Namminersornerullutik Oqartussat nalunaarutaat nr. 6, 18. marts 2003-meersoq kiassarnermut naatsorsuutit pillugit.

Inissianik attartorneq pillugu Inatsisartut peqqussutaanni nr. 5, 31. maj 2001-imeersumi § 21, imm. 3 naapertorlugu aalajangersarneqarput:

 

§ 1. Kiassarnermut naatsorsuutit ima suliarineqassapput takuneqarsinnaassalluni attartortut ataasiakkaat aningaasartuutaasa tamarmiusut ilaat qanoq annertutigisut kiassarnermut aamma imermut kissartumut tunngassuteqarnersut.
Imm. 2. Ineqarnermut akiliutissat akileqquneqarnerannut atatillugu kiassarnermut aamma imermut kissartumut aningaasartuutinut matussutissatut akiliutaagallartussat aningaasat annertoqqatigiikkuutaarlugit akileqquneqartussat attartortitsisup akileqqusinnaavai.
Imm. 3. Attartortut ataasiakkaat pillugit kiassarnermut naatsorsuutini erseqqissumik takutinneqassaaq akiliutaagallartussat akilerneqarsimasinnaasut aningaasanit inaarutaasumik akiliutaasussanit amerlanerunersut imaluunniit ikinnerunersut.

§ 2. Aningaasartuutaasimasut immikkuualuttortaat nalunaarsimassapput. Erseqqissumik nalunaarsimassaaq aningaasartuutit tamarmiusut ilaat qanoq amerlatigisut uuliasinermut uuliamillu assartuinermut, innaallagiaq atorlugu kiassarnermut aamma kiassaateqarfissuarmit kiammik pisiortornermut atorneqarsimanersut.
Imm. 2. Aningaarsartuutit allat kiassarnermut imaluunniit imermik kissartuliornermut attuumassuteqartut, assersuutigalugu innaallagissamut, imermut, aserfallatsaaliuinermut, toqqortikkanut, nakkutilliinermut il.il. ingerlatsinermi aningaasartuutit, aammattaaq ilanngunneqarsinnaapput.

§ 3. Kiassaateqarfissuarnut, kiassaateqarfissuit immikkoortortaannut imaluunniit najugaqaqatigiiffinnut aningaasartuutit attartortitsisup aalajangiinera malillugu attartortut akornanni agguataarneqassapput makku tunngavigalugit:
1) Inissiat ataasiakkaat angissusiat.
2) Kiassarnermut atortulersuutit.
3) Kiammik agguataarinermut uuttuutit, aamma aalanngortitsinikkut innaallagissamoortumillu agguataarinermut
uuttuutit.
4) Kiaap sakkortussusianut uuttuutit.
5) Periutsit nr. 1-imiit 4-mut taaneqartut akuleriinneri.

§ 4. Nalunaarut atuutilerpoq 1. april 2003.
Imm. 2. Peqatigitillugu Namminersornerullutik Oqartussat nalunaarutaat nr. 59, 29. december 1994-imeersoq kiassarnermut naatsorsuutit pillugit atorunnaarsinneqarpoq.

Namminersornerullutik Oqartussat, ulloq 18. marts 2003

Mikael Petersen

/

Jens K. Lyberth