Inuussutissarsiutigalugu piniarnermut allagartat pillugit Namminersornerullutik Oqartussat nalunaarutaat nr. 2, 3. januar 2002-imeersoq.

 

Piniarneq aallaaniarnerlu pillugit Inatsisartut inatsisaanni nr. 12-imi, 29. oktober 1999-imeersumi, Inatsisartut inatsisaatigut nr. 11, 12. november 2001-imeersukkut allanngortinneqartumi, 6, imm. 1 aamma 2, 12, 13, imm. 1 aamma 17, imm. 2, malillugit aalajangersarneqarput:

 

Atuuffii

1. Nalunaarut una Kalaallit Nunaata nunataani aalisarnikkullu oqartussaaffigisaani inuussutissarsiutigalugu piniarnermut aallaaniarnermullu atuuppoq.
Imm. 2. Nalunaarummi uumasut miluumasut timmissallu tamarmik pineqarput.

 

Inuussutissarsiutigalugu piniarsinnaanermut aallaaniarsinnaanermullu
akuersissuteqartarneq

2. Inuussutissarsiutigalugu piniarnermik aallaaniarnermillu ingerlatsisinnaapput taamaallaat inuit taamaaliornissamut akuerineqarsimasut.
Imm. 2. Akuersissut inuussutissarsiutigalugu piniarsinnaanermut allagartatut tunniunneqartarpoq.

3. Inuussutissarsiutigalugu piniarsinnaanermut allagartaq qinnuteqartoqarneratigut tunniunneqartassaaq inunnut:
1) inuiaqatigiinnut kalaallinut aalajangersimasumik attuumassuteqartunut,
2) Kalaallit Nunaanni najugaqartutut inuit nalunaarsorsimaffianni nalunaarsorsimasunut, Kalaallit Nunaannilu ukiuni kingullerni marlunni najugartutut nalunaarsorneqarsimasunut,
3) Kalaallit Nunaannut tamakkiisumik akileraartartussaasunut, Kalaallit Nunaannullu ukiuni kingullerni marlunni tamakkiisumik akileraartartuusimasunut, aamma
4) piniarnermit, aallaaniarnermit aalisarnermillu isertitaqartunut isertitat tamarmiusut ikinnerpaamik 50%-iisa nalinginik. Angallatit angallatip uuttuutaanut uppernarsaat naapertorlugu 150 BRT-init imaluunniit 210 BT-init anginerusut atorlugit aalisarnermit isertitat tamarmiusut piniarnermit, aallaaniarnermit aalisarnermillu isertitat tamarmiusut naatsorsuusiorneqarnerannut ilanngunneqassanngillat. Qinikkatut pisortanillu toqqakkatut suliassaqartitaanermit aningaasarsiat, inuussutissarsiutigalugu piniartut kattuffiisa/peqatigiiffiisa siulersuisuini sulinermit aningaasarsiat, piniarnermit, aallaaniarnermit aalisarnermillu isertitat tamarmiusut naatsorsorneqarnerannut imaluunniit isertitat ilanngaasigaanngitsut tamarmiusut naatsorsorneqarnerannut ilanngunneqassanngillat. Piniarnermit, aallaaniarnermit aalisarnermillu aalajangersagaq manna malillugu isertitat tamarmiusut naatsorsorneqarnerannut ilaapput isertitat tamarmiusut, akiliuteqarluni aallaaniarneq aalisarnerlu pillugit Namminersornerullutik Oqartussat nalunaarutaat naapertorlugu, akiliuteqarluni aallaaniarnermik aaqqissuinermit imaluunniit akiliuteqarluni aallaaniarnermut atatillugu ilisimasortatut suliaqarnermit pissarsiarineqartut.

4. Aalisarnermut, Piniarnermut Nunaqarfinnullu Pisortaqarfik kommunip inassuteqarneratigut tamatumunnga ilanngunneqartumik allakkatigut najukkami aalisartut piniartullu peqatigiiffiannik tusarniaasoqareerneratigut inuussutissarsiutigalugu piniarsinnaanermut allagartamik immikkut akuersissuteqarsinnaavoq.
Imm. 2. Inuussutissarsiutigalugu piniarnermut allagartartaarnissamut immikkut akuerineqarnissamik qinnuteqaat kommunip allaffiatigoortillugu pisortaqarfimmut ingerlatinneqassaaq.
Imm. 3. Imm. 2 naapertorlugu immikkut akuerineqarneq qaammatisiutit ukiuanni tunniunneqarfigisimasamini atuutissaaq.

5. Inuussutissarsiutigalugu piniarsinnaanermut allagartaq killissarititaasut inatsisini allani aalajangersarneqartut iluanni piniarnissamut aallaaniarnissamullu pisinnaatitsivoq.

 

Inuussutissarsiutigalugu piniarnermut allagartartaarniarluni qinnuteqarneq

6. Inuussutissarsiutigalugu piniarnermut allagartassamik qinnuteqaat immersuiffissamut Aalisarnermut, Piniarnermut Nunaqarfinnullu Pisortaqarfimmit ilusilersugaq atorlugu angerlarsimaffigisami kommunep allaffianut nassiunneqassaaq.
Imm. 2. Qinnuteqaat nassiunneqartinnagu kommunip najugarisap najukkami aalisartut piniartullu peqatigiiffiannut tusarniaassutigalugu saqqummiussinnaavaa. Qinnuteqaat kommunimit najugarisamit uppernarsarlugu atsiorneqassaaq, tassani qularnaarneqassalluni 3 malillugu piumasaqaatit naammassineqarsimanerat.
Imm. 3. Kommunimit najugarisamit isumaqarfigineqarpat qinnuteqartup 3-mi piumasaqaatit naammassisimanngikkai, taamaattumillu qinnuteqaat uppernarsarneqaranilu Aalisarnermut, Piniarnermut Nunaqarfinnullu Pisortaqarfimmut nassiunneqanngippat, taama pisoqarnera kommunip allakkatigut qinnuteqartumut nalunaarutigissavaa, assilinera pisortaqarfimmut nassiullugu.

 

Inuussutissarsiutigalugu piniarnermut allagartap atorsinnaassusia

7. Inuussutissarsiutigalugu piniarnermut allagartaq tassaavoq Aalisarnermut, Piniarnermut Nunaqarfinnullu Pisortaqarfiup giro atorlugu akiliiffissiaata akiliisimanermut uppernarsaatitaa.
Imm. 2. Inuussutissarsiutigalugu piniarnermut allagartap tunniunneqarnerani 30 kr.-inik akili-uteqartitsisoqassaaq.
Imm. 3. Inuussutissarsiutigalugu piniarnermut allagartaq taamaallaat atuuppoq akiliisimaneq uppernarsarsimagaangat atuuttarlunilu qaammatisiutit ukiuat allagartap atuuffissaa naallugu. Akiliisimanermut uppernarsaat tassaavoq giro atorlugu akiliiffissami aningaaseriviup allakkerisarfiulluunniit naqitsisaa imaluunniit allatut iliorluni paatsoorneqarsinnaanngitsumik qularnaatsumillu nalunaarsuineq, giro atorlugu akiliiffissami akileqquneqartup 30 kr.-inik aningaasartaqartup akilersimaneranut uppernarsaatitut.
Imm. 4. Aalisarnermut, Piniarnermut Nunaqarfinnullu Pisortaqarfiup inuussutissarsiutigalugu piniarsinnaanermut allagartaq tunniuteriigaq atorunnaarsissinnaavaa inuussutissarsiutigalugu piniarnermut allagartaqarnissamut piumasaqaatit tunniussinermi naammassineqarsimanngippata imaluunniit tunniussinissamut piumasaqaatit naammassineqarsinnaajunnaarpata.

8. Inuussutissarsiutigalugu piniarnermut allagartamik piginnittoq aalajangersimasumik akis-sarsiaqarluni suliffittaarpat taamaalillunilu 3-mi imm. 1-imi nr. 4 aalajangersakkat naammassisinnaajunnaarlugit imaluunniit allatut inuussutissarsiutigalugu piniarnermik aallaaniarnermillu ingerlatsinerminik unitsitsippat, tamanna ullut 30-t qaangiutsinnagit kommunimut najugarisamut nalunaarutigineqassaaq. Allanngortoqarneranik paasissutissat Aalisarnermut, Piniarnermut Nunaqarfinnullu Pisortaqarfimmut ingerlateqqinneqassapput, taakku pineqartoq sunngiffimmi aallaaniarsinnaanermut allagartat pillugit Namminersornerullutik Oqartussat nalunaarutaat malillugu aallaaniarnermut allagartartaarnissaanik neqeroorfigissavaat, 7, imm. 4 takuuk.
Imm. 2. Kommuni najukkami aalisartut piniartullu peqatigiiffiannik tusarniaaviginnereersimanermi kingorna isumaqarpat inuup 3 malillugu inuussutissarsiutigalugu piniarnermut allagartaqarnissamut piumasaqaataasut naammassisinnaajunnaarsimagai, taava kommunip inuk allakkatigut nalunaarfigissavaa pisortaqarfillu pissutsit allanngornerannik nalunaarfigalugu.

9. Inuussutissarsiutigalugu piniarnermut allagartaq piginnittumuinnaq tunngavoq allamullu tunniuteqqusaanani, tuneqqusaanani atukkiuteqqusaananiluunniit.
Imm. 2. Inuussutissarsiutigalugu piniarnermut allagartaq kinaassutsimut uppernarsaammut atuuttumut ilanngullugu piniarnermi aallaaniarnermilu nassarneqartassaaq nakkutilliinermullu atatillugu politiit, piniarnermik aalisarnermillu nakkutilliisut, taakku ikiortaasa imaluunniit inuit tamatumunnga piginnaatitaasut piumasaqarnerisigut takutinneqartassalluni.

 

Pisanik nalunaaruteqartarneq

10. Inuussutissarsiutigalugu piniarnermut allagartalik kinaluunniit pisussaavoq pisaminik nalunaarsuissalluni. Qaammatit naaneri tamaasa pisarisimasat naatsorsuusiorneqartassapput. Ukiumut pisarisimasat pillugit kisitsisit, imm. 3 naapertorlugu piffissap pisanik nalunaarsuiffiusussap naanerani, pisanik nalunaarsuiffissamut Aalisarnermut, Piniarnermut Nunaqarfinnullu Pisortaqarfimmit suliarineqarsimasumut naatsorsuusiorneqassapput, oktobarillu 15-iat tikitsinnagu allakkerivikkut akeqanngitsumik utertinneqassallutik.
Imm. 2. Piffissaq pisanik nalunaarsuiffiusussaq tassaavoq oktobarip aallaqqaataaniit septembarip 30-iannut.
Imm. 3. Inuussutissarsiutigalugu piniarsinnaanermut allagartap taarserneqarnissaanut tunngaviussaaq piffissamut pisanik nalunaarsuiffiusussamut qaangiuttumut pisanik nalunaarsuilluni immersuiffissap immersorneqarsimasup nassiunneqarsimanissaa aamma inuup inuussutissarsiutigalugu piniartutut inissisimanerata atorunnaarsimannginnera, tak. 8, imm. 2.
Imm. 4. Inuussutissarsiutigalugu piniarnermut allagartartaarnissamut qinnuteqaatit suliarineqassanngillat pisanik nalunaarsuiffik, piffissami pisanik nalunaarsuiffiusussaatitaaffimmi siuliani pisanik nalunaarsuiffimmik immersuiffissaq immersorneqarluni nassiunneqarsimanngippat.

 

Immikkut akuersissuteqartarneq

11. Aalisarnermut, Piniarnermut Nunaqarfinnullu Pisortaqarfik nalunaarummi matumani maleruagassat immikkut saneqqunneqarnissaannut akuersissuteqarsinnaavoq tamanna ilisimatuutut misissuinerit pisariaqalersippassuk.

 

Pineqaatissiissutit

12. 2-imik aamma 9-imi imm. 1-imik 2-millu unioqqutitsisut akiliisitsinikkut pineqaatissinneqarsinnaapput.
Imm. 2. 2-mik aamma 9-imi imm. 2-imik unioqqutitsisoqartillugu pisat taakkuluunniit na-lingat naalagaaffiup karsianut iluaqutissanngorlugit arsaarinnissutigineqarsinnaapput.

 

Atuutilerfia

13. Nalunaarut atuutilerpoq ulloq 17. januar 2002.
Imm. 2. Tamatumunnga peqatigitillugu Inuussutissarsiutigalugu piniarnermut allagartat pillugit Namminersornerullutik Oqartussat nalunaarutaat nr. 4, 1. februar 2000-imeersoq atorunnaarsinneqarpoq.




Namminersornerullutik Oqartussat, ulloq 3. januar 2002.




Hans Enoksen

/

Gedion Jeremiassen