Peqqinnissaqarfiup Tulleriissaarisarnermut ataatsimiititaliaa pillugu Namminersornerullutik Oqartussat nalunaarutaat nr. 2, 5. februar 2003-meersoq.
Peqqinnissaqarfiup sullissineri il.il. pillugit Inatsisartut peqqussutaanni nr. 15-imi, 6. november 1997-imeersumi § 22, imm. 3 naapertorlugu aalajangersarneqarput:
§ 1. Killiliussat Naalakkersuisunit aalajangersarneqarsimasut iluanni Tulleriissaarinermut ataatsimiititaliap makku suliassarai:
1) naalakkersuinikkut aalajangikkat innimigalugit napparsimasunik katsorsaanermi tulleriissaarinissaq,
2) Kalaallit Nunaanni aamma Kalaallit Nunaannit innersuussinerit pillugit tunaartarisassaliornissaq taakkuninngalu nakkutiginninnissaq,
3) Katsorsaasarfinni Kalaallit Nunaata avataaniittuni atuineq malinnaaffigissallugu,
4) nakorsanit immikkut ilisimasalinnit sullinneqarnerup pingaarnerutillugu pilersaarusiorneqarneranik aammalu ingerlanneqarneranik nakkutilliinissaq aamma
5) suliassat inuup najugaqarfiata avataani peqqinnissaqarfimmi misissortinnissamut aamma katsorsarneqarnissamut innersuussinerit aalajangersimasut suliarissallugit.§ 2. Tulleriissaarinermut ataatsimiititaliami ilaasortaapput Dronning Ingridip Napparsimmavissuani nakorsat qullersaat, napparsimmavissuup pisortaa, napparsimmavissuarmi kigutit nakorsaat aamma Dronning Ingridip Napparsimmavissuani nakorsaanerit aqutsisut, Peqqinnissaqarfiup Peqqissaaveqarfiinik aqutsisut sinniisuutitaat kiisalu Peqqinnissamut Pisortaqarfimmeersut sinniisut marluk.
Imm. 2. Ilaasortat allanit sinniisuuffigineqarsinnaanngillat
Imm. 3. Peqqinnissamut Pisortaqarfimmi pisortaq ataatsimiititaliami siulittaasuuvoq. Dronning Ingridip Napparsimmavissuata pisortaa siulittaasup tulleraa. Siulittaasup peqannginnerani taassuma suliassai pisinnaatitaaffiilu siulittaasup tullianit suliarineqartassapput.§ 3. Tulleriissaarinermut ataatsimiititaliaq nalinginnaasumik amerlanerussuteqarnikkut aalajangiisarpoq. Amerlaqatigiinnik taasisoqartillugu siulittaasup taasinera aalajangiisuusassaaq.
Imm. 2. Ataatsimiititaliaq aalajangiisinnaassuseqarpoq siulittaasoq imaluunniit siulittaasup tullia aamma ataatsimiititaliami ilaasortat ikinnerpaamik affaat najuuppata.
Imm. 3. Ataatsimiititaliap Dronning Ingridip Napparsimmavissuani nakorsaanerit tulleriissaarisartut suliassani tunngaviusunik aalajangiiffiusussaanngitsuni piginnaatissinnaavai.§ 4. Tulleriissaarinermut ataatsimiititaliaq qaammatikkaartumik ataatsimiittassaaq. Siulittaasoq immikkut ittumik ataatsimiinnernut ataatsimiigiaqqusisinnaavoq.
Imm. 2. Ataatsimiititaliamut ataatsimiigiaqqusinerit sivikinnerpaamik ullunik arfineq marlunnik siumoortumik nalunaarutigineqartassapput, ataatsimiinnermullu ullormut oqaluuserisassanik imaqartassallutik annikinnerpaatigut makkuninnga imaqartartussamik:
1) Kingullermik ataatsimiinnermit imaqarniliap akuersissutiginera.
2) Ullormut oqaluuserisassat akuersissutiginerat.
3) Kalaallit Nunaata avataani katsorsaasarfinnik atuineq pillugu paasissutissiineq.
4) Utaqqisut allattorsimaffiat pillugu paasissutissiineq.
5) Angallassigasuarnerit pillugit paasissutissiineq.
6) Dronning Ingridip Napparsimmavissuanit nunanut allanut innersuussinerit pingaaruteqartut pillugit paasissutissiineq.
7) Najukkani peqqinnissaqarfinni innersuussinerit pingaaruteqartut pillugit paasissutissiineq.
8) Suliassat aalajangersimasut suliarineqarnerat.
9) Tamalaat.
Imm. 3. Dronning Ingridip Napparsimmavissua Tulleriissaarinermut ataatsimiititaliamut allattoqarfeqartitsisuussaaq.§ 5. Tulleriissaarinermut ataatsimiititaliap ataatsimiinneri tamanut ammasuunngillat. Pissutsit immikkut ittut atuuppata ataatsimiititaliap siulittaasua suliamut ilisimasalimmik ataatsimiititaliap suliamik suliarinninnerani ikiuuttumik qaaqqusisinnaavoq.
§ 6. Ataatsimiititaliap ataatsimeereernerani imaqarniliortoqartassaaq ataatsimiititaliap suliai immikkoortuni ataasiakkaarlugit oqaluuserineqartut issuarlugit. Suliassani erseqqissuni inunnut ataasiakkaanut tunngasuni, tunngaviusussatut isikkoqartut, ilisarineqarsinnaajunnaarsillugit imaqarniliami ilanngullugit allaaserineqartassapput. Ataatsimiititaliap ataatsimiinnerinit imaqarniliat ataatsimiititaliap ilaasortaanut ukununnga Peqqinnissamut Naalakkersuisumut, Peqqinnissamut Pisortaqarfimmut, Dronning Ingridip Napparsimmavissuani aqutsisunut, Peqqinnissaaveqarfinnik aqutsivimmut, najukkani peqqissaaveqarfinni nakorsat qullersaanut, Peqqinnissakkut Nakkutilliisoqarfimmut kiisalu Kalaallit peqqissartut Illuannut nassiunneqartassapput.
Imm. 2. Ataatsimiititaliaq suliani pillugit Peqqinnissamut Naalakkersuisumut ukiumoortumik nalunaarusiortassaaq. Kingusinnerpaamik aprilip aallaqqaataanut nalunaarusiortoqareertassaaq ataatsimiititaliallu suliai pillugit nassuiaatinik nalunaarusiaq imaqartassalluni, tassu-nga ilanngullugit § 3-mi, imm. 3 naapertorlugu aalajangernerit.§ 7. Tulleriissaarinermut ataatsimiititaliap suliassani aalajangersimasuni inunnut ataasiakkaanut tunngasuni aalajangiineri nakorsamut innersuussisimasumut allakkatigut nalunaarutigineqartassapput, taassumalu napparsimasumik ilisimatitsinissaq isumagissavaa. Suliassaq innuttaasup aalajangersimasup qinnuteqarneratigut suliassanngortinneqarsimappat aalajangiineq allakkatigut qinnuteqartumut nalunaarutigineqassaaq.
Imm. 2. Suliassami ataatsimiititaliap aalajangiivigisimasaani paasissutissat nutaat pingaaruteqartullu saqqummerpata, suliaq ataatsimiititaliamit suliareqqinneqassaaq.
Imm. 3. Tulleriissaarinermut ataatsimiititaliap inunnut aalajangersimasunut suliani aalaja-ngiineri allaffissornikkut oqartussanut allanut suliassanngorteqqinneqarsinnaanngillat.§ 8. Nalunaarut manna ingerlaannartumik atuutilerpoq.
Imm. 2. Tamatumunnga peqatigitillugu Peqqinnissaqarfiup Tulleriissaarinermut ataatsimiititaliaa pillugu Namminersornerullutik Oqartussat nalunaarutaat nr. 3, 31. januar 2001-imeersoq atorunnaarsinneqarpoq.
Namminersornerullutik Oqartussat, ulloq 5. februar 2003
Ruth Heilmann/
Jørgen Dreyer