Siusinaartumik pensionisiat, piginnaanngorsaaqqinnermik inummullu tapit il.il. pillugit Namminersornerullutik Oqartussat nalunaarutaat nr. 3, 10. januar 2000-imeersoq.

 

Pisortanit pensionisiat pillugit Inatsisartut peqqussutaanni nr. 10-mi 30. oktober 1998-imeersumi § 16 imm. 1 aamma 2, § 20, § 22, § 25 imm. 4, § 27 imm. 2, § 29 imm. 4, § 30 imm. 3, § 31 imm. 4, § 33 imm. 4 aamma § 38 imm. 2 tunngavigalugit makku aalajangersarneqarput:

 

Kapitali 1.

Siusinaartumik pensionisianik pisartagaqalersitsineq

§ 1. Inuit inuussutissarsiorsinnaassutsimikkut ataavartumik pisinnaasakillisimasut, tak. pisortanit pensionisiat pillugit Inatsisartut peqqussutaanni nr. 10-mi 30. oktober 1998-imeersumi § 15 imm. 1, pisortanit siusinaartumik pensionisianik pisartagaqalersinneqarsinnaapput, imaattoqarpat:

• Ukioqqortussuseq, peqqissuseq najukkami periarfissanut naleqqiullugu qinnuteqartoq suliffeqarnermut naleqqussarneqarsinnaanngippat naleqqussaqqinneqarsinnaanngippalluunniit,
• qinnuteqaateqartup inooqatigiinnermi atugai pissutaappata, matumani sivisuumik suliffissaaleqisimaneq, inooqatigiinnermi inuttut ilaqutariissutsikkulluunniit atukkatigut nanertuuteqarneq ilanngullugit eqqarsaatigalugit suliffeqarnermut naleqqussarneqarsinnaanngippat naleqqussaqqinneqarsinnaanngippalluunniit, imaluunniit
• qinnuteqaateqartup toqusoqarneranut inooqatigiikkunnaarnermulluunnit atatillugu inuttut atukkami allanngornerisigut pilersorneqarnerminut tunngavigisani annaappagu, tamatumalu kingorna pineqartoq suliffeqarnermut naleqqussarneqarsinnaanani naleqqussaqqinneqarsinnaananiluunniit.

Imm. 2. Inuit 50-it inorlugit ukiullit inooqatigiinnermi pissutsit pissutigalugit siusinaartumik pensionisiaqalersitaanissamik qinnuteqaateqartut, tak. imm. 1 nr. 2 -3, taamaallat akuerineqarsinnaapput pisut immikkut illuinnartut tamanna ajornartinngippassuk. Inuup peqqissusianut tunngasut, pineqartup ilinniagaqarnermigut nukissaqassussianut sanilliullugu qassinik ukioqarnera aamma suliffeqarnermut attuumassuteqarnera pingaartillugit isiginiarneqartassapput.

§ 2. Aammattaaq siusinaartumik pensionisiaqalersitsisoqassappat qinnuteqartoq najugarivitamini piginnaanngorsaqqinneqartariaqarsimanermi kingorna suliffimmik naleqquttumik neqeroorfigineqarsinnaasimannginnissaa piumasaqaataavoq.

 

 

Imm. 2. Nalunaarummi matumani najugarivitamik oqarnermi pineqartoq tassaavoq najugaq qinnuteqaateqartup pensionisiaqalersitaanissaminik qinnuteqaamminik tunniussinermi nalaani najugarisaa, imaluuniit qinnuteqaateqartup piginnaanngorsaqqinneqarnermi nalaani pensionisiaqalersinneqarnissamilluunniit suliassap suliarineqarnerata nalaani najugaqarfigilersimassaa.

§ 3. Inuit Kalaallit Nunaanni najugaqavissut Nunattali avataanut pineqaatissinneqarnermikkut inissinneqarallarsimasut imaluunniit katsorsarneqarnissamut atatillugu unitsinneqarallarsimasut, siusinaartumillu pensionimik qinnuteqartut, qinnuteqaatertik kommunimi najugarivitaminni kommunalbestyrelsimut ingerlatissavaat.

Imm. 2. Inissinneqarnermi imaluunniit unitsinneqarnermi tak. imm. 1, siusinaartumik pensionit §§ 13 aamma 14 naapertorlugit tunniunneqassapput, tassanilu inissiinerup imaluunniit unitsinneqarnerup ullua aalajangiisuussaaq pensionit tunniunneqartussat naatsorsornissaannut kinguneqarsinnaallunilu pensionit tunniunneqartussat millisinneqarnissaannut.

§ 4. Siusinaartumik pensionisiaqalersitaanissamik qinnuteqaammik kommunalbestyrelsip suliarinnilernerani paasissutissat makku tiguneqareersimassapput:

• nakorsap uppernarsaatitut allagartaliussaa, kommunalbestyrelsimit akilerneqartussaq,
• suliffissarsiuussisarfiup uppernarsaatitut allagartaliussaa,
• isumaginninnermut tunngasut pillugit nalunaarusiaq, matumani piginnaanngorsaaqqittoqarsimappat tamanna pillugu allaaserisaq ilanngullugu, aamma
• oqartussat assigiinngitsunik suliaqartut suleqatigiiffiata inassuteqaataa.

Imm. 2. Suliassani inunnut ataasiakkaanut tunngassuteqartuni oqartussat allat akuliuffigisimasaanni oqartussat taakku oqaaseqaataat aamma pissarsiarineqarsimassapput.

§ 5. Pineqartoq siusinaartumik pensionisiaqalersinneqaruni isertitanut tunngasut qanoq issusiat apeqqutaatinnagu pensionisianik ikinnerpaaffissaminniittunik pisinnaatitaajuaannarpoq, taakkulu aningaasartat pisortanit pensionisiat pillugit Aningaasanut inatsimmi aalajangersarneqarsimasut amerlanerpaaffiisa 20%-eraat.

 

Kapitali 2.

Piginnaanngorsaaqqinneq suliffiillu sulerulunnanngitsut

§ 6. Piginnaanngorsaaqqinnissaq pillugu piviusorsiortumik pilersaarusiap piviusunngortin-niarneqarnerani qinnuteqaateqartoq pinngitsoorani peqatassaaq. Pilersaarusiaq taanna qinnuteqaateqartup qassinik ukioqarnera, peqqissusia piginnaanngorsaqqinneqarnermilu kingorna suliffeqalernissaminut periarfissai eqqarsaatigilluarlugit suliarineqassaaq.

 

Imm. 2. Piginnaanngorsaaqqinnisamut pilersaarusiaq neqeroorutinik makkuninnga imaqassaaq:

• ilinniarnissamut ilinniaqqinnissamulluunniit ikiorsiineq, imaluunniit
• suliamik allamik suliaqalernissamut ilinniartinneqarneq, imaluunniit
• sungiusarneqarneq, pineqartoq innarluuteqarpat ajoqusersimasuuppalluunniit tamatuma kingunerisaanik oqilisaasinnaasoq.

Imm. 3. Kommunalbestyrelsi isumaqaruni piginnaanngorsaaqqinnerup kingorna qinnuteqaateqartoq suliffeqaleqqinnissaminut suliffimmilluunniit sulerulunnanngitsumik pissarsinissaminut periarfissaqanngitsoq kommunalbestyrelsi piginnaanngorsaaqqinnissamut qaqutigooraluartumik pilersaarusiunngitsoorsinnaavoq. Taamatut aalajangertoqarpat tamanna siusinaartumik pensionisiaqalersitaanissamik qinnuteqaatip suliarineqarnerani takuneqarsinnaassaaq.

§ 7. Qinnuteqaateqartoq piginnaanngorsaaqqinnermut pinngitsoorani peqataassaaq, piginnaanngorsaaqqinneq taassumaluunniit ilai najugarivitap avataani ingerlanneqassagaluarpataluunniit, tamanna inuttut ilaqutariittulluunniit atukkat eqqarsaatigalugit erseqqissumik naleqqutinngitsutut inngippat.

§ 8. Suliffik sulerulunnanngitsoq matumani tassaatinneqarpoq suliffik pineqartup inuussutissarsiorsinnaassutsimigut pisinnaasakillisimanera immikkut eqqarsaatigalugu suliffigitinneqarsinnaasoq, ass. piffissap ilaannaani sulisitsisarnikkut, suliffiup immikkut atortulersorneqarneratigut sulialluunniit imaasa immikkut aaqqissuunneqarnerisigut.

Imm. 2. Sulerulunnanngitsumik suliffeqartinneqartoq taassuma saniatigut siusinaartumik pensionisiaqartinneqarsinnaavoq.

Imm. 3. Suliffik sulerulunnanngitsoq piffissap ilaannaanut suliffittut atortinneqarpat, tassalu sap. akunneranut nal. akunneri 25-it inorpagit, pensionisiassat amerlassusissaat taakku tunngavigalugit naatsorsorneqarsinnaapput, isertitaqqortussuseq tunngavigalugu naatsorsornagit, tak. Inatsisartut peqqussutaanni nr. 10-mi 30. oktober 1998-imeersumi kapitali 8, taamaattorli saniatigut isertitat suliffimmut sulerulunnanngitsumut attuumassuteqanngitsut naatsorsuinermi tamakkiisumik suli ilanngunneqartassapput.

Imm. 4. Taamaattorli siusinaartumik pensionisiallip pensionisiai isertitaqqortussuseq tunngavigalugu ikilineqarpata pensionisiat aningaasartaasa amerlanerpaaffiisa 20%-iinik tunineqarnissani pensionisiaqartup pisinnaatitaaffigiuaannarpaa, tak. § 5.

 

Kapitali 3.

Pensionisiat amerlassusissaasa naatsorsorneqartarnerat aaqqivigineqartarnerallu

§ 9. Piffissami pensionisiaqalersitsiviusumi pensionisiat amerlassusissaat piffissamit pensionisiaqalersitsiviusumit pensionisianik tunniussinissap tungaanut naatsorsorneqassapput, tak. § 11, piffissami tassani isertitarpiatut naatsorsorneqarsimasut aallaavigalugit.

Imm. 2. Piffissamut pensionisianik tunniussinermit siullermit ukiup tulliuttup naanissaata tungaanut piffissami tassani akileraaruteqaataasussatut isertitarissangatitanik ukiumut ilivitsumut isertitarissangatinneqartutut naatsorsuineq tunngavigalugu pensionisiat amerlassusilerlugit tunniunneqartassapput.

Imm. 3. Pensionisiaqartup inuttut aningaasaqarnermigulluunniit atugaasa annertuumik ataavartumillu allanngornerat tunngavigalugu pensionisiat aaqqiivigineqarneranni pensionisiaqartup ukiup taassuma sinnerani akileraaruteqaataasussatut isertitarissangasai tunngavigalugit naatsorsuisoqartassaaq, qaammatinut aqqaneq-marlunnut ukiumullu tulliuttumut naatsorsuullugit.

Imm. 4. Katissimasunut aappariinnullu katinnermut assingusumik inooqatigiittunut pensionisiat tunniunneqartartut aaqqiivigineqartarnerat pisassaaq aappaariit marluullutik aningaasarsiat akileraaruteqaataasussat aallaavigalugit, takuuk imm. 1-3.

§ 10. Pensionisiat amerlassusiisa kiisalu isertitaqqortussuseq tunngavigalugu aaqqiissuteqarnerup kingorna pensionisiat amerlassusiisa allannguutaat Isumaginninnermut Pisortaqarfiup kaajallaasitakkut tamanut nalunaarutigisassavai. Aningaasat taakku amerlassusii allanngorpata ukiumi taakku atuuffissaanni januaarip aallaqqaataa nallertinnagu tamanut saqqummiunneqartassapput, Inatsisartut Aningaasanut inatsisaat atuuttoq tunngavigalugu.

§ 11. Pensionisiaqartoq Kalaallit Nunaanni tamakkiisumik akileraartussaatitaangippat pensionisiaqartup pisortani oqartussanit pensionisiai ilanngunnagit ukiumut isertitai tamaasa ilanngullugit saniatigut isertitatut naatsorsuunneqassapput. Pensionisiaqartup Kalaallit Nunaanni tamakkiisumik akileraartussaatitaanngitsup Kalaallit Nunaanni Kalaallillu Nunaata avataani decemberip 31-iata tungaanut isertitani ukiumoortumik naatsorsuutit atorlugit uppernarsaasersortassavai. Uppernarsaatit taakku ukiumi tulliuttumi kingusinnerpaamik septemberip aallaqqaataa nallertinnagu kommunimi najugarivitameeriissapput Isumaginninnermulluunniit Pisortaqarfimmeeriissaalutik, uppernarsaatit taakku ulloq taanna nallertinnagu pissarsiarineqarsinnaanginnerat pensionisiaqartup malugeqqullugu oqaatigereersimanngippagu. Taamatut pisoqarpat paasissutissanik tunniussinissamut piffissaliussaq nutaaq Isumaginninnermut Pisortaqarfiup kommunilluunniit najugarivitap aalajangersassavaa.

Imm. 2. Isertitat uppernarsaasersukkat tunngavigalugit aaqqiissuteqarneq ukiumi tulliuttumi siullermi januaarip aallaqqaataa aallarnerfigalugu atuutilertassaaq.

§ 12. Pensionisiaqartoq nunani allani oqartussanit pensionisiaqartinneqartarpat pensionisiat taakku saniatigut isertitatut naatsorsuunneqassanngillat, pensionisiaqartup pisortanit pensionisiai taakku Inatsisartut peqqussutaanni § 6 tunngavigalugu iluarsiivigineqarsimappata.

 

Kapitali 4.

Napparsimmavimmi uninnganermut, ulloq unnuarlu paaqqinniffimmut inissinneqarnermut imaluunniit tigummigallagassanngortinneqarnermut atatillugu pensionisiat

§ 13. Pensionisiaqartoq Kalaallit Nunaanni ulloq unnuarlu paaqqinniffimmut Pisortanit pensionisiat pillugit Inatsisartut peqqussutaat nr. 10, 30. oktober 1998-imeersumi § 31, imm. 1-mi taaneqartuni takuuk § 31, imm. 4 allaanerusunut inissinneqarpat, Kalaallit Nunaanni imaluunniit Nunatta avataanut napparsimmavimmut unitsinneqarpat, eqqartuussiviup aalajangiineratigut eqqarsartaatsikkut napparsimmavimmut inissinneqarpat imaluunniit pinerluuteqarsimasunik isumaginnittoqarfimmit Kalaallit Nunaannut Danmarkimulluunniit inissinneqarpat, pensionit allannguuteqartinnagit tunniunneqartassapput, pensionisiaqartoq katissimallugu aapparisaminut, nammineq meeqqaminut imaluunniit pensionisiaqartoq katissimanermut assingusumik ukiumi ataatsimi sivisunerusumilluunniit aalajangersimasumik inooqatigisaminut pilersuisussaatitaappat.

Imm. 2. Aammattaaq pensionisiallit Kalaallit Nunaanni imaluunniit Nunatta avataanut napparsimmavimmut unitsinneqarpata pineqartullu ineqarnermut aalajangersimasumik aningaasartuuteqartarpata, pensionit aningaasartaat allannguuteqartinnagit tunniunneqartaannassapput.

Imm. 3. Napparsimmavimmut unitsinneqartoq pineqaatissinneqarluniluunniit inissinneqartussanngorlugu eqqartuunneqartoq katissimallugu aapparisaminut, nammineq meeqqaminut pilersuisussaatitaanngippat imaluunniit ukioq ataaseq sivisunerusumilluunniit katinnermut assingusumik inooqateqarsimanngippat - qaammatit arfinillit uninngareernikkut inissinneqareernikkulluunniit - qaammatip tulliup aallaqqaataa aallarnerfigalugu pensionisiat 20%-ii tunniunneqartalissapput, tak. § 5.

Imm. 4. Pensionisiaqartup angerlartinneqarnerata kingorna qaammatip tulliup aallaqqaataa aallarnerfigalugu pensionisiat isertitaqqortussuseq tunngavigalugu tamakkiisumik aaqqiissuteqarfigineqarsimasut tunniunneqartaleqqissapput.

Imm. 5. Pisortani oqartussat kaasarfimmiuliisimappata, akissarsiaqartitsisimappata imaluunniit sammisassaqartitsinermut atatillugu aningaasarsiaqartitsisimappata taakku pensionisianit ilanngaatigineqassapput, taamaattorli pensionisiat aningaasartaasa ikinnerpaamik 20%-ii pensionisiaqartup tigussallugit, tak. § 5.

Imm. 6. Meeqqanut tapinik tunniussisoqartarsimappat taakku allannguuteqartinnagit tunniunneqartaannassapput, tamaatuttaarlu pensionisiaqartoq pisariaqartitsinini tunngavigalugu naliliiffigineqareerluni inummut tapinik pisinnaatitaassalluni, matumani uninnganerup inissinneqarnerulluunniit nalaani inigisaq pigiinnarniarlugu aningaasartuutaasinnaasut ilanngullugit eqqarsaatigalugit.

§ 14. Pensionisiaqartoq eqqartuussiviup aalajangiineratigut tigummisassanngortinneqarpat pensionisiaqartup qaammatit arfinillit tigummineqareernerata kingorna qaammatip tulliuttup aallaqaataa aallarnerfigalugu pensionisiat allanngortinneqassapput, pensionisiaqartoq tigummineqarnermi nalaani katissimallugu aapparminut, nammineq meeqqaminut, imaluunniit katinnermut assingusumik inooqatigisaminut pilersuisussaatitaanngippat, inigisaniluunniit pigiinnarniarlugu aalajangersimasumik aningaasartuuteqartanngippat. Pensionisiaqartoq napparsimmavimmi imaluunniit Namminersornerullutik Oqartussat ulloq unnuarlu paaqqinniffiutaasa ilaanni tigummineqarpat paaqqinniffinni taamaattuni pensionit tunniunneqartarnerat pillugu malittarisassat nalinginnaasut malinneqartassapput.

Imm. 2. Pensionisiat tigummineqalernerup kingunerisaanik allanngortinneqarpata pensionisiat aningaasartaasa 20%-ii tunniunneqartalissapput, tak. § 5.

Imm. 3. Meeqqanut tapinik tunniussisoqartarsimappat taakku allannguuteqartinnagit tunniunneqartaannassapput, tamaatuttaarlu pensionisiaqartoq pisariaqartitsinini tunngavigalugu naliliiffigineqareerluni inummut tapinik pisinnaatitaassalluni.

Imm. 4. Pensionisiaqartup iperagaanerata kingorna qaammatip tulliuttup aallaqqaataa aallarnerfigalugu pensionisiat isertitaqqortussuseq tunngavigalugu tamakkiisumik aaqqiissuteqarfigineqarsimasut tunniunneqartaleqqissapput.

§ 15. Pensionisianik tunniussisarnermi tunngavigineqartut allannguuteqarpata najugarineqartup tamanna kommunitut najugarivitaanut nalunaarutigissallugu pisussaaffigaa.

 

Kapitali 5.

Pensionisianut tapit

§ 16. Pensionisiaqartoq peqqussummi §§ 18 aamma 19 tunngavigalugit meeqqanut tapinik tunineqartalerpat tapit taakku qaammatikkaartumik tunniunneqartassapput, meeqqanut akilersuutit nalinginnaasut amerlaqataannik, taakkulu Inatsisartut Aningassanut Inatsisaatigut ukiumoortumik aalajangersarneqartarput. Pilersuisut marluullutik pensionisiaqartuuppata pensionisiallit tamarmik immikkut meeqqanut tapinik tunineqartassapput.

 

Imm. 2. Tapit taakku qaammammoortumik tunniunneqartassapput, pensionisiaqartoq meeqqanut akilersuutinik akiliisarnermigut meeqqamut pilersuisuunngippat. Pensionisiaqartoq meeqqamut akilersuutinik akilersuisussanngortitaasimappat meeqqamut tapit ukiup affakkaartumik tunniunneqartassapput, piffissaq akiliiffiusartussaq allatut isumaqatigiissutigineqarsimanngippat aalajangersarneqarsimanngippalluunniit. Akilersuutit piffissamut ukiup affaanit sivikinnerusumut sivisunerusumulluunniit akilerneqartarpata tapit taakku piffissamut tassunga tigusassatut tunniunneqartassapput.

Imm. 3. Meeraq pineqartoq pensionisiaqartumi najugaqanngippat, pensionisiaqartorlu meeqqamut akilersuutinik akilersuisussanngortinneqarsimappat aningaasat taakku meeqqamut akilersuutinik tigusisinnaatitaasumut tunniunneqartassapput. Inuit meeqqap pilersorneqarneranut akilersuutinik tigusisinnaatitaasut kisimik meeqqamut tapinik tigusitinneqarsinnaapput. Meeqqanut tapit meeqqamut toqqaannartumik tunniunneqarsinnaanngillat.

§ 17. Kommunalbestyrelsi pensionisiat aqunneqarnissaat, tapit tunniunneqartarnerat ilanngullugit, peqqussummi § 24 tunngavigalugu aalajangiisimaguni, meeqqanut tapit kommunimit aqunneqarnissaat tamatumunnga peqatigitillugu aalajangersinnaavaa, meeqqanut tapit meeqqanut akilersuutinik tigusisinnaatitaasumut tunniunneqartartussaanngippata.

§ 18. Pensionisiaqartoq meeqqanut tapinik tigusartagaqaruni meeqqap isertitaanut tunngasut kommunalbestyrelsimut nalunaarutigissallugit pisussaaffigaa. Meerarlu piffissami aalajangersimasumi meeqqanut tapit pingasoriaataasa amerlaqataannik taakkuluunniit sinnerlugit isertitaqartarsimappat, meeqqanut tapit peerneqassapput.

Imm. 2. Meeqqap isertitai, matumani ilinniagaqarnersiutai praktikkernersiutaaluunniit ilan-ngullugit eqqarsaatigalugit, pissutigalugit meeqqanut tapit tunniunneqartarunnaarsimappata taakku tunniunneqartaleqqissinnaapput, meeraq isertitaqartarunnaarsimasoq imaluunniit taakku meeqqamut tapit pingasoriaataat sinnerlugit amerlassuseqarunnaarsimasut pensionisiaqartup uppernarsarpagu.

Imm. 3. Meeraq angerlarsimaffimmi avataanut pisortanit inissinneqarsimasoq angerlartinneqarniariarpat meeqqanut tapit ingerlaannartumik tunniunneqaqqittalissapput.

Kapitali 6.

Inummut tapiutit

§ 19. Pensionisiaqartup aningaasartuutinut aalajangersimasunut ingerlaavartunut imaluunniit ataasiaannartumik aningaasartuutinut tamakkiisumik ilaannakortumilluunniit nammineq akiliisarnermigut aningaasaqarnikkut ajornartorsiulernissaa ulorianaateqarpat inuup taassuma pisariaqartitaanik naliliinikkut inummut tapit tunniunneqartarnissaat akuersissutigineqartassaaq.

 

§ 20. Inuk pensionisiaqalersinneqarpat pineqartup atugai ataatsimut isigalugit kommunalbe-styrelsip naliliiffigissavai, aningaasartuutinut aalajangersimasunut ingerlaavartunut matusissutissanik inummut tapiliisoqarnissaa pisariaqartinneqassanersoq paasiniarlugu. Taamatut naliliisoqartassaaq inummut tapinik qinnuteqaateqartoqanera qinnuteqaateqartoqannginneraluunniit apeqqutaatinnagu, taamaaliornikkullu pensionisiaqartup ulluinnarni pisariaqartitaminut manna tikillugu inuunnermi atugarisimasanut najukkamilu pissutsinut naapertuuttunut naleqquttunik aningaasaateqarnissaa qulakkeerniarlugu.

Imm. 2. Inummut tapit ingerlaavartumik tunniunneqartartut ineqarnermut akiliutinut aalaja-ngersimasunut atuinermullu aningaasartuutinut naleqquttumik amerlassuseqartunut matusissutaasartussatut sivisunerpaamik ukiumi ataatsimi akuersissutigineqarsinnaapput, tassa kiassarnermut, innaallagissamut, oqarasuaatip attartorneranut, sillimasiinernut, pisariaqarpat angallanneqarnernut pisariaqartunut, angerlarsimaffimmi ikiorteqarnermut il.il. aningaasartuutit eqqarsaatigalugit.

 

§ 21. Inummut tapit ataasiaannartumik ikiorsiissutitut ataasiaannartumik aningaasartuutinut matusissutissatut tamakkiisumik ilaannakortumilluunniit akuersissutigineqarsinnaapput, ass. isarussanut, atisanut, pequtinut, immikkut ittumik iluaqusersuutinut, inigisap pisariaqartumik iluarsaanneqarneranut, angalanermi aningaasartuutinut naleqquttumik amerlassusilinnut, ilisinermi aningaasartuutinut il.il. ikiorsiissutitut.

Imm. 2. Akiitsunut akiliutissanik inummut tapiliisoqarnissaa tunngaviusumik akuersissutigineqarsinnaanngilaq. Taamaattorli akiitsunut akiliutissanik inummut tapiliisoqarnissaa kommunalbestyrelsip akuersissutigissavaa, aningaasartuutinut ingerlaavartunut aalajangersimasunut akiitsut piffissami pensionisianik tunniussiviusarsimasumi akiliisinnaassuseqannginneq pissutigalugu pilersimappata.

Imm. 3. Ineqarnermut akiliutinut, atuinermut akiliutinut aalajangersimasunut il.il. akiitsut isumakkeertinniarneqassapput, imaluunniit pisortanit ikiorsiissutitut ikiorsiissutigineqassallutik, taakku pisortanit allatigut pilersorneqarnermut atatillugu pilersimappata.

Imm. 4. Akiitsut pilersimasut isumakkeertinniarneqarneranni pensionisiaqartoq kommunalbestyrelsip aamma ikiussavaa.

 

§ 22. Pissutsit pensionisiaqartup atugai allanngorsimasut paasiguniuk pensionisiaqartup inummut tapisitinneqarsinnaatitaanera pillugu apeqqut kommunalbestyrelsip naliliiffigeqqissavaa.

 

§ 23. Naak pensionisiaqartoq isertitaqqortussutsi pissutigalugu pisortanit pensionisianik tu-nineqartanngikkaluartoq inummut tapit akuersissutigineqarsinnaapput.

Imm. 2. Pensionisiaqartut isumaginninnermi ulloq unnuarlu paqqinniffinniittut pensionisiaqartut angerlarsimaffimminni najugaqartut inummut tapinik tunineqartarneranni tunaartarisassat assingi atorlugit inummut tapisitinneqarnissaminnut pisinnaatitaaffeqarput.

 

Kapitali 7.

Ilanngaassisarneq

§ 24. Pensionisiat amerlanaarlugit tunniunneqarsimasut kommunalbestyrelsip ilanngaassissutigisinnaavai, amerlanaaraluni tunniussineq pensionisiaqartup paasissutissanik erseqqissumik eqqunngitsunik tunniussaqarsimaneranik imaluunniit pensionisiaqartup inuttut aningaasaqarnikkulluunniit atukkamini allannguutinik annertuunik nalunaaruteqarsimannginneranik pissuteqarpat.

Imm. 2. Taamaattorli pensionit amerlanaarlugit tunniunneqartut ilanngaatigineqarnerat taamaallaat pisinnaavoq amerlanaarlugit tunniunneqartut annertusimappata, tassa annikinnerpaamik 10%-inik nikingatitsisimappata. Inummut tapit tamakkiisumik ilanngaatigineqarsinnaapput, paasissutissat eqqortut tunniunneqarnerisigut inummut tapit tunniunneqarnissaat itigartitsissutigineqarsimasussaasuuppata.

§ 25. Pensionisiaqartoq aappaqarsimagunilu aappanilu pensionisiat saniatigut isertitaqanngippata pensionit aningaasartaannit akileraarutit ilanngaatigereerlugit qaammammoortumik tunniunneqartartunit annerpaamik 10%-it qaammammut ilanngaatigineqarsinnaapput. Kisianni pensionisiaqartoq aappaqarsimagunilu aappanilu pensionisiat saniatigut allanik isertitaqartarpata pensionit aningaasartaannit akileraarutit ilanngaatigereerlugit qaammammoortumik tunniunneqartartunit annerpaamik 15%-it qaammammut ilanngaatigineqarsinnaapput.

 

Kapitali 8.

Nunat Avannarliit pensionisiaritittagaat

§ 26. Isumaginninnermi isumannaallisaaneq pillugu Nunat Avannarliit isumaqatigiissutaat 15. juni 1992-imeersoq malillugu pensionisiaritinneqartartut Isumaginninnermut Pisortaqarfimmit pensionisiaqartumut toqqaannartumik tunniunneqartassapput, Kalaallit Nunaanni akileraaruteqaataasussat ilanngaatigereerlugit.

Imm. 2. Isertitaqqortussuseq tunngavigalugu aaqqiissuteqartarneq kapitali 3-mi malittarisassat atuuttut malillugit pisassaaq, taamatuttaarlu ilanngaassisoqassappat kapitali 6-imi malittarisassat atuuttut malillugit ilanngaassisoqarsinnaalluni.

 

 

Kapitali 9.

Ilassutitut tunniunneqartartut

§ 27. Uku ilassutitut immikkut tunniunneqartartunik tunineqartassapput:

Inuit aatsaat 65-inik ukioqalernermik kingorna utoqqalinersiaqalernissaminnik qinnuteqaateqarsimanertik pissutigalugu 1975-imi apriilip aallaqqaataanit tunngaviusumik aningaasartanik amerlisanik pisalersimasut, imaluunniit

inuit 1975-imi apriilip aallaqqaataani 60-inik ukioqalereersimasut, aatsaallu 65-inik ukioqalernermik kingorna utoqqalinersiaqalernissaminnik qinnuteqaateqarsimasut.

 

§ 28. Ilassutitut tunniunneqartartut tunngaviusumik aningaasartatut amerlisatut isigineqarput.

Imm. 2. Ilassutitut tunniunneqartartut pisortanit pensionisianut ilanngullugit tunniunneqartassapput, massakkullu kisermaanut aappariinnulluunniit aappaanna ilassutitut tunniunneqartartunik pisinnaatitaasunut ukiumut kr. 8.760-iupput, qaammammut kr. 730-iullutik. Aappariinnut marluullutik ilassutitut tunniunneqartartunik pisinnaatitaasunut ilassutitut tunniunneqartartut ukiumut kr. 13.128-iupput, qaammammut kr. 1.094-iullutik.

 

Kapitali 10.

Atortuulersitsineq

§ 29. Nalunaarut manna ulloq 1. marts 2000 aallarnerfigalugu atortuulersinneqarpoq.

Imm. 2. Tamatumunnga peqatigitillugu pisortat ulloq unnuarlu inissiisarfimmiinnermi il.il. pensionit tunniunneqartarnerat pillugu Namminersornerullutik Oqartussat nalunaarutaat nr. 45, 21. december 1992-imeersoq aamma Isumaginninnikkut siusinaartumik pensionit, inummut tapiutit pensionillu akiligassanut ilanngarneqartarnerat pillugu Namminersornerullutik Oqartussat nalunaarutaat nr. 34, 22. december 1997-imeersoq atorunnaarsinneqarput.

 

 

Namminersornerullutik Oqartussat, ulloq 10. januar 2000

 

Jørgen Wæver Johansen   /   Gunnar Vinge Hansen

 

HOME