Namminersornerullutik Oqartussat kommunini il.il. suliassaqarfiutaasa kukkunersiorneqartarnerat pillugu Namminersornerullutik Oqartussat nalunaarutaat nr. 14, 23. August 1999-imeersoq.
Kommunalbestyrelsit, nunaqarfinni aqutsisut il.il. pillugit Inatsisartut inatsisaanni nr. 20-mi 3. november 1994-imeersumi Inatsisartut inatsisaatigut nr. 6-ikkut 12. juni 1995-imeersukkut allanngortinneqartumi § 48 tunngavigalugu kommunit naatsorsuutaanni Namminersornerullutik Oqartussat kontuisa kukkunersiorneqartarnerat pillugu makku aalajangersarneqarput:
§ 1. Kukkunersiuinermi aningaasartuutit isertitallu kommunip utertitatut tapiissutitullu Namminersornerullutik Oqartussanit tigusartagai imaluunniit kommunip Namminersornerullutillu Oqartussallu akornanni akileeqatigiissutigineqartartut allat tamarmik kukkunersiuinermi ilaatinneqarput.
§ 2. Naatsorsuutit pissusiviusunik ilumut takutitsisuunerat, aningaasanik ingerlaartsitsinerit naatsorsuutinik saqqummiussinermi ilaatinneqartut aningaasaliissutinut, inatsisinut maleruaqqusanullu allanut ilumut naapertuuttuunersut kukkunersiuinermi paasiniarneqartassaaq, matumani Namminersornerullutik Oqartussat kontulersuinermut ilitsersuutaasa kiisalu isumaqatigiissutaasimasut nalinginnaasumillu periusaasartut ilumut malinneqarnerisa paasiniarneqarnerat ilanngullugu eqqarsaatigalugu.
Imm. 2. Ukiup ingerlanerani kukkunersiuinermut atatillugu angalanerni kommunip suleriaasii, kommunip iluani nakkutilliineq suliassaqarfinnilu susassaqarfiusuni sulianik ingerlatsineq kukkunersiuisut misissuiffigisassavaat, matumani qarasaasianik ingerlatseriaatsit atorneqartut ilumut toqqissisimanartuunersut misissorneqarnerat ilanngullugu eqqarsaatigalugu.§ 3. Namminersornerullutik Oqartussat eqqarsaatigalugit akiliisitsiniarnerit akiliisarnerilluunniit kommunit nalunaarsuutaannut utertitsinermiluunniit qanoq amerlatigisut akilerneqartarnissaannik aalajangersakkanut isumaqatigiissutaasunulluunniit ilumut naapertuuttuunersut kukkunersuisut misissortassavaat. Aammattaaq Namminersornerullutik Oqartussanut ilumut ingerlaavartumik akiliisitsiniartoqarlunilu akiliisoqartarsimanera kukkunersuisut misissortassavaat, matumani periutsit eqqortumik piffissakkaanut agguataarinermik qulakkeerisut ilumut pilersinneqarsimanerat ilanngullugu eqqarsaatigalugu.
§ 4. Suliassaqarfinni Namminersornerullutik Oqartussat kontuini inuit ataasiakkaat aqqi atorlugit naatsorsuusiorfiusuni, imaluunniit utertitsissutit, tapiissutit allatigulluunniit akiliutit inuit aqqi tunngavigalugit kommunit naatsorsuutaannut allattorneqarfiini kukkunersiuineq inuit ataasiakkaat pillugit suliassat naleqquttumik amerlassusillit tigulaariffigalugit kukkunersiorneqartarnerisigut ingerlanneqartassaaq.
Imm. 2. Imm. 1 tunngavigalugu kukkunersiugassanik tigulaarinermi inuit ataasiakkaat pillugit suliassat nutaat aalajangersimasunik amerlasasusilinnik naliliinikkulluunniit amerlassusilikkanik pisartagaqalersivisusimasut immikkut pingaartillugit isiginiarneqartassapput. Aammattaaq tigulaariffigisassanik immikkoortitsinermi pingaaruteqarnersiuineq aallaavigineqartassaaq, tassanilu pissutsit aningaasaqarnermut, suliassanik suliarinninnermut, aalajangiinerni pingaaruteqartutut tunngaviusut najukkaniluunniit pissutsinut tunngassuteqartut aallaavigineqartunut ilaatinneqarsinnaallutik.
Imm. 3. Suliassaqarfiit innuttaasut aningaasaqarnerannik tunngaveqarpata suliassap pilersinneqarnerani pisariaqarneralu naapertorlugu suliassap malinnaavigineqarnerani paasissutissat aningaasaqarnermut tunngasut oqartussanit allanit ilumut pissarsiariniarneqartarsimanersut kukkunersiuisut misissortassavaat.
Imm. 4. Suliassat suliarineqarnernerini oqartussat aalajangiisussaatitaasut naammagittaalliuuteqartarfiillu tunngaviusumik aalajangigaat isiginiarneqartarsimanersut kukkunersiuisut misissortassavaat.
Imm. 5. Akiliisitsiniarneq pillugu suliassani tamanna pillugu inatsisit aqutsinermulu allaffissornikkut maleruaqqusat malillugit ilumut akiliisitsiniartoqartarsimanersoq kukkunersiuisut misissortassavaat. Tamatumunnga atatillugu pisassarisanik akilersinniarneqarsinnaajunnaarsimasunik kommunip annaasatut isumakkeerinerani maleruaqqusat atorneqarsimasut kukkuneriuisut naliliiffigisassavaat.§ 5. Namminersornerullutik Oqartussat suliassaqarfiutaanni ukiumoortumik naatsorsuutinik nassiussisoqartarnissaanik aalajangersaaviususimasuni naatsorsuutit taakku ilumut kukkunersiorneqarsimanerat kukkunersiuinerullu kukkunersiuinermi pitsaasumik ileqqulersornissaq naapertorlugu ingerlanneqarsimanera pillugit kukkunersiuisut oqaaseqaataannik ilaqartinneqartassapput.
§ 6. Kukkunersiuisut oqarpata aningaasat utertillugit akiligassanngorlugit kukkusumik nalunaarutigineqarsimasut, amerlavallaanik tapiissuteqartoqarsimasoq imaluunniit kukkusumik akiliisitsisoqarsimasoq, aningaasani kingusinnerusukkut utertillugit akiliutigineqartussatut nalunaarutigineqartut tapiissutitut allatulluunniit akiliutitut ilumut tunniunneqarsimanissaat kukkunersiuisut misissortassavaat.
§ 7. Kommunip naatsorsuutaanik allanik kukkunersiuineq pillugu nalunaarutip saqqummiunneqarneranut atatillugu kingusinnerpaamillu tamatumunnga peqatigitillugu nalunaarut manna tunngavigalugu kukkunersiuineq pillugu immikkut nalunaarusiaq saqqummiunneqartassaaq.
Imm. 2. Nalunaarummi tassani kukkunersiuineq ingerlanneqarsimasoq pissutsillu oqaaseqaateqarsimanermut pissutaasutut pingaaruteqartut aamma nassuiaammi ilanngunneqartassapput. Pissutsit tunngaviusumik aningaasaqarnermulluunniit pingaaruteqartut kukkunersiuisut immikkut oqaatigineqartariaqartutut pissutissaqartitaat nassuiarneqartassapput, matumani malittarisassat atuuttut qanoq paasineqarnissaannik nassuiaaniarnermi nalornisooruteqarfiusut ilanngullugit eqqarsaatigalugit.
Imm. 3. Nalunaarummi tassani § 4 tunngavigalugu tigulaaraluni misissuinerup annertussusia misissuinermilu paasisat nassuiarneqartassapput.
Imm. 4. Nalunaarut taanna kukkunersiuinerup kukkunersiuinermi ileqqorissaarnissaq naapertorlugu ilumut ingerlanneqarsimanera pillugu kukkunersiuisut oqaaseqaataannik ilaqartinneqartassaaq.§ 8. Nalunaarut § 7-imi taaneqartoq kukkunersiuisut oqaaseqaataannut pisariaqarpat akissutinik ilaqartillugu kommunalbestyrelsip Namminersornerullutik Oqartussani Qitiusumik Naatsorsuuserisoqarfimmut nassiutissavaa. Atortussat taakku kalaallisuui danskisuuilu tamaasa immikkut marlunngorlugit nassiunneqartassapput. Tamatumunnga peqatigitillugu kukkunersiuisut oqaaseqaataannut akissuteqaateqartoqassappat akissuteqaatit kukkunersiuisunut nassiunneqassapput. Atortussat taakku kommunip naatsorsuutasa kukkunersiorneqarnerat pillugu nalunaarutip il.il. Kommunit Nakkutilliisoqarfiannut nassiunneqarneranut atatillugu kingusinnerpaamillu tamatumunnga peqatigitillugu nassiunneqartassapput.
Imm. 2. Kukkunersiuineq pillugu nalunaarutit Namminersornerullutik Oqartussanit misissorneqartassapput isummerfigineqartassallutillu. Tamatuma kingorna apeqqutit utertitsilluni akiliinermut, tapiissutinut akiliutinulluunniit allanut pingaaruteqartut kiisalu misissuineq tunngavigalugu ilitsersuusiarineqarsimasumut tunngasut Namminersorlutik Oqartussat apeqqutigissavaat.§ 9. Nalunaarut manna tamanut ilisimatitsissutigineqarnermini 1. januar 1999 aallarnerfigalugu atuutilerpoq.
Namminersornerullutik Oqartussat, ulloq 23. August 1999.
Jonathan Motzfeldt/
Solja í Ólavsstovu