Pisat ilaasa nalunaarutigineqarnerini naatsorsueriaatsit pillugit Namminersornerullutik Oqartussat nalunaarutaat nr. 25, 29. december 2003-meersoq.
Aalisarneq pillugu Inatsisartut inatsisaanni nr. 18-imi, 31. oktober 1996-imeersumi, kingullermik aalisarneq pillugu Inatsisartut inatsisaatigut nr. 6 20. maj 1998-imeersukkut aammalu nr. 5, 21. maj 2002-meersukkut allanngortinneqartumi, § 10, § 26, imm. 1 aamma § 33, imm. 2 malillugit aalajangersarneqarpoq:
Atuffii
§ 1. Nalunaarut kalaallit angallataannut imartami Kalaallit Nunaata aalisarnikkut oqartussaaffigisaata iluani avataanilu aalisarnissamut akuersissuteqartunut atuuppoq.
Imm. 2. Nalunaarut aamma nunat allamiut angallataannut imartami Kalaallit Nunaata aalisarnikkut oqartussaaffigisaani akuersissuteqarlutik aalisartunut atuuppoq.
Imm. 3. Nalunaarut aamma angallatinut aalisakkanit qajuusaasiorlutik nioqqutissiortunut atuuppoq.
Nassuiaatit
§ 2. "Aalisagaq ilivitsuutillugu" paasineqassaaq aalisakkap uumanermini oqimaassusaatut.
§ 3. "Pisanut naleqqiullugu tunisassiat oqimaassusiat" paasineqassaaq kisitsisitut, tunisassiap inerlugu suliarineqareersup poortuutai ilanngunnagit oqimaassusiata aalisakkat pisarineqarsimasut ilivitsuullutik oqimaassusiisa kisinnissaannut amerlisaatitut.
Pisanut naleqqiullugu tunisassiat oqimaassusaat
§ 4. Kalaallit Nunaanni Aalisarsinnaanermut Akuersissutinik Nakkutilliisoqarfimmut (KANUAANA) pisanik nalunaaruteqarnermi ilanngussami 1-imi kisitsisit pisanut naleqqiullugu tunisassiat oqimaassusaattut taaneqartut atorneqassapput.
§ 5. Ilanngussami imm. 1-imi eqqaaneqarsimanngitsunik tunisassiortoqarpat KANUANA-mut saaffiginnittoqassaaq, taakkulu tunisassiamut tassunga tunngatillugu kisitsit pisanut naleqqiullugu tunisassiat oqimaassusissaat aalajangissavaat.
§ 6. Kalaallit angallataasa imartami Kalaallit Nunaata aalisarnikkut oqartussaaffigisaata avataani aalisarneranni ilanngussami 1-imi kisitsisit pisanut naleqqiullugu tunisassianut oqimaassusiliussat atorneqassapput, nunami namminermi imaluunniit nunat tamalaat akornanni oqartussanit kisitsisinik pisanut naleqqiullugu tunisassiat oqimaassusissaannik allanik immikkut aalajangersaasoqarsimanngippat.
Pineqaatissiissutit
§ 7. §§ 4 - 6-imi aalajangersakkanik unioqqutitsinerit akiliisitsinermik imaluunniit akuersissutip arsaarinnissutigineqarneranik kinguneqarsinnaapput. Kiisalu aamma suliassat tamakkununnga tunngasut aalisarneq pillugu Inatsisartut inatsisaanni maleruagassat malillugit suliarineqartassapput.
Imm. 2. Aktiaateqarluni ingerlatseqatigiiffik, piginneqataassuteqarluni ingerlatseqatigiiffik, piginneqatigiiffik imaluunniit piginneqatigiilluni umiarsuaatileqatigiiffik unioqqutitsippat ingerlatseqatigiiffik taannaatillugu akiliisitassatut akisussaasunngortinneqarsinnaavoq.
Atuutilerfia
§ 8. Nalunaarut ulloq 1. januar 2004 atortuulerpoq. Tamatumunnga peqatigitillugu Namminersornerullutik Oqartussat nalunaarutaat nr. 46, ulloq 19. november 1990-imeersoq pisat ilaannik nalunaarusiortarnermi kisitseriaatsimi pissutsit pillugit atorunnaarsinneqarpoq.
Namminersornerullutik Oqartussat, ulloq 29. december 2003
Simon Olsen/
Amalie Jessen