Inuussutissarsiummik Ingerlataqartunik Nalunaarsuiffik (IIN) pillugu Namminersornerullutik Oqartussat nalunaarutaat nr. 22, 3. december 2003-meersoq.
Inuussutissarsiummik Ingerlataqartunik Nalunaarsuiffik pillugu Inatsisartut inatsisaanni nr. 10, 29. oktober 1999-imeersumi § 5, imm. 3, § 8, imm. 3, 4 aamma 5, § 10, imm. 2, § 12, imm. 3 aamma 4, aammalu § 14 naapertorlugit aalajangersarneqarput:
§ 1. Inuussutissarsiummik Ingerlataqartunik Nalunaarsuiffiup imarai Inuussutissarsiummik Ingerlataqartunik Nalunaarsuiffik pillugu inatsisartut inatsisaanni § 3 naapertorlugu inuussutissarsiummik ingerlataqartut imaluunniit sulisitsisut inatsisitigut immikkuullarissutut naatsorsuussat, aamma Inuussutissarsiummik Ingerlataqartunut Nalunaarsuiffik pillugu Inatsisartut inatsisaanni § 4 naapertorlugu ingerlatsiveqarfiit taakkununnga attuumassuteqartut pillugit paasissutissat tunngaviusut.
§ 2. Inuussutissarsiummik Ingerlataqartunik Nalunaarsuiffimmi inatsisitigut immikkuullarissutut naatsorsuussat pillugit paasissutissat tunngaviusut ilanngunneqassapput makku:
1) Immikkuullarissup IIN-normua kiisalu ingerlatsiveqarfiit taakkununnga attuumassuteqartut D-normui
2) ingerlanneqarnerata qanoq ittuunera,
3) piffissaq aallartiffia,
4) piffissaq atorunnaarsinneqarfia,
5) suliffeqarfiup aqqa,
6) suliffeqarfiup najugaa,
7) akisussaassuseqavillutik peqataasut aqqi qitiusumillu inunnik nalunaarsuivimmi (CPR) normui,
8) inuussutissarsiummik ingerlataqarfik saniatigullu ingerlataqarfiusinnaasut allat,
9) oqarasuaatip normua,
10) faxip normua, aamma
11) qarasaasiakkut allakkanik nassitsivissaq.
Imm. 2. Taamatuttaaq immikkuullarissup nittartagaa akiliisinnaajunnaarsimasinnaaneralu pillugit paasissutissat tunngaviusut Inuussutissarsiummik Ingerlataqartunik Nalunaarsuiffimmi paasissutissatut ilanngunneqarsinnaapput.
Imm. 3. Ingerlatsiveqarfiit pillugit Inuussutissarsiummik Ingerlataqartunik Nalunaarsuiffimmi paasissutissat tunngaviusut ilanngunneqarsinnaapput makku:
1) ingerlatsiveqarfiup D-normua,
2) ingerlatsiveqarfiup attuumassuteqarfigisaata inatsisitigut immikkuullarissutut naatsorsuussap IIN-normua,
3) piffissaq aallartiffia,
4) piffissaq atorunnaarsinneqarfia,
5) aqqa/taaguutaa,
6) najugaaa,
7) oqarasuaatip normua,
8) faxip normua,
9) qarasaasiakkut allakkatigut nassitsivissaq,
10) inuussutissarsiummik pingaarnertut ingerlataqarfik saniatigullu ingerlataqarfiusut,
11) sulisut amerlassusiat, aamma
12) pilerisaarinermut atatillugu saaffigineqartannginnissamik nalunaarut.§ 3. Kikkulluunniit inatsisitigut immikkuullarissutut nalunaarsorneqarsimasut pillugit Inuussutissarsiummik Ingerlataqartunik Nalunaarsuiffimmit paasissutissinneqarsinnaapput makkuninnga:
1) immikkuulluarissup IIN-normua aamma ingerlatsiveqarfiit taakkununnga attuumassuteqartut D-normua,
2) ingerlanneqarnerata qanoq ittuunera,
3) piffissaq aallartiffia,
4) piffissaq atorunnaarsinneqarfia,
5) suliffeqarfiup aqqa,
6) suliffeqarfiup najugaa,
7) inuussutissarsiummik ingerlataqarfik,
8) oqarasuaatip normua,
9) telefaxip normua, aamma
10) qarasaasiakkut allakkanik nassitsivissaq.
Imm. 2. Kikkulluunniit ingerlatsiveqarfiit nalunaarsorneqarsimasut pillugit Inuussutissarsiummik Ingerlataqartunik Nalunaarsuiffimmit paasissutissinneqarsinnaapput makkuninnga:
1) ingerlatsiveqarfiup D-normua,
2) ingerlatsiveqarfiup attuumassuteqarfigisaata inatsisitigut immikkuullarissutut naatsorsuussap IIN-normua,
3) piffissaq aallartiffia,
4) piffissaq atorunnaarsinneqarfia,
5) aqqa/taaguutaa,
6) najugaa,
7) oqarasuaatip normua,
8) telefaxip normua,
9) qarasaasiakkut allakkanik nassitsivissaq,
10) inuussutissarsiummik ingerlataqarfik,
11) sulisut amerlassusiat malillugu angissutsimigut inissisimaffia, aamma
12) pilerisaarinermut atatillugu saaffigineqartannginnissamik nalunaarut.
Imm. 3. Inatsisitigut immikkuullarissut akisussaassuseqavilluni peqataaffiusut pillugit, paasissutissat imm. 1-imi taaneqartut saniatigut, peqataasut aqqi paasissutissatut nalunaarutigineqarsinnaapput.
Imm. 4. Sulisorineqartut amerlassusiannut paasissutissat inuinnarnut tunniunneqarsinnaapput sulisoqatigiit amerlassusii taamaallaat taallugit. Amerlassusiliinerit atorneqassapput makku;
Sulisut amerlassusii 0
Sulisut amerlassusii 1-4
Sulisut amerlassusii 5-19
Sulisut amerlassusii 20-49
Sulisut amerlassusii 50-99
Sulisut amerlassusii 100-199
Sulisut amerlassusii 200-499
Sulisut amerlassusii 500 taakkuninngalu amerlanerit.
Imm. 5. Akisussaavilluni peqataasup nammineq najugaa, suliffeqarfiup najugaaniit allaappat, pillugu paasissutissaq inuinnarnut aatsaat tunniunneqarsinnaavoq taassuma uppernarsarsinnaappagu taamaaliornissamut ilumut pisinnaalluni.
Imm. 6. Inatsisilerinikkut immikkuullarissut imaluunniit ingerlatsiviit immikkuullarissut tigulaariffigineqarnerinut atatillugu paasissutissaq imm. 5-imi taaneqartoq inuinnarnut tunniunneqarsinnaanngilaq.
Imm. 7. Tamakku saniatigut akisussaassuseqavillutik piginnittut CPR-normui sulisorineqartullu amerlassusii pillugit pisortani oqartussat paasissutissinneqarsinnaapput. Pisortani oqartussat sullissiveqarfiillu Naatsorsueqqissaartarfimmit paasissutissanik tunngaviusunik tigusaqarsimasut ingerlatitseqqinnermi Naatsorsueqqissaartarfimmut malittarisassiarineqarsimasuni aalajangersakkat malissavaat.§ 4. Nalunaarsuiffimmit paasissutissanik tunngaviusunik inuinnarnut ingerlatitseqqinnermi ingerlatsiveqarfiit pilerisaarinermut atorneqannginnissaannik piumasaqarsimasut pillugit paasissutissat tunngaviusut tunniunneqassanngillat.
Imm. 2. Taamaattoq ingerlatitseqqittoqarsinnaavoq tigusisoq nalunaarpat uppernarsaappallu pilerisaarinermut atorneqannginnissaannik piumasaqaat ataqqiniarlugu aammalu ingerlatsiveqarfiit taamaattut pillugit paasissutissat tunngaviusut allanut tamarmiutillugit eqimattakkuutaarlugilluunnit ingerlateqqinneqassanngitsut.§ 5. Inuussutissarsiutinik Ingerlataqartunik Nalunaarsuiffimmiit paasissutissanik tigulaarinermut suugaluartumulluunniit aqutsinermut akiliutissat 650 kr.-it akilerneqassapput.
Imm. 2. Aqutsinermut akiliutissat saniatigut ingerlatsivimmut ataatsimut akilerneqassapput 1,25 kr., taamaattoq tigulaarinermut ataatsimut amerlanerpaamik 15.000 kr.-it.
Imm. 3. Tuniniaaqqinnissaq siunertaralugu paasissutissanik tigulaakkanik pisisoqarpat taakku saniatigut pisisup akilissavai tuniseqqinnermini akigititami 5 pct.-ia.
Imm. 4. Imm. 1-3-ni aalajangersakkat pisortani oqartussanut aqutsinerminni siunertanut paasissutissanik atuisunut atuutinngillat.§ 6. Suliassat annertussutsimikkut tigulaakkanit § 5-imi taaneqartunit annertunerusut pillugit allaganngorlugu piumaffiginninnikkut pissarsiniartumut Naatsorsueqqissaartarfik akissatut neqeroorusiussaaq.
§ 7. Nalunaarut atuutilerpoq ulloq 1. januar 2004.
Namminersornerullutik Oqartussat, ulloq 3. december 2003.
Hans Enoksen/
Kaj Kleist