Atuarfinni atuanngiffeqarnissat pillugit Namminersornerullutik Oqartussat nalunaarutaat nr. 19, 26. november 1999-imeersoq.

Meeqqat atuarfiat pillugu Inatsisartut peqqussutaanni nr. 1-imi, 6. juni 1997-imeersumi § 17 tunngavigalugu makku aalajangersarneqarput:

 

Atuanngiffeqarnissat

§ 1. Ukioq atuarfiusoq 1. august aallartissaaq, ullullu atuarfiusussat 200 - 240-nik amerlassuseqassallutik sapaatip akunnerata ulluinut siullernut tallimanut imaluunniit ulluinut arfinilinnut tamanut agguarsimasut. Atuartitsineq nalinginnaasumik sap. akunnerini 40-ni ingerlanneqartassaaq. Atuartitsineq ingerlanneqarsinnaavoq sap. akunnerini ikinnerusuni, ikinnerpaamilli sap. ak. 36-ni. Atuartitsineq sap. ak. 40-nit ikinnerusuni ingerlanneqassappat, ullut atuarfiusut sap. akunnerata ulluinut arfinilinnut tamanut agguarsimassapput.
Imm. 2. Atuartut aasakkut atuanngiffiat minnerpaamik sap. akunnerinik arfineq marlunnik malittuinnarnik sivisussuseqarpoq, inissinneqartassallunilu juunip aallaqqaataata aggustillu 31-ata akornannut.
Imm. 3. Aasakkut atuanngiffiup aallartiffissaa pisortaqarfiup aalajangersinnaavaa.
Imm. 4. Sapaatit tamarmik saniatigut ullut makku pinngitsoorani atuanngiffiusarput:
1. Juulliaraq.
2. Juullip ullua.
3. Juullip aappaa.
Ukiutoqaq.
Ukiortaaq.
Sisamanngorneq illernartoq.
Tallimanngorneq tannaartoq.
Poorskip aappaa.
Tussiarfissuaq.
Qilaliarfik.
Piinsip aappaa.
Namminersornerulernerup eqqunneqarnerata ullua 1. maj.
Inuiattut Ullorsiorfik, 21. juni.
Imm. 5. Kunngit pingasut ulluanni, januarip ulluisa arfernanni, atuarfiit matusarsinnaapput nal. 12, ullorlu ullortut atuarfiusutut naatsorsuunneqartassaaq.
Imm. 6. Najukkami pissutsit pissutigalugit atuanngiffiup ullullu atuanngiffissarititaasut qanoq inisisinneqartarnissaannut tunngasut pisariaqartitsineq naapertorlugu isummerfiginiartariaqartassapput.
Imm. 7. Najukkami ullut atuanngiffissat aalajangersarneqarneranni ullut naggataarutaasumik misiliiffissat nalerornaveersaarneqartassapput.
Imm. 8. Atuarfiit ullut atuanngiffissat pillugit pilersaarusiatik ukiut tamaasa pisortaqarfimmut ilisimatitsissutitut nassiuttassavaat.

 

Atortuulersitsinermik aalajangersakkat

§ 2. Nalunaarut atulerpoq 1. august 1999.
Imm. 2. Peqatigitillugu Atuarfinni ukioqatigiinnut agguataariffiusuni aamma ukioqatigiinnut agguataariffiunngitsuni ileqquusumik atuartitsisarnissamut pilersaarutit il. il. pillugit Namminersornerullutik Oqartussat nalunaarutaat nr. 21, 17. maj 1994-imeersoq atorunnaarpoq.

Namminersornerullutik Oqartussat, ulloq 26. november 1999

Lise Lennert

/

Karl Kristian Olsen