Ilulissat Kangerluata, Kangiata, eqqissisimatitassanngortinnera pillugu Namminersornerullutik Oqartussat nalunaarutaat nr. 7, 25. marts 2003-meersoq.
Kalaallit Nunaanni pinngortitamik allanngutsaaliuineq pillugu Landstingip inatsisaani nr. 11-mi, 12. november 1980-imeersumi §§ 3 aamma 19 naapertorlugit aalajangersarneqarput:
§ 1. Ilulissat kommuniani kangia, tamassumalu eqqaani nunataq, nunap alianaassusia pissutigalugu sumiiffittut eqqissimatitassanngortinneqarpoq sumiiffiup pinngortitaassutsikkut oqaluttuarisaanerata, kulturikkut oqaluttuarisaanerata alianaassusiatalu illersorneqarnissaat siunertaralugu. Sumiiffiup allanngoriartunnginnissaa kiisalu sumiiffiup kulturikkut oqaluttuarisaanermi sikukkut piniartarnermi inuussutissarsiorfigineqartarnerata ineriartornissaanut periarfissaat isumannaarneqarnissaat eqqissisimatitsinerup illersussavai.
Imm. 2. Sumiiffik 1994-imi nassuiaatit naapertorlugit IUCN-imi immikkoortumut V-imut ilaatinneqarpoq.
Imm. 3. Sumiiffiup eqqissisimatitap killeqarfilerneqarnera nunap assitaliussami 1-imi nalunaarsimavoq.
Imm. 4. Nunataq illoqarfiup qanitaaniittoq 1100 m²-iusoq nunap assingani sumiiffinni imatut killilikkap 69º12´23´N aamma 51º07´23´V iluaniittoq sermeq iigartartumut allanngutsaaliugassanngortinneqartussamut ilaatinneqanngilaq, Isbræcenter pilersaarutigineqartoq eqqarsaatigalugu.§ 2. Sumiiffimmi allanngutsaaliukkami ingerlatsinerit iliuuseqartitsinerilluunniit sumiiffiup nunataata immikkut ilisarnaataanik allanngortitsisussat imaluunniit kulturikkut oqaluttuassartaanut, pinngortitaassutsikkut oqaluttuassartaanut kiisalu mernguernartuuneranut naleqartitanik pingaaruteqartitanillu allatut ajornerulersitsisussat inerteqqutaapput, taamaattorli §§ 3, 4, 5, 6, 9, 10, 14 aamma 15 takukkit.
§ 3. Nalunaarummi matumani killiliinerit eqqaassanngikkaanni kikkulluunniit sumiiffimmut allanngutsaaliukkamut appakaassinnaapput.
§ 4. Mernguernartumik siunertalinnut atatillugu aammalu inuussutissarsiutigalugu aalisarnernut, aallaaniarnernut piniariarnernullu atatillugu sumiiffiup allanngutsaaliukkap iluani sumiiffimmi aalajangersimasumi tupertornissaq silaannarmilu ikumatitsinissaq ullut pingasut tikillugit taamaallaat pisinnaavoq.
Imm. 2. Aallaaniarnermut piniarnermullu atatillugu tupertortarfissat aalajangersimasut Avatangiisinut Pinngortitamullu Pisortaqarfimmut tusarniaareernermi Ilulissat kommunalbestyrelsianit toqqarneqassapput.§ 5. Piniarianut illuaqqat aalisarnermi, aallaaniarnermi piniarnermilu taamaallaat isumalluutitut atorneqarsinnaapput. Piniarianut illuaqqat ataavartumik najugaqarfigeqqusaanngillat.
Imm. 2. Piniarianut illuaqqat pioreersut atatiinnarneqarsinnaapput aserfallatsaaliorneqartarlutillu. Piniarianut illuaqqanik nutaanik pioreersut taartissaannik sanaartornissanut Ilulissat kommunalbestyrelsianut tusarniaareerluni Avatangiisinut Pinngortitamullu Pisortaqarfik akuersissuteqarsinnaavoq.§ 6. Takornarianut illuaqqat sunngiffimmi angalanernut atatillugu taamaallaat isumalluutitut atorneqarsinnaapput. Takornarianut illuaqqat ataavartumik najugaqarfigeqqusaanngillat.
Imm. 2. Takornarianut illuaqqat taamaattoqarfissatut toqqakkani sumiiffinni marlunni taamaallaat sanaartorneqarsinnaapput, tak. nunap assinga ilanngussaq 2.
Imm. 3. Sumiiffinni toqqakkani tamani takornarianut illuaqqat arfineq-marluk tikillugit ataatsimik quleriillit sanaartorneqarsinnaapput, tak. imm. 1-imi oqaaseqatigiit aappaat.
Imm. 4. Aqqusineeqqat takornarinut illuaraqarfinniittut ujaraaqqanik sioraaqqanillu qallersorneqarsinnaapput.
Imm. 5. Takornarianut illuaraqarfinnut atasumik helikopterinut akunniffiusartussamik nunaminertamik toqqaasoqarsinnaavoq.§ 7. Piniarianut takornarianullu illuaqqat sumiiffimmi allanngutsaaliukkami nunaminertani pinngortitamut alianaassusianullu sapinngisamik takussunarsaataasussaajunnaarlugit inissinneqassapput.
§ 8. Piniarianut takornarianullu illuaqqat imatut sanaartorneqassapput atortunik, qalipaatinik ilusissanillu toqqaanermi taakku avatangiisinut naleqqulluinnassallutik.
Imm. 2. Piniarianut takornarianullu illuaqqat ilusissaat inissisimaffissaallu Ilulissat kommunalbestyrelsianut tusarniaareernermini Avatangiisinut Pinngortitamullu Pisortaqarfiup akuersissutigisassavai.§ 9. Sumiiffiup allanngutsaaliukkap iluani qamutinik motoorilinnik angalanissaq inerteqqutaavoq.
Imm. 2. Kangiani illinerni kommunip toqqagaani inuussutissarsiornermut atatillugu angalanissaq inerteqqutaanngilaq.§ 10. Sumiiffiup allanngutsaaliukkap iluani imaatigut angallatinik angalanissaq inerteqqutaanngilaq.
Imm. 2. Sumiiffimmi angallatinik nunamut qaqitsilluni uninngatitsinissaq inerteqqutaavoq. Inuussutissarsiornermut atatillugu pisariaqartunik angallatinik nunamut qaqitsilluni sumiiffimmi allanngutsaaliukkami uninngatitsinissamut Ilulissat kommunalbestyrelsianut tusarniaareernermini Avatangiisinut Pinngortitamullu Pisortaqarfik akuersissuteqarsinnaavoq.§ 11. Akuerisaasumik timmisartuussisarnerni aamma annaassiniarnerni ujaasinernilu sumiiffimmik allanngutsaaliukkamik helikopterimik qulaavaasarnissat inerteqqutaanngillat.
Imm. 2. Sumiiffimmi allanngutsaaliukkami helikopterimik timmisartuussisarnissamut mittarnissamullu Ilulissat kommunalbestyrelsianut tusarniaareernermini Avatangiisinut Pinngortitamullu Pisortaqarfik ukiumoortumik akuersissuteqartassaaq. Ukiumoortumik akuersissutit Avatangiisinut Pinngortitamullu Pisortaqarfiup, Ilulissat Kommuniata, takornariartitsisartut helikopteriutileqatigiillu akunnerminni isumaqatigiinniuteqareernerisigut tunniunneqartassapput.§ 12. Sumiiffiup allanngutsaaliukkap iluani sikkilerneq inerteqqutaavoq.
§ 13. Sumiiffiup allanngutsaaliukkap iluani tatsit, kuuit, kangerluit, sermimik iigartartut nunatalluunniit iliornikkut imaluunniit eqqakkanik, aalisarnermi atortunik, nalunaarsuutinik ilisimatusarnikkullu atortunik qimatsinikkut mingutsinneqarnissaat inerteqqutaavoq.
Imm. 2. Sumiiffiup allanngutsaaliukkap iluani nunap naasui nunatalluunniit innarlerneqarnissaat inerteqqutaavoq.
Imm. 3. Piniarianut illuaqqat, takornarianut illuaraqarfiit helikopterinullu akunnittarfiit sanaartorneqarneranni nunatat nunallu naasui pissusaattut pilerseqqinneqartassapput.
Imm. 4. Inuussutissarsiutigalugu piniarnermut aalisarnermullu atatillugu ileqquusumik nerisassiornermi ikummatissatut atorneqarnerat eqqaassanngikkaanni nunap naasuisa ikummatigineqarnissaat inerteqqutaavoq.§ 14. Nalunaarummi matumani inatsisilianiluunniit allani maleruagassatut aalajangersakkat qaqugukkulluunniit atuuttut unioqqutinnagit sumiiffimmi allanngutsaaliukkami aalisarneq kiisalu piniarneq ingerlanneqarsinnaapput.
§ 15. § 2-mi, §§ 4-6-ini aamma §§ 9-15-ini aalajangersakkanik sanioqqutsinissaq Ilulissat kommunalbestyrelsianik tusarniaareernermini Avatangiisinut Pinngortitamullu Pisortaqarfiup nalunaarutigisinnaavaa.
§ 16. §§ 2-mik, 4-mik, § 5 imm.1-imik, § 6 imm. 1-imik aamma 4-mik, §§ 7-9-nik, § 10 imm. 2-mik aamma §§ 13-14-inik unioqqutitsinerit akiliisitaassutaasinnaapput.
§ 17. Nalunaarut 1. maj 2003 atuutilerpoq.
Namminersornerullutik Oqartussat, ulloq 25. marts 2003.
Mikael Petersen/
Hans J. Høyer