Pisortanit pensionisiat pillugit Namminersornerullutik Oqartussat nalunaarutat nr. 19, 21. november 2003-meersoq
Pisortanit pensionisiat pillugit Inatsisartut peqqussutaanni nr. 9, 15. april 2003-meersumi § 3, imm. 2, § 20, imm. 4 aamma § 23, imm. 3 naapertorlugit alajangersarneqarpoq:
Meeqqanut tapiutit
§ 1. Peqqussummi § 12 naapertorlugu pensionisialik meeqqanut tapiutinik tunineqartalerpat tapiutit qaammatikkaartumik tunniunneqartassapput, meeqqanut akilersuutit nalinginnaasut Inatsisartut aningaasanut inatsisaatigut ukiumoortumik aalajangersarneqartartut amerlaqqataannik. Pilersuisussaatitaasut tamarmik pensionisiaqartuuppata pensionisiaqartut meeqqamut ataatsimut tamarmik immikkut meeqqanut tapiutinik tunineqartassapput.
Imm. 2. Tapiutit qaammatikkaartumik tunniunneqartassapput, pensionisiaqartoq meeqqanut akilersuutinik akilersuinermigut meeqqamut pilersuisuunngippat. Pensionisialik meeqqamut akilersuisussaatitaappat meeqqanut tapiutit ukiup affakkaartumik tunniunneqartassapput piffissaq alla akiliiffissatut isumaqatigiissutigineqarsimatinnagu imaluunniit aalajangiiffigineqarsimatinnagu. Meeqqanut akilersuutit ukiup affaanit sivikinnerusumut sivisunerusumulluunniit tunniunneqartarpata, tapiutit piffissamut tassunga tunniunneqassapput.
Imm. 3 Meeraq pensionisialimmi najugaqarani allamili najugaqarpat pensionisialillu meeqqamut akilersuisussaatitaappat aningaasat meeqqanut akilersuutinik pisussaatitaasumut tunniunneqassapput.§ 2. Pisortanit pensionisiat pillugit Inatsisartut peqqussutaanni nr. 9-mi, 15. april 2003-meersumi § 13 naapertorlugu meeqqanut tapiutinik atorunnaarsitsinissaq piumasaqaataajunnaarsimagaangat, meeqqanut tapiutit tunniunneqartarnerat piaartumik aallarteqqinneqartassaaq.
Isertitanut iluarsiissutit
§ 3. Pensionisiaqalersisitsisoqaraangat pensionisiassat amerlassusissaat naatsorsorneqartarpoq pensionisiassat saniatigut isertitassatut akileraaruteqaataasussatut naatsorsuutigineqartut allat tunngavigalugit, tassunga ilanngullugit pensionisiat, pensionisiaqalernermi isumaginninnikkut isumannaallisaaneq pillugu Nunat avannarliit isumaqatigiissutaat naapertorlugu tunniunneqarsimasut.
Imm. 2. Ukiup ataatsip ingerlanerani pensionisianik iluarsiinermi, takuuk pisortanit pensionisiat pillugit Inatsisartut peqqussutaanni nr. 9-mi, 15. april 2003-meersumi § 22, imm. 2, allannguinerup kingorna pensionisiallip isertitassatut akileraaruteqaataasussatut naatsorsuutigisai tunngavigalugit naatsorsuineq pisarpoq.
Imm. 3. Aappariit inooqatigiilluunniit isertitaannik iluarsiineq aappariit isertitaat akileraaruteqaataasussat katillugit tunngavigineqartarput, takuuk imm. 1 aamma imm. 2.§ 4. Pensionisialik nunatsinni tamakkiisumik akileraartussaatitaanngippat pensionisiallip ukiumut isertitai tamakkerlugit, pisortanit pensionisiat taamaallaat pinnagit isertitat saniatigut isertitatut ilanngunneqassapput.
Imm. 2. Pensionisialik nunatsinni tamakkiisumik akileraartussaatitaanngitsoq oqartussaasumit pensioninut tunngasunik suliamik ingerlatsisuusumit peqquneqaruni isertitani nunani allanit nunatsinniillu ukiumoortumik inaarutitut naatsorsuutikkut uppernarsassavai.
Paaqqinnittarfimmi allami najugaqarnermi pensionit tunniunneqartarnerat
§ 5. Pensionisialik isumaginninnermi ulloq unnuarlu paaqqinniffimmit allaanerusumut ulloq unnuarlu paaqqinniffimmut inissinneqarpat Pisortanit pensionisiat pillugit Inatsisartut peqqussutaanni § 23 naapertorlugu nunatsinni avataaniluunniit napparsimmavissuarmut unitsinneqarpat, nunatsinni Danmarkimiluunniit tarnikkut nappaatillit napparsimmaviannut unitsinneqartussanngorlugu pineqaatissinneqarpat imaluunniit eqqartuussuviup aalajangigaanik tigummigallarneqarpat pensionisiai allanngornagit qaammammi nuuffiusumi qaammatillu nuuffiusup tulliani tunniunneqassapput. Tamatuma kingorna pensionisiat utoqqalinersiat siusinaartumillu pensionisiat aningaasartaasa 20 %-iisut annertussussilerlugit tunniunneqartassapput.
Imm. 2. Kaasarfimmiussanik, aningaasarsiassanik imaluunniit susassaqartitsinermit akissarsiassanik pisortat oqartussaasuinit tunniussisoqassappat taakku pensionisianit ilanngaatigineqassapput, taamaattorli minnerpaamik pensionisiat 20 %-iisut annertussusilinnik pensionisialik aningaasassaqartinneqassalluni.
Imm. 3. Meeqqanut tapiutinik pisinnaatitaaneq allanngorani ingerlaannassaaq, soorluttaaq aamma pensionisialik inuit ataasiakkaat pisariaqartitaannik naliliiffigineqarnerup kingorna inummut tapiutinik pisinnaatitaasoq, tassunga ilanngullugu piffissami inissinneqarnerup nalaani inigisap piuinnarnissaanut aningaasartuutaasinnaasunut.
Imm. 4. Pensionisiat tunniunneqartassapput isertitat iluarsineqarnerisa kingorna pensionisiallip angerlarsimaffimminut angerlartinneqarneranit imaluunniit anisinneqarneranit qaammatip aallaqqaataa aallarnerfigalugu.
Naammagittaalliuuteqarsinnaaneq
§ 6. § 5-imi inatsisitigut tunngaveqarluni aalajangiinerit isumaginnittoqarfiup aqunneqarnera aaqqissuussaaneralu pillugit Inatsisartut peqqussutaanni aalajangersakkat malillugit Isumaginninnermi Naammagittaalliuuteqartarfimmut naammagittaalliuutigineqarsinnaapput.
Atortuulersitsineq
§ 7. Nalunaarut manna atortuulerpoq ulloq 1. december 2003
Imm. 2. Tamanna peqatigalugu Siusinaartumik pensionisiat aamma inummut tapiutit il. il. pillugit Namminersornerullutik Oqartussat nalunaarutaat nr. 41, 14. december 2001-imeersoq atorunnaarsinneqarpoq.
Namminersornerullutik Oqartussat ulloq 21. november 2003
Asii Chemnitz Narup/
Tabithe Kristensen