Ulluunerani paaqqinnittarfiit, ulluunerani angerlarsimaffimmi paaqqinniffiit il.il. pillugit Inatsisartut peqqussutaat nr. 7, 21. maj 2002-meersoq.

 

Suliassaqartitsiniarnermik inunnillu isumaginninnermik Kalaallit Nunaannut inatsisip nr. 580-ip, 29. november 1978-imeersup 2-a tunngavigalugu imatut aalajangersaasoqassaaq:

 

Aalajangersakkat nalinginnaasut

1. Kommunalbestyrelsi pisussaavoq meeqqanut 15-it inorlugit ukiulinnut paarineqarnis-samik sunngiffimmiluunniit isumaginninnikkut perorsaanermik tunngaveqartumik pisariaqartitsisunut, ilanngullugit paarineqarnissamik pisariaqartitsinermik tunngaveqanngikkaluartumik pinaveersimatitsinissamillu siunertaqartumik sammisassaqartinneqarnissamik pisariaqartitsisunut ulluunerani meeqqerivinni inissanik pisariaqartunik qulakkeerinnissalluni.
Imm. 2. Kommunalbestyrelsi aammattaaq meeqqanut atualertussanut tamanut, atuarfitsialammut piareersarluarnissamut atatillugu siunniussanik siuarsaasunik sammisassanik neqerooruteqassaaq.

2. Ulluunerani neqeroorutit 1-imi taaneqartut siunertarivaat meeqqat inuusuttullu ineriartornerisa sapinngisamik pitsaanerpaamik tapersersorneqarnissaat periarfissinneqarnissaallu.
Imm. 2. Ulluunerani neqeroorutini ataasiakkaani perorsaanermi suliassatut siunertat sinaakkutissallu kommunalbestyrelsip akuerissavai, taakkulu suliarineqassapput angajoqqaat peqatigalugit paaseqatigalugillu:
1) Meeqqanik inuusuttunillu angerlarsimaffiup perorsaanera tapersersornialugu.
2) Nukappiaqqat niviarsiaqqallu tamatigoortumik ineriartornerat siuarsarniarlugu, tassuuna meeqqap inooqataanermini nukittorsarnissaa, inuttullu naleqassusiata attatiinnarnissaa periarfissillugu.
3) Meeqqap inerikkiartornera, peqqissusaa, pilersitsisinnaanermut piginnaasai pisinnaasaalu sammisaqartitsinikkut siuarsarniarlugit, meeqqap takorluuisinnaaneranut, pilersitsisinnaanera nut oqaatsimigullu inerikkiartorneranut kajumissaaqataasunik.
4) Meeqqap misigissutsikkut atugai nukittorsarniarlugit, taamaalilluni meeqqap pitsaasumik toqqissisimasumillu alliartornissaa tapersersorlugu.
5) Akisussaaffeqarneq, ataatsimoorneq peqatigiinnissarlu ilinniartinniarlugit, taamaalilluni aalajangeeqataasinnaatitaanermik, akisussaaqataanermik naammineersinnaanermillu meeqqap ilikkarnissaa periarfissillugu.

 

Ulluunerani paaqqinnittarfiit

3. Meeqqanut inuusuttunullu ulluunerani paaqqinnittarfiit kommuninit pilersinneqarlutillu ingerlanneqassapput.
Imm. 2. Ulluunerani paaqqinnittarfiit meeqqanik arfinilinnik amerlanernilluunniit inissaqartitsisut kommunalbestyrelsimit ingerlatsinissamik isumaqatigiissuteqarfigineqarsimasut paaqqinnittarfittut imminut pigisutut pilersinneqarsinnaapput ingerlanneqarsinnaallutillu.
Imm.3. Naalakkersuisut paaqqinnittarfiit pilersinneqarnissaat, pisatsersornissaat, siulersorneqarnissaat ingerlanneqarnissaallu pillugit, matumani angajoqqaat akiliuteqartarnissaat ilanngullugu, malittarisassanik aalajangersaassapput. Paaqqinnittarfiit nalinginnaasumik aammalu perorsaanikkut ingerlatsinerat Naalakkersuisut nakkutigissavaat.

 

Kommunip aaqqissugaanik ulluunerani angerlarsimaffimmi paaqqinniffiit

4. Kommunip aaqqissugaanik ulluunerani angerlarsimaffimmi paaqqinniffinnik pilersitsisoqarsinnaavoq.
Imm. 2. Imm. 1-imi taaneqareersutut ulluunerani angerlarsimaffimmi paaqqinniffiliorneq kommunalbestyrelsimit akuerineqarsimasussaavoq.
Imm. 3. Kommunalbestyrelsip ulluunerani angerlarsimaffimmi paaqqinniffiup ingerlatsinera nakkutigissavaa.
Imm. 4. Naalakkersuisut kommunalbestyrelsip aaqqissugaanik ulluunerani angerlarsimaffimmi paaqqinniffiit pillugit, matumani angajoqqaat akiliuteqartarnissaat ilanngullugu, malittarisassanik aalajangersaassapput.

 

Nammineq aaqqissuussamik ulluunerani angerlarsimaffimmi paaqqinniffiit

5. Inuup ataatsip meeqqat tallimat tikillugit nammineq aaqqissuussamik ulluunerani angerlar-simaffimmi paarsinissaanik kommunalbestyrelsip akuersissuteqarsinnaavoq.
Imm. 2. Taamaattoq inuk ataaseq kommunimit akuerineqanngitsumik meeqqamik ataatsimik imaluunniit meeqqanik marlunnik 15-it inorlugit ukiulinnik naammineq aaqqissuussamik ulluunerani angerlarsimaffimmi paarsisinnaavoq, kommunili tamatuminnga ilisimatinneqassaaq.
Imm. 3. Kommunalbestyrelsi angerlarsimaffimmi pissutsinik nakkutiginnissaaq, tak. imm. 1 aamma 2.
Imm. 4. Nammineq aaqqissuussamik ulluunerani angerlarsimaffimmi paaqqinninnissamik akuersissummik qinnuteqarneq, kiisalu taakkuninnga nakkutiginninnissaq pillugit, Naalakkersuisut malittarisassanik aalajangersaassapput.

 

Aningaasalersuineq

6. Inatsisartut peqqussutaat manna malillugu ulluunerani meeqqerivinnut, ulluunerani angerlarsimaffimmi paaqqinniffinnut il.il. aningaasartuutit kommuninit akilerneqartassapput.
Imm. 2. Meeqqeriviit sananerinut aningaasartuutinut Namminersornerullutik Oqartussat tapiissuteqarsinnaapput.

 

Misileraanerit

7. Ulluunerani meeqqanut inissanik kommunip aaqqissugaanik misileraalluni pilersitsinerit kommunalbestyrelsip innersuussuteqarneratigut Naalakkersuisut akuerisinnaavaat.
Imm. 2. Kommunip aaqqissugaanik misileraalluni pilersitat sivisunerpaamik ukiut pingasut atuussinnaapput.
Imm. 3. Kommunip aaqqissugaanik misileraalluni pilersitsisimanerup kingunerisai nalunaarusianngorlugit Naalakkersuisunut tunniunneqassapput.

 

Naammagittaalliorsinnaaneq

8. 5-mi imm. 1 naapertorlugu kommunalbestyrelsip aalajangiineri isumaginnittoqarfiup aqunneqarnera aaqqissuussaaneralu pillugit Inatsisartut peqqussutaanni aalajangersakkat naapertorlugit Inunnik Isumaginninnermi Naammagittaalliuuteqartarfimmut naammagittaalliutigineqarsinnaapput.
Imm. 2. Peqqussummi uani aalajangersakkat allat naapertorlugit kommunip aalajangiineri allaf-fissornikkut oqartussaasunut allanut naammagittaalliutigineqarsinnaanngillat.

 

Atortuulersitsineq

9. Inatsisartut peqqussutaat manna 1. januar 2003-imiit atortuutilerpoq.
Imm. 2. Tamatuma peqatigisaanik meeqqanik inuusuttunillu ikiorsiisarneq pillugu Inatsisartut peqqussutaanni nr. 9-mi, 30. oktober 1992-imeersumi 27-miit 32-mut atorunnaarsinneqarput.
Imm. 3. Inatsisartut peqqussutaanni nr. 9-mi, 30. oktober 1992-imeersumi 27-imiit 32-mut atatillugu ulluunerani paqqinnittarfiit il.il. pillugit aalajangersakkat atuutiinnassapput peqqussusiornikkut nalunaarusiornikkulluunniit taarserneqanngikkunik atorunnaarsinneqan-ngikkunilluunniit.




Namminersornerullutik Oqartussat, ulloq 21. maj 2002




Jonathan Motzfeldt

/

Ole Dorph


Siullermeerinninnermut siunnersuut

Siunnersuummut nassuiaatit

Isumaliutissiissut (Aappassaaneerinninneq)

Aappassaaneerinninnermut allannguutissatut siunnersuut (akuerineqartoq)