Peqqussutissatut siunnersuummut nassuiaatit
Nassuiaatit nalinginnaasut
Peqqussutissatut siunnersuutip saqqummiunneqarnera ineqarnermut tunngasut tamanut tun-ngatillugu allanngortiteriffigineqarnerannut ilaavoq, tassa ilaatigut kissaatigineqarmat A/S Inissiaatileqatigiiffik INI-p sunniuteqarnerulersinneqarnissaa allanngortiteriffigineqarnissaalu, taamaalilluni ingerlatseqatigiiffik suliassarpiaminik, tassalu inissiat attartortittakkat ingerlanneqarnerannik aqunneqarnerannillu, siunissami taamaallaat suliaqalersinnaaqqullugu.
Peqqussutissatut siunnersuutip kinguneraa A/S Inissiaatileqatigiiffik INI-p suliassanik assigiinngitsunik pingasunik suliaqalernissaa,
· oqartussaasutut suliassat piginnaatinneqareernikkut naammassineqartussat,
· suliassat suliarineqartussatut neqeroorutigineqartut, aammalu
· siunnersortitut suliakkiutitsuliassaqarfinni assigiinngitsuni marlunni illuatungaatigut inissianik ingerlatsineq, aqutsineq aserfallatsaaliuinerlu illuatungaanilu sanaartornermut tunngasuni sanatitsisutut atuuffik.
Inissiaatileqatigiiffimmik pilersitsinerup suli siunertaraa, Inatsisartut 1993-imi upernaakkut katersuunneranni inissiaatileqatigiiffimmik pilersitsinissaq pillugu immikkoortup oqaluuserineqarnerani soorlu oqaatigineqartutut „Ingerlatseqatigiiffimmik pilersitsineq najugaqartut oqartussaaqataanerannik nukittunerulersitsissaaq taamaalilluni attartortut inigisaminnut sunniuteqarnissaminnut qularnaarunneqassammata aningaasat, ingerlatsineq avatangiisillu eqqarsaatigalugit. Taamaattumik attartortut sullissinerit, aserfallatsaaliuilluni pitsanngorsaallunilu suliassat kiisalu nutarterinissat il.il. pitsaassusissaannut siunissami aalajangii-sooqataalissapput."
Inissiaatileqatigiiffiup ukiuni kingullerni marlussunni ukiut ingerlatsivini siulliit tallimat nalilersuiffigisimavai. Sulinerup tamatuma inerneraa iliuusissatut pilersaarut nutaaq, taamaalilluni ingerlatseqatigiiffiup pingaarnertut suliarilissallugit suliassat inissianik aqutsinermut tunngasut, taamaattumik ingerlatseqatigiiffiup pissusissamisuuinnartutut suliariunnaassavai suliassat pisortat ingerlatsineranni ileqquusut malillugit naammassineqartartut.
Nalornissutigineqassanngilaq inissiaatileqatigiiffiup aqutsivittut ingerlatseqatigiiffiunera inissianik attartortittakkanik periutsit aningaasanik atorluaanerusut atorsinnaalluartullu malillugit aqutsiviginninnissamik suliassaqartoq. Inissiaatileqatigiiffik isumaginninnikkut ingerlatsivittut allatut ingerlassanngilaq innuttaasut inuuniarnermi aningaasaqarniarnerannik imaluunniit inissaqarnissaat pillugu naammassinnittuussanngilaq. Suliassat tamakku kommunit suliassaraat.
Peqqussutissatut siunnersuut KANUKOKA-mut, SIK-mut, Isumaginninnermut Suliffeqarnermullu Pisortaqarfimmut kiisalu A/S Inissiaatileqatigiiffik INI-mut isummerfigeqqusissutigineqarpoq (tusarniaatigineqarpoq). Aammattaaq siunnersuut inatsisissanik nalilersuisarfimmit misissuataarneqarpoq. Tamakku kingorna oqaaseqaatit naleqquttut tunuliaqutaralugit siunnersuut iluarsaanneqarpoq.
Peqqussutissatut siunnersuutip allaffissornikkut kingunerisassaiPeqqussutissatut siunnersuutip taamaallaat nassatarissavaa inissiaatileqatigiiffiup suliassanik sunik suliaqartussaanerata erseqqissaavigineqarnera.
Peqqussutissatut siunnersuutip aningaasatigut kingunerisassaiSiunnersuutip nassatarissavaa immikkut sullissinerit pillugit isumaqatigiissutit ingerlatseqatigiiffip suliassarpiaanut ilaanngitsut Namminersornerullutik Oqartussat inissiaatileqatigiiffiullu, imaluunniit illunik piginnittup, assersuutigalugu kommunit inissiaatileqatigiiffiullu, akornanni kiffartuunneqarnissamik isumaqatigiissuteqarfigineqartarnissaat. Maannakkut Namminersornerullutik Oqartussat inissiaatileqatigiiffiullu akornanni kiffartuunneqarnissamik isumaqatigiissuteqarpoq, tassani pineqarput Namminersornerullutik Oqartussat ineqarnermut tunngasuni suliassaataat tamarmik. Kiffartuunneqarnissamik isumaqatigiissut taanna suliassat aalajangersimasut pillugit kiffartuunneqarnissamik isumaqatigiissutinut aggulunneqassaaq.
Suliassanut ullumikkut inissiaatileqatigiiffimmit isumagineqartunut amerlanerusunik aningaasaleeqqittoqarnissaata pisariaqalernissaa naatsorsuutigineqanngilaq.
Aalajangersakkanut ataasiakkaanut nassuiaatit
§ 1, nr. 1-imut
Aalajangersakkap kingunerissavaa A/S Inissiaatileqatigiiffik INI-p pingaarnertut suliassarilissammagit Namminersornerullutik Oqartussat inissiaataasa ingerlanneqarnerat, aqunneqarnerat aserfallatsaaliuiffigineqarnerallu. Taakku saniatigut suliassat arlallit inissianik ingerlatsinermut sanaartornermullu tunngassuteqartut naammassineqarnissaat pillugu inissiaatileqatigiiffik isumaqatigiissusiorsinnaavoq.
Inissiaatileqatigiiffiup suliassai agguataarneqassapput suliassarpiaanut saniatigullu suliassaanut, imaappoq saniatigut ingerlassanut. Suliassarpiaa, imaappoq Namminersornerullutik Oqartussat inissiaataasa ingerlanneqarnerat, aqutsivigineqarnerat aserfallatsaaliorneqarnerallu, iluanaarniutiginagu ingerlanneqassapput, taamaammat inissiaatileqatigiiffiup Namminersornerullutik Oqartussat aktiaateqarluni ingerlatseqatigiiffiattut pisariaqartinneqartut saniatigut ingerlatseqatigiiffik ingerlatsinermut sillimmatissanik katersissanngilaq ani-ngaasanilluunniit katersissanani, tassa sullitarpiani, attartortut, pisariaqanngitsunik ani-ngaasartuusersortussaanngimmagit.
Suliassat allat inissiaatileqatigiiffiup tigusai, imaappoq ingerlatseqatigiiffiup saniatigut ingerlassai, immikkuutaarlutik ilanngaatissat ilanngaatigereerlugit iluanaaruteqaataaqataassapput. Tamanna isumaqarpoq saniatigut ingerlassat ataasiakkaat pitsaasumik matussuseeqataanermik saniatigut iluanaaruteqaataaqataassapput. Tamanna ima paasineqassaaq isertitaq ingerlassanut aalajangersimasunut akissaajaatit ilanngaatigereerlugit suli iluanaaruteqaataassasoq.
Saniatigut ingerlassat kiffartuunneqarnissamik isumaqatigiissutit atorlugit naammas-sineqarsinnaapput, tamanna ima paasillugu saniatigut ingerlassat imminni ilanngaatissat ilanngaatigereerlugit iluanaaruteqaataaqataassanngillat, taamaammat suliakkiisoq ingerlatassap naammassineqarnissaanut immikkut akiliuteqartassaaq. Kiisalu suliassat aalajangersimasut naammassineqarnissaat pillugit inissiaatileqatigiiffik immikkut isumaqatigiissusiorsinnaavoq.
§ 2-mut
Aalajangersakkap kinguneraa peqqussutissatut siunnersuutip 1. juni 2003-mi atuutilernissaa.