Inuussutissarsiutigalugu piniarnermut allagartat pillugit Namminersornerullutik Oqartussat nalunaarutaat nr. 4, 1. februar 2000-imeersoq.
Piniarneq aallaaniarnerlu pillugit Inatsisartut inatsisaanni nr. 12-imi, 29. oktober 1999-imeersumi § 4, imm. 4, § 6, imm. 1 aamma 2, § 12, § 13, imm. 1 aamma § 17, imm. 2, malillugit aalajangersarneqarput:
Atuuffii
§ 1. Nalunaarut una Kalaallit Nunaata nunataani aalisarnikkullu oqartussaaffigisaani inuussutissarsiutigalugu piniarnermut aallaaniarnermullu atuuppoq.
Imm. 2. Nalunaarummi uumasut miluumasut timmissallu tamarmik pineqarput.
Inuussutissarsiutigalugu piniarsinnaanermut aallaaniarsinnaanermullu
akuersissuteqartarneq
§ 2. Inuussutissarsiutigalugu piniarnermik aallaaniarnermillu ingerlatsisinnaapput taamaallaat inuit taamaaliornissamut akuerineqarsimasut.
Imm. 2. Akuersissut inuussutissarsiutigalugu piniarsinnaanermut allagartatut tunniunneqartarpoq.
§ 3. Inuussutissarsiutigalugu piniarsinnaanermut allagartaq qinnuteqartoqarneratigut tunniunneqartassaaq inunnut:
1) inuiaqatigiinnut kalaallinut aalajangersimasumik attuumassuteqartunut,
2) Kalaallit Nunaanni najugaqartutut inuit nalunaarsorsimaffianni nalunaarsorsimasunut, Ka-laallit Nunaannilu inuit nalunaarsorsimaffianni ukiuni kingullerni marlunni nalunaarsorsimasunut,
3) Kalaallit Nunaannut tamakkiisumik akileraartartussaasunut, Kalaallit Nunaannullu ukiuni kingullerni marlunni tamakkiisumik akileraartartuusimasunut, aammalu
4) piniarnermit, aallaaniarnermit aalisarnermillu isertitaqartunut isertitat tamarmiusut ikinnerpaamik 50%-iisa nalinginik. Angallatit angallatip uuttuutaanut uppernarsaat naapertorlugu 150 BRT-init imaluunniit 210 BT-init anginerusut atorlugit aalisarnermit isertitat tamarmiusut piniarnermit, aallaaniarnermit aalisarnermillu isertitat tamarmisut naatsorsuusiorneqarnerannut ilanngunneqassanngillat. Qinikkatut pisortanillu toqqakkatut suliassaqartitaanermit aningaasarsiat, inuussutissarsiutigalugu piniartut kattuffiisa/peqatigiiffiisa siulersuisuini sulinermit aningaasarsiat, piniarnermit, aallaaniarnermit aalisarnermillu isertitat tamarmiusut naatsorsorneqarnerannut imaluunniit isertitat ilanngaasigaanngitsut tamarmiusut naatsorsorneqarnerannut ilanngunneqassanngillat.
Imm. 2. Inuit tjenestemanditut pensionisiallit, isumaginninnikkut siusinaartumik pensionisiallit imaluunniit isumaginninnikkut utoqqalinermi pensionisiallit inuussutissarsiutigalugu piniarsinnaanermut allagartartaarsinnaanngillat.
Imm. 3. Meeqqat aqqaneq marluk ataallugit ukiullit, meeqqat atuartut ilinniagaqartullu inuussutissarsiutigalugu piniarsinnaanermut allagartartaarsinnaanngillat.
§ 4. Naalakkersuisunut ilaasortap kommunip inassuteqarneratigut tamatumunnga ilanngunneqartumik allakkatigut najukkami aalisartut piniartullu peqatigiiffiannik tusarniaasoqareerneratigut inuussutissarsiutigalugu piniarsinnaanermut allagartamik immikkut akuersissuteqarsinnaavoq;
- Qinnuteqartup § 3-mi, imm. 1, nr. 1-3 nammassisimappagit aamma siunissami § 3 imm. 1-mi, nr. 4-mi piumasaqaat eqqortikkumappagu.
- Qinnuteqartoq § 3, imm. 2-mi taaneqartutut pensionisiaqalernermini inuussutissarsiutigalugu piniarnermik aallaaniarnermillu ingerlataqarsimappat.
- Qinnuteqartoq Kalaallit Nunaanniit ilinniagaqarluni pissuseqataanilluunniit peqquteqarluni qimagussimasimappat aammalu Kalaallit Nunaannut attuumassuteqarnera aallaavigalugu tamanna pissusissamisoortutut isigineqarpat.
Imm. 2. Inuussutissarsiutigalugu piniarnermut allagartartaarnissamut immikkut akuerineqarnissamik qinnuteqaat kommunip allaffiatigoortillugu Naalakkersuisunut ilaasortamut ingerlatinneqassaaq.
Imm. 3. Imm. 2 naapertorlugu immikkut akuerineqarneq qaammatisiutit ukiuanni tunniunneqarfigisimasamini atuutissaaq.
§ 5. Inuussutissarsiutigalugu piniarsinnaanermut allagartaq killissarititaasut inatsisini allani aalajangersarneqartut iluanni piniarnissamut aallaaniarnissamullu pisinnaatitsivoq.
Inuussutissarsiutigalugu piniarnermut allagartartaarniarluni qinnuteqarneq
§ 6. Inuussutissarsiutigalugu piniarnermut allagartassamik qinnuteqaat qinnuteqarnermi im-mersuiffissaq pisortaqarfimmit ilusilersugaq atorlugu pisortaqarfimmut nassiunneqassaaq.
Imm. 2. Qinnuteqaat nassiunneqartinnagu najukkami aalisartut piniartullu peqatigiiffiannut tusarniaassutigalugu peqatigiiffimmit oqaaseqarfigineqartussanngorlugu saqqummiunneqassaaq. Tamatuma kingorna qinnuteqaat kommunimit najugarisamit uppernarsarlugu atsiorneqassaaq, tassani qularnaarneqassalluni § 3 imaluunnit § 4, imm. 1 malillugit piumasaqaatit naammassineqarsimanersut.
Imm. 3. Kommunimit najugarisamit isumaqarfigineqarpat qinnuteqartup § 3-mi piumasaqaatit naammassisimanngikkai, taamaattumillu qinnuteqaat uppernarsarneqaranilu pisortaqarfimmut nassiunneqanngippat, taama pisoqarnera kommunip allakkatigut qinnuteqartumut aalajangiisoqarnerata kinguninnguatigut nalunaarutigissavaa.
Inuussutissarsiutigalugu piniarnermut allagartap atorsinnaassusia
§ 7. Inuussutissarsiutigalugu piniarnermut allagartaq tassaavoq pisortaqarfiup giro atorlugu akiliiffissiaata akiliisimanermut uppernarsaatitaa.
Imm. 2. Inuussutissarsiutigalugu piniarnermut allagartap tunniunneqarnerani 30 kr.-inik akili-uteqartitsisoqassaaq.
Imm. 3. Inuussutissarsiutigalugu piniarnermut allagartaq taamaallaat atuuppoq akiliisimaneq uppernarsarsimagaangat atuuttarlunilu qaammatisiutit ukiuat allagartap atuuffissaa naallugu. Akiliisimanermut uppernarsaat tassaavoq giro atorlugu akiliiffissami aningaaseriviup allakkerisarfiulluunniit naqitsisaa imaluunniit allatut iliorluni paatsoorneqarsinnaanngitsumik qularnaatsumillu nalunaarsuineq, giro atorlugu akiliiffissami akileqquneqartup 30 kr.-inik aningaasartaqartup akilersimaneranut uppernarsaatitut.
Imm. 4. Pisortaqarfiup inuussutissarsiutigalugu piniarsinnaanermut allagartaq tunniuteriigaq atorunnaarsissinnaavaa inuussutissarsiutigalugu piniarnermut allagartaqarnissamut piumasaqaatit tunniussinermi naammassineqarsimanngippata imaluunniit tunniussinissamut piumasaqaatit naammassineqarsinnaajunnaarpata.
§ 8. Inuussutissarsiutigalugu piniarnermut allagartamik piginnittoq aalajangersimasumik akis-sarsiaqarluni suliffittaarpat taamaalillunilu § 3-mi imm. 1-imi nr. 4, § 4, imm. 1-milu aalaja-ngersakkat naammassisinnaajunnaarlugit imaluunniit allatut inuussutissarsiutigalugu piniarnermik aallaaniarnermillu ingerlatsinerminik unitsitsippat, tamanna ullut 30-t qaangiutsinnagit kommunimut najugarisamut nalunaarutigineqassaaq. Allanngortoqarneranik paasissutissat naalakkersuisunut ingerlateqqinneqassapput, taakku pineqartoq sunngiffimmi aallaaniarsinnaanermut allagartat pillugit Namminersornerullutik Oqartussat nalunaarutaat malillugu aallaaniarnermut allagartartaarnissaanik neqeroorfigissavaat, § 7, imm. 4 takuuk.
Imm. 2. Kommuni najukkami aalisartut piniartullu peqatigiiffiat tusarniaavigereerlugu isumaqarpat inuup § 3 imaluunniit § 4, imm. 1 malillugit inuussutissarsiutigalugu piniarnermut allagartaqarnissamut piumasaqaataasut naammassisinnaajunnaarsimagai, taava kommunip inuk aamma Inuussutissarsiornermut Pisortaqarfik pissutsit allanngornerannik allakkatigut nalunaarfigissavai. Tamatuma kingornatigut sunngiffimmi aallaaniarsinnaanermut allagartaq inummut neqeroorutigineqartussanngussaaq, § 7, imm. 4 naapertorlugu.
§ 9. Inuussutissarsiutigalugu piniarnermut allagartaq piginnittumuinnaq tunngavoq allamullu tunniuteqqusaanani, tuneqqusaanani atukkiuteqqusaananiluunniit.
Imm. 2. Inuussutissarsiutigalugu piniarnermut allagartaq kinaassutsimut uppernarsaammut atuuttumut ilanngullugu piniarnermi aallaaniarnermilu nassarneqartassaaq nakkutilliinermullu atatillugu politiit, piniarnermik aalisarnermillu nakkutilliisut, taakku ikiortaasa imaluunniit inuit tamatumunnga piginnaatitaasut piumasaqarnerisigut takutinneqartassalluni.
Pisanik nalunaaruteqartarneq
§ 10. Inuussutissarsiutigalugu piniarnermut allagartalik kinaluunniit pisussaavoq pisaminik nalunaarsuissalluni. Qaammatit naaneri tamaasa pisarisimasat naatsorsuusiorneqartassapput. Ukiumut pisarisimasat pillugit kisitsisit, imm. 3 naapertorlugu piffissap pisanik nalunaarsuiffiusussap naanerani, pisanik nalunaarsuiffissamut pisortaqarfimmit suliarineqarsimasumut naatsorsuusiorneqassapput, oktobarillu 15-iat tikitsinnagu allakkerivikkut akeqanngitsumik utertinneqassallutik.
Imm. 2. Piffissaq pisanik nalunaarsuiffiusussaq tassaavoq oktobarip aallaqqaataaniit septembarip 30-iannut.
Imm. 3. Inuussutissarsiutigalugu piniarsinnaanermut allagartaq ingerlaannartumik taarserneqassaaq piffissamut pisanik nalunaarsuiffiusussamut qaangiuttumut pisanik nalunaarsuilluni immersuiffissaq immersorneqarsimasoq nassiunneqarpat aamma inuup inuussutissarsiutigalugu piniartutut inissisimanera atorunnaarsimanngippat, tak. § 8, imm. 2.
Immikkut akuersissuteqartarneq
§ 11. Naalakkersuisunut ilaasortap nalunaarummi matumani maleruagassat immikkut saneqqunneqarnissaannut akuersissuteqarsinnaavoq tamanna ilisimatuutut misissuinerit pisariaqalersippassuk.
Pineqaatissiissutit
§ 12. § 2-imik, § 8-imi imm. 1-imik aamma § 9-imi imm. 1-imik 2-millu unioqqutitsisut aki-liisitsinikkut pineqaatissinneqarsinnaapput.
Imm. 2. § 2-mik aamma § 9-imi imm. 2-imik unioqqutitsisoqartillugu pisat taakkuluunniit na-lingat naalagaaffiup karsianut iluaqutissanngorlugit arsaarinnissutigineqarsinnaapput.
Atuutilerfia
§ 13. Nalunaarut atuutilerpoq ulloq 1. februar 2000.
Imm. 2. Tamatumunnga peqatigitillugu Inuussutissarsiutigalugu piniarnermut allagartat pillu-git Namminersornerullutik Oqartussat nalunaarutaat nr. 34, 29. december 1998-imeersoq ato-runnaarsinneqarpoq.
Namminersornerullutik Oqartussat, ulloq 1. februar 2000.
Simon Olsen / Jørn Birk Olsen