NAMMINERSORNERULLUTIK OQARTUSSAT Kalaallit Nunaanni Inatsisartut Inatsisartut Allattoqarfiat	GRØNLANDS HJEMMESTYRE Grønlands Landsting Landstingets Bureau
Ilaqutariinnermut Peqqissutsimullu Naalakkersuisoq		Ulloq/Dato: J.nr.:	16. marts 2003 01.33.04.03-1

 

 

Inatsisartut Ilaqutariinnermut Peqqissutsimullu Ataatsimiititaliaanni ulloq 20. marts 2003, nal. 10 Inatsisartut ataatsimiititaliaasa ataatsimiittarfianni 2-mi isumasioqatigiilluni ataatsimiinnissaq.

Inatsisartut Ilaqutariinnermut Peqqissutsimullu Ataatsimiititaliata Ilaqutariinnermut Peqqissutsi- mullu Naalakkersuisup ataatsimiititaliami isumasioqatigalugu ataatsimeeqatiginissaa kissaatigaa.

UPA 2003/26-imut, tassalu: Meeqqanik inuusuttunillu ikiorsiisarneq pillugu Inatsisartut peqqus- sutissaattut siunnersuummut tunngatillugu makku oqaluuserineqarnissaat ataatsimiititaliamit kissaatigineqarpoq:

1.Efterskolit § 9, imm. 9 malillugu inissiivittut isigineqarnerat ataatsimiititaliap malugini- arpaa. Kalaallit inuusuttut ikiorneqarnissamik pisariaqartitsisut siusinnerusukkut Danmarkimi efterskolinut aallartinneqartarsimapput, tamannalu inuusuttunut, pisaria- qartitsinertik naapertorlugu ikiorserneqarlutillu tapersiivigineqanngitsunut, efterskoli- nullu, inuusuttut pisariaqartitaat naapertorlugit isumaginninnikkut perorsaanikkullu ikiorsiisinnaasimanngitsunut, ajornartorsiortitsisarsimavoq.

Inuusuttut § 9, imm. 9 naapertorlugu Danmarkimi efterskolinut aallartinneqartut efterskolimiinnerminni qanoq ikiorneqartarnerisa erseqqissaatigineqarnissaa ataatsimii- titaliamit kissaatigineqarpoq.

2. § 14-imi allassimavoq meeraq angerlarsimaffiup avataanut inissinneqartussanngorlugu kommunalbestyrelsi aalajangiippat iliuusissatut pilersaarusiortoqassasoq. Iliuusissatut pilersaarutit taakku suliarineqarnissaat, taamaalillunilu peqqussutikkut siunertarineqar- tut eqquutsinneqarnissaat, Naalakkersuisuni ilaasortap qanoq qulakkeertilersaarpaa?

3. Ilaqutariit inuussutissarsiutigalugu paarsisartut sukumiisumik ingerlaavartumillu ilitsersorneqartarnissaat, oqilisaassiffigineqartarnissaat aammalu ingerlaavartumik pikkorissartinneqarlutillu nukittorsarneqartarnissaat Naalakkersuisuni ilaasortap qanoq qulakkiilersaarpaa? Ilaqutariit inuussutissarsiutigalugu paarsisartut oqimaatsumik suliassaqarmata ikiorsiivigineqarnissamik qulakkeerunneqarnissaat ataatsimiititaliap pingaartutut isigaa. Tamatuma saniatigut ilaqutariit inuussutissarsiutigalugu paarsisartut ajornartorsiutinik kisimiillutik nammataqannginnissaat anguniarlugu attaveqaatinik ikiortigisinnaasaannik pilersitsinissaq pillugu qanoq eqqarsaatersuuteqartoqarlunilu pilersaaruteqartoqarnersoq pillugu qulaajaanissaq kissaatigineqarpoq.

4. Ilaqutariit inuussutissarsiutigalugu paarsisartut meeqqat angerlartinniarneqarnissaanik sulissutiginninnermi aamma akuutinneqarnissaat Naalakkersuisuni ilaasortap qanoq iliorluni qulakkiilersaarpaa?

5. Ilaqutariit nalinginnaasumik paarsisartut oqimaaqisunik ullumikkut aamma suliaqartut ingerlaavartumik siunnersorneqarnissaat, tapersersorneqarnissaat nukittorsarneqarnis- saallu Naalakkersuisuni ilaasortap qanoq ililluni qulakkiilersaarpaa?

6. Ilaqutariit inuussutissarsiutigalugu paarsisartut aningasaqarnikkut atugaasa itisiliiffigi- neqarnissaat ataatsimiititaliap kissaatigaa. Ataatsimiititaliaq isumaqaqqajaavoq ilaqu- tariinnut inuussutissarsiutigalugu paarsisartunut aningaasarsiaritinneqartartut piviusor- siortuunatillu annikitsuararsuusut.

7. Meeqqanik qanoq ittunik ilaqutariit inuussutissarsiutigalugu paarsisartut paarsaqarsin- naanissaasa itisilerutaasumik nassuiaatigineqarnissaa ataatsimiititaliamit kissaatigine- qarpoq. Oqaaseqatigiit "meeqqat annertuumik eqqarsartaatsimikkut ajoquserneqarsima- sut imaluunniit meeqqat annertuumik timimikkut eqqarsartaatsimikkulluunniit innarluu- tillit" (tak. § 18, imm. 1) siamasippallaamik oqaasertaliorneqarsimasutut ataatsimiititali- amit isumaqarfigineqarput.

8. § 21-imi allassimavoq ilaqutariit paarsisussat paarsinermi suliassamik sukumiisumik ilitsersorneqartussaasut aammalu iliuusissatut pilersaarummik peqassasut. Isumaginnin- nikkut siunnersortit taama suliakkersugaareertigisut tamatumunnga ulloq 1. juli 2003, peqqussutissatut siunnersuutip atortuulerfissaatut siunnersuutigineqartoq tikitsinnagu piffissaliisoqarnissaa aningaasanillu immikkoortitsisoqarnissaa Naalakkersuisuni ilaasortap qanoq qulakkiilersaarpaa?

9. Meeqqat pillugit paasisimasalittut ataatsimiititaliami inatsisilerituumik ilaasortaqarnis- saq ataatsimiititaliamit pingaaruteqartutut isigineqarpoq. Naalagaaffiup sinnissaa meeqqat pillugit paasisimasalittut ataatsimiititaliami ilaasortassatut siunnersuut malillu- gu imminut isiginersoq inatsisileritoorluunniit Naalagaaffiup sinniisoqarfianeersoq paasortaassanersoq Naalagaaffiup sinniisaata tusarniaanermut akissuteqaataani erseqqis- sumik allassimanngilaq. Naalakkersuisuni ilaasortap tamanna akissuteqarfigisinnaavaa?

10. Allannguutissatut siunnersuut matumani pineqartoq iliuusissanik nutaanik arlalinnik inuttut siunnersortinut, ilaqutariinnut inuussutissarsiutigalugu paarsisartunut, taakku ingerlaavartumik pikkorissartinneqarlutillu nukittorsarneqarnissaannut, meeqqat ataasiakkat tamarmik pilersorneqarnissaannut tunngatillugu naliliinernut kommunit aningaasartuuteqarnerunissaannik kinguneqartunik imaqarmat, aningaasartuutit taakku immikkoortinneqartunit 15,9 mio. kr.-iusunit qanoq ilillutik matussuserneqarnissaat pillugu nassuiaat sukumiisoq ataatsimiititaliamit qinnutigineqarpoq.

11. Ulloq unnuarlu paaqqinniffinni ingerlatsinermut akisussaassuseqarnermullu tunngasut kommunit Namminersornerullutillu Oqartussat akornanni qanoq agguataarniarneqarner- sut pillugit sukumiisumik nassuiaat ataatsimiititaliamit kissaatigineqarpoq.

12. § 38-imut nassuiaatinit allassimavoq "kommunip angajoqqaat aappaa tamaasaluunniit akiliuteqanngitsissinnaavai, akiliuteqarnissamik pisussaaffeqarnermi pineqartoq ataasi- akkaatigut naliliineq naapertorlugu imminut ilaquttaminullu pisariaqartitanut naleqqut- tumik inuuniaannarnissaminnik ajornartorsiuteqalersinnaappat". Oqaatsit "naleqquttu- mik inuuniaannarnissaq" aalajangersimarpalunngippallaartutut ataatsimiititaliamit isumaqarfigineqarput. Angajoqqaat qanoq ilisukkut akiliuteqartussanngortinneqanngit- soorsinnaanerat pillugu maleruagassanik ersarilluinnartunik imaqartumik Naalakkersui- sut nalunaarusiornissaat ataatsimiititaliamit kissaatigineqarpoq.

Naalakkersuisuni ilaasortap oqaatigisassaasa allassimaffiata nuutinneqarneranik ataatsimiinnerup aallartinnerani tunineqarnissani ataatsimiititaliami allatsip kissaatigaa.

 

Inussiarnersumik inuulluaqqusillunga
Inatsisartut Ilaqutariinnermut Peqqissutsimullu Ataatsimiititaliaat sinnerlugu

Ellen Christoffersen