Umiarsualivimmiinnermut aamma umiarsuit takornarianik angallassissutit ilaasunik angallassinerannut akileraarutit pillugit Namminersornerullutik Oqartussat nalunaarutaat nr. 5, 7. marts 2003-meersoq.
Umiarsualivimmiinnermut akileraarutit pillugit Inatsisartut inatsisaanni nr. 20, 30. oktober 1992-imeersumi § 12 aamma § 14, imm. 3 naapertorlugit makku aalajangersarneqarput:
§ 1. Umiarsuit akileraartussaatitaasut umiarsualivinnut ataani taaneqartunut nunalittut umiarsualivimmiinnermut akileraarutinik akiliisinneqartassapput:
1) Qaanaaq,
2) Upernavik,
3) Uummannaq,
4) Qeqertarsuaq,
5) Ilulissat,
6) Qasigiannguit,
7) Aasiaat,
8) Kangaatsiaq,
9) Sisimiut,
10) Kangerlussuaq,
11) Maniitsoq,
12) Nuuk,
13) Paamiut,
14) Narsaq,
15) Narsarsuaq,
16) Qaqortoq,
17) Nanortalik,
18) Ammassalik aamma
19) Illoqqortoormiut.§ 2. Umiarsuit aalajangersimasumik Kalaallit Nunaanniittut aammalu umiarsuartut annaassiniutitut kalittaatitut, siorartaatitut, ujaqqanik qalluisutut kiisalu aqqartartut umiarsuaattut aammalu prammitut sanaajusimasut, taamatullu ingerlatsisut umiarsualivimmiinnermut akileraarutinik akiliisussaatitaanngillat.
Imm. 2. Aammattaaq makkua umiarsualivimmiinnermut akileraarutinik akiliisussaatitaanngillat:
1) umiarsuit taamaallaat aalisakkanik aalisakkanilluunniit nioqqutissianik Danmarkimi, Savalimmiuni nunaniluunniit allani pisiarineqarsimasunik Kalaallillu Nunaanni aalisakkanik tunisassiorfinni suliarineqartussanik usingiartut,
2) umiarsuit nunaqarfinnut isorliunerusunullu aalisakkanik aalisakkanillu nioqqutissianik tunisisartut, umiarsualiviit § 1-imi taaneqartut arlaannut nunalittut,
3) umiarsuit taamaallaat uuliamik uuliamillu nioqqutissianik assartuinermik ingerlataqartut.§ 3. Umiarsualivimmiinnermut akileraarutit pillugit Inatsisartut inatsisaanni nr. 20, 30. oktober 1992-imeersumi pisussaaffiit pisinnaatitaaffiillu Akileraartarnermi Pisortaqarfimmut inissinneqarsimasut umiarsualivimmi oqartussaasumit isumagineqassapput.
Imm. 2. Suliassalli imm. 1 naapertorlugu umiarsualivimmi oqartussaasumut suliassiissutigineqartut, Akileraartarnermi Pisortaqarfik akuersiseqqaarnagu, allanit isumagisassanngorlugit umiarsualivimmi oqartussaasoq piginnaatitsisinnaanngilaq.
Imm. 3. Una nalunaarut naapertorlugu umiarsualivimmi oqartussaasup aalajangiineri Akileraartarnermi Pisortaqarfimmut naammagittaalliutigineqarsinnaapput.§ 4. Umiarsuup naalagaa, imaluunniit inuttaasoq alla akisussaassuseqartoq pisussaavoq umiarsuup aallannginnerani umiarsualivimmi oqartussaasup erseqqinnerusumik ilitsersuinera naapertorlugu umiarsuup suunera, umiarsuup BRT/BT-ia, ullut unnuallu qassit umiarsualivimmiissimanersoq kiisalu akileraarutissat naatsorsorneqartut akuerineqarneri pillugit umiarsualivimmi oqartussaasumut nalunaaruteqarnissamut.
Imm. 2. Nalunaarutip imm. 1-imi pineqartup tunniunneqarnera ilutigalugu umiarsualivimmiinnermut akileraarutit akiligassanngorsimasut umiarsualivimmi oqartussaasumut akilerneqassapput.§ 5. Umiarsuit ingerlatsivimmit pigineqartut attartorneqarsimasulluunniit allatut akiliisarnissaq pillugu Akileraartarnermi Pisortaqarfimmik isumaqatigiissuteqarsimasut § 4-mi ilaatinneqanngillat.
§ 6. Nalunaarutit § 4, imm. 1 naapertorlugu qaammatip siuliani tunniunneqarsimasut assilineri umiarsualivimmi oqartussaasup Akileraartarnermi Pisortaqarfimmut nassiutissavai, akileraarutillu qaammatip siuliani akilerneqarsimasut kingusinnerpaamik qaammatip tulliuttup ulluisa 15-iani akilertassallugit.
Imm. 2. Ingerlatsiviit § 5-imi taaneqartut akileraarutit tamarmiusut qaammatikkaartumik naatsorsortassavaat naatsorsuusiorfillu nassiutissallugu kiisalu akileraarutissat naatsorsorneqartut akilertassallugit Akileraartarnermi Pisortaqarfimmut kingusinnerpaamik qaammatip tulliuttup ulluisa 15-iani.§ 7. Qaammatisiutit malillugit ukiut naaneri tamaasa umiarsualivimmi oqartussaasup naatsorsuuserisuata Akileraartarnermi Pisortaqarfimmut nalunaarutigisassavaa, umiarsualivimmiinnermut akileraarutit pillugit Inatsisartut inatsisaanni nr. 20, 30. oktober 1992-imeersumi aalajangersakkat nalunaarummilu uani aalajangersakkat malillugit umiarsualivimmiinnermut akileraarutinut akiligassiisarnerit, akiliutinik ingerlateqqiisarnerit allaffissornikkullu aqunneqarnerat suleriaasissatut pilersinneqarsimasut naapertorlugit suliarineqartarsimanersut.
§ 8. § 4-mik aamma § 6, imm. 2-mik unioqqutitsineq akiliisitsinermik pillarneqaatissiissutaasinnaavoq.
§ 9. Nalunaarut ullormi 15. marts 2003-mi atuutilissaaq.
Imm. 2. Tamatumunnga ilutigitillugu umiarsualivimmiinnermut akileraarutit pillugit nalunaarut nr. 28, 27. november 1997-imeersoq atorunnaarsinneqassaaq.
Namminersornerullutik Oqartussat, ulloq 7. marts 2003
Augusta Salling/
Kaare Hagemann