naafferaalluni akilersuilersinnaalersimappat tamanna sumiginnaanertut isigineqassaaq akiliigallassutissallu tamarmiusut sinneri erngerlutik akiligassanngussallutik.