Ilinniartitsisussanik ilinniartitsineq siammartitaq pillugu Namminersornerullutik Oqartussat nalunaarutaat nr. 8, 24. april 2003-meersoq.
Meeqqat atuarfianni ilinniartitsisussanik ilinniartitsineq pillugu Inatsisartut peqqussutaanni nr. 2-mi 2. maj 1996-imeersumi § 10, imm. 2, §14, imm. 5 aamma § 16, Inatsisartut peqqussutaatigut nr. 2-kkut 31. maj 2001-imeersukkut allannguuteqartinneqartut tunngavigalugit aalajangersarneqarpoq:
Kapitali 1.
Ilinniarnerup imaa
Ilinniarnerup aaqqissuussaanera§ 1. Ilinniarneq ukiunik sisamanik affarmillu sivisussusiligaavoq semesterinilu qulingiluani ingerlanneqartassalluni.
Imm 2. Ukiut ilinniarfiusut siulliit marluk affarlu Kalaallit Nunaanni meeqqat atuarfianni timelæreritut sulinertut, aammalu nammineq ilinniarnertut, ataatsimoorussilluni ingerlassaqar-fittut, pikkorissarfitsigut kiisalu suliffimmik misiliinikkut aaqqissuunneqarpoq.
Imm. 3. Ukiut marluk affarlu ilinniarnerup kingornatigut ilinniartoq ilinniartitsisussanik ilinniartitsinermi katersuutsitami ilinniakkani nangissanerlugit aalajangersinnaavoq.
Imm. 4. Ukioq ilinniarfik kingulleq ilinniartitsinermi katersuutsitami ingerlanneqassaaq.§ 2. Atuartitsissutinik annerusumik sammisassanik (liniefag), atuartitsissutinik toqqagassanik aammalu atuartitsissutinik neqeroorutigineqarsinnaasunik pilersitsinissami piumasarineqarpoq ilinniartut ikinnerpaamik tallimat nalunaarsimanissaat, taamaattorli immikkut pisoqartillugu rektorip tamanna immikkut akuersissutigisinnaavaa.
Ilinniarnermi ilinniagassat aaqqissuussaanerat
§ 3. Rektorip ilinniagassat aaqqissuunnerata minnerpaamik makkuninnga imaqartussap suliarinissaa qulakkiissavaa
1) atuartitsissutit ataasiakkaat, pikkorissarnerit, ullut suliffimmik misiliivissat, naammassiniagaqarluni suliassat kiisalu allattariarsorluni suliassat tunniutassat, nalunaarusiat immikkullu sammisat (speciale) imassaannik soraarummeerutissartaannullu ilitsersuutinik kiisalu tamakkua ilinniarnerup ingerlanerani qanoq inissinneqarnerinik,
2) soraarummeernermi allattariarsorluni suliat, nalunaarusiat immikkullu sammisat tunniunneqartarnissaat pillugu maleruagassanik, tamatumunnga ilanngullugu ilinniartut ataasiakkaarlutik suleqatigiikkuutaarlutilluunniit tunniussisassanersut,
3) ilinniarnerup ingerlanerani misilitsittarnissat allaaserinerannik kiisalu tamakkua ilinniarnerup ingerlanerani qanoq inissinneqarnerinik,
4) misilitsinnerit qanoq iluseqartarnerisa allaaserinerannik,
5) takussutissamik misilitsinnerni suni karakteeriliisoqartarneranut, aamma misilitsinnerni suni naliliisoqartarnersoq "angusivoq", "angusinngilaq", imaluunniit "akuerineqarpoq" "akuerineqanngilaq" atorlugit naliliisoqartarnersoq,
6) "angusivoq"/"angusinngilaq" aamma "akuerineqarpoq"/"akuerineqanngilaq" atorlugit nali-liinerni pissutaasunut ilaasartunik, ilanngullugit tamakkuninnga naliliissagaanni piumasaqaatit erseqqinnerusut,
7) iliuutsit suut suliffimmi misiliinermik naliliinissami suliffimmi misiliiffiusumut ingerlasussat erseqqissarnerat.
8) napparsimalluni soraarummeertarnissaat misilitseqqittarnissaallu pillugit maleruagassanik
9) atuaqatigiit ilinniartut nalunaarsimasut qassiuneri tunngavigalugit avinneqartarnissaat kattunneqartarnissaallu pillugit maleruagassanik, aamma
10) ilinniakkanik aallussinermut malittarisassat, kiisalu ilinniagaqartut ilinniagaqarfinnit atuarunnaarsinneqartarnissaannut piumasaqaatit
Imm. 2. Ilinniarnerup aaqqissuunnera Ilinniarfissuup ilinniarnerup aaqqissuunnerani aalaja-ngersakkanit immikkut akuersissuteqarfigineqarnissaanut inatsisitigut tunngavigineqartunik imaqarsinnaavoq.
Imm. 3. Ilinniarnerup aaqqissuunnera Ilinniartitaanermut Pisortaqarfimmit akuersissutigineqassaaq.
Imm. 4. Ilinniagassat aaqqissuussaanerat taakkualu allannguutaat pingaarnerusut ukiup ilinniarfiusup aallartinnerani atortuulertassapput.
Qulliunerusumut ingerlaqqinneq aamma ilinniarnermik unitsitamik nangitseqqinneq
§ 4. Semesterip tullianut ingerlaqqinnissaq taamaallaat pisinnaavoq ilinniakkanik aallussineq rektorimit akuerineqarsimappat.
Imm. 2. Ukiup aappaanut ingerlaqqissagaanni piumasarineqarportaaq misilitsinnermi, pin-ngortitanut tunngasunut mernguernartunullu "angusivoq" naliliunneqarsimappat, tak. § 40, imm. 1, nr. 3 aamma nr. 6.
Imm. 3. Suliffimmik misiliinerit angusiffigineqarsimassapput ilinniagaqartoq ilinniarnerup sinnerani peqataasinnaassappat, tak. § 44.
Kapitali 2.
Atuartitsissutit aaqqissuussaanerat§ 5. Atuartitsissutini pinngitsoorani ilinniartariaqartuni fagini ataasiakkaani nal. ak. atuartitsiviusut imatut agguataarneqarput:
1) Atuartitsissutit perorsaanermut tunngasut, immikkut sammisaq ilanngullugu nal. ak. atu. 560. 2) Kalaallit oqaasii, ataatsimoorussassaq nal. ak. atu. 280. 3) Pinngortitalerinermut tunngasut nal. ak. atu. 56. 4) Ilinniartitsissutit paasissutissiiviusut nal. ak. atu. 224. 5) Kristumiussuseq nal. ak. atu. 56. 6) Mernguernartut I nal. ak. atu. 112. Imm. 2. Atuartitsissutit toqqagassat danskit oqaasii, tuluit oqaasii aamma kisitsineq /matematik neqeroorutigineqassapput atuartitsissutini tamani nal. ak. atuartitsiviusut 224-nngorlugit. Atuartitsissutit toqqagassat ilusilersuineq, illumi suliassat, assassorneq/ammerineq, timersorneq, erinarsorneq/nipilersorneq aamma qisunnik sananeq neqeroorutigineqassapput atuartitsissutini tamani nal. ak. atuartitsiviusut immikkut 168-inngorlugit. Atuartitsissut toqqagassaq fysik/kemii neqeroorutigineqassaaq nal. ak. atuartitsiviusut 112-inngorlugit.
Imm. 3. Atuartitsissutit annerusumik sammisassat neqeroorutigineqassapput atuartitsissutini tamani nal. ak. atuartitsiviusut immikkut 280-inngorlugit.
Imm. 4. Atuartitsissutit neqeroorutigineqarsinnaasut neqeroorutigineqassapput atuartitsissutini tamani nal. ak. atuartitsiviusut immikkut 56-inngorlugit.
Imm. 5. Semesterini tallimani siullerni atuarfimmi suliffimmik misiliineq aaqqissuunneqassaaq semesterini tamani nal. ak. atuartitsiviusut katillugit 40-nngorlugit sapaatit akunnerisa arfineq-pingasut ingerlaneranni sap. akunneranut katillugit nal. ak. atuartitsiviusut tallimanngorlugit. Semesterit arfernanni arfineq-aappaannilu atuarfimmi suliffimmik misiliineq aaqqissuunneqassaaq semesterini tamani nal. ak. atuartitsiviusut 30-nngorlugit, sap. akunnerisa arfinillit ingerlaneranni sap. akunneranut nal. ak. atuartitsiviusut tallimanngorlugit. Ilinniartup qitiusumik ilinniartitaanermi ilinniarnini nangeqqikkuniuk, tak. § 1, imm. 3-4, piffissat suliffimmik misiliiffiusut ilinniartitsisussanik ilinniartitsineq katersuutsitaq pillugu nalunaarut naapertorlugu aaqqissuunneqassapput.
Imm. 6. Timelæreritut sulinermi ukiumut atuarfiusumut ataatsimut akunnerit namminersuutigalugu atuartitsiviusussat 320 - 480-iupput.
Imm. 7. Nal. ak. atuartitsiviusoq ataaseq tassaavoq minutsini 45-ni atuartitsivik.
Imm. 8. Naalakkersuisut misiliinermut atatillugu aalajangerput atuartitsissutit pinngortitalerinermut tunngasut atuartitsissutissatut pinngitsoorani ilinniartariaqartutut inissinneqassasut aammalu timersorneq kiisalu fysik/kemilu atuartitsissutissatut toqqagassatut inissinneqassasut, tak. Meeqqat atuarfianni ilinniartitsisussanik ilinniartitsineq pillugu Inatsisartut peqqussutaanni § 17.
Imm. 9. Ilinniartitaanermut Pisortaqarfik immikkut pisoqartillugu imm. 1-6-imi aalajangersakkanit immikkut akuersissuteqarsinnaavoq.§ 6. Ilinniartitsissut toqqagassaq aamma ilinniartitsissut annerusumik sammisassaq taakkuninnga atuartitsilernissaq sioqqullugu ilinniartumit toqqarneqassapput. Atuartitsissutinik allan-ngortitsisoqassappat tamanna pissaaq atuartitsinerup aallartinnerata kingornagut kingusinnerpaamik sap. akunneri sisamat qaangiutsinnagit.
Imm. 2. Atuartitsissutit neqeroorutigineqarsinnaasut atuartitsissutinik taakkuninnga atuartitsinissat aallartinnissaat sioqqullugu toqqarneqassapput.§ 7. Rektorip, immikkut pisoqartillugu, ilinniartoq atuartitsissutini § 5-imi taaneqartuni ataatsimi arlalinniluunniit atuartitaanngitsoortissinnaavaa.
§ 8. Atuartitsissutinik annerusumik sammisassanik kalaallit oqaasiinik, danskit oqaasiinik, tuluit oqaasiinik, kisitsinermik/matematikkimik aamma fysik/kemimik ilinniartussatut tiguneqarnissamut piumasarineqarpoq atuartitsissutini taaneqartuni kingullermik atuarfigisami semesterit tallimaanni minnerpaamik 6-imik karakteereqarsimanissaq.
Kapitali 3.
Atuartitsissutit ataasiakkaat siunertaat
Atuartitsissutit pinngitsoorani ilinniartariaqartut§ 9. Atuartitsissutit perorsaanermut/ilinniartitsinermut tunngasut siunertaraat ilinniartut atu-artitsissummik suliaqarnerminni inuttut ineriartornerannik siuarsaanissaq, ilinniartullu ilisimasaqalernissaat aamma paasisimasaqarnerujartorlutillu piginnaanngoriartornerunissaat:
1) perorsaanermi/ilinniartitsinermi tarnillu pissusiinik ilisimaqqaagassanik (teorier) atuinissamut,
2) ilinniartitsisutut sulinermik, sulinermi atugarisanik aamma ilinniarnerup ingerlannerani avataanilu periarfissanik paasiniaanissamut nalilersuisarnissamullu,
3) ilaqutariinnermi, atuarfimmi inuiaqatigiinnilu pissutsit allanngorarneranni meeqqanik inuusuttunillu atuartitsinermik allaaserinninnissamut, pilersaarusiortarnissamut, aaqqissuisarnissamut aamma nalilersuisarnissamut,
4) ilinniartitaaneq perorsaanerlu pillugit apeqqutinut tunngavilimmik isummertarnissamut,
5) atuartumut atuaqatigiinnullu siunertalimmik ilitsersuisarnissamut,
6) atuaqatigiinnik, suleqatinik, angajoqqaanik, atuarfimmik isumaginninnermilu oqartussaasunik suleqateqartarnissamut aamma
7) perorsaanermik, atuartitsinermik ilinniartitaanermillu ineriartortitsinermut nutaanngorsaanermullu ikiuunnissamut.
Imm. 2. Ukiut ilinniarfiusut naggataanni perorsaanikkut immikkut sammisamik ilinniagaqartut suliaqartinneqassapput. Immikkut sammisakkut tassuuna siunertarineqarpoq ilinniagaqartut immikkut sammisamik namminersorlutik suliaqarnertik aqqutigalugu ilinniartitaanerup perorsaanikkut, tarnip pissusiinut inooqatigiinnermullu tunngasutigut imarisai pillugit itinerusumik paasisimasaqalernissaat, atuartitsinermi sulinermilu periaatsinut suliamillu misiliinermut ataqatigiissaagaasumik.§ 10. Kalaallit oqaasiinik ataatsimoorutassanik meeqqat atuarfianni ilinniartitsinermi siunertaavoq ilinniartut ilinniarnerup ingerlanerani pinngitsoorani peqataaffigisassami atuartitsinissamut pikkorissarnissaat makkununnga pisinnaalernermikkut:
1) Saqqummiisinnaanermik allaatiginnittarnermillu sungiusarnikkut atuartitsissummik ilinniartitsinermi periaatsinut allanngorartunut.
2) Oqaasertanik allanngorartunik paasiniaasarnikkut misissuinikkullu allanneqaqqaarfiinik nutsikkanillu paasinninnissamut.
3) Atuakkatigut oqaatsinillu atuinermut sungiusarnikkut oqaatsit qanoq katitigaallutillu atorneqartarnerannik ilisimasaqarlualernermut.
4) Oqaatsinik ilisimasaqalernissamut taamalu paasisaqarnissamut atuartitsissutip atuarfimmi inuiaqatigiinnilu immikkut ittumik inissisimaneranut.
5) Atuartitsissutip ilitsoqqussaralugu oqaatsit allallu oqaasii atorlugit ilinniartitsinissamut pisinnaassuseqalernermut.
6) Atuartitsissummik ilinniartitsinermi iluaqusersuutinik ilisimasaqalernermut.
7) Atuartitsissutip atuartitsissutiginerani periaasissanik paasisimasaqalernermut.§ 11. Atuartitsissutinik pinngortitalerinermut tunngasunik ilinniartitsinermi siunertaavoq ilinniartut uumasulerinermik, nunalerutinik, fysikimik kemiimillu tunngaveqartumik ilinniartitaanikkut:
1) Pinngortitamut nalinginnaasumik paasinninnissamut ilisimasatigut pikkorissutsikkullu tunngavissaqalersinniarnissaat.
2) Pinngortitaq pillugu isummanik assigiinngitsunik paasisimasaqalersinniarnissaat.
3) Pinngortitami uumasumi uumaatsumilu nukiit, allanngoriartortarnerit, sananeqaatit nunarsuullu ukiup ingerlanerani allanngorarnerisa imminnut ataqatigiinnerannik paasisimasaqalersinnissaat.
4) Pisuussutit, teknikip, nioqqutissiornerup avatangiisillu, tamakkununnga ilanngullugit soqutigisat assigiinngitsut pinngortitap inuiaqatigiillu ineriartornerannut atasut, imminnut ataqatigiinnerannik paasisimasaqalersinnissaat.
5) Pinngortitamik laboratoriani atuartitsissutit periaasiinik ikiuutissaannillu atuinikkut misissuinermut pikkorissarnissaat.§ 12. Atuartitsissutini paasissutissiiviusuni siunertarineqarpoq ilinniartut uumassusilerinermik, nunalerutinik, nalerput pillugu ilisimasassanik nassuiaanermik oqaluttuarisaanermillu tunngaveqartumik ilinniartitaanikkut meeqqat atuarfianni ilinniarnerup ingerlanerani pinngit-soorani peqataaffigisassami atuartitsinissamut pikkorissarnissaat
1) Pinngortitanut, inunnut tunngasunut aamma inuiaqatigiinnut tunngasutigut oqaluuserisassatut toqqakkat oqaluuserineqartarnissaanni atuarsimanikkut tunngavissaqalernissamut piginnaanngornissamullu.
2) Atuartitsissutinik tamakkuninnga atuartitsissutinillu allanik atuartitsinermi atortussanut tamakkualu qanoq atornissaannut.
3) Atuartitsissutini aalajangersimasuni atuartitsinermi periaatsinik paasisimasaqalernissamut atuartitsinerullu aaqqissuunnissaanut ingerlanneqarneranullu tunngavissaqarlualernissamut.§ 13. Kristumiussutsimik atuartitsissummi siunertarineqarpoq ilinniartut meeqqat atuarfianni atuarnerup ingerlanerani pinngitsoorani peqataaffigisassami atuartitsinissamut pikkorissarnissaat:
1) Testamentitoqqamut pingaartumillu Testamentitaamut tunngasunik oqaluuserisassatut toq-qakkat oqaluuserineqartarnissaanni atuarsimanikkut tunngavissaqalernissamut piginnaan-ngornissamullu.
2) Atuartitsissutit taakkua imminut ilisarilersitsisinnaanerannik paasinninnissamut kiisalu atuartitsissutit taakkua kulturikkut inuiaqatigiinnermullu pingaarutaannik ilisimasaqalernissamut.
3) Atuartitsissutip atuartitsissutiginissaanut atortussanik atuartitsissutigineranilu periaatsinik kiisalu atuartitsissutinut tunngasutigut periaaseqarnikkullu ilisimalluagassanik ilisimasaqalernissamut.§ 14. Mernguernartut I-imik atuartitsissummi siunertarineqarpoq ilinniartut ilusilersuinermik, timersornermik, nipilersornermik, assassornermik aamma/imaluunniit qisunnik sananermik suliaqarneq aallaavigalugit
1) Kusanartuliornermut tunngasunik paasisimasaqalernissaat.
2) Meeqqat atuarfianni atuartitsissutinik allanik atuartitsinermi suleriaatsinik pilersitsissutaasinnaasunik atuinissamut pikkorissunngornissaat.
3) Isiginnaagassianik (pissanganarsakkanik) suliaqartarnissamut tunngavissaqalersinnissaat.
4) Ilinniarnermi ingerlatassat ilaattut assassornikkut eqqumiitsuliornikkullu suliaqarsinnaanermut meeqqap pisariaqartitaanik paasisimasaqalersinnissaat.
Atuartitsissutit qinigassat
§ 15. Danskit oqaasiinik atuartitsissummi siunertarineqarpoq ilinniartut ilinniarnerup ingerlanerani meeqqat atuarfianni pinngitsoorani peqataaffigisassami atuartitsinissamut pikkorissarnissaat makkununnga:
1) Danskit oqaasiinik oqalunnermi allannermilu atorneqartunik paasinnilluarsinnaalernissamut namminnerlu oqaatsinik taakkuninnga ajunngitsumik oqalussinnaalernissaannut allassinnaalernissaannullu.
2) Danskit oqaasiinik kiisalu danskisut naqitanik naqitaanngitsunillu oqaasilerisinnaalernissamut naliliisinnaalernissamullu.
3) Atuartitsissutip suleriaasiinut ilinniagassartaasigut atuartitsissutigeriarnissaannilu eqqarsaatigilluagassartaanut paasisimasaqalernissamut.§ 16. Tuluit oqaasiinik atuartitsissummi siunertarineqarpoq ilinniartut ilinniarnerup ingerlanerani meeqqat atuarfianni pinngitsoorani peqataaffigisassami atuartitsinissamut pikkorissarnissaat makkununnga:
1) Tuluit oqaasiinik oqalunnermi allannermilu atorneqartunik paasinnilluarsinnaalernissamut namminnerlu oqaatsinik taakkuninnga ajunngitsumik oqalussinnaalernissaannut allassinnaalernissaannullu.
2) Tuluit oqaasiinik kiisalu tuluttut naqitanik naqitaanngitsunillu oqaasilerisinnaalernissamut naliliisinnaalernissamullu.
3) Nunarsuarmi tuluit oqaasiinik atuiffiusuni piorsarsimassutsimut inuiaqatigiillu inuunerannut tunngasunik ilisimasaqalernissamut.
4) Atuartitsissutip ikiuutaanik, suleriaasiinik atuartitsissutigeriarnissaanilu eqqarsaatigilluagassartaannik pigiliussilluarnissamut.§ 17. Kisitsineq/matematikkimik atuartitsissummi siunertarineqarpoq ilinniartut ilinniarnerup ingerlanerani meeqqat atuarfianni pinngitsoorani peqataaffigisassami atuartitsinissamut pikkorissarnissaat:
1) Atuartitsissutip tunngaviusumik taamaattuusorisaanerinik (teorier), suussusiinik suleriaasiinillu paasisimasaqalernikkut.
2) Matematikkimik ilinniarnermi isummanik assigiinngitsunik matematikkimillu ilisimasassanik pigiliussinissaq pillugu isummanik ilisimasaqalernikkut.
3) Atuartitsissutip imaasa, suleriaatsit suussutsillu matematikkimut tunngasut tapersersoqatigiittarnerannik nalilersuilluarsinnaalernikkut.
4) Atuartitsissutip atuartitsissutiginissaanut atortussanik tamakkulu atorlugit atuartitsinermi periaatsinik ilisimasaqalernikkut.§ 18. Ilusilersuinermik atuartitsissummi siunertarineqarpoq ilinniartut, ilinniarnerup ingerlanerani pinngitsoorani peqataaffigisassami meeqqat atuarfianni atuartitsinissaq siunertaralugu, aamma atuartitsissutip atuarfimmi suliat nalinginnaasut suliarineqarneranni atornissaa eqqarsaatigalugit, makkuninnga ilikkartinnissaat:
1) Ilinniagassat assigiinngitsut pillugit tunngaviusumik ilisimasassanik.
2) Atuartitsinissamut pilersaarusiornermik, atuartitsinermik ingerlatsinermik nalilersuinermillu.
3) Marlunnik pingasunillu sammivilinnik ilusilersuisinnaanermik aammalu ilusilersuinermik piginnaasarilikkat oqaatiginiakkatut nalunaarutitullu atorneqarsinnaanerannik.
4) Atuartitsissutip atuarfimmi perorsaanermut tunngatillugu periarfissaanik.§ 19. Illumi suliassanik atuartitsissummi siunertarineqarpoq ilinniartut makkuninnga ilikkartinnissaat:
1) Atuartitsinissamut pilersaarusiornermik, atuartitsinermik ingerlatsinermik nalilersuinermillu.
2) Atuartitsissutip sammisassartaasa iluanni suliassanik suliarinnissinnaanermik tunngavissaasutigullu ilisimasassanik.
3) Nerisassat inuussutissaqarluartut eqqiluisaarluarnerullu pingaassusiinik paasinninnermik.
4) Atuartitsissutip perorsaanermut tunngasutigut periarfissaanik.§ 20. Assassornermik/ammerinermik atuartitsissummi siunertarineqarpoq ilinniartut makkuninnga ilikkartinnissaat:
1) Suliassanik suliarinnissinnaalernermik aamma ilinniagassat assigiinngitsut pillugit tunngaviusumik ilisimasassanik.
2) Atuartitsinissamut pilersaarusiornermik, atuartitsinermik ingerlatsinermik nalilersuinermillu.
3) Atuartitsissutip perorsaanermut tunngasutigut periarfissaanik.§ 21. Timersornermik atuartitsissummi siunertarineqarpoq ilinniartut makkuninnga ilikkartinnissaat:
1) Atuartut timikkut, anersaakkut inooqataassutsikkullu ineriartornissaat pingaartillugu suliniutinik suliarinnissinnaalernermik aamma tunngavissaasutigut ilisimasassanik.
2) Atuartitsissutip perorsaataasinnaaneranik atuartitsissummilu suleriaasissanik kiisalu timersornermik atuartitsissutip atuartitsissutiginissaanut pilersaarusiornermik, atuartitsinermik ingerlatsinermik nalilersuinermillu.
3) Atuartitsissutip atuarfimmi inuiaqatigiinnilu sulissutigeqqinnissaanut soqutiginninnermik kajumissuseqarnissamillu, tamakkulu aqqutigalugit atuartunik timersornermut soqutiginnittuaannartunngortitsiniarnissamik.§ 22. Erinarsornermik/nipilersornermik atuartitsissummi siunertarineqarpoq ilinniartut erinarsorneq nipilersuutinillu atuineq aqqutigalugit makkuninnga ilikkarnissaat:
1) Nipilersornermut tunngasutigut paasisimasassanik.
2) Tunngavissaasutigut teknikimullu tunngasutigut ilisimasassanik.
3) Atuartitsissutip atuartitsissutiginerani periaasissanik.§ 23. Qisunnik sananermik atuartitsissummi siunertarineqarpoq ilinniartut makkuninnga ilikkarnissaat:
1) Assassorluni sulinermi suleriaatsinik, aamma misilittagaqalernissaat kiisalu nutaanik pilersitsisinnaanerminnik sananermullu pisinnaassutsiminnik ineriartortitsisinnaanermik.
2) Suleriaatsitigut ilinniartitsinermilu ilisimasassanik.
3) Assassorluni sulinermik nuannarisaqarnermik.
4) Nammineersinnaanermik misileraasarnikkullu paasiniaasarnermik.
Atuartitsissutit annerusumik sammisassat
§ 24. Kalaallit oqaasiinik atuartitsissummi siunertarineqarpoq ilinniartut:
1) Atassuteqaqatigiittarnermut tunngasutigut suliaqarsinnaalernissaat.
2) Kalaallit oqaasii atorlugit suliaqarsinnaalernissaat.
3) Sulinermi kalaallisut atuakkianik atuisinnaalernissaat..
4) Allanit ikiorneqarnatik oqalullutik allallutillu oqaatiginiakkaminnik oqaatiginnilluarsinnaalernissaat.
5) Inuit oqaasiinik atuakkiaannillu ilisimasaqalersinnissaat.
6) Atuartitsissutip atuartitsissutiginerani periaasissanik paasisimasaqalernissaat, tamatumun-nga ilanngullugu allamiut oqaasiinik ilisimasaqalernissaat, taamaalillutik atuartitsissummik atuartitsisinnaaleqqullugit ilinniarnerup ingerlanera tamakkerlugu.§ 25. Danskit oqaasiinik atuartitsissummi siunertarineqarpoq ilinniartut:
1) Atassuteqaqatigiittarnerit assigiinngitsut ilusaannik namminneerlutik suliarinnissinnaalerlutillu nalilersuisinnaalernissaat.
2) Atuartitsissutip kultureqarnermut inooqatigiinnermullu tunngasut ataqatigiinneranni inissisimaneranik paasinninnissaat.
3) Allanit ikiorneqaratik oqalullutik allallutillu oqaatiginiakkaminnik oqaatiginnilluarsinnaalernissaat.
4) Atuartitsissutip atuartitsissutiginerani periaasissanik paasisimasaqalernissaat, taamaalillutik ilinniartut atuartitsissummik atuartitsisinnaaleqqullugit ilinniarnerup ingerlanera tamakkerlugu.§ 26. Tuluit oqaasiinik atuartitsissummi siunertarineqarpoq ilinniartut:
1) Sammisassat assigiinngitsut iluanni atassuteqaqatigiittarnerit assigiinngitsut ilusiinik namminneerlutik paasiniaaqqissaarsinnaalerlutillu nalilersuisinnaalernissaat.
2) Oqalullutik allallutillu oqaatiginiakkaminnik oqaatiginnilluarsinnaalernissaat.
3) Tuluttut oqaluttartut kulturianni pingaarutilinnut assigiinngitsunut ilisimasaqalernissaat.
4) Atuartitsissutip atuartitsissutiginerani periaasissanik paasisimasaqalernissaat, taamaalillutik atuartitsissummik atuartitsisinnaaleqqullugit meeqqat atuarfianni klassini tamani.§ 27. Kisitsinermik/matematikkimik atuartitsissummi siunertarineqarpoq ilinniartut:
1) Matematikkimut tunngasutigut ilisimasariaqartunik pingaarnernik aamma matematikkip perorsaanermut/ilinniartitsinermut tunngasortaanik ima annertutigisumik paasisimasaqalernissaat, ilisimasariaqartut tamakku imminnut tapersersoqatigiilersillugit imminnullu paasinarsaaqatigiilersillugit. Sammisassanik suleriaasissanillu qinersineq tunngaveqartinneqassaaq meeqqat atuarfianni atuartitsissummik taassuminnga atuartitsinermik atuartitsissutillu taassuma oqallisigineqartarneranik.
2) Atuartitsissutip aaqqissuussaaneranik eqqarsarsinnaassutsimillu atuinissamik ilisimasaqalersinnissaat.
3) Matematikkimik paasisimasaqalernissamut matematikkimillu paasinnittarnernik assigiin-ngitsunik ilisimasaqalernissaat, tamatumunnga ilanngullugu matematikkimi paasisimasariallit imaasa suliarineqartarnerisalu tapersersoqatigiittarnerat pillugu apeqqutinik nammin-neerlutik paasiniaaqqissaarsinnaalernissaat isummerfiginnittarsinnaalernissaallu.
4) Atuartitsissutip atuartitsissutiginerani periaasissanik paasisimasaqalernissaat, taamaalillutik ilinniartut regningimik/matematikimik atuartitsisinnaaleqqullugit ilinniarnerup ingerlanerani tamarmi.§ 28. Fysik/kemimik atuartitsissummi siunertarineqarpoq ilinniartut:
1) Sammineqarsinnaasunik immikkut toqqakkanik, inuiaqatigiinnermut ullutsinni pingaaruteqartunik paasisimasaqalernissaat.
2) Fysikimi kemimilu tunngaviusumik isummiussanik, paasisimasarialinnik suleriaatsinillu paasisimasaqalernissaat.
3) Misileraalluni sulisinnaanngornissaat sulianillu nalilersuisinnaanngornissaat, kiisalu tamakkuninnga suliaqarnermi isumannaallisaanermut avatangiisinullu tunngasutigut ajornartorsiutaasartunik ilisimasaqalernissaat.
4) Atuartitsissutip atuartitsissutiginerani periaasissanik paasisimasaqalernissaat, taamaalillutik atuartitsissummik taassuminnga atuartitsisinnaaleqqullugit ilinniarnerup ingerlanerani ta-marmi.§ 29. Nunalerutinik atuartitsissummi siunertarineqarpoq ilinniartut:
1) Nunap sananeqaataanut tunngasunik ilisimasaqarnissaat kiisalu ilinniagassanik nunanut aamma inuit taakkualu suliarisartagaannut tunngasunik, inuit nunarsuup ilaani assigiinngitsuniittut atugarisaannik paasiniaalluarnerusalernissamut tunngavissaqalersitsisussanik, nunat assigiinngitsut atassuteqaqatigiittarnerannut kiisalu pisuussutit, nioqqutissiornerup avatangiisillu nunani ataasiakkaani nunanilu assigiinngitsorpassuarni imminnut ataqatigiinnerannut tunngasunik paasisimasaqalernissaat.
2) Atuartitsissutip qangaaniilli nunanik allanik ilisimasaqalissutissatut inuiaqatigiillu akornanni paaseqatigiissutaalissutissatut atortuuneranik nalinginnaasumillu ilisimasaqalissutaasinnaaneranik paasisimasaqalernissaat.
3) Atuartitsissummi najoqqutassaqarfinnik sanileriissitsisarnikkut avatangiisinillu inunnit pi-lersitaanngitsunik aamma kulturip pilersitaanik misissuisarnikkut paasiniaalluarsinnaalernissaat nunanik assigiinngitsunik tamakkunanilu ajornartorsiutaalersartunik.
4) Atuartitsissutip atuartitsissutiginerani periaasissanik paasisimasaqalernissaat.§ 30. Uumassusilerinermik atuartitsissummi siunertarineqarpoq ilinniartut:
1) Sammineqarsinnaasunik immikkut toqqakkanik ullumikkut pingaaruteqartunik paasisimasaqalernissaat.
2) Uumassusilerinermi isummiussanik, paasisimasarialinnik suleriaatsinillu paasisimasaqalernissaat.
3) Misileraalluni sulisinnaanngornissaat sulianillu nalilersuisinnaanngornissaat, kiisalu tamakkuninnga suliaqarnermi isumannaallisaanermut avatangiisinullu tunngasutigut ajornartorsiutaalersartunik ilisimasaqalernissaat.
4) Atuartitsissutip atuartitsissutiginerani periaasissanik paasisimasaqalernissaat, taamaalillutik atuartitsissummik taassuminnga atuartitsisinnaaleqqullugit ilinniarnerup ingerlanerani ta-marmi.§ 31. Oqaluttuarisaanermik atuartitsissummi siunertarineqarpoq ilinniartut:
1) Oqaluttuarisaanermik atuartitsissutillu taassuma immikkut issusianik ilisimasaqalerlutillu paasisaqarnissaat atuartitsissutillu atuartitsissutiginerani suleriaatsinik paasisimasaqalernissaat.
2) Ukiut ullullu, inuiaat nunallu assigiinngitsut, inuiaqatigiinni pissutsit kulturimullu tunngasut pillugit assigiinngitsunik arlalinnik Kalaallit Nunaanni pissutsit pingaarnerutillugit suliaqartarnikkut ilisimasaqalerlutik paasinninnissaat.
3) Oqaluttuarisaanermi allaaserineqartut pillugit apersuilluarsinnaalernissaat tunngaveqartumillu akissutinik isumasisinnaalernissaat.
4) Atuartitsissutip atuartitsissutiginerani periaasissanik paasisimasaqalernissaat.§ 32. Atuartitsissummi inuiaqatigiilerinermi siunertarineqarpoq ilinniartut:
1) Inuiaqatigiinni kalaallini inuiaqatigiinnilu allani inooqatigiinnermut, aningaasarsiornermut naalakkersuinermullu tunngasunik paasisimasaqalernissaat kiisalu paasiniaasarnissaat ta-makkununnga tunuliaqutaasunik.
2) Ilisimasaqalernissaat inuiaqatigiinni pissutsinik, tamakkununnga ilanngullugit nunatsinni nunanilu allani naalakkersuinikkut periaatsinik aaqqissuussaanernillu, taamaalillutik soqutigisat isummallu tunuliaqutaasut tunngavigalugit inuiaqatigiinni oqallinnermik paasiniaaqqissaarsinnaaleqqullugit nalilersuisarsinnaaleqqullugillu.
3) Sammisamut ilisimatuutut isummiussinikkut ajornartorsiutaalersartunut aalajangersimasumik ilisimatuutut isummiussanik tunngavissaqalernissaat.
4) Atuartitsissutip atuartitsissutiginerani periaasissanik paasisimasaqalernissaat.§ 33. Upperisarsiornermik atuartitsissummi siunertarineqarpoq ilinniartut:
1) Kristumiussutsimik kiisalu upperisarsiornernik inuunermillu paasinneriaatsinik allanik ilinniarnikkut atuartitsissutip kultureqarnermi qangarsuarli isumaasartuni assigiinngitsuni inissisimaneranik paasinninnissaat.
2) Atuartitsissutip periaasiinik atuilluarsinnaalernissaat naliliisinnaallualernissaallu kiisalu ilinniartitsissutiginissaani eqqarsaatigilluagassanik suliaqarluarsinnaalernissaat.
3) Atuartitsissutip perorsaanikkut periarfissarisaanik atugassarisaanillu paasinninnissaat, taa-maalillutik ilinniartut kristumiussutsimut tunngasuni ilisimasassanik atuartitsisinnaaleqqullugit ilinniarnerup ingerlanerani tamarmi.
Atuartitsissutit neqeroorutigineqarsinnaasut
§ 34. Atuartitsissutinik neqeroorutigineqarsinnaasunik ilinniartitsinermi siunertarineqarpoq sammisassani immikkut ittuni itisilerisinnaalersitsinissaq, ilaatigullu atuartitsissutinik atuartitsissutigisaviit avataanniittunik suliaqarsinnaanissaq.
Imm. 2. Atuartitsissummik neqeroorutigineqarsinnaasumik atuartitsilersinnani atuartitsissummi siunertarisassat imassallu nassuiarneqaqqaassapput.
Suliffimmik misiliineq
§ 35. Atuartitsinermik misiliinerup siunertaraa ilinniartut:
1) Ilinniartitsisup suliarisartagaanik tamanik paasisimasaqalernissaat, taamaalillutik atuartut, angajoqqaat atuarfimmilu sulisut allat peqatigalugit Kalaallit Nunaanni meeqqat atuarfiini tamani atuartitsinermik assigiinngisitaartumik ingerlatsisinnaaleqqullugit.
2) Ilinniartitsisup suliassaanik ullut tamaasa nalliuttartunik allanngorartartunillu alaatsinaassinnaanermik, paasiniaaqqissaartarnermik paasisaminnillu isummerfiginnittarnissamut sungiusarneqarnissaat.
3) Pissusiviusut tunngavigalugit atuartitsinermik taamatullu ilinniartitsisup suliassaanik allanik aaqqissuussisinnaalerlutillu, ingerlatsisinnaalerlutillu nalilersuisinnaalernissaat kisimiillutik aammalu allanik suleqateqarlutik.
Kapitali 4.
Ilinniarnermi misilitsinnerit
Ilinniarnermi misilitsinnerit siunertaat§ 36. Ilinniarnermi misilitsinnerit siunertaraat paasiniassallugu ilinniartup pikkoriffigisai meeqqat atuarfianni ilinniartitsisussanik ilinniartitsineq pillugu Inatsisartut peqqussutaanni, nalunaarummi uani aamma ilinniarnerup aaqqissuunnerani il.il. aalajangersakkanut naapertuunnersut. Misilitsinnerni angusineq tunngaviliisuussaaq inaarummik soraarummeernerup allagartaata suliarineqarnissaanut.
Ilinniarfimmeersumik avataaneersumillu naliliiffigineqartunik misilitsinnerit nassuiagaanerat
§ 37. Misilitsinnerit ilinniarfimmeersumik avataaneersumillu naliliiffigineqartarput.
Imm. 2. Ilinniarfimmeersumik nalileeqateqarnerit tassaapput misilitsinnerit nalilerneqartut soraarummeersitsisumit ataatsimit imaluunniit soraarummeersitsisunit arlalinnit.
Imm. 3. Avataaneersumik nalileeqateqarnerit tassaapput misilitsinnerit nalilerneqartut soraarummeersitsisumit imaluunniit soraarummeersitsisunit aamma nalileeqataasartumit ataatsimit arlalinnilluunniit Ilinniartitaanermut Pisortaqarfimmiit toqqagaasunit.
Allattariarsorluni soraarummeernerit avataaniit nalileeqataaffigineqartartut
§ 38. Allattariarsorluni misilitsissutissat avataaniit nalileeqataaffigineqartartut Ilinniartitaa-nermut Pisortaqarfimmit suliarineqartassapput.
Imm. 2. Misilitsinnerit soraarummeertunut tamanut assigiissapput.
Imm. 3. Soraarummeerutissatut siunnersuutit, tamakkununnga ilanngullugit ikiuutissatut aku-erisassat, soraarummeerutissaliortoqatigiinnit suliarineqartassapput. Soraarummeerutissaliortoqatigiit tamarmik Ilinniartitaanermut Pisortaqarfimmiit tamakkuninnga suliaqartussanngortinneqartassapput ukiut pingasukkuutaarlugit.
Imm. 4. Misilitsinnerni nakkutilliisoqartassaaq.
Imm. 5. Ilinniarnerup ingerlanera naammassippat ilinniartup akissutimi imminut tunniunneqarnissaat piumasarisinnaavaa.
Oqaluttariarsorluni misilitsinnerit avataaniit nalileeqataaffigineqartartut
§ 39. Soraarummeersitsinermi apersuineq ingerlanneqassaaq ilinniartitsisumit imaluunniit ilinniartitsisunit atuartitsissummi atuartitsisuusimasumit/atuartitsisuusimasunit. Apersuineq sapinngisamik soraarummeersitsisumik soraarummeertumillu oqaloqatigiissitsiniarnerussaaq nalileeqataasussap peqataaffigisinnaasaanik. Allaatigisat ilinniartup atuartitsissummik soraarummeerutissamik suliaqartarsimaneranut uppernarsaataasunut amerlanerulissutaasinnaasut soraarummeertumut apersuinermi ilanngunneqarsinnaapput.
Imm. 2. Soraarummeernermi apeqqutit soraarummeertunut makitsissutigitinneqartassapput. Ilinniagaqartup misilitsinnginnermini toqqarsimasaa allagarlu pingaarnersiugaq ilinniartitsisumit akuerineqarsimasoq aallavigalugu apeqquteqartoqarsinnaavoq. Soraarummeertussat allaatigisimasaasa arlaat sammineqassappat taanna aammattaaq apersuinermut tunngaviussaaq.
Imm. 3. Nalileeqataasoq soraarummeernermilu soraarummeersitsisoq karakteeriliinissami kisimiissapput. Soraarummeertoq karakteeriliinerup kingornagut karakteeriliunneqartumut pissutaasumik naatsumik oqaatsit atorlugit ilisimatinneqarsinnaavoq.
Imm. 4. Ilinniartoq piareersarfissaqartitaappat, piareersarnera nakkutigineqassaaq.
Imm. 5. Oqaluttarissanik misilitsinnerit tamanut ammapput.
Misilitsinnerit naliliinerillu
§ 40. Atuartitsissutit §§ 9-14 naapertorlugit pinngitsoorani ilinniartariaqartut misilitsinnerit naliliinerillu makku imaraat:
1) Atuartitsissutit perorsaanermut/atuartitsinermut tunngasut: Semesterit arfineq aappassaat naggaserneqassaaq oqaluttariarsorluni avataaneersumik nalileeqataaffigineqartumik misilitsinnermik, aallaaveqartumik allallugu nalunaarusiamik. Oqaluttuarinninneq allaaseralugulu nalunaarusiaq ataatsimut nalilerneqassapput, ataatsimullu karakteeriliisoqassalluni. Ukiut ilinniarfiusut naggataanni oqaluttariarsornermik avataaneersumik naliliiffigineqartumik misiliisoqassaaq, aallaaveqartumik perorsaanermut tunngasumik immikkut sammisamik, ataatsimullu karakteeriliisoqassalluni.
2) Kalaallit oqaasiinik atuartitsissut ataatsimoorussassaq: Atuartitsissut naggataarneqassaaq oqaluttariarsorluni avataaneersumik nalileeqataaffigineqartumik misilitsinnermik aamma allattariarsorluni avataaneersumik nalileeqataaffigineqartumik misilitsinnermik. Misilitsinnerit tamarmik assigiimmik oqimaalutarneqartassapput, ataatsimullu karakteeriliisoqassalluni.
3) Atuartitsissut pinngortitalerinermut tunngasoq: Atuartitsissutip inaarneqarnerani nalilerneqassaaq "angusivoq " imaluunniit "angusinngilaq " atorlugit, ilinniartup suliai aamma atuartitsissummik ilinniartitsinermi periaatsinik iliuuserisartakkanillu paasisimasai tunngavigalugit naliliisoqarluni.
4) Atuartitsissut paasissutissiiviusoq: Atuartitsissutip inaarneqarnerani angusimasanut karak-teeriliisoqassaaq ilinniartup suliai, ilisimaqqaagassanik ilisimasai aamma atuartitsissummik ilinniartitsinermi periaatsinik iliuuserisartakkanillu paasisimasai kiisalu suliassanut ataasiakkaanut naliliinera tunngavigalugit.
5) Kristumiussuseq: Atuartitsissutip inaarneqarnerani nalilerneqartassaaq "akuerineqarpoq" imaluunniit "akuerineqanngilaq" atorlugit. Naliliineq ilinniartup eqqarsaatikkuinnaq ilisimasaanik kiisalu suliassanut ataasiakkaanut naliliinera tunngavigalugu pisassaaq.
6) Mernguernartut I: Atuartitsissutip inaarneqarnerani misilitsinneq nalilerneqassaaq "angusivoq" imaluunniit "angusinngilaq" atorlugit. Naliliineq ilinniartup kisimiilluni suleriaatsinik atorluaaneranik ataatsimoorussaqarnermilu peqataassuseqarneranik tunngavilimmik ingerlanneqartassaaq.
Imm. 2. Ilinniartitaanermut Pisortaqarfik immikkut pisoqartillugu imaluunniit ilinniartitaanerup ineriartortinneqarneranut ilassutitut imm. 1-imi aalajangersakkanit immikkut akuersissuteqarsinnaavoq.§ 41. Atuartitsissutit §§ 15-23 naapertorlugit qinigassat misilitsinnerit naliliinerillu makku imaraat:
1) Danskit oqaasii aamma kisitsineq/matematik: Atuartitsissutit tamarmik naggaserneqassapput avataaneersumik nalileeqataaffigineqartumik misilitsinnermik. Misilitsinneq oqaluttariarsornerullunilu allattariarsorneruvoq, nalilerneqassallunilu ataatsimut karakteerimik.
2) Tuluit oqaasii: Atuartitsissut taanna naggaserneqassaaq avataaneersumik nalileeqataaffigineqartumik misilitsinnermik ataatsimik marlunnilluunniit, atuartitsissullu tamatigut oqaluttariarsornermik naggaserneqartussanngorlugu aaqqissuunneqartassalluni.
3) Ilusilersuineq aamma assassorneq/ammerineq: Atuartitsissutit tamarmik naggataarnerini angusimasanut karakteeriliisoqassaaq ilinniartup suliaanik, ilisimaqqaagassanik ilisimasaanik aamma atuartitseriaatsinik atuartitsissutigineranilu ilikkartitseriaatsinik ilisimasaanik naliliineq tunngavigalugu.
4) Timersorneq, erinarsorneq/nipilersorneq qisunnillu sananeq: Atuartitsissutit tamarmik naggataarnerini angusimasanut karakteeriliisoqassaaq ilinniartup pikkorissusianik, ilisimaqqaagassanik ilisimasaanik aamma atuartitseriaatsinik atuartitsissutigineranilu ilikkartitseriaatsinik ilisimasaanik naliliineq tunngavigalugu.
5) Illumi suliassat: Atuartitsissutip naggataarnerani angusimasanut karakteeriliisoqassaaq ilin-niartup nalunaarusiaanik, pikkorissusianik aammalu atuartitseriaatsinik atuartitsissutigineranilu ilikkartitseriaatsinik ilisimasaanik naliliineq tunngavigalugu.
Imm. 2. Ilinniartitaanermut Pisortaqarfik immikkut pisoqartillugu imaluunniit ilinniartitaanerup ineriartortinneqarneranut ilassutitut imm. 1-imi aalajangersakkanit immikkut akuersissuteqarsinnaavoq.§ 42. Atuartitsissutit §§ 24-33 naapertorlugit annerusumik sammisassat misilitsinnerit naliliinerillu makku imaraat:
1) Kalaallit, danskit tuluillu oqaasii aamma kisitsineq/matematik: Atuartitsissutit tamarmik naggaserneqassapput avataaneersumik nalileeqataaffigineqartumik misilitsinnermik. Misilitsinneq oqaluttariarsornerullunilu allattariarsorneruvoq, nalilerneqassallunilu ataatsimut karakteerimik. Oqaluttariarsornermi misilitsissutaassapput apeqqutit, ilaatigut sammisamiittut ilaatigullu allaaseralugu nalunaarusiamiittut.
2) Fysik/kemii: Atuartitsissut naggaserneqassaaq fysikimi avataaneersumik nalileeqataaffigineqartumik oqaluttariarsorluni misilitsinnermik aamma kemiimi avataaneersumik nalileeqataaffigineqartumik oqaluttariarsorluni misilitsinnermik. Misilitsinnerit assigiimmik oqimaalutarneqassapput nalilerneqassallutillu ataatsimut karakteerimik.
3) Nunalerutit, uumassusilerineq, oqaluttuarisaaneq, inuiaqatigiilerineq upperisarsiornerlu: Atuartitsissutit tamarmik naggaserneqassapput avataaneersumik nalileeqataaffigineqartumik oqaluttariarsorluni misilitsinnermik. Misilitsissutaassapput apeqqutit, ilaatigut sammisamiittut ilaatigullu allaaseralugu nalunaarusiamiittut.
Imm. 2. Ilinniartitaanermut Pisortaqarfik immikkut pisoqartillugu imaluunniit ilinniartitaanerup ineriartortinneqarneranut ilassutitut imm. 1-imi aalajangersakkanit immikkut akuersissuteqarsinnaavoq.§ 43. Ilinniartup tapiutitut pikkorissarnermi atuartitsissummilu neqeroorutigineqarsinnaasumi peqataanera nalilerneqassaaq "akuerineqarpoq" imaluunniit "akuerineqanngilaq" atorlugit.
§ 44. Piffissat suliamik misiliiviusut tamarmik ilinniartup nalilerneqarneranik naggaserneqartassapput. Naliliineq suliffimmik misiliiffimmit Ilinniarfissuarmut tunniunneqartassaaq. Piffissanik suliffimmik misiliiffiusunit ataasiakkaanit suliffimmik misiliivimmit naliliineq tunuliaqutaralugu rektori ataatsimut "angusivoq" imaluunniit "angusinngilaq" atorlugu naliliisassaaq.
Ilinniarnermi misilitsinnerni peqataajumanermik nalunaarneq piumasarineqartullu
§ 45. Ilinniarnermi pinngitsoorani ingerlassimasassami nalunaarneq pisarpoq ilinniarnissamut tiguneqarsimaneq tunngavigalugu.
Imm. 2. Atuartitsissutini toqqagassani, atuartitsissutini annerusumik sammisassani aamma atuartitsissutini neqeroorutigineqarsinnaasuni nalunaarneq pisarpoq atuartitsissutinut taakkununnga tiguneqarsimaneq tunngavigalugu.§ 46. Ilinniakkanik aallussineq nalunaarsorneqassaaq atuartitsinermi aamma suliamik tunniussaqarnermi peqataanertut, rektorimillu akuerineqaqqaassalluni ilinniartoq atuartitsissutini ataasiakkaani misilitsinnerni peqataasinnaalertinnagu.
Misilitseqqinniarneq
§ 47. Ilinniartoq atuartitsissutini 6 inorlugu karakteereqarfigisamini misilitseqqinniartarsinnaavoq.
Imm. 2. Ilinniartoq atuartitsissummi taannaasumi marloriaannarluni misilitseqqinniartarsinnaavoq.
Imm. 3. Misilitseqqinniarnerup ilinniartoq pisinnaatissavaa atuartitsissummi misilitsinnissami tullermi peqataanissaanut. Semesterit qulingiluaanni naggataarutaasumik misilitsinnissami misilitseqqinniarnerup ilinniartoq pisinnaatissavaa ukiumi tassani augustimi misilitsinnissami peqataanissaanut.
Imm. 4. Ilinniartoq atuartitsissummi taannaasumi ataasiaannarani naggataarutaasumik misilitsissimappat karakteeri angusaasoq annerpaaq atortuussaaq.
Imm. 5. Ilinniartup suliffimmik misiliinermini angusinngitsoortutut naliliivigineqartup ilinniarnerup ingerlanera tamaat piffissaq suliffimmik misiliiffiusoq ataasiaannarluni uteqqissinnaavaa.
Imm. 6. Ilinniartitaanermut Pisortaqarfik immikkut pisoqartillugu imm. 1-2-mi aammalu imm. 5-imi aalajangersakkanit immikkut akuersissuteqarsinnaavoq.§ 48. Ilinniartunut nappaammik imaluunniit taamatut atuannginnermik uppernarsaateqartumik imaluunniit nakorsamit allagarserneqartumik pissuteqarlutik misilitsissimanngitsunut immikkut ittumik misiliisoqartassaaq, tamanna Ilinniartitaanermut Pisortaqarfiup aalajangersimappagu, taamaattorli misiliineq taanna atuartitsissummi tassani tullianik misiliisoqalerpat kingusinnerpaamik pisussanngorlugu.
§ 49. Ilinniartoq misilitsinnissamut takkutinngippat, peqataannginnissanilu ilisimatitsissutigisimanngippagu misilitsinneq angusiffiunngitsutut isigineqassaaq, aamma tak. § 48.
Soraarummeerutissat soraarummeernermilu apeqqutit
§ 50. Soraarummeerutissaq tassaavoq soraarummeerut ilinniartut atuartitsissutini ataasiakkaani misilitsinneranni apersuinissamut tunngaviusussaq. Soraarummeerutissaq ilinniartitsisup imaluunniit ilinniartitsisut atuartitsissummik soraarummeerutissamik atuartitsisimasup/atuartitsisimasut ilinniartoq oqaloqatigeqqaarlugu toqqassavaa/toqqassavaat.
Imm. 2. Soraarummeernermi apeqqutissat tassaapput apeqqutit apersuinermut tunngavigisassat. Soraarummeernermi apeqqutissat suliarineqassapput ilinniartitsisumit imaluunniit ilinniartitsisunit atuartitsissummik soraarummeerutissamik atuartitsisimasumit/atuartitsisimasunit.
Imm. 3. Soraarummeernermi soraarummeertussap allattariarsorluni suliaasa ilaannik apersuisoqassappat, allaaseralugu suliaq taanna apersuinermi aamma tunngavigineqassaaq.§ 51. Soraarummeerutissaq soraarummeernermilu apeqqutissat nalileeqataasussamut akue- ritinniarlugit saqqummiunneqassapput kingusinnerpaamik misilitsinnissat/misilitsinnissaq sap. ak. sisamanik sioqqullugu.
Imm. 2. Soraarummeerutissanut apeqqutissanullu oqaaseqaatit nassiunneqassapput taakku tigunerinit ullut arfineq-marluk qaanngiutsinnagit. Ullut taakku naaneranni Ilinniarfissuaq oqaaseqaatinik tigusaqarsimanngippat soraarummeerutissat soraarummeernermilu apeqqutissat nalileeqataasussamit akuerineqarsimasutut isigineqassapput.
Imm. 3. Soraarummeertussap suliaa apersuinissamut tunngaviusussaappat, tak. § 50, imm. 3, taanna misissoqqullugu nalileeqataasussamut nassiunneqassaaq kingusinnerpaamik misilitsinnissaq sap. ak. sisamanik sioqqullugu.
Nalileeqataasartussat
§ 52. Nalileeqataasussat Ilinniartitaanermut Pisortaqarfimmit toqqarneqassapput. Nalileeqataasartussat peqataasassapput atuartitsissutini tamani, avataaneersumik nalileeqataaffigineqartumik misilitsiffigineqartuni.
§ 53. Nalileeqataasartut nakkutigissavaat
1) ilinniarnermi misilitsinnerni, aamma allattariarsorluni suliani, piumasarisat siunertanut peqqussummi, nalunaarutini aamma ilinniarnerup aaqqissuunnerani aalajangerneqartunut naapertuunnersut,
2) misilitsinnerit malittarisassat atuuttut naapertorlugit ingerlanneqartarnissaat aamma
3) ilinniartut assigiiaartumik eqqortumillu pineqarnissaat, aamma suliaasa tutsuiginartumik nalilerneqarnissaat karakteeriliisarneq kiisalu allatut naliliisarneq pillugit nalunaarut naapertorlugu.
Misilitsinnerni pissusissaanngitsunik iliornerit
§ 54. Rektori ilinniarnermi misilitsinnerit tamakku pillugit maleruagassat aalajangersarneqartut naapertorlugit ingerlanneqarnissaannut akisussaavoq.
Imm. 2. Misilitsinnerit ingerlanneqarneranni pissusissaanngitsumik iliornerit erniinnarluinnaq Ilinniartitaanermut Pisortaqarfimmut nalunaarutigineqartassapput.
Imm. 3. Ilinniartitaanermut Pisortaqarfik Ilinniarfissuarmi misilitsittarnerit ingerlanneqartarnerat pillugu malittarisassiorsinnaavoq.§ 55. Ilinniartitaanermut rektorip misilitsittoq misilitsinnermit peeqqusinnaavaa:
1) Soraarummeertoq taamaalioqqusaanani allanit ikiorneqarsimappat, iluaqusersuutinik akuerisaanngitsunik atuisimappat imaluunniit allap suliaa nammineq suliarinerarpagu.
2) Soraarummeertoq taamaalioqqusaanani misilitsinnermi allanik ikiuisimappat imaluunniit ikiuiniaraluarsimappat.
Imm. 2. Soraarummeertoq misilitsinnermit peersinneqarpat unioqqutitsinerup annertussusia eqqarsaatigalugu rektorip pineqartoq ilinniarneranit peersissinnaavaa.
Kapitali 5.
Angusissagaanni tunngavissat§ 56. Ilinniartitsisutut angusisinnaanermut piumasarineqarput:
1) karakteerit tamarmik katinnerat karakteerit amerlassusiisa 6-imik amerlisarneqarlutik inernerattut angissuseqassasoq imaluunniit annerussasoq,
2) atuartitsissutini annerusumik sammisani aammalu atuartitsissutini perorsaanermut tunngasuni kiisalu immikkut sammisani soraarummeernermi karakteeri minnerpaamik 6-iussasoq,
3) atuartitsissutini allani tamani karakteeri minnerpaamik 5-iussasoq, taamaattorli atuartitsissummi ataatsimi karakteerigineqarsinnaavoq 03, aamma
4) atuartitsissut "akuerineqarpoq"-mik imaluunniit "akuerineqanngilaq"-mik nalinerneqartoq angusineruvoq.
Imm. 2. Atuartitsissutini neqeroorutaasuni karakteerit, takuuk § 43, imm. 1-imi pineqanngillat.
Kapitali 6.
Allattuiffiit aamma inaarutaasumik soraarummeernerup allagartaa§ 57. Rektori allattaavissuarnik allattuisassaaq, tassungalu ilinniartut tamarmik allattorneqarfeqassapput. Allattorneqarfimmut allanneqartassapput ilinniartitsisunngorniartoq pillugu inummut paasissutissat, atuartitsissutinik toqqartuisimanera, uppernarsarlugit atsiukkat, peqataasinnaajunnaarsitsinerit nalunaarullu manna tunngavigalugu allaasunik iliuuseqarnerit, suliffimmik misiliinerni, atuartitsissutini pinngortitalerinermut tunngasuni aamma mernguernartut 1-imi naliliinerit, kiisalu misilitsinnermi angusarisimasallu pillugit karakteerit.
Imm. 2. Ilinniartitaanermut Pisortaqarfik allattuiffiit qanoq iluseqarnissaannut aalajangersaasinnaavoq.§ 58. Ilinniartitsisunngorniartut ilinniartitsisutut soraarummeernermi angusisimasut tamatumunnga uppernarsaammik tunineqassapput. Uppernarsaat inummut ataatsimut tunngasunik oqaasertaqarpoq aammalu tamanut tunngasunik assigiinnik oqaasertaqarluni.
Imm. 2. Inummut ataatsimut tunngasunik oqaasertatigut ilisimatitsissutigineqassapput
1) ilinniartitsisunngorniartoq pillugu inummut paasissutissat aamma ulloq ilinniarnerup naammassiffia,
2) suliffimmik misiliinermi nalilerneqarneq,
3) atuartitsissutit annerusumik sammisassat aammalu atuartitsissutit toqqagassat suut ilinniartitsisunngorniartup sammisimanerai kiisalu atuartitsissutini ataasiakkaani tamani naliliineq § 56 malillugu ilanngullugu naatsorsuutigineqartoq,
4) § 7 naapertorlugu atuartitsissutinut peqataasinnaajunnaarsimasinnaaneq,
5) tapertaasumik pikkorissarnerni peqataaneq, ilinniartitsisunngorniartoq nalilerneqarsimappat "akuerineqarpoq"-mik, nal. akunneri atuartitsiviusut qassiuneri nalunaarlugit, aamma
6) atuartitsissutini neqeroorutigineqarsinnaasuni peqataaneq, ilinniartitsisunngorniartoq nalilerneqarsimappat "akuerineqarpoq"-mik, nal. akunneri atuartitsiviusut qassiuneri nalunaarlugit.
Imm. 3. Tamanut tunngasunik oqaasertani allassimassapput nalunaarummi matumani §§-1-imi 5-imi aamma 56-imi oqaasertaliussat.
Imm. 4. Soraarummeersimanermut uppernarsaat rektorimit suliarineqassaaq ilinniartitsisun-ngorniartup allattorneqarfigisimasaa najoqqutaralugu. Rektorip uppernarsaat atsiussavaa.
Imm. 5. Ilinniartup ilinniarnini naammassinagu ilinniarunnaartup qinnuteqarnermigut misilitsinnernut angusiffigisaminut suliamillu misiliinerminut angusiffigisaminut kiisalu atuartitsissutinut angusanik naliliinermik naggaserneqartunut allagartat uppernarsaatit pissarsiarisinnaavai.
Imm. 6. Ilinniartitaanermut Pisortaqarfik inaarutaasumik soraarummeersimanerup allagartaata qanoq isikkoqarnissaa pillugu maleruagassiorsinnaavoq.
Kapitali 7.
Atuutilerfia ikaarsaariarnermilu aalajangersakkat§ 59. Nalunaarut atuutilerpoq ulloq 24.april 2003. Tamatuma peqatigisaanik atorunnaarput:
1) Meeqqat atuarfianni ilinniartitsisussat illoqarfiit ilaanni (qitiusup avataani) ilinniartitaanerat pillugu Namminersornerullutik Oqartussat nalunaarutaat nr. 37 28. august 1990-imeersoq,
2) Ilinniartitsisussanik ilinniartitsinermi fagit pillugit Namminersornerullutik Oqartussat nalunaarutaat nr. 38 28. august 1990-imeersoq, kiisalu
3) Ilinniartitsisussanik ilinniartitsineq katersuutsitaq pillugu Namminersornerullutik Oqartussat nalunaarutaanni nr. 19-imi 31. juli 2000-imeersumi kapitali 6.
Namminersornerullutik Oqartussat, ulloq 24. april 2003.
Arkalo Abelsen/
Lise Lennert Olsen