Kommunit qimmit qitsuillu pillugit ileqqoreqqusaat pillugit Namminersornerullutik Oqartussat nalunaarutaat nr. 15 ulloq 19. juni 2003-imeersoq.

 

Qimmit qimuttut kiisalu qimmeqarneq qitsuuteqarnerlu pillugit Inatsisartut inatsisaat nr. 18, 30. oktober 1998-imeersoq naapertorlugu aalajangersarneqarput:

 

Atuuffia

§ 1. Kommunit qimmit qitsuillu pillugit ileqqoreqqusaat imaqassapput aalajangersakkanik nalunaarummi matumani eqqaaneqartunut tunngassuteqartunik.
Imm. 2. Kommunalbestyrelsi najukkami pissutsit aallaavigalugit allanut tunngasunik aalajangersaasinnaavoq aalajangersakkat taakku Qimmit qimuttut kiisalu qimmeqarneq qitsuuteqarnerlu pillugit Inatsisartut inatsisaannut nr. 18-imut, ulloq 30. oktober 1998-imeersumut, taannalu naapertorlugu aalajangersakkanut, akerliunngippata.

 

Kommunit qimuttoqarfiunngitsut

§ 2. Kommunit qimuttoqarfiunngitsut qimmit qitsuillu pillugit ileqqoreqqusaat imaqassapput makku pillugit aalajangersakkanik:
1)    Taaneqassapput,
a) sumiiffinni erseqqinnerusumik taasani imaluuniit angallatini qimmeqarneq qitsuuteqarnerlu inerteqqutaanersut, aamma
b) sumiiffiit aalajangersimasut qimminut aalajangersimasunut naatsorsuussaanersut, soorlu savat qimmiinut.
2) Taaneqassapput
a) kommunimi qimmeqarnissamut qitsuuteqarnissamulluuniit immikkut akuersissuteqartoqartariaqarnersoq,
b) akuersissut taamaattoq qanoq pissarsiarineqartarnersoq,
c) akuersissut inummut tunngatitaanersoq, imaluunniit allamut tunniunneqarsinnaanersoq, aamma
d) kommunalbestyrelsi innuttaasunik annertuumik qasseeriarlutilluuniit maleruaqqusanik unioqqutitsisartunik itigartitsinissaminnut imminut periarfissaqartinnersoq.
3) Taaneqassapput qungasequtit, qimmit ilisarnaataat, aqqisa allassimaffii kiisalu piumasarineqartutut akiuussutissanik kapitissimanermut uppernarsaatit pillugit kommunalbestyrelsip piumasaqaatai.
4) Taaneqassapput
a) qimminik qitsunnillu erniortitsineq akuerisaanersoq, imaluunniit
b) pilattaanikkut nakorsaatitortitsinikkulluuniit kinguaassiorsinnaajunnaarsitsinissamik piumasaqaateqartoqarnersoq.
5) Kommunimi qimminut qitsunnullu tunngasutigut akisussaasussamik toqqaaneq pillugu aalajangersakkat, soorlu qimmeqarnermik nakkutilliisumik. Aalajangersakkatigut erseqqissarneqassapput pineqartup piginnaatitaaffii pisinnaatitaaffiilu.
6) Makku pillugit aalajangersakkat
a) qimmit pitussimajuarneqarnissaannik inerteqquteqartoqassappat tamatuminnga inerteqqut, kiisalu
b) qimmit pituutaat naannerpaagunik 5 meteriussasut.
7) Qimmit pitutaanngitsut aamma qimmit qitsuillu inuttaqanngitsut tiguneqartarnerat toqunneqartarnerallu pillugit aalajangersakkat kiisalu qimmit qitsuillu unioqqutitsilluni eqqussat pigineqartullu pillugit aalajangersakkat.
8) Qimmeqarnerup qitsuuteqarnerullu ajoqutaanerat pillugu naammagittaaliuutit suliarineqartarnerat pillugu aalajangersakkat.
9) Qimmeqarneq qitsuuteqarnerlu pillugit ileqqoreqqusat atuuttut atorunnaarsinneqarneri pillugit aalajangersakkat. 10)  Kommunimi qimmeqarneq qitsuuteqarnerlu pillugit ileqqoreqqusamik atortuulersitsinerup ullua.

 

Kommunit qimuttoqarfiusut

§ 3. Kommunit qimuttoqarfiusut qimmit qitsuillu pillugit ileqqoreqqusaat makku pillugit aalajangersakkanik imaqassapput:
1)    Taaneqassapput
a) sumiiffinni erseqqinnerusumik taasani qimmeqarnerup qitsuuteqarnerullu inerteqqutaanera,
b) sumiiffiit ukiup ilaani imermik qarsunneqartartut taamaalinerani qimmiliviussanngitsut, aamma
c) qeqertat sorliit qimmilivittut atorneqarsinnaanersut, kiisalu qaqugukkut qimmit qeqertani inissinneqarsinnaanersut.
2) Taaneqassapput
a) kommunimi qimmeqarnissamut qitsuuteqarnissamulluuniit immikkut akuersissuteqartoqartariaqarnersoq,
b) akuersissut taamaattoq qanoq pissarsiarineqartarnersoq,
c) akuersissut inummut tunngatitaanersoq, imaluunniit allamut tunniunneqarsinnaanersoq, aamma
d) kommunalbestyrelsi innuttaasunik annertuumik qasseeriarlutilluuniit maleruaqqusanik unioqqutitsisartunik itigartitsinissaminnut imminut periarfissaqartinnersoq.
3) Taaneqassapput qungasequtit, qimmit ilisarnaataat, aqqisa allassimaffii kiisalu piumasarineqartutut akiuussutissanik kapitissimanermut uppernarsaatit pillugit kommunalbestyrelsip piumasaqaatai.
4) Taaneqassapput
a) qitsunnik erniortitsineq akuerisaanersoq, imaluunniit
b) pilaanikkut nakorsaatitortitsinikkulluuniit kinguaassiorsinnaajunnaarsitsinissamik piumasaqaateqartoqarnersoq.
5) Kommunimi qimminut qitsunnullu tunngasutigut akisussaasussamik toqqaaneq pillugu aalajangersakkat, soorlu qimmeqarnermik nakkutilliisumik. Aalajangersakkatigut erseqqissarneqassapput pigineqartup piginnaatitaaffii pisinnaatitaaffiilu.
6) Immikkoortoq ataaseq nunaminertanik qimmilivissanik atugassanngortitsisarnermut tunngasoq
7) Makku pillugit aalajangersakkat
a) qimminut illuaqqiorneq ungaluukkiornerlu
b) aqqusinernut, aqqusineeqqanut illunullu il.il. qaninnerpaaffissat
c) qimmit atuarfinnut, paaqqinnittarfinnut, nerisasserivinnut assigisaannullu ajornanngippat ungasinnerpaaffissaanut pitunneqassasut,
d) pitunneqassasut illunut iserniarneq ajornarunnaarlugu, aamma
e) qimmit allap illuanut inuttaa allakkatigut akuersiseqqaartinnagu 7,5 meterinik qaninnerusumut pitunneqassanngitsut.
8) Makku pillugit aalajangersakkat
a) qimmiliviit ilusilersorneqarnissaat pillugit piumasaqaatit, tassunga ilanngullugit pituffilerfissanik qillerineq
b) piumasaqaatit qimmit minnerpaamik 3 meteriusunik pituutserlugit illugiissitaarlutik pitussimassasut imaluunniit qimmeqatigit akornanni pituuttat siaarlugu minnerpaamik 1 meterinik takissuseqarnissaannik. Qimmip ataatsip pituutaa minnerpaamik ataatsimik atuuttumik qissartoqassasoq.
c) nunaminertat atugassiissutigineqartut ipiitsuullutillu torersuussasut, aamma
d) qimmilivik piginnittup aqqanik erseqqissumik allassimasulimmik allagartalerneqassasoq.
9) Makku pillugit aalajangersakkat,
a) qimmit naartusut sarlialluunniit kiisalu qimmiaqqat inaat imaluunniit taamaattoqarpat ungaluukkat qanoq ilusilersorneqassanersut, aamma makku pillugit
b) arnavissat naartusut sarliallu ima pitussimassasut ajornanngitsumik qimmit inaannut isersinnaanngorlutik.
10)  Makku pillugit aalajangersakkat
a) kommunalbestyrelsi qimminik angalaaginnartunik, qimminik qitsunnillu inuttaqanngitsunik, kiisalu qimminik qitsunnillu unioqqutitsinikkut eqqussanik pigineqartunillu toqutsipallattassanersoq imaluunniit tigoriarlugit inuttassarsiuussisassanersoq.
11) Makku pillugit aalajangersakkat
a) Qimmiuteqarnerup qitsuuteqarnerullu ajoqutaaneri pillugit naammagittaaliuutit suliarineqartarnerannut aalajangersakkat.
12) Qimmeqarneq qitsuuteqarnerlu pillugit ileqqoreqqusat atuuttut atorunnaarsinneqarneri pillugit aalajangersakkat.
13)  Kommunimi qimmeqarneq qitsuuteqarnerlu pillugit ileqqoreqqusamik atortuulersitsinerup ullua.

 

Atuutilersitsineq pillugu aalajangersakkat

§ 4. Nalunaarut atuutilerpoq ulloq 1. januar 2004.
Imm. 2. Peqatigalugu Kommunit qimmit qitsuillu pillugit ileqqoreqqusaat pillugit Namminersornerullutik Oqartussat nalunaarutaat nr. 7, 14. juni 1999-imeersoq atorunnaarsinneqarpoq.

Namminersornerullutik Oqartussat, ulloq 19. juni 2003

Finn Karlsen

/

Jørgen Peter Labansen